Luke7
1Xong xók Ađó paluch dyóp paraaq ưng ađêi toom rau tameng xâng ưng manưih dhanuôr, Ađó mót leq kalóóng kanóón Ka-bê-na-um.2Xók achêk, mưi dhơn ratơơq achêk ưng takóh kadhâng koq linh, hơq ađek nek manưih nh'nhơr bhlơng palơq ađó, xók bâân ka-ai klơp, kanóq chêt.3Xong xók xâng leq Chuôq Jê-su, ađó kayua nôôq takóh bhươl Jo Thaaiq tơk palơq Chuôq, nhan gavơh Chuôq tơk đóng Chuôq paq payươh dhơn ratơơq ưng ađêi.4Xók nôôq manưih achêk tơk palơq Chuôq Jê-su, piđó mââl lóóm nhan gavơh Ađó, móón kơi ađô: “Abhươp achêk nek đaang đóng thêi e têêng tarnêêng ađô leq ađó,5taai ađó nh'nhơr dhanuôr nôôq he, ađó kung ơi têêng đong gươl leq nôôq he.”6Hayơq, Chuôq Jê-su yuur vôôiq palơq piđó. Bơơi xók Ađó ơi dyơq đan dham đong kah mơ changaai, hayơq takóh kadhâng koq linh kayua nôôq manưih parjơơk vôôiq móón palơq Ađó: “Kakoh Chuôq, nhan óóq panhok lóóm, taai aku kah ađaang đóng Amei mót leq đong aku.7Chênh taai ađek, aku patơk mơ kung kah lêi ađêi kala ađaang đóng tơk lum Amei. Dhơ kơi ađek, nhan Amei praaq mapaleh, hayơq dhơn ratơơq aku nek bâân yươh ka-ai.8Ơi aku nek kung manưih bâân patơơt raraal karơ kataai, hơq ve linh raraal kataai ưng aku, lơq aku kayua ađó ađô: ‘Vôôiq aq,’ nek ađó vôôiq; hayơq palơq ađó đu lââng: ‘Tơk nô leq,’ nek ađó tơk; lơq palơq dhơn ratơơq ưng aku: ‘Phaai têêng tarnêêng ađô,’ nek ađó têêng.”9Xók Chuôq Jê-su xâng kơi achêk, Ađó lóng chrih xâng leq akonh ađek, hơq palâh leq tanóói manưih bơk xók vôôiq ting ađêi, Ađó praaq: “Aku praaq palơq adhi anó, patơk mơ dhiq I-sơ-ra-êên, aku kung kah glêh lêi lóóm huuiq kơi ađek.”10Xók nôôq manưih bâân kayua chô lóóiq leq đong, piđó lêi manưih dhơn ratơơq xók ơi khe karơ.11Tarnêêng ơi vaaih xók tangêi tatun, Ađó mót leq mưi kanóón bâân đóók nek Na-iin, nôôq môôn-đô Ađó lơq manưih dhanuôr bơk bhlơng xók ting vôôiq palơq Ađó.12Dhalam xók Chuôq Jê-su đan tơk leq palóng kanóón nek lêi tôôh, palââng glâk pagluh mưi nak ơi chêt, nek akóón padruuih mưi ưng amêêq ađêi (amooq nek pađiil kamaai), mưi tanóói nh'jang bơk manưih dhanuôr tââq kalóóng kanóón ting vôôiq palơq amooq.13Xók lêi amooq, Chuôq vaaih lóóm kayô ka-er leq amooq, hayơq Ađó móón palơq amooq: “Óóq nhiim.”14Vôôiq pađan, Ađó kadhâng leq taraang, nek nôôq manưih xók glâk dyương parngau. Hayơq Ađó móón: “Akóón padruuih, aku móón amei, nek yuur tơơt.”15Manưih chêt yuur tơơt lơq tââp papraaq, hayơq Chuôq pajaau ađó leq amêêq ưng ađó.16Hơq nek, rau kakhin kapơn dhuum tabhơt, piđó bhi haanh Yaang Pleng, móón kơi ađô: “Mưi manưih đââng taruuih gamak bhlơng ơi bâân yuur tabhral dhiq m'pơng nôôq he” lơq kơi ađô: “Yaang Pleng ơi mót tham dhanuôr