Philippians4
1Kơi achêk nek, adhi anó nh'nhơr liêm lơq rââm hei ưng aku ơơi, lóóm bhuui lơq panơơng pơơng ưng aku, nôôq adhi anó nh'nhơr liêm ơơi, phaai bhiêk dyương tamưng kơi achêk kalóóng Chuôq.2Aku mââl bhơơl Ê-vô-đi lơq mââl bhơơl Siin-ti-kơ ve markơi lóóm karnóq kalóóng Chuôq.3Dhơ dhakơi, aku kung nhan anó, manưih mađó tarnêêng lalua dhalam ơơi, anó phaai poor jóói nôôq pađiil achêk, piđó ơi palơq aku tajeng tajơl đóng Taruuih Liêm, kung palơq Kơ-lê-man lơq nôôq parjơơk mađó tarnêêng lââng ưng aku, hơq achak ưng piđó dhiq kalóóng Bha-aar Parmông.4Phaai bhiêk taluôn bhuui marhaal kalóóng Chuôq. Aku e móón dyơq, phaai yuur bhuui marhaal.5Phaai đóng dyóp ngaai n'nal lóóm moor liêm ưng adhi anó. Chuôq ơi đan aq.6Óóq karaang marau marâ, Klóóih dhiq ađek, kalóóng dyóp tarnêêng, palơq rau gavơh nhan lơq nhan padhiêr nek palơq rau ma-ơơn, phaai đóng nôôq paraaq gavơh nhan ưng adhi anó bâân praaq pakah leq Yaang Pleng,7hayơq yươq rauha ưng Yaang Pleng, nek rau jalơh bhơt dyóp rau n'nal, e jư lêi lóóm adhi anó lơq lóóm karnóq ưng adhi anó kalóóng Jê-su Chuôq Paq Manưih.8Tatun kiêt, nhan móón adhi anó, hơq hau rau nek dhalam lalua, hơq hau rau đaang bhi chap, hơq hau rau bhơt liêm, hơq hau rau sek tabah, hơq hau rau đaang nh'nhơr, hơq hau rau ve haanh liêm, la n'đó rau lóóm liêm, lơq la n'đó rau đaang haanh, nek adhi anó phaai kanóq tơk piđó.9Nôôq rau adhi anó ơi đuui n'nal, ơi pei katiêu, ơi xâng lơq ơi lêi dhiq aku, nek phaai yuur têêng nôôq rau ađek, hayơq Yaang Pleng yươq rauha e tơơt palơq adhi anó.10Aku lóng bâân bhuui marhaal kalóóng Chuôq taai ađôk xariêq adhi anó val karaang tơk aku. Bơơi alua, kalóóng chiên ađôk, adhi anó biêh ơi karaang hei tơk aku, bơơi kah ve bhêêl bâân praaq pakah.11Achêk eh rau nek aku móón leq tabhuch tapiêl ađêi, taai aku ơi đuui phaai iêm lóóm dhơ aku tơơt kalóóng n'đó rau tarlum.12Aku tame n'nal ngeeo ha-ul, drươh n'nal ve xưa raai. Kalóóng rau yuur avaaih lơq kalóóng rau tarlum, aku ơi đuui tabhơt bhêêl xók bâân kabhôôq lơq xók đơơp ha-ul, palơq bhêêl ve xưa raai lơq xók pâng tabhuch tapiêl.13Aku ve dyóp praan talum tabhơt ve Yaang têêng đóng aku karơ.14Dhơ kơi ađek, adhi anó ơi têêng liêm xók ting paak blah hadhơơp janah ưng aku.15Nhan móón adhi anó kanóón Phi-liip, adhi anó kung n'nal kơi kalóóng vaar tarnââp ưng Taruuih Liêm, xók aku yuur tââi tââq Ma-xê-đoan, kah ve kabhuh akóón dhơn Chuôq ngaai ting paak blah palơq aku kalóóng tarnêêng đóng đơơp, chapiên mưi adhi anó giêl,16taai dhalam dhiq Tê-sa-lô-ni-ka, adhi anó ơi bơơr pe chu pagơơi ađô parvech tarmông leq aku.17Achêk eh rau nek aku rââm chik-chêk kaliim, hơq aku rââm chik-chêk bóóng pale n'dhương bơk xưa raai leq phơn malơơi ưng adhi anó.18Aku xók ve dyóp rau lơq xưa raai dyơq. Aku ơi bâân bơk dyóp, Xók đơơp tââq Ep-ba-phô-đich kliim kaliim bhral tââq adhi anó, nek n'naq thum, nek bhanuôih adhah bâân đơơp đươi, nek rau liêm lóóm Yaang Pleng.19Yaang Pleng ưng aku e poor đóng bhơt dyóp rau tarmông ưng adhi anó ting rau karvaan ưng Ađó kalóóng rau cha-iil tabah dhiq Jê-su Chuôq Paq Manưih.20Nhan cha-iil tabah mađó leq Yaang Pleng, Ama nôôq he, đóng tơk nh'chró taluôn. A-meen.21Nhan pagơơi tham dyóp nôôq manưih huuiq kalóóng Jê-su Chuôq Paq Manưih. Nôôq adhi anó tơơt palơq aku pagơơi tham adhi anó.22Tabhơt nôôq manưih huuiq pagơơi tham adhi anó, hơq liêm tââm nek nôôq manưih mađó đong Xê-xa.23Nhan ơơn phươk liêm ưng Chuôq, nek Jê-su Chuôq Paq Manưih tơơt palơq lóóm yaang adhi anó. A-meen.
FAR EAST BROADCASTING COMPANY