Mihingo yeBapositoli23
1Phawuli wakalingisisa banhu belubahhe, akati, “Makamu angu, ndatjila mbeli kweNdzimu nehana mbuyanana kuswika ileli hhuba.”2Mphirisiti nkulu unoyi Ananiyasi wakalaya baka balimile pedlo kuti bawumadule nlomo.3Phawuli eba eti kuwunli, “Ndzimu unowhokuloba, iwe guma lakadzulugwa nekalaga! Ugele kuti unditonge nekwenlayo, koga iwe tjekuko uvuna nlayo ngelaya kuti ndimadugwe!”4Baka balimile pedlo bakati, “Unotuka Mphirisiti nkulu weNdzimu?”5Phawuli akahandula eti, “Ndandisingazibe, makamu angu, kuti ndiye Mphirisiti Nkulu; ngobe kwaka kwagwa kuti, ‘Usitongoleba zwakayipa nekwentongi webanhu.’ ”6Ngobe Phawuli wakaziba kuti bamwe babo baSadusi bamwe baFarisi, akamilidza whi mulubahhe, eti, “Makamu angu, imi ndiMfarisi, ndinkololo weMfarisi; ndolongwa nlandu ngentha yegalabgwe kwangu mumuka kwebafi.”7Wakati aleba ikoku, kukaba nekukakabadzana pakati kwebaFarisi nebaSadusi; gubungano likathubukana pakati.8Ngobe baSadusi banoti akuna muka kubafi, akuna ntumwa weNdzimu, akuna Meya; koga baFarisi banobvuma kuti kose ikoku kuyapo.9Kukabe nekukakatilana kukulu; bamwe bebakwali belubabi gwebaFarisi bakamilika bakakakabala beti, “Akuna tjakayipa tjatinowana munlume iwhoyu. Hapa kuli kuti meya kene ntumwa weNdzimu wakalebeleka naye ke?”10Kukati kakabadzana kwakula, nlawuli webagwi bengwa, ngentha yehla kuti bangabva bepalulanya Phawuli, akatumila bagwi bengwa kuti banowuntsara pabali, bawunlesi munzi webagwi bengwa.11Busiku gunotobela He wakama ntome kukwe akati, “Sima, ngobe sekwawapa busupi nekwangu muJerusalema, wakafanila nopa busupi nekuRoma kakale.”12Kukati kwayedza, maJuta akalangana akazwisunga ngetuna kuti aangadle kene iko n'wa kuswika abulaya Phawuli.13Baka bepinda makumi mana ibabo bakalangana ikoku.14Bakayenda kubaphirisiti bakulu nekubawhola, benoti, “Tazwisunga ngetuna kuti atitowholabila zodliwa kuswika tabulaya Phawuli.15Ndizo, imwi kan'ompela nelubahhe zibisani nlawuli webagwi bengwa kuti awunlesi kumuli sekunoyi mohaka whisisa ndebo iye. Iswi takamilila kuti tiwumbulaye asanhu akaswika pedlo.”16Koga nkololo wehazwadzi yaPhawuli wakawha langana kwabo; ndizo wakayenda akanobudza Phawuli munzi webagwi bengwa.17Phawuli wakadana umwe webatungamili bebagwi bengwa akati, “Yendisani nhhuhha iwhoyu kunlawuli webagwi bengwa; una tjaanohaka wumbudza.”18Ndizo wakawuyendisa kunlawuli webagwi bengwa akati, “Phawuli umujele wandikumbila kuti ndihhise nhhuhha iwhoyu kumuli, ngobe una tjaanohaka mubudza.”19Nlawuli webagwi bengwa wakawumbhata neluboko, akati atshedukila ntome akawumbhuzwa baliboga, eti, “Ini tjawunohaka ndibudza?”20Wakahandula eti, “MaJuta abvumilana kuti amukumbile kuti muhhise Phawuli kulubahhe mangwana, sekunoyi banohaka bhuzwisisa lebeswa kakale nekukwe.21Koga musibabvumile; ngobe kuna balume banopinda makumi mana bakawumbgwatilila, bakazwisunga ngetuna kuti abatowhodla kene n'wa kuswika bawumbulaya; sangwenu batjizwilulamisa, bakalinda mbvumo yenyu.”22Ndizo nlawuli webagwi bengwa wakasunungula nhhuhha, ewunkowhomesedza eti, “Usibudze kene iye nhu kuti wandibudza ikoku.”23Wakadana balawuli bebagwi bengwa babili akati kubali, “Lulamisani bagwi bengwa bali makhulu mabili, nebagwi bembizi bali makumi ali kutondeka, nebabhayani bali makulu mabili muyende kuKhesariya mu awa yebutatu yebusiku.24Muwanile Phawuli mbizi yekuti atanhe bo, anoswika zwibuyanana kuna Felikisi mbhati wentunhu.”25Akakwala lukwalo gunoti.26“Imi Kilawudiyasi Lisiyasi, kuna Unolemekedzewa mbhati wentunhu Felikisi, ndomubuyisa.27Nlume iwhoyu waka abhakhwa nemaJuta, betjowhowumbulaya, imi ndikahha nebagwi bengwa bangu ndikawuwangulila, hule kwekuti ndaziba kuti unghali wekuRoma.28Ndiyemula ziba kuti banowuntilika nlandu weni, ndakawuyendisa kulubahhe gwabo.29Ndikawana kuli kuti banowuntilika nlandu wezwinhu zwenlayo wabo, koga kusina nlandu wekuti angasungwa kene kuti abulawe.30Hule kwekuti ndabudziwa kuti kuna langana kwayetiwa nekukwe, ndawuntumila kumuli nekulibilidza, ndabudza bo nebanowuntilika nlandu kuti balebe mbeli kwenyu kuti banowuntilika nlandu weni.”31Ndizo bagwi bengwa bakatola Phawuli selayiwa kwabo, bakayenda naye busiku bakadza bakanoti kuAntiphathirisi.32Tjimuka bagwi bemakumbo bakabgwilila kunzi webagwi bengwa, besiya bagwi bembizi kuti bayendilembeli naye.33Bakati baswika kuKhesariya bakayendisa lukwalo kumbhati wentunhu, bakatula Phawuli bo mbeli kukwe.34Wakati abala lukwalo, akabhuzwa kuti ndewawupi ntunhu. Akati awha kuti ndewe kuSilisiya35wakati, “Ndowhokuwhilila hapa banokutilika nlandu baswika.” Akalaya kuti alindiwe ali mun'umba yaHherodi.
The Word for the World International