Exodus5
1जखनी मूसा आउर हारून राजा भीर गेलन। ऊ उनका से कहलन, “यहोवा नाम के परमेश्वर हथन, जिनकर हमनी इस्राएली आराधना करऽ ही; तोहनी से ई कहऽ हथन, कि हमर लोग के जंगल में जाय दऽ। ताकि परमेश्वर यहोवा के जंगल में आराधना कर सकतन!'”2बाकि राजा उत्तर देलन, “यहोवा कौन हथन? उनका बारे में हम कहियो नऽ सुनली हे, तऽ हम उनकर बात काहे मानम?, येहिगुने हम आज्ञा नऽ देम!'”3मूसा आउर हारून जबाब देलन, “जौन परमेश्वर के हमनी यहूदी उपासना करऽ ही ऊ हमनी से खास तरह से भेंट कईलन हे, हमनी के कुछ दिन ला जंगल में कोई तीन दिन ला यात्रा पर जाय ला अनुमति दे दऽ, जेकरा से हम उहाँ अपन परमेश्वर यहोवा के बलिदान चढ़ा सकम, जदि हमनी अईसन काम नऽ करम, तऽ ऊ हमनी के बेमरियन से आउर हमनी के दुश्मन के हमला से मरवा देतन।”4बाकि मिस्र के राजा ओकरा से कहलन, “हे मूसा आउर हे हारून, इस्राएलियन के ओकर काम से अलग करे ला तोहनी के बेकार हे। तोहनी सभे काम पर फिरू से लौट आवऽ।”5तब फिरौन आगे कहलन, “देखऽ, मिस्र में इस्राएली एतना जादे हथन कि तूँ ओखनी के काम करे ला बंद करे लागी बहका सकलऽ हे।”6ओही दिन राजा मिस्र के ऊ काम करावे वाला के, जे ऊ लोग के ऊपर हलन आउर ओकर इस्राएली सरदार के आज्ञा देलन,7“इस्राएलियन के ईंटवन बनावे ला भूसा देवे ला बंद करऽ। अखनी से, ओखनी के ई खुद ही लावे ला होत।8तईयो ओकरा से ओतना ही ईंटा पारे ला मजबूर करे पड़त जेतना ऊ पहले ईंटा पारऽ हलन, ईंटा गिनती में कमी नऽ होवे के चाही, ऊ काम नऽ करे ला चाहऽ हथन येहिगुने ऊ हमरा से विनती कर रहलन हे कि ओखनी के अपन परमेश्वर के आराधना करे ला जंगल में जाय देऊँ।9लोगवन से आउर जादे कड़ा काम करावऽ जेकरा से कि ऊ ओकरा में मेहनत करतन आउर अपन अगुवन से झूठ सुने ला बेचैन नऽ होतन!”10तऽ दास लोग के अगुवा आउर इस्राएली सरदार उहाँ गेलन जहाँ इस्राएलियन हलन, आउर उनका से कहे लगल, “राजा कहलन हे कि ऊ अखनी तोरा भूसा नऽ देतन।11येहिगुने तोहनी जा के जहाँ कहीं भूसा मिलत उहाँ से ले आवऽ बाकि तोहनी के ओतना ही ईंटा के गिनती में पारे ला हे उतने काम करे के चाही।”12येहिगुने, इस्राएलियन सभे मिस्र में इधर उधर हो गेलन कि बचल अनाज के डंठल भूसा ला बटोरतन।13जहाँ तक दास के मालिक के बात हे, ऊ ई कह के ओखनी के सता रहलन हल, “जेतना काम हम तोरा देली हे, ऊ सभे रोजदिन करऽ। ओतने ईंटवन पारे ला हे जेतना तोहनी पहिले पारलऽ हल, जहिया हम तोहनी के भूसा दे हली!”14जखनी ऊ लोग ओतना ईंटा नऽ बनईलन तऽ राजा के गुलाम के सरदार ऊ मालिक के पकड़ के पिटलन जिनका इस्राएलियन पर अधिकार देलन हल। ऊ ओखनी से कहलन, “अईसन येहिगुने हल काहेकि तोर काम करे वाला पिछला कुछ दिन में ओतना जादे ईंटा नऽ पार सकलन हल, जेतना ऊ पहले पारऽ हलन।”15तऽ इस्राएली के सरदार महल में गेलन, आउर राजा से शिकायत कईलन, “तूँ हमनी से अईसन बर्ताव काहे करऽ हऽ?16तोर दास के सरदार हमनी के ईंटा पारे ला भूसा नऽ दे हथन ओकर बदले हमनी से कहऽ हथन, नऽ ओतने तूँ ईंटा पारऽ, ऊ हमनी के पीट भी रहलन हे बाकि हमनी के भीर ईंटा बनावे ला उनकरे गलती हे।”17बाकि राजा कहलन, “तोहनी आलसी हऽ येही चलते काम करे ला नऽ चाहऽ हऽ! येहिगुने तोहनी कहते रहऽ हऽ, हमनी के यहोवा के आराधना करे ला जंगल में जाय दऽ।18अखनिये काम करे ला वापस आ जा! हम तोरा भूसा नऽ देवो, बाकि तोहनी के ओतना ही संख्या में ईंटा पारते रहे पड़त!”19जखनी राजा कहलन, “तोरा रोजदिन नजदीक ईंटा बनावे के नऽ हे” तऽ इस्राएली सरदार समझ गेलन कि उनकर जीवन केतना संकट में हे।20जखनी ऊ राजा के सभा से निकसलन, तऽ उनका भेंट हारून आउर मूसा से होल, जे उनकर इनतेजार कर रहलन हल।21ऊ हारून आउर मूसा से कहलन, “हमरा उमीद हे कि यहोवा ई बात पर ध्यान देतन कि तोहनी राजा आउर उनकर हाकिम के हमरा से दुश्मनी करवईलऽ हे। हमरा उमीद हे कि ऊ तोहनी दूनो के सजा देतन! तोहनी उनका ई सोचे ला मजबूर कर देलऽ हे कि उनका हमनी के मार देवे के चाही!”22मूसा ओखनी के छोड़ देलन, आउर यहोवा से फिरू प्रार्थना कईलन, “हे हमनी के प्रभु, तूँ अपन प्रजा पर अईसन बुरा काम काहे कईल हे? तूँ हमरा उनकर मदत करे ला भेजलऽ हे, उनका चोट पहुँचावे ला नऽ।23जहिया से हम राजा भीर गेली आउर उनका ई सभे बात बतईली जे तूँ हमरा से कहलऽ हल, तहिया से ऊ तोर प्रजा के साथे बहुत बुरा बर्ताब कर रहलन हे, आउर तूँ उनकर सहायता ला कुछ नऽ कईलऽ!'”
Bridge Connectivity Solutions Pvt. Ltd.