Jakobe4
1Ini tjinomusa kakabadzana pakati kwenyu, kakale ini tjinota mukagwa? Akutanjemulo dzenyu dzinogwisana mukati kwenyu?2Moyemula koga mukasibe nako; ndizo mubulaya. Motjiba koga mukasikuwane; ndizo mukakabadzana kakale mugwa. Amuna ngobe amutokumbila.3Mokumbila koga mukasiwamutjile, ngobe mokumbila nezila isi iyo, mokumbilila kuti hapa mawamutjidziwa mukuhingise mukuzwihanhisa.4Imwi banhu basingagalikebgwe! Amutoziba kuti bukhwinya nehango whubatjita tjeNdzimu? Ndizo ke unoyemula kuti abe nkhwinya wehango unozwithama tjita tjeNdzimu.5Kene mokumbula kuti lukwalo gunoti, “Una njemulo dzinahungu nekwemeya yaakata kuti igale mutili,” agutoleba lebeswa?6Koga ngoni dzatinowhigwa neNdzimu inji; ndizo lukwalo guti, “Ndzimu unonyanyayidzana nebanhu banozwikudza, koga unangoni kuna banozwitebamisa.”7Ndizo, muzwininipise kuNdzimu. Mugwisane naSatane, unowhomutihha.8Sedzelani kuNdzimu, unowhosedzela kumuli. Ngulani maboko, imwi batjinyi, mutjenese mimoyo yenyu, imwi banhu bana mikumbulo mibili.9Ibani nebuyendasi, mulile mukuwe. Seka kwenyu ngakuhanduke kube lila, nehanha kwenyu kube magwadzo.10Muzwitebamise mbeli kwaHe, iye unowhomumilidza.11Musilebane zwakayipa, makamu. Iwhoyo unoleba zwakayipa nekwegamu lile kene bona gamu lile nlandu, unoleba zwakayipa nekwenlayo kakale unobona nlayo nlandu. Koga hapa wobona nlayo nlandu, awutjinlondolodzi wawo koga watjiba ntongi wawo.12Uyapo un'ompela unopa nlayo kakale ali ntongi, unotubula tjidza nepaladza. Koga iwe uyani kuti ungatonga mbakidzani uwo?13Tjiwhililani ke imwi munoti, “Nasi kene mangwana towhoyenda kuwumwe nzi tikanolaluka ko gole, tihaba tiwana mari njinji”;14imwi musingazibe nekwelemangwana. Butjilo gwenyu guni kene? Ngobe monga fulele inobayapo kwelubaka nyana ibva ipela.15Makafanila kuti muti, “Hapa He bebvuma, towhotjila tikathama whoku nawhokuya.”16Sangwenu, mozwiloba fuba nezwamunohaka thama. Kose ikoku zwiloba fuba kwakayipa.17Kene yani unoziba kuti ini tjakatambunuka tjaakafanila yeta ekokon'wa tjithama, wathama jinyo.
The Word for the World International