Matthew10
1Xong xók dhaloong majêt bơơr môôn-đô ưng ađêi tơk, Ađó ơi đóng leq piđó paraaq mataai dhiq nôôq yaang anhuq, buôn pagluh piđó lơq payươh ting rau khuch dhuôr palơq dyóp ka-ai dhur.2Achak ưng majêt bơơr sưưq-đô nek nô kơi: Laloom tââp, Si-môôn (bâân đóók nek Phi-e-rơ) lơq En-rê, adhi padruuih ađó; Ja-kơ akóón ưng Xê-bê-đê lơq Jang, adhi padruuih ađó;3Phi-liip lơq Ba-thê-lê-mi; Thô-ma lơq Ma-thi-ơ, manưih đu pagoop jêên; Ja-kơ akóón ưng A-phê, lơq Tha-đê;4Si-môôn Xê-lôôt, lơq Ju-đa Ich-ka-ri-ôôt, kung nek đu ơi tamôôp Ađó.5Chuôq Jê-su ơi kayua majêt bơơr nak ađô vôôiq, xong xók praaq pató piđó kơi ađô: “Óóq vôôiq dhiq kalơng ưng nôôq dhanuôr manưih nguôi, kung óóq mót kalóóng kanóón ưng manưih Sa-ma-ri.6Bơơi nek vôôiq palơq nôôq akóón trưưu xraang bil ưng đong I-sơ-ra-êên nek lơh.7Xók achêk, bhêêl vôôiq kalơng, adhi anó phaai truuih đuui, praaq kơi ađô: ‘Katiêk pleng ơi tơk đan.’8Phaai payươh manưih ka-ai dhur, têêng manưih chêt mamông lóóiq, têêng pasek manưih tơơt bhơơi lơq pagluh nôôq abhưi. Adhi anó ơi đơơp kagóh, nek phaai đóng kagóh.9Óóq koom ha-ơu vaang, môôiq baak, môôiq đông jêên kalóóng bhiiq dhiq hóng ưng adhi anó,10kah chadhung talek đóng galuh vôôiq, môôiq bơơr aau, môôiq jêi, môôiq tarlââng, ơi manưih têêng makông đaang bâân phơn cha ađêi.11Dyơq kalóóng kanóón môôiq n'đó bhươl hơq adhi anó vôôiq mót, nek tabâân n'nal mưi ngaai ađek kalóóng dhiq ađô nek manưih đu ađaang, nek tơơt dhiq ađek đóng patơk xók bhêêl adhi anó yuur vôôiq.12Xók achêk, xók mót kalóóng đong ađek, nek nhan yươq rauha đóng dhiq achêk.13Mưi phơn, la đong ađek nek dhiq đu ađaang, nek yươq rauha ưng adhi anó phaai tơk dhiq ađó, kơi lââng, la ađó eh rau nek dhiq đu ađaang, nek yươq rauha ưng adhi anó phaai bâân val chô palơq adhi anó.14Lơq ngaai đu kah pơh yaauq adhi anó, kung kah tameng xâng nôôq paraaq ưng adhi anó, nek xók vôôiq gluh tââq đong môôiq kanóón ađek, nek tapiêh puui dhiq dyung adhi anó.15Alua, thêi praaq palơq adhi anó, e nek nh'jang khe đóng katiêk Sô-đôôm lơq Gô-mô-rơ kalóóng tangêi xêi xanêi lơh nek đóng kanóón ađek.16Lêi nô, thêi kayua adhi anó vôôiq kơi trưưu tơơt dhiq m'pơng kabhuh axing, đóng hayơq nek val xar tabech galang kơi kaxênh lơq moor m'pheep kơi achim paraap.17Bơơi nek hêch lêi leq palââng, ơi piđó e pajaau đââng adhi anó leq kabhuh xêi xanêi, lơq palââng e m'bhiiq adhi anó palơq rooi kalóóng đong gươl ưng piđó;18hayơq adhi anó patơk mơ e bâân tađââng tơk toom nôôq kuôn gamak lơq nôôq bhua ơi taai thêi, buôn kơi mưi paraaq truuih đóng piđó lơq đóng nôôq dhanuôr đu lââng.19Bơơi bhêêl piđó pajaau đââng adhi anó, óóq karaang kakhin leq n'đó kơi môôiq hau rau ađêi kơng praaq, ơi rau hơq adhi anó kơng praaq e bâân đóng leq adhi anó xók bhêêl ađek.20Ơi eh rau adhi anó nek manưih praaq, bơơi nek Yaang Liêm ưng Ama adhi anó praaq kalóóng adhi anó.21Lơh ađek, anó e pajaau adhi mót leq chêt, lơq akonh nek pajaau akóón, lơq akóón anaaq e yuur vaaih huông palơq akonh akan lơq e têêng piđó phaai chêt.22Lơq adhi anó e bâân dyóp ngaai gaam geet taai dhanóók thêi, bơơi