Luke6
1Tarnêêng ơi vaaih leq mưi tangêi Sa-baat, Chuôq Jê-su xók vôôiq kóh nôôq hare aviq, lơq môôn-đô Ađó takat kanuung aviq, kataar dhiq têi, hayơq cha.2Bơơi ve nôôq manưih Pha-ri-si móón: “Hau nôôq pe chóóm têêng rau kah chóóm đóng pheep kalóóng tangêi Sa-baat?”3Xók ââi bóóp piđó, Chuôq Jê-su praaq palơq piđó: “Nôôq pe kah glêh đok leq tarnêêng đu Đa-viit ơi têêng xók bhua lơq nôôq manưih tơơt palơq ađêi ha-ul cha hơ?4Ng'kơi bhua ơi mót leq kalóóng đong Yaang Pleng, pei beng dhiq baang bhanuôih, bhua cha lơq nh'xóóng đóng nôôq manưih đu ting vôôiq palơq ađêi, đu beng achêk kah chóóm pheep cha, chapiên mơ palơq nôôq takóh kadhâng bhanuôih giêl.”5Hayơq Ađó praaq palơq piđó ađek: “Akóón Manưih nek Chuôq ưng tangêi Sa-baat.”6Tarnêêng ơi vaaih xók mưi tangêi Sa-baat đu lââng, Chuôq Jê-su mót leq kalóóng đong gươl truuih pachóóm, lơq dhiq ađek ve mưi chanak padruuih, tapaang têi atươm ưng ađó ơi dyóói.7Bơơi nôôq takóh pachóóm gani lơq manưih Pha-ri-si đương chamet đóng lêi Ađó, lêi Ađó ve payươh kalóóng tangêi Sa-baat kah, đóng piđó ve bâân chêk kaauq patu Ađó.8Bơơi Ađó n'nal rau karnóq ưng piđó, hayơq Ađó praaq palơq manưih đu dyóói têi: “Nek yuur dyương lơq gluh dyương dhiq m'pơng nôôq yi.” Manưih achêk yuur dyương lơq gluh dyương dhiq ađek.9Chuôq Jê-su praaq palơq piđó: “Aku tamóh nôôq pe, la pâng ting kơi gani kalóóng tangêi Sa-baat nek chóóm têêng liêm môôiq têêng môôp, paq parmông môôiq leng manưih?”10Xong xók hangiêk lêi dyóp ngaai xirvir, Ađó praaq palơq ađó achêk: “Nek jarơ têi ưng amei.” Ađó achêk ting têêng lơq têi ađó bâân yươh.11Bơơi piđó bing lóóm kabhróónh lơq tapraaq xóng ađêi lêi piđó ve chóóm têêng hau rau palơq Chuôq Jê-su.12Tarnêêng vaaih kalóóng nôôq tangêi achêk, ađek nek Ađó đơk leq bôôl đóng nhan gavơh, lơq Ađó ơi meh n'drươh brương kalóóng rau praaq chiên palơq Yaang Pleng.13Xók tangêi tame ơi tơk, Ađó dhaloong nôôq môôn-đô ađêi, lơq chââih majêt bơơr chanak tââq kalóóng piđó, hơq Ađó kung đóók majêt bơơr chanak manưih achêk nek sưưq-đô, ađek nek:14Si-môôn, manưih đu Chuôq kung đóók achak nek Phi-e-rơ, adhi padruuih ađó nek En-rê, Ja-kơ, Jang, Phi-liip, Ba-thê-lê-mi,15Ma-thi-ơ, Thô-ma, Jang akóón A-phê, Si-môôn nek manưih bâân đóók nek Xê-lôôt,16Ju-đa akóón Ja-kơ, lơq Ju-đa Ich-ka-ri-ôôt nek manưih xar đu têêng tamôôp.17Xong xók vôôiq dhuônh palơq piđó ađek, Ađó dyương dhiq mưi dham katiêk klung bhang palơq mưi ganơr manưih nôôq môôn-đô Ađó, lơq tanóói dhanuôr palơq parbơk manưih bơk tơk tââq plok xưưq Ju-đê lơq Jê-ru-sa-leem, kung kơi xưưq tóór taxiiq Ti-rơ lơq Si-đôôn,18nôôq