John21
1Lơh nôôq tarnêêng achêk, Chuôq Jê-su vil pakah chênh ađêi đóng nôôq môôn-đô dhiq taxiiq Ti-bê-ri-aat. Ađó ơi yuur pakah Ađêi nô kơi ađô:2nôôq môôn-đô tơơt palơq xóng piđó — Si-môôn Phi-e-rơ, Thô-ma, bâân đóók nek Đi-điim, Na-tha-na-êên, manưih mađó Ka-na kalóóng parah Ga-li-lê, palơq nôôq akóón padruuih ưng Xê-bê-đê, lơq bơơr chanak lââng kalóóng nôôq môôn-đô ưng Ađó.3Si-môôn Phi-e-rơ móón piđó: “Aku vôôiq trah kadhóóng.” Piđó móón palơq ađó: “Nôôq yi kung vôôiq palơq amei.” Piđó vôôiq gluh lơq jađaang dyók mưi beq bhuông, đu piđó ơi kah rau ve bâân kalóóng hayum ađek.4Xók achêk, xók ơi nek dhahô brương aq, Chuôq Jê-su dyương dhiq xuôr taxiiq, dhơ kơi achêk, nôôq môôn-đô kah n'nal kơi ađek nek Chuôq Jê-su.5Kơi achêk hayơq Chuôq Jê-su praaq palơq piđó: “Nôôq akóón ơơi, kah ve kadhóóng rau đóng đah?” Piđó ââi bóóp Ađó: “Kah.”6Bơơi Ađó kayua piđó: “Nek m'peq jươl hót tóór atươm bhuông, nek nôôq pe e ve bâân kadhóóng.” Kơi achêk piđó m'peq jươl, hơq kah ve dyóp praan đóng n'drơh ađó padyók taai parbơk kadhóóng bơk bhlơng.7Xong ađek, môôn-đô tôôh, nek manưih đu Chuôq Jê-su nh'nhơr, móón palơq Phi-e-rơ: “Ađek nek Chuôq.” Kơi chêk hơq, xong xók Si-môôn Phi-e-rơ xâng kơi achêk nek Chuôq, hơq pươr aau nguôi n'dhoop chak ađêi (taai ađó dyơq tơơt chak lalôh) hayơq chrơm ađêi leq taxiiq.8Dyơq nôôq môôn-đô lââng nek vôôiq dhiq bhuông (taai piđó tơơt tââq tóór yươq changaai, chapiên n'đơq mơ bơơr hariêng ku-đê), ting galôôi m'beq jươl bing kadhóóng.9Xong ađek, xók bhêêl piđó dhaluônh tââq bhuông dyók leq kakóóng, piđó lêi tapeh óih rahââng dyơq rahôôq, kadhóóng lơq beng mi dyơq boh dhiq papiing.10Chuôq Jê-su yua piđó: “Phaai đââng m'bưưiq nôôq kadhóóng đu adhi anó tame bâân nô leq.”11Taai kơi achêk, Si-môôn Phi-e-rơ vôôiq đơk lơq n'drơh jươl leq tóór, liêm bing mưi hariêng xââng jêt pe panong kadhóóng gamak. Lơq dhơ ve lóng bơk kadhóóng, jươl ơi yươq bâân tanteek.12Chuôq Jê-su praaq palơq piđó: “Phaai vôôiq nô leq cha vaar yayóng”. Kơi lââng kah ngaai kalóóng nôôq môôn-đô khin tamóh Ađó: “Amei nek ngaai?” Piđó maar ơi n'nal kơi achêk nek Chuôq.13Chuôq Jê-su jađaang vôôiq hayơq pei beng lơq pađơơp leq piđó, palơq kadhóóng kung kơi achêk.14Ađôk ơi nek chu đu pe Chuôq Jê-su pakah ađêi leq nôôq môôn-đô, tââq xók Ađó bâân mamông lóóiq tââq kan chêt.15Hayơq xók piđó ơi cha vaar yayóng, Chuôq Jê-su praaq palơq Si-môôn