Romans6
1Kơi achêk nek, nôôq he e praaq ng'kơi? Nôôq he ve chóóm bhiêk tơơt kalóóng matu lơt buôn ơơn phươk liêm dyơq xưa raai kah?2Chiên ađek kah chóóm yuur vaaih. Nôôq he nek manưih ơi chêt ting kơi palơq matu lơt nek ng'kơi têêng nôôq he e bhiêk mamông kalóóng ađó?3Môôiq adhi anó kah n'nal kơi hơq ngaai ơi đơơp bap-teem kalóóng Jê-su Chuôq Paq Manưih nek ơi bâân bap-teem mót kalóóng akan chêt ưng Ađó kah lua?4Taai ađek, nôôq he ơi bâân tơp palơq Ađó đươi pheep bap-teem mót kalóóng akan chêt, hơq đóng nham kơi Chuôq Kriit đươi cha-iil tabah ưng Ama ơi bâân têêng mamông lóóiq tââq akan chêt n'đó kơi, nek nôôq he kung ve chóóm jađaang vôôiq kalóóng parmông tame kơi achêk.5Ơi la nôôq he ơi val xar markơi palơq kung mađó rau chêt ưng Ađó, nek mat lââng, nôôq he kung e nek kơi achêk dhiq rau parmông lóóiq ưng Ađó;6taai n'nal rau ađô, kơi akóón manưih ti ưng nôôq he ơi bâân teeng đinh palơq Ađó, buôn achak araang ưng matu lơt ve chóóm bâân m'peq lơơi, yươq dyơq kađââng nôôq he têêng xól đóng matu lơt dyơq.7Ơi la ngaai ơi chêt nek bâân tabil lơơi nôôq tóóm patu tââq matu lơt.8Bơơi la nôôq he ơi chêt palơq Chuôq Paq Manưih, nek nôôq he huuiq kơi ađêi kung e mamông palơq Ađó,9taai n'nal kơi xong xók bâân têêng mamông lóóiq tââq akan chêt, Chuôq Paq Manưih yươq ve chêt dyơq; akan chêt yươq dyơq kadhâng akoq dhiq Ađó.10Ơi akan chêt hơq Ađó ơi đơơp, ađek nek Ađó ơi chêt ting kơi palơq matu lơt mưi chu dyóp aq. Dyơq parmông hơq Ađó mamông ađek nek Ađó mamông đóng Yaang Pleng.11Kung ting kơi ađek, dhơ adhi anó phaai lêi chênh ađêi nek manưih chêt ting kơi palơq matu lơt, bơơi nek mamông đóng Yaang Pleng kalóóng Jê-su Chuôq Paq Manưih.12Kơi achêk, óóq lơơi matu lơt kadhâng akoq kalóóng achak araang ting huuiq dhiq akan chêt ưng adhi anó, buôn hayơq ting xâng nôôq malóóch kiêng ưng ađó.13Kung óóq pajaau nôôq achak araang ưng ađêi đóng matu lơt kơi đô-đaak ưng rau kah liêm. Bơơi phaai tapôông chênh ađêi đóng leq Yaang Pleng, kơi rau dyơq veq mamông tââq manưih chêt, lơq nôôq achak araang ưng ađêi kơi đô-đaak ưng rau bhơt liêm đóng Yaang Pleng.14Ơi taai matu lơt e yươq bâân kadhâng akoq dhiq adhi anó, ơi adhi anó yươq tơơt kalóóng gani, bơơi nek tơơt dhiq ơơn phươk liêm.15Kơi achêk nek ng'kơi? Nôôq he ve chóóm têêng matu taai nôôq he kah tơơt raal gani, hơq tơơt raal ơơn phươk liêm? Chiên ađek kah mơ chóóm vaaih.16Adhi anó kah n'nal kơi adhi anó pajaau chênh ađêi đóng rauriq kơi têêng xól kalóóng rau huuiq bóóp, nek adhi anó val xar têêng xól đóng rau hơq ađêi huuiq bóóp kah lua, dhơ dhakơi nek ưng matu lơt đââng tơk akan chêt, môôiq nek ưng rau huuiq bóóp đââng tơk rau bhơt liêm?17Bơơi ma-ơơn Yaang Pleng taai adhi anó biêh nek têêng xól ưng matu lơt, hơq adhi anó ơi tââq kalóóng lóóm huuiq xâng ting kơi palơq dhalam liêm paraaq pachóóm hơq ađêi bâân truuih đóng.18Hayơq xong xók bâân đââng pagluh lơh tââq matu lơt, adhi anó ơi bâân têêng xól đóng rau bhơt liêm.19Aku praaq ting kơi akóón manưih ơi taai tarlum dhur lóóm ưng manưih ti adhi anó. Ơi n'đó kơi adhi anó ơi pajaau nôôq achak araang ưng ađêi kơi têêng xól đóng rau anhuq lơq đóng rau kah matich ađô tơk rau kah matich tôôh, nek bhêêl đôk, kung kơi chêk, adhi anó phaai tapôông nôôq achak araang ưng ađêi kơi têêng xól đóng rau bhơt liêm malóóm tơk rau liêm tabah.20Ơi xók adhi anó dyơq nek têêng xól ưng matu lơt, nek adhi anó biêh bâân rathaai ting kơi palơq rau bhơt liêm.21Kơi chêk adhi anó ơi ve harau yưưm xók achêk leq nôôq rau hơq xók ađôk adhi anó tư lêi kachiit mat? Taai xariêq ưng nôôq rau ađek nek akan chêt.22Bơơi xók ađôk, xong xók bâân paloh pagluh tââq matu lơt lơq bâân têêng xól đóng Yaang Pleng, adhi anó ve bóóng pale ưng ađêi đââng tơk rau tabah liêm, hơq xariêq nek parmông tơk nh'chró.23Taai jêên makông ưng matu lơt nek akan chêt, bơơi ơơn phươk ưng Yaang Pleng nek parmông tơk nh'chró kalóóng Jê-su Chuôq Paq Manưih, Chuôq nôôq he.
FAR EAST BROADCASTING COMPANY