John20

1Yayóng marư-rư tangêi đu tarnââp kalóóng tapól tangêi, biêh dyơq bhêêl pleng kanam, Ma-ri Ma-đơ-leen vôôiq tơk ping lơq lêi dhơl gamak ơi bâân talan tââq xaal ping.2Kơi achêk hơq, ađó mut vôôiq lơq tơk palơq Si-môôn Phi-e-rơ nek palơq môôn-đô tôôh, nek manưih Chuôq Jê-su nh'nhơr, hayơq ađó móón leq piđó: “Palââng ơi patââi Chuôq gluh tââq ping, lơq nôôq yi kah n'nal palââng lơơi Ađó n'dhiq bơơi bóói.”3Kơi chêk nek Phi-e-rơ lơq môôn-đô tôôh gluh leq nguôi lơq vôôiq tơk ping.4Miq bơơr nhiđó mandrươh yuur mut, hơq môôn-đô tôôh mut đâh lơh Phi-e-rơ lơq tơk dhiq xaal ping laloom.5Xong xók kagong chok leq bhange lêi, manưih achêk bâân lêi nôôq tala bhaai len dyơq dhiq ađek, bơơi kah mót leq kalóóng.6Si-môôn Phi-e-rơ, ting tatun tơk dham, vôôiq mót kalóóng ping. Ađó bâân lêi nôôq tala bhaai len dyơq dhiq ađek,7dyơq beq khan bâân pươr dhiq akoq Ađó nek kah bêch madhiq palơq nôôq tala bhaai len, hơq bâân puôl lóóiq tơơt n'tua mưi dhiq.8Kơi achêk hayơq, bhêêl achêk, môôn-đô tôôh, nek manưih vôôiq tơk dhiq ping laloom, kung jađaang mót; manưih achêk bâân lêi lơq huuiq.9Taai piđó biêh kah ơi n'nal paraaq Bha-aar Yaang Pleng leq tarnêêng Ađó phaai mamông lóóiq tââq kan chêt.10Xong ađek, bơơr môôn-đô vil val chô dham ưng ađêi.
11Dyơq Ma-ri nek dyương nhiim tơơt hót nguôi xaal ping. Hayơq ađó drươh nhiim, drươh kóp bhange leq kalóóng ping.12Ađó lêi bơơr dhơn pleng xơp aau bhóók chadhah dyơq tơơt dhiq dham tabêch xaak Chuôq Jê-su, mưi chanak tơơt hót akoq, lơq mưi chanak tơơt hót dyung.13Nôôq chanak achêk tamóh ađó: “Amóóq ơơi, kơi amei nhiim?” Ađó ââi bóóp piđó: “Taai palââng patââi Chuôq aku xooq, lơq aku kah n'nal palââng lơơi Ađó dhiq bơơi bóói.”14Praaq nôôq paraaq achêk xong, ađó palâh chak leq hót hóng nek lêi Chuôq Jê-su ơi dyương dhiq ađek, hơq ađó kah n'nal kơi ađek nek Chuôq Jê-su.15Chuôq Jê-su praaq palơq ađó: “Amóóq ơơi, kơi amei nhiim? Ngaai amei chik chêk?” Taai ađó ngóq kơi ađek nek manưih têêng bhươn, hơq ađó móón: “Abhươp ơơi, la amei ơi đââng paxooq Ađó, nhan móón đóng aku dham đu amei lơơi Ađó, hayơq aku e đââng paxooq Ađó.”16Chuôq Jê-su dhaloong ađó: “Ma-ri.” Xók palâh lóóiq, ađó móón palơq Chuôq palơq paraaq Hi-baaq-laai: “Ra-bu-ni” (paraaq achêk ngi kluôh nek: “Thêi”).17Chuôq Jê-su praaq palơq ađó: “Óóq kadhâng leq thêi, taai thêi biêh kah ơi vôôiq tơk paleq Ama ơi; bơơi phaai vôôiq lum adhi anó ưng thêi lơq móón palơq piđó ‘Thêi e vôôiq tơk paleq Ama thêi kung nek Ama ưng adhi anó, lơq Yaang Pleng ưng thêi kung nek Yaang Pleng ưng adhi anó.’”18Ma-ri Ma-đơ-leen vôôiq, truuih lóóiq đóng nôôq môôn-đô kơi ađô: “Aku ơi lêi Chuôq,” lơq nôôq paraaq Ađó ơi truuih đóng amei.
