Genesis28
1तऽ इसहाक याकूब के बोलइलन आउर उनका आशीर्वाद देलन, ऊ उनका से ई कहलन: कनानियन के औरतियन में से कोई औरत से बियाह नऽ करिहऽ।2एकर बदले सीधा पद्दनराम अपन नाना बतूएल के घरे जा। अपन माय के भाई लाबान के बेटियन में से एगो से बियाह करेलागी कहऽ।3हम प्रार्थना करम कि सर्वशक्तिमान परमेश्वर तोरा आशीर्वाद देतन, आउर तोरा बड़ी मनी वंश पईदा करे के लायक बनइतन, जेकरा से ऊ अलगे-अलगे लोगवन के समाज बन जईतन। 4हम ई भी प्रार्थना करम कि ऊ तोरा आउर तोर वंशज के ऊ देश के अधिकारी बने में सच्छम बना के आशीर्वाद देतन जेकरा में तूँ अखनी एगो विदेसी के रूप में रह रहलऽ हे, ऊ जमीन जेकरा में परमेश्वर अब्राहम आउर उनकर वंशज के देवे के वादा कईलन हल।5येहिगुने इसहाक याकूब के रिबका के भाई बतूएल के बेटा लाबान भीर, जे अरामियन के समाज के हलन, रहे ला पद्दनराम भेजलन। ई ओही रिबका हल जे बाद में याकूब आउर एसाव के जलम देलन।6एसाव के पता चलल कि उनकर बाबू जी इसहाक याकूब के आशीर्वाद देलन हे, तऽ ऊ उनका पद्दनराम भेज देलन। उनका ई भी पता चलल कि जखनी उनकर बाबू जी याकूब के आशीर्वाद देलन हल, तऽ ऊ उनका से कहलन हल, “कनानियन में से कोई औरत से बियाह नऽ करिहऽ”7आउर याकूब अपन बाबू जी आउर माय के आज्ञा मानलन हल, आउर पद्दनराम चल गेलन हल।8एसाव ई भी जान गेलन कि उनकर पिता इसहाक कनान लोग के औरतियन के पसंद नऽ करऽ हलन।9ओकर कारण, एसाव अपन रिश्तेदार इश्माएल से मिले गेलन आउर इस्माएल के बेटी महलत से बियाह कईलन। महलत नबायोत के बहिन आउर अब्राहम के पोती हल। 10एकरा में याकूब बेर्शेबा से निकल के हारान दने जाय लगलन। 11जखनी ऊ एगो तय जगह पर पहुँचलन, तऽ ऊ उहाँ रुक गेलन काहेकि सूरज डूब गेल हल। ऊ ऊहाँ से एगो पत्थल उठईलन आउर ओकरा तकिया के रूप में इस्तेमाल करे लागी अपन माथा के तरे धर लेलन। फिन ऊ उहाँ पड़ गेलन आउर सूत गेलन।12जखनी ऊ सुतल हलन, तऽ ऊ सपना देखलन, आउर ऊ एगो सीढ़ी देखलन। सीढ़ी के नीचे के हिस्सा धरती पर हल आउर उपरका छोर आसमान में हल। याकूब ई भी देखलन कि परमेश्वर के दूत सीढ़ी से ऊपरे नीचे आ-जा रहलन हल।13तऽ यहोवा के सीढ़ी के उपरका छोर पर खड़ा देखलन, आउर कहलन, “हम यहोवा परमेश्वर ही, जिनकर आराधना तोर दादा अब्राहम कईलन हल, आउर जिनकर आराधना इसहाक कईलन हल। हम तोर आउर तोर वंश के ऊ जमीन देम जेकरा पर तूँ सुतल हऽ। 14तोर वंश के लोग धरती पर धूरी के कण के जईसन अनगिनती होतन, आउर उनकर जगह बड़ी बड़का गो होत। एकर फैलावऽ चारो पट्टी होत, पूरुब आउर पच्छिम, उत्तर आउर दक्षिण पट्टी। हम तोर आउर तोर वंसवन के जरिये धरती पर सभे कुल-खनदान आउर लोगवन के समाज के आशीर्वाद देम।15जहाँ कहूँ तूँ जइबऽ ऊहाँ हम तोर मदत करम, आउर तोरा रक्षा करम, आउर तोरा ई देश में लौटा ले आयेम। हम तोरा नऽ छोड़म; हम तोरा लागी ऊ सभे करम जे हम करे के वादा कईली हे।” 16रात के जखनी याकूब सूत के उठलन, तऽ ऊ सोंचलन, सच में यहोवा ई जगह में हथन, आउर अखनी ला हम ई बात से अनजान हली।17ऊ डेरा गेलन, आउर ऊ कहलन, "ई जगह डेरावना हे! ई सच में ऊ जगह हे जहाँ परमेश्वर रहऽ हथन, आउर ई स्वर्ग में घूँसे वाला दुआरी हे!"18दूसरा दिन भोर के याकूब उठलन, आउर जौन पत्थल ऊ अपन माथा के तरे धईले हलन, ओकरा उठा के ऊ जगह पर चिन्हासी लगावे ला जहाँ परमेश्वर उनका दर्शन देलन हल, खड़ा कईलन। ऊ पत्थल के परमेश्वर लागी अलगे करे लागी तनी सा जैतून के तेल डाललन।19ऊ ऊ जगह के नाम बेतेल रखलन, जेकर माने कि “परमेश्वर के घर हे”। पहिले एकर नाम लूज हल। 20याकूब सोच समझ के परमेश्वर से मन्नत कर के कहलन, “जदि तूँ हमर मदत करबऽ, आउर जहिया ला हम ई यात्रा पर चलम, तूँ हमर रक्षा करबऽ, आउर हमरा खाय लागी भर पेट खाना, आउर पेहेने लागी कपड़ा देवऽ,21जेकरा से कि हम बाद में अपन बाबू जी के घर में सुरक्षित लौट सकम, तऽ हे यहोवा, तूँ ऊ परमेश्वर होवऽ जिनकर हम आराधना करम।22ई पत्थल जे हम खड़ा कईली हे, ऊ जगह परमेश्वर के भवन ठहरत। आउर जे कुछ तूँ हमरा देवऽ ओकर दसमां हिस्सा हम तोर दे देम।”
Bridge Connectivity Solutions Pvt. Ltd.