BaHhebheru6
1Ndizo ke ayiletjeni zwidiyo zwekutanga zwilelulelu zwebugalimoyo munaKhirisitu, tiyendilembeli nekula, tisingapamhe teya mbviwa dzehanduka tisiya mihingo yakafa negalamoyo muNdzimu,2nezwidiyo zwebvubikiwa, nebigiwa maboko, nemusiwa kwebafi, netongewa nekusingapele.3Whoku towhokuthama hapa Ndzimu atibvumila.4Ngobe akutotubulika handula kakale ibabo bakatongobona tjedza, bakalabila tjipo tjekudzimu, kakale bakaba negobe leMeya Yakayengemala,5bakalabila zipa kwedama leNdzimu nemasimba ezwibaka zwinohha,6kakale hapa bepanduka bebgwilila hule befupatila handuka kwabo, banobe bekowhomela Nkololo weNdzimu patjileyanyo kakale bewulengudza.7Ngobe minda yaguta vula inogala ina, ikoba nezwidlo zwinobhatsha ibabo bayinolimigwa, inowamutjila makombolelo anobva kuNdzimu.8Ngono hapa minda yomela mimhiwa nedihwa, ayitjina bhatsho kakale wabapedlo nelongwa bhiso, bupelo gwayo whuti upisiwe.9Nekene tileba zwedu tijali, tina bugalibgwe kuti imwi badikani kuna zwinhu zwihine zwakamulizana zwinohha netjidziwa kwenyu.10Ngobe akuta kuli kuti Ndzimu azolulama, kwekuti ungahayila hanya mihingo yenyu neludo gwamakalakidza kuwunli mukubhatsha bayengemali sekwamutjathama nangwenuwali zwako.11Toyemula kuti umwe newumwe wenyu alakidze zwipila iko zwako, kudzina kunoti kubupelo, kuyetila kuti tjamakalingilila tjihhadzisike,12kuti ndizo musibe banhu banabusimbe, koga muyedzelele ibabo kwakati ngemubugalimoyo, nangemoyonlefu bakadla nhaka yezwigadzabgwe.13Ngobe Ndzimu paakathama tjigadzabgwe kuna Abhurahhamu ngentha yekuti kwaka kusina umwe nkulu pawunli, Ndzimu wakatuna nezina lile.14Wakati, “Lebeswa ndowhokukombolela, ndikakupa bana banjinji.”15Abhurahhamu wakati alinda ngemoyonlefu, akawamutjila tjaakabe agadziwabgwe.16Banhu banotuna behingisa zina lenhu unkulu pabali, tuna ikoko kolakidza kuti nhu unoleba lebeswa kakale kopedza kakabadzana kose kupakati kwabo.17Ndizo ke Ndzimu paaka ehaka lakidza patjena bagali benhaka yetjakagadziwabgwe nesahanduka kwembumbiko iye, wakatuna.18Kuna izwezwi zwinhu zwibili zwisingake zwikahanduka, kakale Ndzimu zwaasingake akanyepa nekwazo, ndizo ke iswi takatihhila kudihhilo kuti tikulumbidzike kwazo tibhatilile kubugalibgwe gumbeli kwedu.19Tinako kugalabgwe ikoku semidzi yebutjilo gwedu yakasima isingazunguzike, kunongina mubugalo gwakayengemala gwemukati hule kwejila letjisitilo,20ikweno Yesu kwaakayendambeli akangina akamilila iswi, iye watjiba mphirisiti upehhugwi nekusingapele nekweludzi gwebuphirisiti gwaMelikhizedeki.
The Word for the World International