19Xong tơk, xók bhêêl habu blót kalóóng tangêi ađek, nek tangêi đu tarnââp kalóóng tapól tangêi, lơq nôôq palóng dhiq dham đu nôôq môôn-đô tơơt maar bâân kađơp lóóiq taai kakhin manưih Jo Thaaiq, nek Chuôq Jê-su bhral lơq dyương dhiq m'pơng piđó lơq Ađó praaq palơq piđó: “Yươq rau ha đóng adhi anó.”20Praaq paraaq achêk xong, Ađó đóng piđó lêi bơơr têi lơq hót bharêêu ưng ađêi. Xók achêk, nôôq môôn-đô maar bâân bhuui marhaal xók bâân lêi Chuôq.21Xong ađek, Ađó vil praaq palơq piđó: “Yươq rau ha đóng adhi anó. Ama ơi kayua thêi ng'kơi, nek thêi kung kayua adhi anó kơi achêk.”22Lơq xong xók praaq paraaq achêk, Ađó gahó parhââm dhiq piđó lơq móón piđó: “Phaai pei đơơp Chuôq Yaang Liêm.23La nôôq ngaai adhi anó lơơi matu đóng, nek matu piđó bâân tarlơơi đóng; la nôôq ngaai adhi anó kadhâng jư lóóiq, nek matu piđó bâân kadhâng jư lóóiq.”
24Bơơi Thô-ma, mưi kalóóng majêt bơơr môôn-đô, manưih bâân đóók nek Đi-điim, kah tơơt nek palơq piđó xók Chuôq Jê-su tơk.25Kơi achêk hơq, nôôq môôn-đô lââng móón palơq ađó: “Nôôq yi ơi lêi Chuôq.” Bơơi ađó móón palơq piđó: “La aku kah lêi dham đinh dhiq têi Ađó, lơq lơơi kabró têi aku dhiq dham đinh, kung kơi ravơq têi aku dhiq hót naar Ađó, nek aku alua dhakơi e kah huuiq.”
26Takóól tangêi tatun nôôq môôn-đô Ađó vil tơơt kalóóng đong, lơq Thô-ma tơơt palơq piđó. Xók nôôq palóng maar bâân kađơp mưng, Chuôq Jê-su bhral lơq dyương dhiq m'pơng hayơq Ađó praaq: “Yươq rau ha đóng adhi anó.”27Nek kơơq, Ađó yua Thô-ma: “Phaai lơơi kabró têi amei leq ađô hơq lêi tapaang têi thêi. Lơq nek pei têi amei lơơi leq hót naar thêi. Óóq val xar kah huuiq, bơơi phaai huuiq.”28Thô-ma ââi lóóiq lơq móón palơq Ađó: “Kakoh Chuôq aku lơq Yaang Pleng aku.”29Chuôq Jê-su praaq palơq ađó: “Ơi taai amei ơi lêi thêi, hơq amei huuiq. Phươk đóng nôôq ngaai kah lêi hơq huuiq.”
30Xong ađek, Chuôq Jê-su kung têêng bơk mataai chrih lââng toom mat nôôq môôn-đô Ađó, hơq nôôq tarnêêng chêk nek kah bâân xaraq kalóóng bha-aar ađô;31dyơq nôôq rau ađô bâân xaraq lóóiq nek đóng adhi anó huuiq kơi Chuôq Jê-su nek Chuôq Paq Manưih, Akóón Yaang Pleng, lơq đóng adhi anó ve bâân parmông xók huuiq dhiq dhanóók Ađó.

FAR EAST BROADCASTING COMPANY

https://app.library.bible/content/15a813fef7fefb05