Matthew9

1Bhêêl ơi mót kalóóng bhuông, Ađó chaang taxiiq lơq chô tơk kanóón ưng ađêi.2Lêi tôôh, palââng đââng tơk leq Ađó mưi chanak đu rabóót achak xók bêch dhiq alơơq. Xók Chuôq Jê-su lêi lóóm huuiq ưng piđó, Ađó praaq lơq manưih đu rabóót achak: “Nô akóón, phaai yuur nhóól lóóm. Nôôq matu lơt akóón ơi bâân lơơi lơt.”3Lơq lêi tôôh, mưi phơn kalóóng nôôq manưih pachóóm gani móón palơq xóng piđó: “Manưih ađô praaq chôlô.”4Taai ơi n'nal nôôq karnóq ưng piđó, Chuôq Jê-su praaq: “Nôôq pe kanóq môôp maap kalóóng lóóm ađêi hau rau đươi?5Ơi hau rau nek khe lơh ngi praaq: ‘Nôôq matu lơt akóón ơi bâân lơơi lơt,’ môôiq praaq: ‘Nek yuur dyương lơq jađaang vôôiq’?6Bơơi buôn nôôq pe ve chóóm n'nal kơi Akóón Manưih ve karơ mataai tơơt dhiq katiêk buôn lơơi matu …” nek xók bhêêl ađek, Ađó yua manưih rabóót achak: “Nek yuur dyương, halooq alơơq, lơq yuur chô leq đong ađêi.”7Lơq xong xók yuur dyương, manưih ađek chô leq đong ađêi.8Kơi achêk nek, xók lêi kơi achêk, tanóói dhanuôr braaih kakhin lơq bhi haanh Yaang Pleng, taai ơi đóng leq akóón manưih karơ mataai kơi achêk.9Xók ơi tââq ađek yuur vôôiq, Chuôq Jê-su ve lêi mưi chanak achak Ma-thi-ơ xók tơơt dhiq đong pagoop jêên, hayơq Chuôq yua ađó: “Hêq ting thêi.” Lơq xong xók yuur dyương, ađó vôôiq ting Chuôq.
10Tarnêêng yuur vaaih xók Ađó tơơt cha kalóóng đong, nek lêi tôôh, bơk đu têêng pagoop jêên lơq đu ve matu pơh tơk, ơi tơơt leq baang cha palơq Chuôq Jê-su lơq nôôq môôn-đô Ađó.11Xók bâân lêi kơi achêk, nôôq manưih Pha-ri-si móón palơq nôôq môôn-đô Ađó: “Ơi taai harau hơq thêi ưng nôôq pe cha madhiq palơq kabhuh pagoop jêên lơq đu ve matu?”12Bơơi xong xók xâng lêi, Ađó praaq: “Manưih karơ khe kah ve rau đươi leq manưih payươh, hơq nek manưih đu ka-ai.13Dyơq xong xók vôôiq lơh, phaai hok n'nal xayar ađô nek ng'kơi: ‘Aku kiêng lóóm kayô ka-er, eh rau adhah bhanuôih.’ Ơi eh rau aku bhral buôn dhaloong manưih đu liêm, bơơi nek đu ve matu.”
14Bhêêl ađek, nôôq môôn-đô ưng Jang tơk lum Ađó, tamóh: “Ơi taai harau hơq nôôq yi lơq manưih Pha-ri-si đóók drơng cha, dyơq nôôq môôn-đô ưng thêi nek kah drơng cha?”15Chuôq Jê-su praaq palơq piđó: “Ve kơq nôôq parjơơk ting tơơt bhiêk nhan mamaai ve chóóm ranguôq rabaang kalóóng ganah mơ đươnh hơq chaxaau tơơt nek palơq piđó? Bơơi e tơk tangêi xók hơq chaxaau bâân đââng vôôiq tââq piđó, nek bhêêl ađek piđó e drơng cha.16Lơh tââq ađek, kah ngaai bươl mưi paleh bhaai tame yươq ơi karnhól leq beq aau ti, ơi bhaai rabươl chatang tanteek tââq beq aau achêk, lơq mưi dham tanteek yuur vaaih gamak lơh.17Kung kah ngaai jrung alak tame leq aluui ng'kar ti. Bơơi la eh rau kơi achêk, nek kakhin e aluui ng'kar bâân pađóh bhriq, alak bâân tantoh lơq aluui bâân bhraaiq. Klóóih leq ađek, palââng jrung alak tame leq aluui ng'kar tame, lơq miq bơơr bâân jư paliêm.”
