Wakolinto10
1Mbwiga zangu, nolonda mvimanye kua wasao wetu viwakalile wobita muiisi ya luwala, wose wakala wolongozigwa na wingu, kaidi wose wabita hagati ya bahali ndung'hu.2Viwalongozigwe na wingu na kubita hagati ya bahali wose wakala wabatizigwa na kua wajalusona wa Musa.3Wose waja ndia iija ilavigwe kulawa uchanha kwa Mulungu4na wang'wa mazi galavigwe na Muhe wa Mulungu, wang'wa kulawa mdibwe kulu dikalile dogenda nawo, iyo Kilisito mwenyego.5Hata ivo wengi wao Mulungu hanogeligwe nao, ivo wadanganika na mitufi yao ipwililika muluala.6Sambi gano gose gakwiga kumwetu, kochilakila cheye sekechilonde gehile kama viwasang'hane wao.7Seke muifugamile milungu ya nyang'iti kama viwatendile wanhu wamwenga, kama Mayandiko vigolonga, “Wanhu wakala woja na kung'wa, amala wema na kuvina chaka chaka kama wanhu hawammanyile Mulungu.”8Hebu sekemtende ugoni kama wamwenga wao viwatendile, wanhu ishilini na nhatu elufu wadanganika mdizua dimwe.9Seke chimgeze Mndewa kama wanhu wamwenga viwamgizile, kwambuli iyo walumigwa na nyoka wadanganika.10Sekemnung'hunike kama wamwenga viwatendile, na wakomigwa na mtumigwa wa kubananga wa kwa Mulungu.11Baho mbuli izo zose ziwapatile wao, zandikigwa ili gawe chilaguso kuchilakila cheye waja chikala mmazua gano gachikomelezo.12Kwaivo yoigesa kua kema goya kumtogola Mulungu, na yaitiganye seke yagwe mmalozo.13Magezo gampatile gago golawililaga kwa wamwenga chila zua. Mumtumanile Mulungu iyo hawaleka mgezigwe kubita vija udaho wenu. Haja muhagezigwa, komwing'hani udaho wa kufunya moyo na nzila ya kulawila.14Kwaivo mbwiga zangu, inegeni kufugamila milungu ya nyang'iti.15Nolonga na mweye kama wanhu mli na nzewele, gatongeni goya gano ganilonga.16Vichimwing'ha hewela Mulungu kwa chikombe chikitumila kwa ndia ya Mndewa, ivo hua hachiilumba hamwe kung'wa damu ya Kilisito? Na vichiumega mgate, ivo, hachiilumba hamwe kuja lukuli lwa Kilisito?17Kwa vija mgate uwo ni umwe, na cheye chili wengi cha lukuli lumwe, kwavija choilumba kuja mgate uwo umwe.18Loleni kama viweli Wayahudi wenyego, waja woja ndia itambikiligwe mchilemela, baho woilumba na kuija mchilemela.19Nolonda kulonga choni baho? Kua nyama itambikiligwe na milungu ya nyang'iti ni chinhu goya kubita ndia? Ivo, milungu ya nyang'iti ni mulungu kweli?20Habule! Chinilonga ni kua nhambiko wozilava wanhu hawammanyile Mulungu wovilavila vinyamkela, na sio Mulungu. Silonda mbe mweye muilumbe na wotambikila vinyamkela.21Hamdaha kung'wela chikombe cha Mndewa na chikombe cha vinyamkela, na hamdaha kuilumba kuja ndia muimeza ya Mndewa na mje ndia muimeza ya chinyamkela.22Hebu, chonda chimtende Mndewa yawe na migongo? Mogesa cheye china ludabwa ng'hani kubita iyo?23Molonga,wanhu wamwenga wolonga, “Ching'higwa ludabwa wa kusang'hana chochose,” Iyo kweli, mbali sio chila chinhu chofaya. “Ching'higwa nyafasi ya kusang'hana chila chinhu,” mbali sio chila chinhu chotaza wanhu kugangamala kwa kumtola Mulungu.24Iyoheni kuwasang'hanila ganogile wayenu badili ya kusang'hana ganogile gako mwenyego.25Dieni nyama ija iguligwa mdigulilo bila ya kuiuzauza ili sekemdununzike mmoyo.26Kwavija Mayandiko ga Mulungu gandikigwa, “Isi na vose viliumo ni va Mndewa.”27Munhu hamtogole Kilisito yahawagoneka kuja ndia yahawa moita baho dieni chochose chimwing'higwe. Seke muiuzeuze kwa chochose ili seke muigaze mmoyo.28Mbali munhu yahawalongeleni, “Ino nyama itambikiligwa na milungu ya nyang'iti,” baho seke mje kwavija chodaha kubananga kumtogola Mulungu.29Hano nolongela sio kwambuli ya kulumiza kutonga kwetu, mbali kwa ija yawalongele. Habali chinilonda nie mwenyego chilamuligwa chiyatonga munhu imwenga?30Yahawa noilumba kuja ndia iyo kuno nomwing'ha hewela Mulungu, habali wonilonga kwa ndia ija kwambuli ya kumwing'ha hewela Mulungu?31Baho, chochose chimsang'hana iwe ni kuja hebu kung'wa, sang'haneni gose kwambuli ya kumwing'ha hewela Mulungu.32Sekemuwatende Wayahudi hebu kwa Wagiliki sekewamtogole Kilisito.33Muwe kama nie noiyoha kusang'hana kwambuli ya gose gaja ganisang'hana, wanhu wose wawe wodeng'helela. Sio kama nosang'hana ivo kwambuli yangu mwenyego, ila kwambuli ya wanhu wengi wapate kuloholigwa.
The Word for the World International