Deuteronomy26
1मूसा इस्राएली से कहलन, जब तूँ ऊ देश में पहुँचिहऽ जेकरा तोर परमेश्वर यहोवा तोरा निज भाग होवेला दे हथिन, आउर तूँ ओकर अधिकारी बन के रहे लगिहऽ,2तऽ जौन देश तोर परमेश्वर यहोवा तोरा दे हथिन ओकरा में से जौन तूँ अपन देश में ले अईलऽ हे ओकर सभे उपज के पहिलका भाग में से कुछ ले लिहऽ। तोरा एकरा एगो मौनी में रखे के चाही आउर ऊ जगह पर जाय के चाही जेकरा यहोवा तोर परमेश्वर अपन पवित्रस्थान के रूप में चुनतन।3आउर ऊ याजक भीर जईहऽ जे ऊ दिन में सेवा करते रहतन, आउर उनका से कहिहऽ, हम आज तोर परमेश्वर यहोवा के सामने कबूल करऽ ही, कि हम ऊ देश में अईली हे, जेकरा देवे लागी यहोवा हमर पुरखावन से शपथ खईलन हल।4याजक के मौनी तोरा हाथ से लेके तोर परमेश्वर यहोवा के वेदी सामने रखे के चाही।5तोरा अपन परमेश्वर यहोवा के सामने प्रार्थना कर के कहे पड़त, कि हमर पुरखा भटके वाला अरामी हलन। ऊ मिस्र में चल गेलन आउर ऊहें रहे लगलन, आउर उनकर लोग गिनती में कम हलन। उहाँ ऊ एगो महान शक्तिशाली आउर आबादी वाला देश बन गेलन।6मिस्र के लोग हमरा से बुरा वर्ताव कईलन, आउर हमरा दुःख देलन। ओखनी हमनी से गुलाम के जईसन काम करवईलन। 7हम अपन पुरखा के परमेश्वर यहोवा के दोहाई देली, आउर ऊ हमर सुन लेलन, आउर हमर दुःख, हमर मेहनत, आउर हमर शोषण देखलन।8यहोवा बलवन्त हाथ, आउर बढ़ावल गेल भुजा, आउर बड़ी भय, चिन्ह, आउर चमत्कार काम कर के हमरा मिस्र में से निकास ले अईलन;9आउर ऊ हमनी के ई जगह में पहुंचा के ई देश, मतलब कि दूध आउर मधु के धारा बहऽ हे, हमरा देलन हे। 10आवऽ देखऽ, जौन देश तोर यहोवा, हमरा देलन हे ओकर पहिला उपज में से ले अईली हे। तूँ जरुर ओकरा अपन परमेश्वर यहोवा के सामने रख दिहऽ, आउर उनका सामने दण्डवत करिहऽ;11आउर जौन भलाई तोर परमेश्वर यहोवा तोर घरवा लागी कईलन हे, ओकरा से तूँ आउर लेवियन आउर तोर बीच में रहे वाला परदेशी आनन्द मनइतन।12जब तूँ तिसरका साल मतलब कि दशमांश देवे के साल में अपन उपज के सभे दशमांश दे चुकलऽ हे, तब ऊ लेवी, परदेशी, अनाथ, आउर विधवा के दे दिहऽ; कि तोर नगर के फाटक के भीतर खाना खा के छक जइतन।13आउर अपन परमेश्वर यहोवा के सामने कहिहऽ, कि जौन चीज यहोवा के हे ओकरा हम अपन भवन में से निकास के तोर सभे आज्ञा के मोताबिक लेवी, परदेशी, अनाथ आउर विधवा के दे देली हे। जे तूँ हमरा देलऽ हे, हम तोर कोई आज्ञा के इनकार नऽ कईली, आउर हम नऽ ही भूलईली हे।14हम शोक करते घड़ी ओकरा में से कुछ नऽ खईली; आउर नऽ अशुद्ध होके कहीं आउर रखली, आउर नऽ मरलकन के आदर में कुछ देली। हम अपन परमेश्वर यहोवा के बात के सुनली हे; तूँ हमरा जे कुछ करे के आज्ञा देलऽ हे, हम ओकरा पालन कईली हे। 15आउर जौन पवित्रस्थान में तूँ रहऽ हऽ, ओकरा में से स्वर्ग पर से नजर कर के अपन प्रजा इस्राएल के आउर ऊ देश के आशीष दिहऽ, जे तूँ हमर पुरखावन से खायल शपथ के मोताबिक हमरा देल हे, आउर ऊ देश में दूध आउर मधु के धारा बहऽ हे। 16आज तोर परमेश्वर यहोवा तोरा ई सभे विधि आउर नियम के माने के आज्ञा दे हथिन; येहिसे तूँ उनकर आज्ञा पालन करिहऽ, आउर अपन पूरा मन आउर पूरा जी-जान से ओकरा पालन करिहऽ।17तूँ आज प्रगट कईलऽ हे, कि यहोवा तोर परमेश्वर हथिन, आउर तूँ उनकर रहिया पर चलिहऽ, आउर उनकर विधि, आज्ञा, आउर व्यवस्था के पालन करिहऽ, आउर उनकर बात सुनिहऽ।18आज यहोवा प्रगट कईलन हे, कि तूँ उनकर निज-निज प्रजा हऽ, जईसे ऊ तोरा वचन देलन हे, आउर तोरा उनकर सभे आज्ञा के पालन करे ला हे।19आउर ऊ तोरा सभे अन्यजाति से जेकरा ऊ बनईलन हे, ऊँचा ठहरईतन, आउर तूँ प्रशंसा, यश, आउर सम्मान पईवऽ। जईसन कि ऊ कहलन हे, तूँ अपन परमेश्वर लागी पवित्र कईल गेल लोग हऽ।
Bridge Connectivity Solutions Pvt. Ltd.