Hebrews11

1Lóóm huuiq nek rau kadhâng tamưng leq nôôq rau bâân đương rââm, nek tarnêêng pakah dhalam leq nôôq rau kah chóóm lêi.2Taai tââq lóóm huuiq, nôôq manưih takóh hanua ơi bâân truuih xêi liêm.3Tââq lóóm huuiq nôôq he bâân n'nal pleng katiêk ađôk ơi bâân tavaaih xong tââq paraaq praaq ưng Yaang Pleng, đóng rau chóóm lêi ơi kah tavaaih xong tââq rau ve chóóm lêi.4Tââq lóóm huuiq A-bêên ơi tapôông leq Yaang Pleng mưi bhanuôih liêm lơh marchơng palơq Ka-iin, hơq tââq ađek ađó ơi bâân đóók nek bhơt liêm, xók Yaang Pleng pagluh rau pei đơơp dhiq nôôq bhanuôih ưng ađó, lơq tââq lóóm huuiq, A-bêên bhiêk dyơq praaq dhơ ơi achêt.5Tââq lóóm huuiq Hê-nok bâân đââng padyók, yươq glêh pâng rau chêt đok, lơq “ađó kah bâân chêk lêi, taai Yaang Pleng ơi đââng padyók ađó vôôiq.” Taai laloom xók đââng padyók ưng ađêi, ađó ơi bâân đóók nek têêng iêm lóóm Yaang Pleng.6Bơơi kơi ađek, kah ve lóóm huuiq nek kah chóóm têêng iêm lóóm Yaang Pleng, taai rau kajuq phaai têêng ting kơi palơq manưih tơk palơq Yaang Pleng nek phaai huuiq kơi Ađó ve mat lơq Ađó nek Yaang đóng chaner leq nôôq ngaai chik-chêk Ađó.7Tââq lóóm huuiq, lơh xók bâân patrêh tơk nôôq rau kah glêh bâân lêi, nek taai bhi kakhin, Nô-ê ơi têêng mưi beq bhuông koom đóng rau trôông paq ưng parlóng đong ađêi, hơq lơh ađek, ađó ơi xêi kaauq manưih dhiq hóng katiêk lơq val xar manưih pei đơơp rau bhơt liêm ting kơi dhiq lóóm huuiq.8Tââq lóóm huuiq, taai bâân tadhaloong kayua, Ap-ra-haam ơi xâng bóóp hơq yuur vôôiq tơk dhiq hơq ađêi e đơơp têêng karvaan kabhôôq, lơq ađó ơi yuur vôôiq xók kah n'nal ađêi yuur vôôiq n'leq.9Tââq lóóm huuiq, ađó mamông dhiq katiêk hươq kơi tamóói tââq katiêk lââng, xók ơi mamông kalóóng pơơq pađơ palơq I-saak lơq Ja-kôôp, bơơi nôôq manưih makơi ting đơơp karvaan ưng palơq mưi paraaq hươq,10Taai ađó bhiêk rââm đương mưi kanóón ve bhanơn pariiq, hơq manưih kadhơng têêng lơq manưih yuur têêng ưng kanóón achêk nek Yaang Pleng.11Tââq lóóm huuiq, patơk mơ chênh Sa-ra ơi bâân pei đơơp chóóm đuôh đóng pabhaq đađââng dhalam xók ơi lơh ganah kre liêm ưng n'dhóm kamór, taai ađó bâân lêi Yaang ơi hươq nek yươq tadhơ.12Taai kơi ađek, kung tââq dhiq mưi chanak manưih, lơq dhơ bâân lêi kơi achêt aq, nôôq klaang akóón chachau ơi bâân gluh n'niên, kơi parbơk kók dhóól nôôq chatur dhiq pleng, lơq kơi xuôr kah đuôh chóóm yaap dhiq tóór taxiiq.13Kalóóng lóóm huuiq, tabhơt nôôq manưih ađô ơi chêt xók kah ơi pei đơơp nôôq paraaq hươq, bơơi chalaang lêi lơq pơh chap yayar piđó tââq changaai, palơq móón ađêi kơi nek manưih katiêk lââng lơq tamóói vôôiq changaai dhiq katiêk.14Taai ngaai dhơơm praaq nôôq rau kơi ađek đóng lêi drêh kơi piđó dyơq chik-chêk mưi xưưq xaang.15La piđó hei tơk xưưq xaang hơq piđó ơi tââq ađek yuur vôôiq, hơq dhakơi nek piđó kung ve bhêêl buôn val chô lóóiq.16Bơơi xók ađôk piđó rahaal mưi dhiq liêm lơh, achêk nek xưưq xaang dhiq pleng. Taai ađek Yaang Pleng yươq kachiit mat leq piđó, đóng bâân đóók nek Yaang Pleng ưng piđó, taai Ađó ơi ravang lơơi mưi kanóón đóng piđó.17Tââq lóóm huuiq, Ap-ra-haam tapôông I-saak xók đơơp klêêu lêi, tơk mơ xong xók bâân đơơp nôôq paraaq hươq, ađó ơi đââng tapôông akóón padruuih mưi tââm ưng ađêi,18hơq leq akóón achêk, ve paraaq móón kơi ađô: “Tââq I-saak, dhong nooi ưng akóón e bâân đóók achak,”19taai ơi karnóq pajal kơi ađô Yaang Pleng ve mataai têêng đóng mamông lóóiq, kơi dhơ tââq akan chêt, lơq kalóóng babi klêch, ađó