Luke20
1วันหนึ่งเมื่อพะเยซูกำลังสั่งสอนและประกาศเรื่องข่าวดีอยู่ในบริเวณโบด พวกหัวหน้าตุ๊เจ็า พวกครูสอนกฎปฏิบัติ และพวกผู้นำอาวุโสมาหาพะอ๋ง2พวกเปิ้นถามว่า “จ้วยบอกหน่อยว่าแกมีต๊ะทธิ์อะหยังไปขับไล่พวกคนขายของนั้น ใครให้ต๊ะทธิ์นี้กั้บแก”3พะเยซูตอบไปว่า “ตอบเฮามาก่อนว่า4พิธีจุ่มน้ำของยอห์น มาจากสวรรค์หรือมาจากมนุษย์”5พวกเปิ้นปรึกษากั๋นว่า “ถ้าเฮาตอบว่า ‘มาจากสวรรค์’ เปิ้นก็จะถามว่า ‘แล้วเป่นได๊พวกสูถึงไม่เจื้อยอห์นล่ะ’6แต่ถ้าเฮาตอบว่า ‘มาจากมนุษย์’ คนก็จะเอาหินขว้างเฮา เพราะจาวเฮือนพวกนี้เจื้อว่า ยอห์นเป๋นผู้อู้แทนพะเจ็า”7พวกเปิ้นก็เลยตอบพะอ๋งว่า “เฮาไม่ฮู๊ว่ามาจากไหน”8พะเยซูก็เลยตอบพวกเปิ้นว่า “ถ้าอย่างนั้น เฮาก็จะไม่บอกเหมือนกั๋นว่าเฮาใช้ต๊ะทธิ์ของใครยะสิงเหล่านี้”9พะเยซูเล่าเรื่องเปรียบเทียบให้คนฟังว่า “มีพ่อจายคนหนึ่งยะสวนองุ่น แล้วให้จาวสวนเช่า แล้วเปิ้นก็ไปอยู่ต่างประเทศเป๋นเวลาเมิน10เมื่อถึงเวลาเก็บเกี่ยว เปิ้นส่งทาสคนหนึ่งมาฮับส่วนแบ่งจากผลองุ่น แต่พวกคนเช่าปิ๊กยะร้ายทุบตีทาสคนนั้น และไล่ปิ๊กไปมือเปล่า11สูของสวนองุ่นก็เลยส่งทาสแห็มคนหนึ่งไป พวกคนเช่าก็ยะร้ายทุบตีเปิ้นและยะให้เปิ้นอับอายขายหน้า แล้วไล่ปิ๊กไปมือเปล่าแห็ม12สูของสวนก็ส่งคนตี้สามไปแห็ม พวกคนเช่าก็ยะเหมือนเดิม ยะเปิ้นจนบาดเจ็บสาหัสแล้วโยนออกไปนอกสวน13สูของสวนองุ่นอู้กั้บตั๋วว่า ‘จะยะจะได๋ดี ฮู๊แล้ว เฮาจะส่งฮูกพ่อจายสุดตี้รักของเฮาไป พวกนั้นจะต้องเคารพยำเกรงฮูกพ่อจายเฮาแน่ๆ’14แต่พอพวกคนเช่าหันฮูกพ่อจายของเปิ้น ก็ปรึกษากั๋นว่า ‘นี่ไงผู้ฮับมรดก ให้พวกเฮาฆ่ามันเลย สวนนี้จะได้โต๊กเป๋นของพวกเฮา’15พวกเปิ้นก็เลยจับฮูกพ่อจายสูของสวนโยนออกไปนอกสวนและฆ่าเปิ้น พวกสูคิดว่า สูของสวนจะยะจะได๋กั้บพวกคนเช่าเหล่านั้น16เปิ้นจะปิ๊กไปฆ่าพวกคนเช่าสวนเหล่านั้น และยกสวนองุ่นให้กั้บคนอื่นๆ” เมื่อผู้คนได้ยินอย่างนั้น ก็อู้ขึ้นว่า “อย่าให้เป๋นอย่างนั้นเลย”17แต่พะเยซูก็จ้องพ้อเปิ้นและอู้ว่า “ถ้างั้น ข้อความนี้ในพระคัมภีร์หขนาดถึงอะหยัง ‘หินก้อนนี้ตี้ช่างก่อสร้างขว้างแล้วปิ๊กกลายมาเป๋นหินก้อนตี้สำคัญตี้สุด’18คนตี้ล้มทับหินก้อนนั้น ร่างกายก็จะหักเป๋นท่อนๆ แต่ถ้าถูกหินนี้ล้มทับ คนนั้นก็จะแหลกละเอียด”19เมื่อพวกครูสอนกฎปฏิบัติ และพวกหัวหน้าตุ๊เจ็าฮู๊ตัวว่าพะเยซูกำลังเปรียบพวกเปิ้นว่าเป๋นคนเช่าสวนพวกนั้น พวกเปิ้นก็เลยหาทางตี้จะจับพะเยซูตอนนั้นเลย แต่ก็ไม่กล้าเพราะกั๋วประชาชน20พวกเปิ้นจึงเฝ้าป่อพะเยซูอย่างใกล้ชิด และส่งพวกสอดแนมตี้แกล้งยะเป๋นคนดีเปื่อไปจับผิดกำอู้ของพะอ๋ง เปื่อจะได้จับตัวพะอ๋งส่งไปให้ผู้พิปากษาและสูเมืองโรม21พวกสอดแนมถามพะเยซูว่า “อาจารย์คับ พวกเฮาฮู๊ว่ากำอู้และกำสอนของต่านนั้นถูกต้องและต่านก็ไม่กั๋วว่าคนอื่นจะคิดอย่างไร และสอนความแต๊ในสิงตี้พะเจ็าต้องการให้ยะ22อาจารย์จ้วยบอกหน่อยว่า มันถูกต้องโตยกฎหรือเปล่าตี้จ่ายภาษีให้กั้บซีซาร์”23พะเยซูฮู๊ถึงอุบายของพวกเปิ้น จึงบอกพวกเปิ้นว่า24“ไหน ส่งเหรียญอันหนึ่งมาให้ป่อต๊ะ นี่รูปใคร แล้วมีจื้อใครสลักอยู่” พวกเปิ้นก็ตอบว่า “ซีซาร์”25พะอ๋งจึงอู้กั้บพวกเปิ้นว่า “ของๆซีซาร์ก็ให้ซีซาร์ ของๆพะเจ็าก็ให้พะเจ็า”26พวกเปิ้นไม่สามารถจะจับผิดกำอู้ของพะอ๋งต่อหน้าผู้คนได้ ได้แต่ตะลึงในกำตอบจนถึงกั้บอู้ไม่ออก27มีพวกสะป่อสีบางคนมาหาพะเยซู พวกนี้ไม่เจื้อว่าคนต๋ายแล้วจะฟื้นขึ้นจากความต๋าย เปิ้นถามพะอ๋งว่า28“อาจารย์คับ โมเสสเขียนสั่งไว้ว่า ถ้าพ่อจายคนไหนต๋ายและขว้างเมียไว้โดยยังไม่มีฮูก ก็ให้น้องพ่อจายของคนต๋ายแต่งกั้บแม่ยิ๊งม่ายคนนั้น จะได้มีฮูกไว้สืบสกุลให้กั้บพี่พ่อจายของเปิ้น29ครั้งหนึ่งมีปี่น้องอยู่เจ็ดคน พี่พ่อจายคนโตแต่งงาน แล้วต๋ายไปแต่ยังไม่มีฮูก30น้องคนตี้สองก็ได้แต่งกั้บแม่ยิ๊งม่ายนั้น แต่เปิ้นก็ต๋ายไปและยังไม่มีฮูกเหมือนกั๋น31น้องคนตี้สามก็ยะแบบเดียวกั๋น และในตี้สุด ปี่น้องทั้งเจ็ดคนนี้ก็ได้แต่งงานกั้บแม่ยิ๊งนั้น