Efazə4
1Rəkɔ, əmə, əyïkânga mbrə Âgbɔ̂ Əyïngerə, mə sə kə gbɔgbɔ e ndə kə pa e mbrə tə̂ e ə lï də kə e e ə̂në Ndjapä ê e kɔ,2e mbrə̈ tə̂ e teashe ə mbrə̈ tə̂ e mbrə̈ də awlra ne, ə wüsə̂ kə ru tshelə e. E rü tshelə e tə̂ angâ e lə takpa tə̂ e, lə kə yi tə̂ e,3e mbrə̈ nɔ̂ ndə kə pa äwä kə sə e kʉ kpiabale lə Âgbɔ̂ Yîrə̂ nə daka pə kpə mandânə tə̂ äwä blatshe lə takpa tə̂ e.4Tshekotə̂ sə kʉ kpiabale â Âgbɔ̂ Yîrə̂ sə kʉ kpiabale, mata ə̂në Ndjapä nə ê e ndje mbrə ərə kʉ bale ə̂në e za lɔsu e gâ pâ nə kɔ.5Âgbɔ̂ Əyïngerə sə kʉ kpiabale, əpʉ lɔsu sə kʉ kpiabale, batamo sə kʉ kpiabale,6â Ndjapä sə kʉ kpiabale tə Abä azü nɔ̂, ə̂në tshə sə gâ pâ azü nɔ̂, ə mbrə ərə lə azü nɔ̂ â sə lə azü nɔ̂ kɔ.7Bale, Ndjapä nə mbrə̂ ə̂rɔ̂tə̂ ye kə əzü bale bale lə takpa tə̂ əzə̂ gâ ye ə lï də âkrâ ə̂në Kristə nə zâ kə əzü bale bale kɔ.8Âdârə ə̂në əndje pâ əpʉ lə Fraka nə̂ Ndjapä ə pa:«Tshə ô mâ ngâ lafɔ,ə gû də alayïkânga,ə krâ âkrâ kə azü» kɔ kə sə̂.9Bale, «Tshə ô», âdâ nə də̂ yekɔ? Əpʉ sə̂ yində kə pa tshə jêrə ndje djoko tʉ mâ budu ashɔ.10Ətshə nə ə̂në tshə jêrə kɔ, kʉtə̂ ətshə kə ô rô tshelafɔ nɔ̂, ndə kə pa tshə su aərə nɔ̂ trɔ̂ kɔ.11Ətshə kə kô alabə̈ azü tə azü-awla, alabə̈ əndje tə aawopandəma Ndjapä, alabə̈ aata əndje tə aawomʉ Ə̂rɔ̂ Əpʉ, â alabə̈ aata əndje tə aawoyisə̂ äwä də aawoyisə̂ ərə kə azü kɔ,12ndə kə pa əndje mbrə ka azü nə̂ Ndjapä lï ndə kə mbrə kosəra ə gerə tshekotə̂ Kristə nə,13ʉrrr ndjɔ ndə kə pa əzə̂ nɔ̂, a sə kʉ bale gâ pâ əpʉ lɔsu ə wusə̂ Ɨrɨ Ndjapä kpro, ə ne tə aâgbɔ̂ azü, ə lï də kə gerə Kristə nə nɔ̂.14Ə sə rə kanika a sə sə kwatə̂zə tə aaya aneshe ə̂në kplaka ə̂ngû də əyi kə yisə̂ ərə nə̂ azü ə meme əzə̂ ə ro də əzə̂ ne, ə̂në əndje frɔ əzə̂ ə djingli əzə̂ tə̂ äwä əterə də aərə nə̂ əndje kɔ ne.15Kədə əzə̂ sə kə pa djatra əpʉ, lə kə yi tə̂ əzə̂, a sə kə gerə lə aərə nɔ̂ gu ndə Kristə nə, tə kumu tshekotə̂ nə.16Tə̂ äwä Kristə nə də̂ tshekotə̂ nə tshegege, ə̂në ə ngbo gâ tə̂ nə ə sə kʉ bale mbrə tshelə akəshe nə ə̂në ə mbrə kosəra kɔ, sə kə za äwä ndə kə pa ə gerə ə lï də kosəra nə̂ ərə tshekotə̂ nə bale bale, kanika ə gamba tə̂ ye də ə̂tə̂ ye tə̂ äwä kə yi tə̂.17Rəkɔ, ərə