BaRoma8
1Ndizo ke, akutjina wan'wa nlandu kwayibabo bamuna Khirisitu Yesu. (Basingayende ngekwenyama, banoyenda ngekwemeya.) 2Ngobe nlayo weMeya yebutjilo muna Khirisitu Yesu wandisunungula munlayo wejinyo nelufu.3Ngobe Ndzimu wathama nlayo tjawakakon'wa thama, wakaba nyolonyolo ngentha yenyama. Wakatumila Nkololo uwe eli mutjimo tjenhu wejinyo, akapa nlandu kujinyo,4kuyetila kuti kose kunohakiwa nenlayo kuhhadzisiwe mutili, iswi tisingatjile butjilo gwenyama koga titjila ngekweMeya.5Ibabo banotjila butjilo gwenyama mikumbulo yabo inokumbula kwenyama; koga ibabo banotjila ngekweMeya mikumbulo yabo inokumbula kweMeya.6Nkumbulo wenyama lufu, koga nkumbulo unolawugwa ngeMeya ubutjilo nekunyalala;7nkumbulo wenyama utjita kuNdzimu. Awutowhilila nlayo weNdzimu, lebeswa awungatange ukawuwhilila.8Nayibabo banotjila butjilo gwenyama abangahanhise Ndzimu.9Imwi, amutotjila munyama, koga motjila muMeya, hapa Meya yeNdzimu inogala mumuli. Kene yani nayani usina Meya yaKhirisitu muwunli, haata ali nhu waKhirisitu.10Koga hapa Khirisitu alimukuli, mbili uwo wakafa ngentha yejinyo, koga meya imhenyu ngentha yendulamo.11Koga hapa meya iye iwhoyo wakamusa Yesu kubafi igala mumuli, iye wakamusa Khirisitu Yesu kubafi unowhopa kakale mibili yenyu yenyama butjilo ngeMeya iye, iyo inowhogala mumuli.12Ndizo, makamu angu, tina nlandu, koga kusi kunyama, kuti titjile sekunoda nyama.13Ngobe hapa mutjila sekunohakiwa nenyama, mowhofa; koga hapa mungabulaya zwiyeto zwenyama ngeMeya, mowhotjila.14Ngobe bose banotungamigwa ngeMeya yeNdzimu, bana beNdzimu.15Ngobe amuzowamutjila meya yebulanda inomubgwiliza mukahla, koga makawamutjila meya yeba bana beNdzimu, kakale nayiyeyo Meya tolila titi, “Abha , Tate.”16Meya ngekwayo inobvumilana nemeya yedu, kuti tibana beNdzimu.17Hapa kuli kuti tibana beNdzimu, tinghalinhaka, nghalinhaka dzeNdzimu kakale tinghalinhaka kan'ompela naKhirisitu, hapa kuli kuti ngelebeswa todziyidzika bo mukudziyidzika kukwe kuyetila kuti tikudziwe bo mugudzo lile.18Ndobvuma dziyidzika kwedu kwemisi ino kuhomanana akungalizanyisiwe negudzo latinowhowamutjila.19Mbumbiko ngekuhanha, yakalindila zumbunugwa kwebakololo beNdzimu.20Ngobe mbumbiko yakapalaligwa netjimo tjayo, kusikuda kwayo, koga ngekuda kwayiwhoyo wakayipaladza, kwakalingiligwa21kuti mbumbiko tjekwayo inowhosunungugwa mubulanda gwekubola kakale inginisiwe mugudzo lelusununguko gwebana beNdzimu.22Toziba kuti mbumbiko yose inogomela, inakugwadziwa (sewetjikadzi etshibama) kudza kuwhoswika ngwenuwali.23Akuta kuli mbumbiko yoga, koga iswi tjekwedu bo, tina mitjelo yekutanga yeMeya, togomela mukati takalindila yetiwa bakololo nesunungugwa kwemibili yedu.24Ngobe mukugalabgwe ikoku takatjidziwa. Koga galabgwe muna tjinoboneka akuta galabgwe. Ndiyani ungagalabgwe muna tjaatjibe natjo kale?25Koga hapa tigalabgwe muna tjatisanhu tikabenatjo, totjilinda ngemoyonlefu.26Sayikoku, Meya inotibhatsha mubunyolonyolo gwedu. Atitoziba kuti titembezeleleni, koga Meya tjekwayo inotibhatsha ngeliga dikahana kusingake kukalebgwa ngematama.27Kakale iye unoholesesa mimoyo yedu unoziba nkumbulo weMeya, ngobe Meya inolebelekela bayengemali kuyendidzana nekuda kweNdzimu.28Kakale toziba kuti muzwinhu zose Ndzimu unohinga kuti kunakile ibabo banoda Ndzimu, bakadan'wa kuyendidzana nendongoloso iye.29Ibabo baakaziba kutanga, wakabva abahala kuti babe netjiso tjeNkololo uwe, kuyetila kuti abe mbano yenkololo kubunji gwebagalimoyo.30Ibabo baakahala wakabadana; kakale ibabo baakahala wakabalulamisa; kakale ibabo baakalulamisa wakabakudza.31Towhotini ngono, ngekwayikoku? Hapa Ndzimu alikuntha yedu, ndiyani ungagwisana naswi?32Iye usakagugutila Nkololo uwe, koga wakawumpila iswi tose, unokon'wa neni kuti panhu pan'ompela naye atipe zwinhu zose?33Ndiyani unowhotilika nlandu bakahagwa neNdzimu? Ndzimu ndiye nlulamisi webanhu.34Ndiyani unowana nlandu? NdiKhirisitu Yesu, iye wakatifila, pehhugwi kwayikoku wakamuka, ukuluboko gweludli gweNdzimu kakale unotilebelekela kuNdzimu.35Ini kunowhotipalalanya neludo gwaKhirisitu? Kungaba manikana, kene bulemo, kene dziyidziwa, kene hhala, kene yenda mbudlo, kene mbatsha, kene bhangatjeke?36Sekwakwaka kwagwa,“Ngentha yenyu tolingana nelufu hhuba lose;tobagwa semhwizi dzakalinda bhayiwa.”37Akuzojalo! Muzwinhu zose izwezwi takakunda kupinda kose kunda, tili muna iwhoya wakatida.38Ndinalebeswa kuti kene kuli lufu, kene butjilo, kene batumwa beNdzimu, kene batongi, kene zwinhu zwiyapo kene zwinohha, kene api masimba,39kene yenda pehhugwi, kene jitila pasi, kene tjipi tjakabumbiwa akungatithubukanye neludo gweNdzimu gumuna Khirisitu Yesu He wedu.
The Word for the World International