Phi-e-rơ: “Si-môôn akóón ưng Jang, amei nh'nhơr thêi lơh nôôq rau ađô kah?” Phi-e-rơ móón palơq Ađó: “Chuôq ơơi, ve, Amei n'nal kơi aku nh'nhơr Amei.” Chuôq praaq palơq ađó: “Phaai paar ban nôôq trưưu akóón ưng thêi.”16Chuôq vil praaq palơq ađó chu đu bơơr: “Si-môôn, akóón ưng Jang, amei nh'nhơr thêi kah?” Phi-e-rơ ââi bóóp Ađó: “Chuôq ơơi, ve, Amei n'nal kơi aku nh'nhơr Amei.” Chuôq Jê-su praaq palơq ađó: “Phaai jư kađââng nôôq trưưu ưng thêi.”17Chuôq praaq palơq ađó chu đu pe: “Si-môôn, akóón ưng Jang, amei nh'nhơr aku kah?” Phi-e-rơ ka-ai ranguôq taai Chuôq tamóh ađó chu đu pe: “Amei nh'nhơr thêi kah?” Ađó ââi palơq Chuôq: “Kakoh Chuôq, Amei n'nal bhơt dyóp rau; Amei n'nal kơi aku nh'nhơr Amei.” Chuôq Jê-su praaq palơq ađó: “Phaai paar ban nôôq trưưu ưng thêi.18Alua, alua, Thêi praaq palơq amei, xók amei dyơq n'dhóm, amei tư ađêi xeet xaneet lơq vôôiq n'đó leq ađêi kiêng, bơơi xók amei leq takóh, amei e jarơ têi ađêi gluh, lơq manưih lââng e paxeet xaneet đóng amei hayơq đââng tơk dhiq đu amei kah kiêng.”19Chuôq praaq rau ađek, đóng chaleq kơi chêt n'đó kơi hơq Phi-e-rơ e têêng cha-iil tabah Yaang Pleng. Praaq paraaq achêk xong, Chuôq yua ađó: “Vêq ting thêi.”20Xók hangiêk lóóiq, Phi-e-rơ lêi môôn-đô đu Chuôq Jê-su nh'nhơr vôôiq ting tatun, nek manưih kalóóng vaar cha blót ơi ganương leq tadhưa Chuôq, hayơq tamóh: “Chuôq ơơi, ngaai nek đu tamôôp Amei?”21Taai kơi achêk, xók lêi manưih achêk, Phi-e-rơ móón palơq Chuôq Jê-su: “Chuôq ơơi, hayơq manưih ađô e ng'kơi?”22Chuôq Jê-su praaq palơq ađó: “La thêi kiêng manưih achêk bhiêk tơơt lóóiq patơk bhêêl thêi bhral, nek ve rau chóóm pâng tơk amei? Amei phaai ting thêi.”23Kơi achêk nek paraaq ađô yuur tanđôôr dhiq kalóóng nôôq adhi anó kơi môôn-đô ađek e yươq chêt. Bơơi Chuôq Jê-su kah praaq palơq ađó kơi manưih ađek e yươq chêt, bơơi nek: “La thêi kiêng manưih achêk bhiêk tơơt lóóiq patơk bhêêl thêi bhral, nek ve rau chóóm pâng tơk amei.”24Ađôk chênh nek môôn-đô truuih đuui leq nôôq tarnêêng ađô, lơq nek manưih xaraq lóóiq nôôq tarnêêng achêk, hơq nôôq he n'nal kơi paraaq truuih đuui ưng ađó achêk nek lalua dhalam.25Lơh dyơq, kung ve bơk tarnêêng lââng đu Chuôq Jê-su ơi têêng, leq nôôq tarnêêng achêk, la xaraq lóóiq tabhơt dyóp tarnêêng, nek aku kanóq bhơt hóng katiêk patơk mơ kah dyóp dham đóng kađôôq bhơt nôôq bha-aar ơi bâân taxaraq.
FAR EAST BROADCASTING COMPANY