ə̂në mə yu tshuku nə kə e ə̂në mə ka gâ pâ nə də əɨrɨ Âgbɔ̂ Əyïngerə kɔ kə səye: e mbrə̈ tə̂ e mbrə̈ kwatə̂-e mata adulu ə̂në aəpʉ lɔsu əndje na kʉ gâ tə̂ amba ərə kɔ ne.18Kə wusə̂ ərə nə̂ əndje sə kʉ lə əbutshe; əndje sə sə lə sorô nə̂ Ndjapä ne, mbrə ə̂në əndje wusə̂ ərə wu bale ne â lɔsu əndje gbɔ̂ tə bandanə gâ ye.19Gana ngɔ əndje ngɔ kwatəndje ne; əndje zâ tə̂ əndje gâ tə̂ äwä adongo aəgo tshekotə̂ â sə sə kə mbrə aərə kene də gana bale ne.20Ə də̂ ənə̂ e, ə də̂ ərə ə̂në e wusə̂ nə gâ pâ əpʉ nə̂ Kristə nə kɔ də̂ kə sə̂ ne.21E djî əpʉ ngâ nɔ̂ gâ pâ ye gâ ye, â əndje yîsə̂ djatra əpʉ ə̂në ə sə lə Jezu kɔ kə e gâ ye, tə azü nə̂ Kristə nə.22Rəkɔ, e lï ndə kə pa e wəra tə̂ e tə̂ kə mbrə tə̂ e leme-e ətshinə kɔ ə verə angbrɔ kə sə e mata agba ləba gâ tʉ, ə̂në aəgo nə sə kə frɔ əzü ndə kə na də ətshə gâ tə̂ kuzu kɔ.23E kätə̂ äwä kə Âgbɔ̂ Yîrə̂ tshə do kə wusə̂ ərə nə̂ e tə tafa nə.24E yï tafa kə sə əzü gâ tə̂ e mata tafa ləba, ə̂në Ndjapä nə mbrə̂ gâ ye ə ko ətshə kɔ â ə̂në ə sə tə̂ äwä kə mbrə ərə də äwänə də kə sə kpî mbrə Ndjapä nə kɔ, Lïndə̂ djatra əpʉ.25Rəkɔ, e kätə̂ äwä əterə! Əzü bale bale pä djatra əpʉ kə bəngâ nə, mbrə ə̂në əzə̂ sə nɔ̂ tə aərə tshekotə̂ kʉ bale.26Kədə e mbrə əkɔ, e mbrə̈ nyaka mbrə̈ ne; alɔ dɨ̈ dɨ̈ tə̂ e də əkɔ nə ne.27E kätə̂ äwä kä kə djablo ne.28Əzü ə̂në tshə sə kə zɨ angba, tshə zɨ̈ angba zɨ̈ kwatə̂ye ne; tshə wü əyo ə mbrə̈ kosəra də kəna ye də ə̂tə̂ ye, ndə kə pa tshə sɔtə̂ ərə ə za kə ə̈bə̈ əyïəyo.29Ə̈bə̈ əmbrʉ əpʉ bale wü wütu lə ama e ne, bale kədə äwä nə â sə je, ə̂rɔ̂ əpʉ ə̂në ə lï ndə kə gbɔgbɔ əzü kɔ ə sə kə mbrə ə̂rɔ̂nə kə azü ə̂në əndje sə kə dji nə kɔ ka ə wutu lə ama e.30E zä əyo zä gâ tə̂ lɔsu Âgbɔ̂ Yîrə̂ nə̂ Ndjapä, ə̂në Ndjapä nə zâ gâ pâ e gâ ye mata tapɔ tə azü nə̂ ye mbrə alɔ kə djɔ e lə əmbrʉ ərə gbrä kɔ ne.31Kə bata əkɔ ərə tə̂ lɔsu, də kə mbrə əkɔ alɔnɔ̂, də əkɔ, də râwâ, də aə̂gû gâ ndə âkâ aəmbrʉ aərə nɔ̂ lïwu lə takpa tə̂ e gâ ye.32E sə̈ də ə̂rɔ̂ lɔsu lə takpa tə̂ e ə yï tə̂ e də lɔsu e nɔ̂; e gbä aəpʉ lə kumu angâ e lə takpa tə̂ e, mata ə̂në Ndjapä nə gbâ aəpʉ lə kumu e tə̂ äwä Kristə nə gâ ye kɔ.
The Seed Company