18Bhêêl xók Ađó papraaq nôôq paraaq achêk palơq piđó, nek lêi tôôh, mưi nak jư lêi đong gươl xong xók tơk pađan, ơi chakoh chok leq toom Ađó, móón kơi ađô: “Akóón pađiil aku nôk tame chêt, hơq bơơi bhêêl tơk ađek, nhan nek lơơi têi thêi dhiq akóón paniên, nek akóón paniên e mamông.”19Xong xók yuur dyương, Chuôq Jê-su lơq nôôq môôn-đô Ađó ting vôôiq lơq ađó achêk.20Lơq lêi tôôh, mưi akan pađiil đơơp jruôn ka-ai hóói ahaam bhluuch majêt bơơr kamó, xók tơk pađan hót hóng Ađó hayơq, nek ơi xuui leq xrooi aau ưng Ađó,21Ơi ađó tư kanóq: “La ađêi mơ xuui leq aau Ađó giêl, nek ađêi e bâân yươh ka-ai.”22Bơơi xong xók palâh lóóiq lơq lêi ađó, Chuôq Jê-su móón: “Akóón pađiil ơơi, phaai mưng lóóm; lóóm huuiq akóón ơi payươh akóón.” Lơq manưih akan pađiil achêk bâân yươh ka-ai tââq bhêêl ađek.23Hayơq Chuôq Jê-su, xong xók vôôiq tơk đong manưih jư lêi đong gươl achêk lơq lêi nôôq đu plong aluôt palơq manưih ganơr ka-uôih kadhuôih,24ơi praaq: “Nek róch dhun, ơi akóón pađiil yươq rau chêt, bơơi nek xók bêch.” Hayơq piđó kachang jóóch Ađó.25Kơi achêk nek, bhêêl manưih ganơr ơi bâân tađuôi gluh leq nguôi, nek xong xók mót kalóóng, Ađó kadhâng têi akóón paniên, lơq akóón pađiil achêk tư yuur tơơt.26Taruuih ađô yuur tanđôôr plok kalóóng parah ađek.
27Xók bhêêl Chuôq Jê-su tââq dhiq ađek yuur vôôiq, nek bơơr chanak kabaang ơi vôôiq ting Ađó, lalơu karơ, lơq móón: “Kakoh Akóón bhua Đa-viit, nhan kayô ka-er nôôq yi!”28Bhêêl achêk, xók ơi mót leq kalóóng đong, bơơr chanak kabaang tơk pađan Ađó lơq Chuôq Jê-su praaq palơq nhiđó: “Ve alua nôôq anó huuiq kơi Aku ve chóóm yuur têêng tarnêêng achêk?” Nhiđó móón palơq Ađó: “Alua, Chuôq ơơi.”29Xók ađek, Ađó rapơq leq mat nhiđó, praaq: “Tarnêêng achêk phaai bâân yuur vaaih đóng nôôq anó ting kơi lóóm huuiq ưng nôôq anó,”30Mat nhiđó bâân tapơơh, lơq Chuôq Jê-su pagat nhiđó, kơi ađô: “Phaai chagơn, nôôq anó óóq đóng ngaai n'nal.”31Bơơi xong xók gluh leq nguôi, nhiđó truuih đuui tarnêêng achêk plok kalóóng parah ađek.
32Xók achêk, dyơq xók nhiđó vôôiq gluh, nek lêi tôôh, palââng đââng tơk leq Ađó mưi chanak a-ơp bâân abhưi bóq.33Bhêêl abhưi ơi bâân tapagluh, nek manưih a-ơp chóóm praaq, lơq manưih ganơr hêq lêi, praaq: “Mưi tarnêêng kơi achêk kah ve glêh bâân tapakah kalóóng I-sơ-ra-êên!”34Bơơi nôôq manưih Pha-ri-si biêh móón: “Ađó viêng abhưi đươi leq takóh abhưi.”
35Chuôq Jê-su vôôiq val plok bhơt nôôq kanóón lơq bhươl veel, pachóóm pató kalóóng nôôq đong gươl ưng manưih dhanuôr, truuih đuui Taruuih Liêm ưng katiêk pleng lơq payươh ting rau dhuôr palơq dyóp ka-ai dhur.36Xók achêk, bhêêl lêi nôôq tanóói dhanuôr ganơr, Ađó kayô ka-er lêi đóng piđó, taai piđó xók bâân m'bhiiq vei lơq jruôn rau tachêh tavươk, ngóq kơi trưưu kah ve manưih jư.37Xong ađek, Ađó praaq palơq nôôq môôn-đô ađêi: “Dhơ nil xóót nek bơk aviq, bơơi manưih xóót nek m'bưưiq.38Taai ađek, phaai gavơh nhan Kala ưng nil xóót, ng'kơi đóng Ađó kayua nôôq manưih xóót mót kalóóng nil xóót ưng ađêi.”

FAR EAST BROADCASTING COMPANY

https://app.library.bible/content/15a813fef7fefb05