Exodus21
1जे व्यवस्था तोहनी इस्राएली जाति ला ठहरावल जायेत ऊ ई हे:2जखनी तूँ इब्री गुलाम के मोल लिहऽ तऽ ऊ छौ बरस तक सेवा करतन। सतमा बरस में तोरा ओकरा अपन गुलामी से छोड़ देवे के चाही आउर ओकरा आजाद कर देवे के होत आउर ओकरा से कुछ भुगतान नऽ लेवे के चाही।3जदि ऊ अकेले तोर गुलाम हो गेलन हे, तऽ तूँ ओकरा अकेले ही छोड़ देवे के चाही, जखनी ओकर मेहरारू हे तऽ ओकर मालिक ओकरा आउर ओकर मेहरारू दूनो के छोड़ देवे के चाही।4जे कोई गुलाम के मालिक ओकरा अपन मेहरारू देतन आउर ऊ बेटा आउर बेटी के जलम दे हे, जबकि ओकर मरद सेवक हे, तऽ खाली ओही आदमी के आजाद करे ला होत। जबकि ओकर मेहरारू आउर बच्चा अपन मालिक के गुलाम बनल रहतन।5बाकि जखनी तोरा दास के छोड़े के घड़ी आ जायेत, आउर ऊ साफ कहऽ देतन, कि हम अपन मालिक आउर औरत आउर बेटवन से प्रेम रख ही, आउर हम आजाद होवे ला नऽ चाहऽ ही।6तऽ ओकर मालिक ओकरा ऊ जगह पर ले जाय। ऊ जगह पर जहाँ ऊ देऊता के आराधना करऽ हलन उहाँ ऊ गुलाम के दुआरी चाहे चौखट के सामने खड़ा करे के चाही, तऽ मालिक गुलाम के कान में छेद करे ला सुआ के इस्तेमाल करिहऽ आउर ऊ जिन्दगी भर अपन मालिक के गुलाम रहतन।7जदि कोई अपन बेटी के गुलाम होवे ला बेंचतन, तऽ ऊ गुलामन के तरह आजाद नऽ होतन।8जदि ऊ मोल लेवे वाला आदमी ओकरा अपन रखैल बनावल चाहतन, बाकि बाद में ऊ ओकरा से खुश नऽ होतन तऽ ओकरा ओकर बाप के हाथ वापस बेंच देवे के चाही। ओकरा कोई विदेशी के नऽ बेंचे के चाही काहेकि ऊ आउर लड़की के बाप के ई पर आज्ञा नऽ हल।9आउर जदि मोल लेवे वाला चाहे ऊ ओकर बेटा के मेहरारू होवत, ऊ ओकरा साथे अईसन व्यवहार करतन मानऽ कि ऊ ओकर बेटी हे।10जदि मालिक कोई दूसरा औरत से वियाह करे तऽ ऊ पहिलका औरत के ओतना ही खाय ला, कपड़ा, यौन धियान देते रहतन जेतना ऊ पहिले दे हलन।11जदि ऊ ओकरा ला ई तीन काम नऽ करतन तऽ ओकरा दासी होवे से छोड़ावे, आउर आजाद होवे ला ओकरा से कुछ भी दाम नऽ लेवल जाय।12जदि कोई आदमी के जान से मारे, आउर ऊ मर जाय, तऽ जरुर ऊ हत्यारा के मार डाले के चाही।13बाकि जदि ऊ हत्या करे के योजना नऽ बनईलन हल, आउर जदि परमेश्वर अईसन होवे देलन हे, जौन ओकरा मार के हे ऊ जगह पर भाग सकल हे जे हम ओकरा लागी चुनम आउर ऊ उहाँ सुरक्षित रहतन।14बाकि जदि कोई केकरो दूसरका आदमी पर गोस्सा होवे आउर जान बुझ के ओकरा मार देवे, तऽ तोरा ऊ हत्यारा के मार देवे के चाही, चाहे ऊ परमेश्वर के वेदी के भीर काहे नऽ लौट जायेत।15जे कोई अपन माय आउर बाप के मारे, तोरा ओकरा मार डाले के चाही।16तोरा ऊ आदमी के मार देवे के चाही जे दूसरा कोई आदमी के अपहरण करऽ हथन। चाहे ऊ आदमी के बेंच देलन हे चाहे तूँ ऊ बेंचेवाला के साथे पावल गेलऽ हे।17जे कोई अपन बाप आउर माय के श्राप देतन चाहे अपमान करतन, ओकरा मार देवे के चाही।18मान लऽ कि दूगो आदमी लड़ते हथन, आउर एगो दूसरा के पत्थल चाहे मुक्का से मारऽ हे, मान लऽ कि जे आदमी पर ऊ हमला करऽ हे ऊ मर नऽ जा हे, लेकिन घायल हो जा हे आउर ओकरा कुछ समय ला बिछौना पर पड़ल रहऽ हे।19बाकि बाद में ऊ लाठी के इस्तेमाल कर के चले में ठीक हो जा हे। तब ओकरा ऊ आदमी दंड नऽ देवे के चाही जौन ओकरा मरलक हल, बजाय एकर कि ऊ घायल आदमी के ऊ धन देवे पड़त जे ऊ ठीक होवे तक नऽ कमा सकल हल आउर साथे ही इलाईज करावे ला खरचा देवे पड़त।