Deuteronomy3
1तब हमनी मुड़ के बाशान के राह से चढ़ गेली। बाशान के राजा ओग, अपन सऊँसे प्रजा सहित एद्रेई में लड़े ला अईलन, आउर हमरा पर हमला कईलन।2यहोवा हमरा से कहलन, ओकरा से मत डरऽ; काहेकि हम तोरा ओकरा पर जयवन्त कर देली हे, आउर ओकर सऊँसे प्रजा आउर देश के तोर वश में कर देली हे। तूँ ओकरा साथे ओईसहीं करिहऽ जईसे तूँ एमोरी लोग के राजा सीहोन के साथे कईलऽ हल, जहाँ हेशबोन रहऽ हलन।3ई तरह से हमर परमेश्वर यहोवा हमरा बाशान के राजा ओग पर भी जीत दिलईलन, आउर ओकर समूचे प्रजा के हमर काबू में कर देवल गेल,4ऊ घड़ी हम ओकर सभे नगर ले लेली। ऊ सभे साठगो नगर में से एगो भी अईसन न हल जेकरा हम ओकरा से नऽ लेली हल अर्गोब के पूरा इलाका जे बाशान में ओग के राज्य के भी।5ई सभे नगर ऊँचा-ऊँचा शहरपनाह, आउर फाटक आउर बेड़ी से मजबूत हल; एकर अलावे बड़ी सा बिना दीवार वाला गाँव भी हल।6आउर जईसे हम हेशबोन के राजा सीहोन के कईली, ओईसहीं हम ओकरा भी बर्बाद कर देली, आउर का मरद, का औरत, का छोटकन लईकन, सभे नगरवन के बर्बाद कर देली।7बाकि सभे जनावर आउर नगरवन के हमनी अपना लागी लूट लेली।8एहिगुने ऊ घड़ी हम अर्नोन के तराई से लेके हेर्मोन पर्वत तक के देश एमोरियन के दुन्नो राजा के हाथ से जे यरदन नदी के पार हल छीन लेली।9हेर्मोन पर्वत के सीदोनी लोग सिर्योन कहऽ हथिन, आउर एमोरी लोग ओकरा सनीर कहऽ हथिन।10आउर घाटी के सभे नगर, मतलब कि समूचे गिलाद, आउर समूचे बाशान, आउर सलका आउर एद्रेई तक, ई सभे बाशान में ओग के राज्य के नगर हे।11रपाई के बचलकन में से बाशान के राजा ओग ही बचल रह गेलन। देख, उनकर बिछौना लोहा के हल। का ऊ रब्बा नगर में नऽ, जेज्जा अम्मोनियन के वंशज रहऽ हे? ऊ नौ हाथ लम्बा आउर चार हाथ चौड़ा हल, जौन तरह से लोग नाप हथिन।12"अरोएर से लेके अर्नोन के घाटी भीर से के जौन देश हम ऊ घड़ी अपन अधिकार में कर लेली, आउर गिलाद के पहाड़ी देश के आधा हिस्सा के नगर के साथ अपन अधिकार में कर लेली ऊ हम रूबेनियन आउर गादियन के दे देली।13गिलाद के बचलकन भाग, आउर समूचे बाशान मतलब कि ओग के राज्य, हम मनश्शे के आधा गोत्र के दे देली। अर्गोब के समूचे क्षेत्र, आउर समूचे बाशान। ओही क्षेत्र रपाईयन के देश कहलावऽ हे।14मनश्शे के वंशज याईर गशूरियन आउर मकाबियन के सीमा तक अर्गोब के समूचे प्रान्त के ले लेली। ऊ, ऊ क्षेत्र के, हियाँ तक कि बाशान के, अपन नाम से, हव्वोत्याईर, आज तक बुलाबल जा हे। 15हम गिलाद के माकीर के दे देली।16रूबेनियन आउर गादियन के हम गिलाद से लेके अर्नोन कि घाटी तक, आउर ऊ घाटी के बीच में से यब्बोक नदी तक, जौन अम्मोनियन के सीमा हे, दे देली।17एकर एगो आउर सीमा यरदन नदी घाटी के मैदान भी हे किन्नेरेत से अराबा सागर मतलब कि नमक के सागर से लेके पूरब के दने पिसगा पहाड़ के ढलान तक। 18ओही घड़ी हम तोरा ई आज्ञा देली, कि तोर परमेश्वर यहोवा तोरा ई देश अधिकार करे ला देलन हे; तोहनी सभे योद्धा अपन संगी इस्राएल के आगे हथियारबंद होके आगे बढ़ऽ।19बाकि तोर मेहरारु, तोर बाल-बच्चा, आउर तोर जनावर, हम जानऽ ही, कि तोरा भीर बड़ी सा जानवर हे, तूँ अपन ऊ नगरवन में रहवऽ जौन हम तोरा देली हे,20जखनी तक यहोवा तोर संगी इस्राएली के तोरा समान आराम नऽ देतन, आउर ऊ, ऊ देश के अधिकारी न हो जइतन जे तोर परमेश्वर यहोवा उनका यरदन नदी के पार दे हथिन; तब तोहनी में से सभे आदमी अपन-अपन संपत्ति में जे हम तोरा देली हे, लौट अईतन।21ऊ घड़ी हम यहोशू के ई आज्ञा देली, कि तोर परमेश्वर यहोवा ई दुन्नो राजवन से का-का कईलन हे, ऊ सभे तूँ अपन आँख से देखल हे; यहोवा ऊ सभे राज्य के साथे अईसहीं करतन जेज्जा तूँ जईवऽ।22तूँ अन्यजाति से नऽ डरवऽ, काहेकि तोर परमेश्वर यहोवा तोरा ला लड़तन।23ऊ घड़ी हम यहोवा से विनती कर के कहली,24हे प्रभु यहोवा, तूँ अपन दास के अपन महिमा आउर अपन तागतवर हाथ दिखावे लगल हे; स्वर्ग में चाहे धरती पर कौन देऊता हे जौन तोरा जईसन काम आउर सामर्थ के काम कर सकल हे?25हम तोरा से बिनती करऽ ही, कि हमरा पार जा के यरदन नदी पार के बढ़िया देश के, आउर ऊ बढ़िया पहाड़ी देश के, आउर लाबानोन के भी देखे दऽ।26बाकि यहोवा तोरे चलते हमरा पर गोस्सा होलन; ऊ हमर बात नऽ सुनलन। यहोवा हमरा से कहलन, तोरा ला एही बड़ी हे, ई बारे में हमरा से फिन नऽ बोलिहऽ।27पिसगा के चोटी पर चढ़ऽ, आउर अपन नजर, पच्छिम, उत्तर, दक्खिन, आउर पूरब दने करऽ; अपन आँख से देखऽ, काहेकि तूँ यरदन पार नऽ जा पईवऽ।28बाकि यहोशू के उपदेश दऽ, आउर ओकरा ढाढस दऽ आउर मजबूत करऽ काहेकि ऊ ओखनी के आगे-आगे चलतन, आउर जौन देश तूँ देखवऽ ओकरा ओही उनकर अधिकार में देतन।29येहिसे हम बेतपोर शहर के सामने के घाटी में ठहर गेली।
Bridge Connectivity Solutions Pvt. Ltd.