Mark12
1พะเยซูเล่าเรื่องเปรียบเทียบฮื๊อฟังว่า “มีป้อจายคนนึ่งเยี๊ยะสวนองุ่น เปิ้นล้อมฮั้วฮื็อรอบ ขุดบ่อย่ำองุ่น และแป๋งหอท่า เปิ้นฮื๊อจาวสวนมาเจ๊าสวนองุ่นอั่น ส่วนตั๋วเปิ้นเตียวไป๋เมิงไก๋2ตอนตึ๋งกั๋นเก็บเกี่ยวผลองุ่นเปิ้นก็ส่งทาสคนนึ่งมาฮับส่วนแบ่งจากผลองุ่นอั่น3แต่หมู่คนเจ๊าปิ๊กยั๊บทาสคนอั่นบุ๋บและไล่ปิ๊กไป๋มือเปล่า4เจ้าของสวนส่งทาสคนใหม่มาแฮ๋ม แต่คราวนี้หมู่คนเจ๊าก็ได้รุมกั๋นบุ๋บหัวเปิ้นและสูล้งเปิ้นจนอับอาย5เจ้าของสวนส่งแฮ๋มคนนึ่งมาแต่ก็ถูกฆ่า แล้วเปิ้นก็ยังส่งคนมาแฮ๋มเรื่อยๆ คนตี้เปิ้นส่งมาก็ถูกบุ๊บบ้าง ถูกฆ่าบ้าง6ซุ๊ดท้ายเจ้าของสวนเหลือคนเพียงคนเดียว คือลูกบ่าวซุ๊ดตี้ฮักของเปิ้น เปิ้นจึงส่งลูกบ่าวมา เปิ้นคึดว่า ‘หมู่อั่นจะต้องเคารพยำเกรงลูกบ่าวของเฮา’7แต่หมู่คนเจ๊าอู้กั๋นว่า ‘เปิ้นเป๋นผู้ฮับมรดก มาเร็วเข้า ฆ่ามันลุ สวนนี้จะได้ต๋กเป๋นของเฮา’8หมู่คนเจ๊าจึงยั๊บเปิ้นไป๋ฆ่า แล้วโยนซบขว้างออกไป๋นอกสวนองุ่น9โบ๋สูคึดว่าเจ้าของสวนจะเยี๊ยะจะได๋ เปิ้นจะมาฆ่าหมู่จาวสวนอั่น แล้วเอาสวนองุ่นอั่นไป๋ฮื๊อจาวสวนคนอื่นเจ๊าต่อ10โบ๋สูบะเคยอ่านพะคัมภีร์ข้อนี้หรือ ตี้ว่า‘หินก้อนนี้ตี้ช่างก่อแป๋งขว้างแล้ว ปิ๊กกลายเป๋นหินก้อนตี้สำคัญตี้ซุ๊ด11องค์เจ้าจีวิดเยี๊ยะฮื๊อเป๋นอย่างอั่นสำลับเฮา นี่เป๋นเรื่องเหลือเจื้อแต๊ๆ’”12ตอนหมู่ผู้นำจาวยิวฮู๊ตั๋วว่าพะอ๋งกำลังเปรียบหมู่เปิ้นว่าเป๋นคนเจ๊าสวนหมู่อั่น หมู่เปิ้นจึงหาตางตี้จะยั๊บพะอ๋ง แต่ก็บะกล้าเพาะว่าโก๊วหมู่คนหลาย หมู่เปิ้นจึงพากั๋นปิ๊กเฮือน13หมู่ผู้นำยิวส่งหมู่นักบวชจั๋นสูง และหมู่ตี้สนับสนุนจ้าวแป่นดินเฮโรด มาฮื๊อยั๊บปิ๊ดคำอู้พะเยซู14หมู่เปิ้นซอยพะอ๋งว่า “อาจ๋านครับ เฮาฮู๊ว่าตั้นเป๋นคนอู้ไหนคำอั่น บะโก๊วว่าผู้ได้จะคึดจะได บะหันสู่หน้าไผ และสอนความแต๊ในสิ่งตี้พะเจ๊าต้องการฮื๊อมนุษย์เยี๊ยะ จ้วยอู้หน่อยสิครับว่ามันถูกต้องตามกฎก๋ะตี้จะเสียต๋งฮื๊อกับซีซาร์”15พะอ๋งฮู๊ว่าหมู่เปิ้นมาหลอกซอยว่า “โบ๋สูมาหลอกยั๊บปิ๊ดเฮาจะได๋ ส่งเหรียญสตางค์มาให้เฮาอันนึ่ง”16หมู่เปิ้นจึงส่งเหรียญฮื๊อพะอ๋ง แล้วพะอ๋งซอยหมู่เปิ้นว่า “นี่เป๋นฮูปและจื้อไผ” หมู่เปิ้นอู้ว่า “ซีซาร์”17พะเยซูกะอู้ว่า “ของๆซีซาร์ก็ฮื๊อปิ๊กซีซาร์ และของๆพะเจ๊าก็ฮื๊อกับพะจ้าว” หมู่เปิ้นก็ทึ่งในคำอู้ของพะอ๋ง18หมู่สะดูสีมาหาพะอ๋ง (หมู่นี้บะเจื้อเรื่องการฟื้นขึ้นจากความต๋าย) หมู่เปิ้นซอยว่า19“อาจ๋านครับ โมเสสได้เขียนสั่งหมู่เฮาว่า ถ้าป้อจายคนไดต๋ายและขว้างเมียฮื็อโดยยังบะมีลูก ก็ฮื๊อน้องป้อจายของคนต๋ายอั่นแต่งงานกับหญิงม่ายคนอั่น จะได้มีลูกฮื็อสืบสกุลของปี้ป้อจายของเปิ้น20เตื้อนึ่งมีปี้น้องอยู่เจ็ดคน ปี้ป้อจายคนโตแต่งงานแล้วต๋ายไป๋แต่ยังบะมีลูก21น้องคนตี้สองก็มาแต่งงานกับแม่ม่ายของปี้ป้อจาย และเปิ้นก็ต๋ายไป๋โดยยังบะมีลูก น้องคนตี้สามก็มาเยี๊ยะอย่างเดียวกั๋น22เยี๊ยะจะอี้จนครบทั้งเจ็ดคนโดยบะมีไผมีลูกลุ แล้วซุ๊ดท้ายหญิงคนนี้ก็ต๋าย23ในวันตี้ตุ๊กคนฟื้นขึ้นจากความต๋ายอั่น แม่ยิ๋งคนนี้จะเป๋นเมียของไผ ในตอนทั้งเจ็ดคนอั่นก็เคยเป๋นสามีของเปิ้น”24พะเยซูว่า “โบ๋สูเข้าใจ๋ปิ๊ด นี่เพาะว่าโบ๋สูบะเข้าใจ๋พะคัมภีร์ และบะฮู๊จักฤทธิ์เดชของพะจ้าว25ตอนคนฟื้นขึ้นจากความต๋ายอั่น จะบะมีการแต่งงานหรือยกฮื๊อเป๋นผัวเมียกั๋นแฮ๋มอีก แต่หมู่เปิ้นจะเป๋นอย่างเดียวกับเตวดา26โบ๋สูบะเคยอ่านในหนังสือของโมเสสหรือ ในตอนตี้พุ่มไม๊ติดไฟแต่บะไหม้ พะเจ๊าอู้กับโมเสสว่า ‘เฮาเป๋นพะเจ๊าของอับราฮัม พะเจ๊าของอิสอัค และพะเจ๊าของยาโคบ’27พะเจ๊าบะได้เป๋นพะเจ๊าของคนต๋าย แต่เป๋นพะเจ๊าของคนมีจีวิด โบ๋สูเข้าใจ๋เรื่องนี้ปิ๊ดเมิ๊อดลุ”28มีคูสอนกฎปฏิบัติคนนึ่งตี้ยืนฟังหมู่เปิ้นซอยอู้กั๋นอยู่ตี้ฮั่น เปิ้นหันว่าพะเยซูอู้ได้ดีจะนัก จึงเข้าไป๋ซอยพะอ๋งว่า “กฎตึงมด ข้อไดสำคัญตี้ซุ๊ด”29พะเยซูอู้ว่า “ข้อตี้สำคัญตี้ซุ๊ดคือ ‘หมู่อิสราเอลฟังฮื็อดีๆ องค์เจ้าจีวิดพะเจ๊าของเฮาเป๋นองค์เจ้าจีวิดแต่เพียงผู้เดียว30ฮื๊อฮักองค์เจ้าจีวิดพะเจ๊าของเจ้าอย่างซุ๊ดใจ๋ ซุ๊ดจิต ซุ๊ดความคึด และซุ๊ดกำลังของเจ้า’31ข้อตี้สำคัญฮองลงมาคือ ‘ฮื๊อฮักมิตรเฮือนอย่างเดียวฮักตั๋วเก่า’ บะมีกฎข้อไดตี้ยิ่งใหญ่ไป๋กว่าสองข้อนี้แฮ๋ม”32คูสอนกฎปฏิบัติคนนี้ก็อู้กับพะเยซูว่า “อาจ๋านอู้ถูกต้องลุตี้ว่ามีพะเจ๊าเพียงองค์เดียว บะมีไอหยังแฮ๋มแล้วนอกจากพะอ๋งเต้าอั่น33และการฮักพะอ๋งซุ๊ดใจ๋ ซุ๊ดความคึด ซุ๊ดกำลัง และการฮักมิตรเฮือนอย่างเดียวฮักตั๋วเก่า สำคัญยิ่งกว่าการนำเครื่องเผาบูชาและเครื่องเซ่นไหว้ต่างๆมาถวายตามกฎแฮ๋ม”34พะเยซูหันเปิ้นอู้สวกจะนัก พะอ๋งก็อู้ว่า “สูอยู่บะไก๋จากเมิงของพะเจ๊าแล้ว” หลังจากอั่นก็บะมีไผกล้าซอยพะอ๋งแฮ๋มลุ35จ้วงตี้พะเยซูกำลังสอนอยู่ในวิหารอั่น พะอ๋งได้ซอยว่า “เป๋นไป๋ได้จะได๋ ตี้หมู่คูสอนกฎปฏิบัติอู้ว่าพะคริสต์สืบเจื้อสายมาจากดาวิด36ในตอนดาวิดเองได้อู้ตามตี้พะวิญญาณบริสุทธิ์ดลใจ๋ว่า‘พะเจ๊าอู้กับองค์เจ้าจีวิดของผมผู้เป๋นพะคริสต์ว่านั่งลงตางขวามือของเฮาจนกว่าเฮาจะเยี๊ยะฮื๊อศัตรูของตั้นถูกเหยียบอยู่ใต้ตี๋นของตั้น’37แม้แต่ดาวิดเองยังฮ้องพะคริสต์ว่า ‘องค์เจ้าจีวิด’ ลุ แล้วพะคริสต์จะเป๋นลูกของดาวิดได้จะได๋” มีคนจะนักตั้งอกตั้งใจ๋ฟังพะอ๋งสอน38พะอ๋งสอนว่า “ระวังหมู่คูสอนกฎปฏิบัติฮื๊อดี หมู่นี้จ๊อบใส่เสื้อกุมยาวๆเตียวไป๋มาฮื๊อคนคำนับตามกาด39หมู่นี้จ๊อบนั่งในตี้สำคัญตี้ซุ๊ดในตี้ปะชุม และจ๊อบนั่งหัวโต๊ะในงานเล่งต่างๆ40หมู่นี้โกงเอาเฮือนของหมู่แม่ม่ายไป๋ และสูล้งเยี๊ยะเป๋นอธิษฐานเสียยืดยาวฮื๊ออวดคน คนหมู่นี้จะต้องถูกลงโต้ดหนักกว่าคนอื่นตี้บะได้เยี๊ยะอย่างอั่น”41ตอนพะเยซูนั่งอยู่หน้ากล่องฮับสตางค์ในวิหารอั่น พะอ๋งนั่งพ้อคนใส่สตางค์ในกล่องกั๋น คนรวยๆก็ใส่สตางค์เข้าไป๋จะนัก42มีหญิงม่ายทุกคนนึ่ง ได้ใส่เหรียญทองแดงน้อยๆสองเหรียญ ลงไป๋43พะเยซูจึงฮ้องหมู่ลูกซิดเข้ามาและอู้ว่า “เฮาจะอู้ฮื๊อฮู๊ว่าหญิงม่ายทุกคนนี้ได้ใส่สตางค์เข้าไป๋ในกล่องฮับสตางค์อั่นจะนักกว่าตุ๊กๆคนตี้เอาสตางค์มาถวาย44เพาะว่าคนอื่นๆเอาสตางค์ตี้เหลือกิ๋นเหลือใจ๋มาฮื๊อ แต่หญิงม่ายคนนี้เอาสตางค์เล่งชีพตึงมดของเปิ้นมาฮื๊อ”
Empower Asia Bible Translation Movement