20जदि कोई अपन दास चाहे दासी के लाठी से मारे, आउर दास ऊ मारे से मर जाय, तऽ ऊ दास के मौत के बदला लेवे ला हे।21बाकि जदि सेवक थोड़ा दिन के बाद बढ़ियाँ हो जाय, तऽ मारे वाला के सजा नऽ दिहऽ, काहेकि दास पर ओकर अपन हक हे।22जदि कोई आदमी लड़ाई लड़ रहल हे, आउर कोई गर्भवती के अईसन मारलन कि ओकर गर्भ गिर जाय, बाकि ओकर आउर ओकर बच्चा के कोई हानि नऽ होवे, तऽ जे कोई ओकरा मारे ओकरा कोई सजा नऽ देवल जाय। न्यायाधीश से जुलमाना के मंजूरी के बाद औरत के पति जे कुछ माँगतन, ऊ ओकरा चुकावे पड़त।23बाकि जदि ऊ कोई के हानि पहुँचईलन हे तऽ तूँ ओकरा ओईसहीं हानि पहुँचा के सजा देवे के चाही, जदि ऊ कोई के मार देवे तऽ तूँ ओकरा जरुर मार दिहऽ।24ओईसहीं, जदि ऊ कोई के आँख, दाँत, हाथ, चाहे पैर के हानि पहुँचईलन हे,25चाहे जलन चाहे घाव चाहे खरोच के कारण बनल हे तोरा भी ओईसहीं चोट पहुँचावे के चाही।26जदि कोई दास के स्वामी अपन दास चाहे दासी के आँख पर अईसन मारलन कि आँख से आंधर हो गेल तऽ ऊ दास के आँख के साथे जे कईलन हे ओकरा चलते ऊ ऊ दास के आजाद कर देवे।27जदि कोई अपन दास के एगो दाँत तोड़ देतन, तऽ ऊ दास दाँत के साथे जे कईलक ओकरा ऊ दास के आजाद कर देतन।28जदि बैल कोई मरद चाहे औरत के अईसन मारे कि ऊ मर गेल, तऽ ऊ बैल के पत्थर मार के मार देवे के चाही, पर ओकरा खाय के नऽ हे, बैल के मालिक दोषी नऽ ठहरे के चाही। 29बाकि जदि बैल पहिलहुँ केतना बार हमला कईलक हे आउर जदि लोगवन ओकर मालिक के ई बारे में बतईलन हे, बाकि ऊ बैल के बाड़ा के भीतर नऽ रखलन हे, आउर ऊ कोई आदमी चाहे औरत के जानऽ से मार दे हे तऽ ओकरा पर पत्थल फेंक के मार देवे के चाही आउर ओकर मालिकवन के भी मार देवे के चाही।30जदि मरल के परिवार एकर बदले मुआवजा के मांग करे ला चाहऽ हे तऽ अपन जानऽ बचावे ला ओकरा ओकर मांग के राशि के भुगतान करे पड़त।31जदि केकरो बैल केकरो बेटवन चाहे बेटियन पर हमला कर के ओकरा घायल कर दे हे, तऽ ऊ बैल के मालिक के साथे ओही नियम के जईसन व्यवहार करे के हे।32जदि कोई बैल कोई दास चाहे दासी पर चढाई कर के ओकरा घायल कर देत तऽ ओकर मालिक के दास के मालिक के 342 ग्राम चाँदी के सिक्का देवे के चाही आउर बैल पर पत्थर फेंक के बैल के मार देवे के चाही। 33मान लऽ कि कोई पानी जमा करे ला कोई गड़हा खोदऽ हे चाहे खोदवावऽ हे आउर ओकरा नऽ ढँक हे, जदि कोई के बैल चाहे गधा ओकरा में गिर के मर जाय,34तऽ गड़हा के शासक ऊ जानवर के मालिक के जानवर के दाम के अनुसार धन देवे के चाही बाकि मरल जानवर के मालिक ओही होतन।35जदि कोई के बैल दूसरा आदमी के बैल के अईसन चोट पहुँचईलन कि ऊ मर गेल, तऽ दूनो बैलवन के मालिक के ऊ जिन्दा बैल के बेंच देवे के चाही आउर ओकर बदले में जे धन मिले ओकरा आपस में बाँट लेवे के चाही, ओखनी के ऊ जानवर के मांस भी बाँट लेवे के चाही जे मर गेल हे।36तईयो जदि शासक जानऽ हलन कि पहिलही से दूसरा जानवर पर हमला कर हल आउर ऊ ओकरा रक्षा नऽ करतन, तऽ ऊ बैल के मालिक के मारे वाला बैल के एगो जिन्दा बैल देवे पड़त, बाकि तब ऊ मरल जानवर मालिक के होत।
Bridge Connectivity Solutions Pvt. Ltd.