1 Peter5
1अखनी हम, पतरस, तोहनी बीच में ओखनी से निवेदन करऽ ही जौन पुरनिया हथन, मतलब कि जौन विश्वासियन के झुण्डवन के अगुवाई करऽ हे; हमहूँ एगो पुरनिया आउर गवाह ही। हम निजी तौर से मसीह के दुःख उठइते देखली हे, आउर हम उनकर महिमामय स्वभाव में सहभागी हो जायेम जेकरा परमेश्वर जल्दिये परकट करतन।2हे पुरनियन, अपन साथी विश्वासियन के देख भाल अईसे करऽ जईसे कि तूँ चरवाहा हऽ जौन अपन भेड़वन के झुण्ड के देख भाल करऽ हथन। उनकर देख भाल येहिसे नऽ कर कि तोरा ई करे ला हे, बलुक येहिसे कि तूँ सचमुच में ऊ चाहऽ हऽ, जईसन परमेश्वर चाहऽ हथन। लोभवश होके अईसन नऽ सोचऽ कि अईसन कर के दौलत पा लेवऽ, बलुक एकरा खुशी के साथे करऽ।3परमेश्वर तोरा जौन लोग के देलन हे, ओखनी पर प्रभुता करे वाला अधिकारियन के जईसन काम मत करऽ। एकर बदले, तूँ अपन जिनगी के कईसे चलईवऽ एकर द्वारा ऊ सभे विश्वासियन के झुण्ड लागी बढ़ियाँ उदाहरण बनऽ।4जदि तूँ ऊ सभे काम के करऽ हऽ, तऽ जब यीशु, जौन हमर शासक चरवाहा के जईसन हथन, परकट होतन, तऽ ऊ तोरा में से हरेक अगुवा के महिमा के मुकुट देतन। ऊ इनाम महिमामय होत आउर हमेशा तक बनल रहत। 5ओईसहीं, हे जवान, तूँ ऊ सभे पुरनियन के आज्ञा के पालन करऽ जौन विश्वासियन के झुण्ड के अगुवाई करऽ हथन। अखनी तूँ सभे विश्वासियन के एक दोसरा के प्रति नम्र होके काम करे के चाही काहेकि जौन सुलैमान पवित्रशास्त्र में लिखलन ऊ सच हे: "परमेश्वर घमण्डी लोग के विरोध करऽ हथन, बाकि ऊ नम्र लोग के प्रति दयालु होके काम करऽ हथन।" 6जबकि ई सच हे, येहिसे परमेश्वर के सामने, जिनका भीर लोगवन के बचावे आउर दंड देवे के अधिकार हे, खुद के दीन बनावऽ जेकरा से ऊ सही समय पर तोर आदर करतन।7परमेश्वर पर भरोसा रखऽ कि जौन बात से तूँ चिंता में हऽ ऊ सभे के देख भाल येहिसे करतन काहेकि उनका तोर चिंता हे।8साफ तौर से आउर होशियार होके सोचऽ, काहेकि तोर दुश्मन शैतान हे, आउर लोग के नाश करे के ताक में चारो दने घूम रहल हे। ऊ, ऊ शेर के जईसन हे जौन गरजऽ हे आउर मार के खाय लागी आदमी के खोज हे।9मसीह आउर उनकर संदेश में मजबूती से भरोसा कर के शैतान के विरोध करऽ। अईसन येहिसे करऽ काहेकि तूँ जानऽ हऽ कि सऊँसे दुनियाँ भर में तोर विश्वासी भाई ई तरह से दुःख उठावऽ हथन।10बाकि तूँ जखनी थोड़ा समय लागी दुःख उठावऽ हऽ, तऽ जौन सभे तरह से तोर प्रति दयालु होके काम करऽ हथन, ऊ खुद ही जौन तूँ भूला देलऽ हे ओकरा फिन से दूबारा स्थापित कर देतन आउर तोरा सभे तरह से पूरा मजबूत करतन। परमेश्वर ही हथन जौन हमेशा ला स्वर्ग में उनकर महिमामय मौजूदगी के अनुभव करे लागी चुनलन हे काहेकि तूँ मसीह से जुड़ गेलऽ हे।11हम प्रार्थना करऽ ही कि परमेश्वर हमेशा ला सामर्थी रूप से राज करतन। आमीन!12सीलास जईसन कि हम उनका बतईली हे ई चिट्ठी हमरा ला लिखलन हे। हम ओकरा एगो विश्वासयोग्य विश्वासी भाई मानऽ ही। हम तोरा ई छोटगर चिट्ठी येहिसे लिखली हे जेकरा से तोर हौसला बढ़ावल जा सकत आउर तोरा ई बतावल जा सकत कि हम तोरा जौन लिखली हे ऊ परमेश्वर के सच्चा आउर अनुग्रहकारी संदेश के बारे में हे। ई संदेश पर मजबूती से विश्वास करे ला जारी रखऽ!13ई नगर जेकरा हम बेबीलोन कहऽ ही, एकरा में से जौन विश्वासियन के परमेश्वर अपन लोग होवे लागी ओईसहीं चुनलन, जईसे ऊ तोरा चुनलन, तोरा अपन नमस्कार भेजऽ ही। मरकुस जौन हमरा ला एगो प्रिय बेटा के जईसन हे, ऊ भी तोरा अपन नमस्कार भेजऽ हथन।14प्रेमपूर्वक एक दोसरा के हाथ जोर के ई देखावे लागी नमस्कार करऽ कि तोहनी एक दोसर से प्रेम करऽ हऽ। हम प्रार्थना करऽ ही कि परमेश्वर तोहनी सभे के जौन मसीह से जुड़ गेलऽ हे, शान्ति के एहसास करवईते रहतन।
Bridge Connectivity Solutions Pvt. Ltd.