مکاشفہ1
1یہ کتاب چھےٚ تِمن چیزن متعلق یم یسوعؔ مسیحنؔ مےٚ، یوحناؔ ہس ہٲوؠ خداین کٔرؠ یِم چیز یسوعسؔ پیٚٹھ ظٲہِر یُتھ سُہ تِم پنٮ۪ن خٲدمن تام واتناوِ۔ یِم چیز سپدن جلدےٕ واقعہٕ، پنُن فرشتہٕ مےٚ پننِس خٲدِم یوحناہسؔ نِش سوزِتھ، واتناوِ تمؠ یمہٕ کتھٕ مےٚ تام یُس وفادٲری سان تمسنٛز خدمت کران اوس۔ 2اکِس گواہ سنٛدِ رنٛگؠ چُھس بہٕ، یوحناؔ تمہِ پرٛتھ کُنہِ چیزٕچ خبر واتناوان یمہٕ مےٚ خدایہ سنٛدِس کلامس متعلق تہٕ تِمن پزٮ۪ن بیانن متعلق دنہٕ آے یمہٕ مےٚ وُچھ تہٕ بوزؠ مسیحس نِش۔3خدا ورتاوِ تمِس کانٛسہِ تہِ شخصس سٟتؠ رُت یُس یہ کلام پرِ تہٕ بییہِ تمِس سٟتؠ یُس یہ تمہِ ساعتہٕ بوزِ ییٚلہِ یہ تھدِ پرنہٕ ییہِ۔ سُہ ورتاوِ تِمن سٟتؠ رٕژر یمہٕ حٮ۪سہٕ سان اتھ کن تھاون تہٕ اتھ تمہِ ساعتہٕ پٲروی کرن ییٚلہ یِم سٲری چیز واقع سپدن یُس جلدےٕ نزدیک یوان چُھ۔4بہٕ، یوحناؔ چُھس آسیہ صوبہٕ کٮ۪ن ستن ایمان واجنیٚن جمٲژن یہ کتھ لیٚکھان۔ خدا روزِنؠ توٚہہِ پیٚٹھ مہربان تہٕ توٚہہِ دینو بٲطنی امن۔ خدا چُھ موجود سُہ اوس ہمیشہٕ موجود، تہٕ سُہ ییہِ آینٛدٕ ضرور تہٕ کرِ پرٛتھ أکؠ سُنٛد فٲصلہٕ۔ خدایہ سنٛدِس تختس برونٛہہ کنہِ موجود ستھ روح تہِ روزن توٚہہِ پیٚٹھ مہربان تہٕ توٚہہِ بنٲوِن پُر امن۔ 5یسوعؔ مسیحؔ تہِ روزِنؠ توٚہہِ پیٚٹھ مہربان تہٕ بنٲوؠ نو پُر امن۔ تمؠ ووٚن اسہِ خدایہ سُنٛد پٲغام بہتر پٲٹھؠ۔ سُہ چُھ گۅڈنیُک شخص یُس خداین مرنہٕ پتہٕ دوبارٕ زندٕ کوٚر۔ سُے چُھ یُس دنیا کٮ۪ن بادشاہن پیٚٹھ حکومت کران چُھ۔ تکیازِ سُہ چُھ اسہِ سٟتؠ لول ورتاوان، تہٕ تمؠ ژُھن سانٮ۪ن گناہن ہُنٛد تحریر نُہنٲوِتھ سانہِ باپتھ پنُن خوٗن دِتھ، ییٚلہ تٔمؠ صلیبس پیٚٹھ زُوو دیُت۔ 6یسوعؔ چُھ سُہ یمؠ أسؠ تِتھؠ لوٗکھ بنٲوؠ یِمن پیٚٹھ خدا حکمرٲنی کران چُھ۔ تمؠ بنٲوؠ أسؠ کاہن تہِ یمہٕ خدایہ سنٛز خدمت کران چھِ، یُس یسوع سُنٛد بب چُھ۔ لوٗکھ پٔرِن یسوعؔ سنٛز تسبیح تہٕ تمِس کرِن ہمیشہٕ باپتھ پنُن حکمران تسلیم۔ یی سپدِن! 7دِیو نظر! یسوعؔ چُھ آسمانہٕ پیٚٹھٕ اُبرٕ منٛزؠ ینہٕ وول۔ پرٛتھ کانٛہہ وُچھِ تمِس، تِمو لوٗکو سان یمو سُہ صلیبس پیٚٹھ کِلؠ ٹھٲسِتھ قتٕل کوٚر۔ زمیٖنس پیٚٹھ آسہِ پرٛتھ کانٛہہ قبیلہٕ غمگین تہٕ دۅکھٕ زد ییٚلہِ تِم أمِس شخصس یوان وُچھن، یوٚہے چُھ پزر! 8خداوند خدا چُھ فرماوان: " بےٕ چُھس سُہ یمؠ سٲری چیز شُروع کٔرؠ۔ تہٕ بےٕ چُھس سُہ یُس سارنی چیزن انٛد واتناونُک سبب بنہِ یعنی۔ بہٕ چُھس سُہ یُس موجود چُھ، یُس ہمیشہٕ موجود اوس تہٕ یُس ہمیشہٕ پٲٹھؠ موجود اوس، تہٕ یُس یِنہٕ کالس منٛز ییہِ تہٕ پرٛتھ کٲنٛسہِ ہُنٛد انصاف کرِ۔ بےٕ چُھس سُہ یُس پرٛتھ کُنہِ چیزس تہٕ پرٛتھ کانٛسہِ پیٚٹھ حکمرٲنی کران چُھ" 9بہٕ، یوحناؔ چُھس یسوعسؔ پیٚٹھ ایمان انان یتھ کنؠ توٚہؠ انان چُھو۔ تُہنٛدی پٲٹھؠ چُھس بتہِ صبرٕ سان تمہٕ مصیبت برداش کران یمہٕ پرٛتھ کانٛسہِ تُلٕنؠ چھِ پیٚوان یمسنٛزِ زندگی پیٚٹھ یسوعؔ حکومت کران چُھ۔ رومی حکومتن تھووُس بہٕ اوٕ کِنؠ جلایہِ وطنی منٛز پاٹموس جزیرس پیٚٹھ تکیازِ بہٕ اوسُس لوٗکن خدایہ سُنٛد پٲغام ونان زِ یسوعؔ کُس چُھ۔10یہ ٲس آتھوار یمہِ دوٚہہ ایمان وٲلؠ عبادت خٲطرٕ جمع سپدان چھِ، تکیازِ خداین کوٚر تمہِ دوٚہہ یسوعؔ دوبارٕ زندٕ۔ پاک روحن کوٚرس بہٕ آمادٕ یُتھ بہٕ رویا ہس منٛز وُچِھتھ کینٛہہ چیز بوزٕ۔ مےٚ وُچھ مےٚ پتہٕ کنہِ اوس کُستام ونان۔ تمسنٛز آواز ٲس تیٖژ بڈِ زنتہٕ ترے وزان ٲس۔11تٔمؠ شخصن ووٚن مےٚ، "یہ کینٛژھا ژٕ یتھ طُمارس پیٚٹھ وُچھان چُھکھ یہ لیٚکھ تہٕ یہ ژےٚ لیٚوکُھتھ یہ واتناو ایمان والیٚن ہنٛزن ستن جمٲژن تام۔ بییہِ واتناو افسس، سمُرنہ، پرگُمن، تھواتیرہؔ، سردیس، فِلدلفیہؔ تہٕ لودیہ کہ شہرن ہنٛدین ایمان والیٚن نِش"12ییٚلہ مےٚ یہ آواز بوز تہٕ مےٚ دِژ پتھ کُن نظر یہ کُس چُھ مےٚ سٟتؠ کتھٕ کران۔ پتھ کُن پھیرِتھ وُچھِم اتہِ ستھ سۅنہٕ سنٛدؠ ژٲنگؠ تار۔