ngaai đu đuôh jruôn tơk tatun xariêq, manưih achêk e bâân paq.23Bơơi n'đó bhêêl palââng kóóp róp adhi anó kalóóng kanóón ađô, hơq nek mut leq kanóón tôôh, ơi alua, thêi praaq palơq adhi anó, dhơ dhakơi adhi anó kah chóóm đuôh vôôiq bhơt nôôq kanóón ưng I-sơ-ra-êên đóng patơk xók bhêêl Akóón Manưih bhral.24Môôn-đô nek kah lơh thêi, dhơn ratơơq kung kah lơh kala ađêi.25Nek palơq môôn-đô, ng'kơi đóng manưih achêk ve chóóm bâân kơi thêi ađêi, lơq dhơn ratơơq nek kơi kala ađêi, nek dyóp aq. La palââng ơi đóók kala đong nek Bê-êên-xê-buun, nek manưih đong ưng kala dyơq parneq lơh tơk n'nal mơ!26Kơi achêk, óóq kakhin piđó, ơi kah ve hau rau bâân gơp pađơp hơq e kah bâân tapakah, bâân kadrêi palââp hơq e kah bâân palââng n'nal.27Rau thêi truuih móón adhi anó tơơt dhiq kanam, phaai yuur praaq tơơt dhiq brương, lơq rau adhi anó xâng dhiq katór, phaai truuih karơ dhiq pabhung đong.28Óóq braaih kakhin toom nôôq đu leng chêt achak araang hơq yươq chóóm leng chêt ravaai. Bơơi phaai braaih kakhin Yaang ve chóóm leng kaxiêt tabhơt ravaai palơq achak araang dhiq kalóóng bóng óih nek lơh.29Kah alua bơơr panong achim a-iih chóóm baan palơq janaaq mưi xu kah alua? Lơq yươq mưi panong panâ kalóóng nôôq piđó e n'tôq leq katiêk lơh tââq karnóq kiêng ưng Ama adhi anó.30Hơq nek chênh xok dhiq akoq adhi anó, tabhơt nek kung ơi bâân yaap.31Taai ađek, óóq kakhin; adhi anó kiiq liêm bơk lơh akóón achim a-iih.32Kơi achêk, ting chanak, hơq nek tabhơt dhơ dhangaai e đơơp chanót leq thêi toom mat palââng, nek thêi kung e đơơp chanót leq manưih ađek toom mat Ama thêi dhiq pleng.33Bơơi dhơ dhangaai đu dyiin thêi toom mat palââng, nek thêi kung e dyiin manưih ađek toom mat Ama thêi dhiq pleng.34Óóq ngóq kơi thêi bhral buôn đââng yươq rauha dhiq katiêk. Thêi kah bhral buôn đââng yươq rauha, hơq nek bhươt dhaau.35Ơi thêi bhral buôn têêng akóón padruuih tarjơl lóóiq akonh ađêi, akóón pađiil tarjơl lóóiq akan ađêi, mamaai tarjơl lóóiq akan kayiik ađêi;36lơq manưih brau ưng mưi nak nek nôôq ngaai kalóóng parlóng đong ưng manưih achêk.37Ngaai nh'nhơr akonh môôiq akan lơh thêi nek kah chóóm ađaang palơq thêi; ngaai nh'nhơr akóón padruuih môôiq akóón pađiil lơh thêi nek kung kah chóóm ađaang palơq thêi.38Lơq ngaai đu kah đuôl n'lóóng m'baang chatông ađêi lơq ting tapun thêi nek kah chóóm đaang palơq thêi.39Ngaai chêk tabâân parmông ađêi e têêng tabil ađó, hơq ngaai bil parmông ađêi ơi taai thêi e ve bâân ađó.40Ngaai pơh yaauq adhi anó nek pơh yaauq thêi, lơq ngaai pơh yaauq thêi nek pơh yaauq Yaang ơi đu kayua thêi.41Ngaai pơh yaauq mưi manưih đââng taruuih nek taai dhanóók tarnêêng manưih đââng taruuih e bâân đơơp kaliim haanh ưng manưih đââng taruuih, lơq ngaai pơh yaauq mưi chanak bhơt liêm nek taai dhanóók tarnêêng manưih bhơt liêm e bâân đơơp kaliim haanh ưng manưih bhơt liêm.42Lơq la ngaai đóng mưi kalóóng nôôq đu katưưiq katit ađô ơm mưi choom đơơk chriêt mơ taai dhanóók tarnêêng môôn-đô, nek alua thêi praaq palơq adhi anó, manưih ađek dhơ dhakơi kah bil kaliim haanh ưng ađêi.”
FAR EAST BROADCASTING COMPANY