ơi đơơp lóóiq akóón ađêi tââq dhiq ađek.20Kung tââq lóóm huuiq, I-saak nhan phươk đóng Ja-kôôp lơq Ê-saau leq nôôq tarnêêng e tơk vaaih.21Tââq lóóm huuiq, xók đan chêt, Ja-kôôp nhan phươk đóng ting chanak akóón padruuih ưng Jô-seep, lơq ganương leq tahaal tarlââng ađêi, ađó chakoh tarkól bhuôih haanh.22Tââq lóóm huuiq, xók tơk parlưch đơơi, Jô-seep praaq pahei tơk ganơt yuur vôôiq ưng akóón chachau I-sơ-ra-êên lơq pató piđó leq xaak ng'haang ưng ađêi.23Tââq lóóm huuiq, lơh xók bâân n'niên, Môôi-se ơi bâân akonh akan ađêi đââng kadrêi kalóóng pe kaxe taai piđó lêi akóón paniên ploq liêm, lơq piđó kah kakhin paraaq parâng ưng bhua.24Tââq lóóm huuiq, xók ơi taha, Môôi-se kah đươi bâân đóók nek akóón padruuih ưng akóón pađiil kamór Pha-ra-ôôn.25Klóóih dhiq ađek, ađó pei đơơp janah kung palơq dhanuôr Chuôq lơh nek pei đơơp bhuui sương pađơ m'bưưiq ưng matu lơt.26Ađó haring lêi rau jarnah ưng manưih bâân xut dhơu nek rau kabhôôq kavaan kiiq gamak lơh nôôq jơơng karvaan ưng Ai Kơp, taai ađó lêi kơi pagiit madhiq malóóm tơk phơn chaner ưng ađêi.27Tââq lóóm huuiq, ađó xooq lơơi Ai Kơp, kah kakhin ganơt grâ ưng bhua, taai ađó đơơp pei jruôn kađung kơi ngóq xók bâân lêi Yaang kah chóóm lêi.28Tââq lóóm huuiq, ađó têêng Bhiêk Jalơh lơq rau havươch ahaam, đóng Yaang leng kaxiêt nôôq akóón taha tââm yươq leng pâng tơk dhanuôr.29Tââq lóóm huuiq, dhanuôr vôôiq chaang lơh Taxiiq Bhrôông kơi ngóq vôôiq lơh katiêk kakóóng, nek dhiq hơq manưih Ai Kơp ơi bâân galuôn mamông xong xók pagluh praan pei karơ.30Tââq lóóm huuiq, nôôq garóóng kariing dhơl kanóón Jê-ri-kô preh harlơm hachươp, xong xók bâân vôôiq tring praang bhluuch tapól tangêi.31Tââq lóóm huuiq, pađiil baan achak Ra-haap yươq chêt madhiq palơq nôôq manưih kah huuiq, lơh xók vôôiq pơh nôôq manưih choop lêi palơq lóóm xamươr.32Lơq aku ve chóóm praaq paxóng hau rau dyơq? Taai tangêi kaxe e kah dyóp đóng aku truuih đuui tơk Gê-đê-ôôn, Ba-raak, Sam-sôôn, Jeep-thê, Đa-viit, lơq miq Sa-mu-êên palơq nôôq manưih đââng taruuih,33nek nôôq manưih, đươi lóóm huuiq, ơi đuôh têêng kala nôôq katiêk, xêi xanêi dhalam liêm, bâân đơơp paraaq hươq, chabit bóóp agôôt,34tapat pat par-aang râng ưng óih, klươch lơh tââq pla bhươt, bâân bơk praan tââq dhiq dhur tââm, bâân vaaih grâ karơ dhiq tarvei tarleng, têêng đóng kabhuh linh katiêk palââng phaai chaluui.35Bơk pađiil đơơp lóóiq xóng anó ơi chêt ưng ađêi tââq tarnêêng mamông lóóiq, bơơi nôôq manưih lââng bâân janah, kah đương rââm bâân paloh, đóng piđó ve chóóm đươi tââq rau mamông liêm kre lơh;36dyơq phơn lââng dyơq ơi đơơp klêêu lêi xók tââq nôôq paraaq ajóóch kachang lơq ng'gươi tarnaach, hơq lơh ađek dyơq nek taklooiq kađaai lơq takról kalóóng đong kanam.37Piđó bâân glơm dhơl, bâân takut bơơr, piđó đơơp taklêêu lêi, chêt tââq pala bhươt leng tabhơt, piđó vôôiq leq ađek leq tôôh kalóóng ng'kar trưưu, ng'kar beeq, bâân thiêuq hat, bâân janah chanaaq, bâân kađiq kađiêp;38(hơq hóng katiêk nek kah ve đaang palơq piđó), bâân đââng vôôiq chuul vuul kalóóng kruung vơng, bôôl booiq, nôôq gơơp bóng lơq trôông lihôq dhiq katiêk.39Lơq xong xók ơi bâân haanh liêm ơi taai lóóm huuiq, tabhơt nôôq manưih ađô kah bâân đơơp lóóiq paraaq hươq đóng ađêi,40taai Yaang Pleng ơi loom kanóq rau liêm lơh tapâng tơk nôôq he, buôn đóng kah ve nôôq he, piđó kah chóóm bâân têêng đóng dyóp liêm.

FAR EAST BROADCASTING COMPANY

https://app.library.bible/content/15a813fef7fefb05