13ستن ژٲنگؠ تارن منٛزباگ وُچھ مےٚ آدمؔ سُنٛد گوبر۔ تمِس ٲس اکھ زیٹھ ژادر ؤلِتھ یۅسہٕ تس کھۅرن تام وٲژمٕژ ٲس، تمِس ٲس سینس پیٚٹھ سُنہرؠ رنٛگہٕ کپرٕچ اکھ پٔٹ تہِ گنٛڈِتھ۔ 14تمسنٛدِ کلُک مس اوس سفید ییرٕکؠ نتہٕ سفید شینٕکؠ پٲٹھؠ چمکان۔ تمسنٛزٕ أچھ آسہٕ نارٕ مشالہِ ہشہٕ روشن۔ 15تمسنٛدؠ کھۅر ٲسؠ صاف سرتلہِ ہی پرٮ۪زلان زن ٲسؠ نارٕ بچھِ منٛزٕ صاف کرنہٕ آمٕتؠ۔ ییٚلہ تٔمؠ کلام کوٚر، تمسنٛز گرٮ۪زوٕنؠ آواز ٲس وسہٕ ونہِ بڈِ دریاوٕکؠ پٲٹھؠ گرٮ۪زان۔ 16سُہ، یُس اکھ انسان ہیٚو باسان اوس، ٲسِس پننِس دٔچھنِس اتھس منٛز ستھ تارک رٹِتھ تھٲمٕتؠ، دُودار واجِنؠ تیز تلوار ٲس تمسنٛدِ ٲسہٕ منزٕ نیران۔ تٔمسُنٛد بُتھ اوس تِتھ کنؠ چمکان زنتہٕ دوپہرُک آفتاب روشن اوس۔ 17ییٚلہِ مےٚ سُہ وُچھ تہٕ بہٕ پیوس تس برُونٛہہ کنہِ سجدس منٛز، تہٕ گوس تیوت مغلوب زِ بہٕ ہیٚوکُس نہٕ حرکت تہِ کٔرِتھ۔ مگر تٔمؠ تھوو پنُن دٔچُھن اتھٕ مےٚ پیٚٹھ تہٕ لوٚگ مےٚ وننہِ، "کھۅژ مہٕ! بےٕ چُھس سُہ اکھ یمؠ تمام چیز پٲدٕ کٔرؠ تہٕ بےٕ چُھس سُہ یُس سٲری چیز ختم کرن وول چُھ۔ 18بہٕ چُھس ہمیشہٕ باپتھ زندٕ۔ ییٚلہ بہٕ دھرتی پیٚٹھ آس، تہٕ بہٕ مودُس، مگر ووٚنؠ چُھس بہٕ یقینی طور ہمیشہٕ خٲطرٕ زنٛدٕ۔ مےٚ چُھ پانس یہ اختیار زِ یُس مودمُت آسہِ سُہ کرن بہٕ دوبارٕ زنٛدٕ۔ 19بس یُس یہ رویا یتھ منٛز ژٕ مےٚ وُچھان چُھکھ تھاو لیٚکِھتھ۔ بہٕ کرے ژےٚ پیٚٹھ پزرُک اِظہار زِ وُنہ کٮ۪ن کیاہ چُھ سپدان تہٕ آینٛدٕ کیاہ سپدِ۔ بہٕ چُھس یژھان زِ ژٕ لیٚکھکھ تمہٕ چیز تہِ۔20بہٕ کرے ژٕ تِمن ستن تارکن ہُنٛد علامتی معنی تہِ بیان یمہٕ ژےٚ مینِس دٔچھنِس اتھس کٮ۪تھ وُچھتھکھ تہٕ سۅنہٕ سنٛدؠ ستھ ژٲنگؠ تار۔ ستھ تارک چھِ ایمان والیٚن ہنٛدین ستن جمٲژن ہنٛدین فرشتن کُن اِشارٕ کران تہٕ ستھ سۅنہٕ سنٛدؠ ژٲنگؠ تار چھِ ستن ایمان والیٚن ہنٛزن جمٲژن کُن اِشارٕ:
Bridge Connectivity Solutions Pvt. Ltd.