manưih achêk ơi tơk đóng tameng xâng Ađó lơq đóng bâân payươh tââq nôôq ka-ai dreh ưng ađêi. Nôôq manưih bâân abhưi môôp panhok kung bâân payươh.19Tabhơt tanóói manưih bhiêk tabâân kơi xuui leq Ađó taai mataai raman gluh tââq Ađó lơq payươh dyóp ngaai.20Hayơq Chuôq Jê-su, mat Ađó riing lêi nôôq môôn-đô ưng Ađó, lơq praaq: “Phươk đóng adhi anó nek manưih ngeeo, ơi katiêk Yaang Pleng nek ưng adhi anó.21Phươk đóng adhi anó xók ađôk ha-ul, ơi adhi anó e bâân kabhôôq dyóp. Phươk đóng adhi anó xók ađôk nhiim kalau, ơi adhi anó e bhuui kachang.22Adhi anó bâân phươk xók palââng geet adhi anó, xók piđó m'peq lơơi adhi anó, praaq paxê lơq tabil achak adhi anó pakơi manưih đu aak ơi taai Akóón Manưih.23Kalóóng tangêi ađek, nek bhuui marhaal lơq tanâât yayar ơi, lêi nô, kaliim haanh ưng adhi anó dhiq pleng nek gamak bhlơng, taai abhươp avuôq ưng piđó ơi têêng palơq nôôq manưih đââng taruuih ting kơi ađek.24Dhơ kơi ađek, ayô đóng adhi anó, nek manưih kavaan, taai adhi anó ơi đơơp rau tabhơơl ưng ađêi.25Ayô đóng adhi anó nek manưih xók ađôk kabhôôq kajrê, taai adhi anó e ha-ul. Ayô đóng adhi anó xók ađôk kachang kakrươh, ơi adhi anó e ka-ai ranguôq lơq nhiim kalau.26Ayô đóng adhi anó xók bâân dyóp ngaai maar praaq liêm leq ađêi, ơi abhươp avuôq ưng piđó kung têêng praaq ting kơi ađek palơq nôôq manưih đââng taruuih chachââr.27Bơơi Aku móón palơq adhi anó, nôôq ngaai xók tameng xâng, nek nh'nhơr brau ađêi lơq têêng praaq paliêm palơq manưih geet ađêi.28Phaai nhan phươk đóng manưih tóh taaiq adhi anó lơq gavơh nhan đóng ngaai đu chanaaq janah adhi anó.29Palơq ngaai m'bhah adhi anó dhiq tabók hót ađô, nek đóng luôn tabók hót tôôh, dyơq manưih pei n'drooih aau chaguôk ưng adhi anó, nek adhi anó kung óóq jư kadhâng aau kalóóng tââq manưih ađek.30Dhơ dhangaai nhan gavơh adhi anó, phaai đóng, lơq óóq pachô lóóiq tââq manưih đu pei ve rau ưng adhi anó.31Adhi anó kiêng palââng têêng đóng ađêi ng'kơi, phaai têêng leq piđó kơi achêk.32La adhi anó nh'nhơr ngaai dhơơm nh'nhơr ađêi, hayơq ađek nek n'tââq ve ơơn palơq adhi anó? Taai chênh manưih ve matu kung nh'nhơr manưih nh'nhơr ađêi.33La adhi anó têêng praaq liêm palơq manưih đu têêng praaq liêm palơq ađêi, hayơq ađek nek n'tââq ve ơơn palơq adhi anó? Manưih ve matu kung têêng dhalam kơi ađek.34La adhi anó đóng palââng vaq hơq adhi anó rââm đơơp lóóiq tââq piđó, hayơq ađek nek n'tââq ve ơơn palơq adhi anó? Manưih đu ve matu kung đóng manưih đu ve matu vaq, đóng đơơp lóóiq dhalam kơi ađek.35Bơơi phaai nh'nhơr brau ađêi lơq têêng praaq paliêm palơq piđó, phaai đóng vaq xók kah rââm