Zumbunulo13
1Ndakabona tjibanda tjibhuda mugungwa, tjina nyanga dzili gumi nemiholo ilikutondeka, pehhugwi kwenyanga kuna zwiyala zwiligumi, pehhugwi kwemiholo kwaka kuna zina linotuka Ndzimu.2Tjibanda tjandakabona tjaka tjinga ngwe, makumbo atjo aka enga makumbo ebhele, nlomo watjo unganlomo wehumba. Hangale yakapa tjibanda masimba ayo netjigalo tjayo tjobumambo netonga kukulu.3Umwe n'holo watjo waka unabanga linobulaya, banga linobulaya lakapola, hango yose yaka tjenamisiwa netjibanda ika tobela tjibanda.4Banhu bakanamata hangale, ngobe yaka yapa tjibanda masimba ayo, bakatembezela tjibanda beti, “Ndiyani wakafanana netjibanda, kakale ndiyani ungagwa natjo?”5Tjibanda tjakapiwa nlomo welebeleka mawhi ekuzwikudza nemasapa etuka Ndzimu, tjakabvumigwa hingisa masimba kwemimwedzi ili makumi mana nemibili,6tjibanda tjakahhula nlomo watjo tjileba masapa kuNdzimu, tjituka zina lile, nebugalo gugwe, nebanogala kudzimu.7Tjakapiwa masimba ogwa nebayengemali, kakale kuti tjibakunde, kakale tjakapiwa masimba pehhugwi kwenjudzi dzose, nebanhu bose, nendimi dzose, nehango dzose,8kakale bose bagele muhango banowhotjinamata, wose nhu unazina lisakakwagwa kusanhu kukasimulugwa hango mulukwalo gwebutjilo gweMwizana yakabhayiwa.9Unazebe ngaawhe.10Hapa kuna wakafanila ba ntapwa, unowhoyenda kubutapwa, hapa kuna wakafanila bulawa nebhangatjeke, unowhobulawa nebhangatjeke. Ikoku kohaka whililidzila nebugalimoyo kwebayengemali.11Ndakabona tjimwe tjibanda tjibhuda pasi kwehango, tjaka tjina nyanga mbili dzinonga dzemwizana tjaka tjilebeleka sehangale.12Tjakahingisa masimba ose etjibanda tjekutanga tjihinga tjakatjimilila, tjakathama hango nebanogala muyili kuti banamate tjibanda tjekutanga, tjinabanga lakagwilo tjibulaya laka lapola.13Tjibanda tjebubili itjetji tjakathama makaabadzo makulukulu, kose nejitisa moto ubva kudzimu uhha muhango banhu bakalinga,14tjakatjebela ibabo banogala muhango nemakaabadzo atjakabvumigwa thama mbeli kwetjibanda tjekutanga, tjiti ngababumbe tjibumbwa tjelemekedza tjibanda tjekutanga tjakatjakubadziwa nebhangatjeke koga tjikatjila.15Tjibanda tjobubili tjakapiwa masimba ofemela bupenyu mutjibumbwa tjetjibanda tjokutanga, kwakathama kuti tjibumbwa tjilebeleke, kakale tjiyeta kuti bakabelamba namata tjibumbwa tjetjibanda babulawe.16Tjakathama kuti banhu bose batukununu, nebakulu, bafumi nebahayi, bakasununguka nebalanda, basiwe lutjayo paluboko gweludli, kene pawhuma.17Kuyetila kuti kusibe nenhu unowhotenga kene tengesa kuhhe kwawhoya unalutjayo, gwakamilila zina letjibanda kene mbalo yezina latjo.18Ikoku kohaka butjenjebvu, iwhoyo unowhisisa, ngaabhate mbalo wetjibanda, ngobe mbalo iyeyo yakamilila zina lonhu, mbalo iyeyo makulu matanhatu anamakumi matanhatu nekutanhatu (666).
The Word for the World International