Ađó.”17Taruuih ađô leq Ađó đââr plok luch xưưq Ju-đê lơq dyóp xưưq xaang đan tóór.18Nôôq môôn-đô ưng Jang truuih lóóiq đóng ađó leq dyóp rau ađek. Lơq xong xók kayua dhaloong bơơr môôn-đô tôôh ưng ađêi, hayơq Jang19kayua nhiđó tơk leq Chuôq, tamóh: “Thêi nek Yaang phaai bhral, môôiq nôôq yi dyơq kơng đương rââm Yaang lââng?”20Xók tơk leq Chuôq, nôôq manưih achêk móón: “Jang Bap-tiit kayua bơơr yưa tơk leq thêi, kơi ađô: ‘Thêi nek Yaang phaai bhral, môôiq nôôq yi dyơq kơng đương rââm Yaang lââng?’”21Leq chênh jơ achêk, Ađó payươh bơk ngaai yươh ka-ai dreh, ka-ai karuôq lơq abhưi bóq, Ađó kung têêng đóng bơk manưih kabaang bâân lêi.22Đóng ââi, Ađó praaq palơq nhiđó: “Xong xók val chô, nek truuih lóóiq leq Jang rau dhơơm bơơr nhưa ơi lêi lơq xâng: manưih kabaang bâân brương mat, manưih khuch ke jađaang vôôiq, manưih tơơt bhơơi bâân sek, manưih tung xâng n'nal, manưih chêt bâân têêng đóng mamông lóóiq, manưih ngeeo bâân xâng taruuih liêm,23lơq phươk đóng ngaai đu yươq bâân n'đóih lơt ơi taai Aku.”24Tatun ađek, xong xók nôôq manưih đââng paraaq ưng Jang chô lơh, Ađó tââp praaq palơq manưih dhanuôr leq Jang: “Adhi anó vôôiq mót leq kalóóng kruung vơng đóng lêi hau? Mưi tanââm karbho bâân adhiiq paveq alua?25Palâh lóóiq, adhi anó vôôiq gluh đóng lêi hau? Mưi manưih xơp kun aau palơq bhaai ramaanh alua? Lêi tôôh, nôôq manưih kalóóng kun aau liêm kre lơq mamông sương si nek tơơt kalóóng đong bhua.26Hayơq bơơi, adhi anó vôôiq gluh đóng lêi hau? Mưi manưih đââng taruuih eh? Alua, aku móón palơq adhi anó, nek lơh mưi manưih đââng taruuih dyơq.27Achêk nek leq ađó hơq paraaq ađô ơi bâân xaraq: ‘Nô, Aku kayua dhơn đââng paraaq Aku vôôiq loom toom mat Akóón,ađó e dhoon kalơng ưng Akóón toom mat Akóón.’28Aku praaq đóng adhi anó n'nal, kalóóng nôôq manưih đu tââq pađiil n'niên, kah ngaai nek gamak lơh Jang, bơơi manưih katưưiq tââm dhiq kalóóng katiêk Yaang Pleng nek gamak lơh ađó achêk.”29(Xók ơi tameng xâng, nek dyóp ngaai, patơk tabhơt nôôq manưih chik pagoop jêên, maar móón Yaang Pleng nek bhơt liêm, xók đơơp bap-teem ting pheep bap-teem ưng Jang.30Bơơi nôôq manưih Pha-ri-si lơq nôôq takóh pachóóm gani ơi kah đơơp kanóq kiêng ưng Yaang Pleng đóng leq ađêi, xók kah đơơp ađó têêng bap-teem.)31“Kơi ađek nek, aku e marchơng nôôq manưih leq klaang đơơi ađô palơq hau rau? Piđó thê ngaai?32Piđó thê kơi kabhuh paniên tơơt dhiq dham babaan, dhaloong dhabơ xóng piđó, piđó praaq: ‘Nôôq yi plong aluôt đóng nôôq pe hơq nôôq pe kah đơơp tanâât. Nôôq yi babóóch chaxuul kalau kalêêng hơq nôôq pe kah đơơp nhiim kalau.’33Taai Jang Bap-tiit ơi bhral, kah cha beng, kung kah ơm buôh, nek nôôq