แล้วพวกเปิ้นก็ต๋ายโดยไม่มีฮูกสักคน32ต่อมาแม่ยิ๊งคนนั้นก็ต๋ายโตย33จ้วยบอกหน่อยต๊ะว่า ในวันตี้ทุกคนฟื้นขึ้นจากความต๋ายนั้น ผู้แม่ยิ๊งคนนี้จะเป๋นภรรยาของใคร ในเมื่อทั้งเจ็ดคนนั้นก็เคยเป๋นสามีของเปิ้น”34พะเยซูจึงตอบว่า “คนในโลกนี้เต่านั้นตี้แต่งงานกั๋น และยกให้เป๋นผัวเมียกั๋น35ส่วนในโลกหน้า คนตี้เหมาะสมตี้จะได้อยู่ตี้นั่นและฟื้นขึ้นจากความต๋ายแล้ว จะไม่แต่งงานกั๋น หรือยกให้เป๋นผัวเมียกั๋นแห็มต่อไปแล้ว36เป๋นไปไม่ได้ตี้พวกเปิ้นจะต๋ายแห็มครั้ง แต่เปิ้นจะเป๋นเหมือนเตวดาและจะเป๋นฮูกของพะเจ็า เพราะพะเจ็าจะยะให้เปิ้นฟื้นขึ้นจากความต๋าย37เรื่องการฟื้นขึ้นจากความต๋ายนี้ ขนาดโมเสสก็ยังอู้ถึงเลย ตอนตี้เปิ้นเขียนเรื่องพุ่มไม้ตี้ลุกเป๋นไฟ เปิ้นได้ฮ้ององค์สูจีวิดว่า ‘พะเจ็าของอับราฮัม พะเจ็าของอิสอัค และพะเจ็าของยาโคบ’38พะเจ็าเป๋นพะเจ็าของคนมีจีวิด ไม่ใช่ของคนต๋าย เพราะสำหฮับพะเจ็าแล้วทุกคนยังมีจีวิดอยู่”39พวกครูสอนกฎปฏิบัติบางคนชมพะเยซูว่า “อาจารย์ อู้ได้แอ่วหานักเลยคับ”40แล้วก็ไม่มีใครกล้าถามอะหยังพะเยซูแห็มเลย41พะเยซูอู้ว่า “สูอู้ได้จะได๋ว่า พระคริสต์เป๋นฮูกของดาวิด42ทั้งๆตี้ตัวดาวิดเองอู้ในหนังสือสดุดีว่า ‘พะเจ็าได้อู้กั้บองค์เจ้าจีวิดของเฮาผู้เป๋นพระคริสต์ว่านั่งลงทางขวามือของเฮา43จนกว่าเฮาจะยะให้ศัตรูของต่านเป๋นตี้วางตีนของต่าน’44แม้แต่ดาวิดยังฮ้องพระคริสต์ว่าเป๋นองค์เจ็าจีวิดเลย แล้วพระคริสต์จะเป๋นฮูกของดาวิดได้จะได๋”45ขณะตี้หม่ค้นกำลังฟังอยู่นั้น พะเยซูก็หันไปอู้กั้บพวกศิษย์ว่า46“ระวังพวกครูสอนกฎปฏิบัติให้ดี พวกนี้ชอบใส่เสื้อคลุมยาวๆเตียวไปมาให้คนกำนับโตยท้องตลาด และชอบนั่งในตี้สำคัญๆในตี้ประชุม และชอบนั่งตี้หัวโต๊ะในงานเลี้ยงต่างๆ47พวกเปิ้นมักจะโกงเอาเฮือนของแม่ยิ๊งม่าย และแกล้งอธิษฐานซะยืดยาวเปื่ออวดคน คนพวกนี้จะต้องถูกลงโทษหนักกว่าคนตี้ไม่ได้ยะอย่างนั้น”
Son Light Foundation