đơơp lóóiq, hayơq kaliim haanh ưng adhi anó e nek gamak bhlơng, adhi anó e nek akóón ưng Yaang Bhơt Yaal, ơi Ađó dyơq lóóm nh'nhơr nek palơq manưih tabil mlơơi lơq môôp aak.36Phaai ve lóóm kayô ka-er, pakơi Ama ưng adhi anó ve lóóm kayô ka-er.37Óóq xêi lơt, nek adhi anó e lalua yươq rau bâân xêi lơt. Óóq kaauq lơt nek adhi anó e lalua yươq bâân takaauq lơt. Phaai lơơi lơt, nek adhi anó e bâân lơơi lơt.38Phaai pei đóng, nek rau e bâân đóng leq adhi anó: mưi phơn bang paliêm — bâân niêl ralet, bâân pakơr đóng dhaluônh, têêng đóng bing bhlaai — piđó e n'toh leq kađung aau adhi anó. Ơi adhi anó bang n'đó n'đơq, nek mơ achêk e bâân bang lóóiq leq adhi anó.”39Ađó kung truuih leq piđó mưi babi: “Manưih kabaang kah ve chóóm đââng kalơng manưih kabaang, pâng kah? Kah lua bơơr nhiđó maar e n'tôq leq bóng alua?40Môôn-đô nek kah lơh thêi, bơơi dyóp nak xók bâân pachóóm dyóp liêm e xar thê kơi thêi ađêi.41Hau adhi anó lêi xanaak kalóóng mat mưi adhi anó ađêi, hơq adhi anó kah lêi mandreh n'lóóng dhiq kalóóng mat ưng ađêi?42Hau kơi adhi anó ve chóóm praaq palơq adhi anó ađêi: ‘Anó ơơi, đóng aku vươih pagluh xanaak tââq kalóóng mat amei’ xók chênh ađêi kala adhi anó kah lêi mandreh n'lóóng dhiq kalóóng mat ađêi kala? Manưih paliêm dhiq bóóp tôôh! Laloom tââm, phaai pei pagluh mandreh n'lóóng tââq mat ađêi, hayơq adhi anó chóóm lêi drêh dróói hơq pei xanaak dhiq kalóóng mat adhi anó ađêi.43Ơi kah ve tââm n'lóóng liêm bóóng pale môôp, kơi lââng, kung kah ve tââm n'lóóng môôp bóóng pale liêm.44Bơơi dyóp n'lóóng bâân n'nal tââq pale ưng n'lóóng ađek. Palââng kah leh pale tarung dhiq tââm axông, hayơq palââng kung kah leh pale nho tââq tââm jaraau.45Manưih liêm tââq rau đu liêm takarong ưng lóóm vaaih rau liêm, dyơq manưih aak tââq kalóóng rau aak vaaih rau aak. Ơi tââq rau bing bhlaai kalóóng lóóm hơq bóóp ađêi praaq.46Hau adhi anó đóók aku: ‘Chuôq, Chuôq,’ hơq kah đơơp têêng kơi paraaq aku pachóóm?47Aku e đóng adhi anó n'nal manưih đu tơk palơq aku, xâng paraaq aku lơq ting têêng nôôq praaq ađek nek ngaai thê.48Manưih ađek thê kơi manưih têêng đong, hayơq manưih ađô ơi uôch katiêk padhơuq lơq têêng bhanơn dhiq hóng dharaaq. Hayơq, xók đơơk tuh lim tơk, parloong đơơk kajuôh leq đong achêk, bơơi ađó yươq đuôh têêng kalơm đong, taai đong ađek ơi bâân têêng liêm mưng.49Bơơi manưih xâng hơq kah đơơp ting têêng nek thê kơi mưi nak têêng đong dhiq katiêk hơq kah vaaih bhanơn pariiq, xók đơơk tuh kajuôh mót leq đong ađek, ađó n'drươh hachươp kalơm, lơq rau hư bil đong xaang ađek nek gamak bhlơng.”
FAR EAST BROADCASTING COMPANY