pe móón: ‘Ađó ađek bâân abhưi bóq.’34Akóón Manưih ơi bhral, cha lơq ơm, nek nôôq pe móón: ‘Lêi tôôh, mưi manưih n'thaam cha lơq n'thaam ơm, parjơơk ưng kabhuh manưih pagoop jêên lơq kabhuh manưih ve matu!’35Bơơi rau tarbech galang ơi bâân tapaq liêm taai tabhơt akóón anaaq ưng ađêi.”36Xók achêk, mưi kalóóng sôôq nôôq manưih Pha-ri-si kayua Ađó đóng cha vaar palơq ađêi. Xók ơi mót leq kalóóng đong manưih Pha-ri-si achêk, Ađó tơơt dhiq baang chacha.37Lêi tôôh, ve mưi manưih pađiil kalóóng kanóón, hơq pađiil ađek nek manưih ve matu. Xók bâân n'nal kơi Ađó xók tơơt dhiq baang chacha kalóóng đong manưih Pha-ri-si, pađiil đââng mưi beq klóng palơq ngok kađôôq dhơu thum,38lơq tơk dyương hót hóng, đan dhiq dyung Chuôq, hơq nhiim. Ađó tââp têêng padyêp dyung Chuôq palơq đơơk mat, hayơq ađó dyuut đơơk mat palơq xok dhiq akoq ađêi, chum dyung Chuôq lơq xut dhơu thum đóng.39Xók manưih Pha-ri-si, nek manưih ơi kayua Chuôq, lêi kơi ađek, ađó ađek tư móón kalóóng lóóm, kơi ađô: “La ađó ađô nek manưih đââng taruuih, nek ađó ađek alua phaai n'nal manưih pađiil đu kadhâng tơk ađêi nek ngaai lơq ng'kơi dhơq manưih ađô, kơi akan ađek nek manưih matu lơt.”40Đóng ââi bóóp, Chuôq Jê-su praaq palơq ađó: “Si-môôn, aku ve rau ađô đóng móón palơq amei.” Ađó ađek móón: “Thêi ơơi, nhan bhiêk móón!”41“Ve bơơr chanak manơơq ưng mưi nak buôn đóng vaq jêên achêk. Mưi chanak manơơq xââng hariêng đơ-ni-ê, hayơq manưih tôôh manơơq xââng jêt.42Xók piđó maar kah ve đóng chróót, kala đóng vaq ơi lơơi nơơq miq nhiđó. Hayơq kơi ađek, ngaai kalóóng sôôq bơơr chanak e nh'nhơr ađó achêk lơh?”43Xók Si-môôn pei ââi, ađó móón: “Aku kanóq kơi ađô manưih đu kala manơơq ơi lơơi bơk lơh.” Chuôq praaq palơq ađó: “Amei móón pâng bhlơng.”44Hayơq palâh leq manưih pađiil, Chuôq praaq palơq Si-môôn: “Amei lêi manưih pađiil ađô kah? Aku mót leq đong ưng amei. Amei kah đóng aku đơơk raau dyung, dyơq ađó pei padyêp dyung aku palơq đơơk mat, hayơq dyuut nôôq ađek palơq xok ưng ađêi.45Amei ơi kah đóng aku chanum chanâ, dyơq ađó tââq bhêêl aku vôôiq mót, ơi kah dhêi chum dyung aku.46Amei kah xut dhơu leq akoq aku, dyơq ađó ơi xut dyung aku palơq dhơu thum.47Taai kơi ađek, aku móón palơq amei, matu ưng ađó ađô, dhơ bơk, ơi bâân lơơi lơt, ơi ađó ađô nh'nhơr bơk. Dyơq ngaai bâân lơơi lơt m'bưưiq nek nh'nhơr m'bưưiq.”48Hayơq Chuôq praaq akan ađek: “Matu lơt ưng amei ơi bâân lơơi.”49Nôôq manưih đu tơơt dhiq ađek tââp vaaih tapraaq dhiq m'pơng piđó: “Ađó ađô nek ngaai hơq kung lơơi matu?”50Hayơq Chuôq praaq palơq manưih pađiil: “Lóóm huuiq ưng amei ơi paq amei. Nek vôôiq kalóóng yươq rauha.”
FAR EAST BROADCASTING COMPANY