فلپین4
1میانیو ایمان باجو، بہٕ چھِسو توٚہہِ لول بران بییٚہِ چُھ مےٚ توٚہؠ وُچھنُک سؠٹھاہ اشتیاق۔ بہٕ چُھس تُہندِ سٟتؠ توشان؛ تُہنٛدی سٟتؠ کرِ خدا مےٚ انعام عطا۔ یمہِ اندازٕ مےٚ ونؠ یتھ خطس منٛز تُہنٛز ذکر کٔر، خداوندس کن روزیو ثٲبت قدمی سان درِتھ، میانیو ایمان باجو یِمن بہٕ لول چُھس بران۔2یوودیہؔ بہٕ چُھسے ژےٚ تلقین کران تہٕ سنتخےؔ بہٕ چُھسے ژےٚ تہٕ زور دِوان، دُبارٕ کریو اکھ أکس سٟتؠ پُر امن صلح، تکیازِ توٚہؠ دۅشوے چھُو خداوندس سٟتؠ رٔلِتھ۔3تہٕ بہٕ چُھسو توٚہہِ میانین وفادار سٲتھین زور دوان، تمن زنانن کریو مہربٲنی کرِتھ مدد۔ مہربٲنی کرِتھ کریو تِمن مدد تکیازِ تِمو چُھ مےٚ رٕژ شیچھ پھہلاونس منٛز مدد کوٚرمُت، یتھٕ پٲٹھؠ کلیمینسنؔ بییٚہِ باقی میانیو سٲتھی مزوٗرو، یُہند ناو خداین پننہِ کتابہِ منٛز لیکھمٕتؠ چِھ یِم تمس سٟتؠ ہمیشہ خٲطرٕ زندٕ روزن۔4خدایس منٛز روزیو ہمیشہِ خۅش یہِ تمؠ کور بییٚہِ کران چُھ! بییٚہِ چھِسو دبارٕ ونان خۅش روزیو!5تمہِ اندازٕ کریو عمل یُتھ زن سٲری لوٗکھ ونان زِ توٚہؠ چھُو شریف۔ یہِ کریو تکیازِ خداوند واتہِ جلدے واپس۔6کُنہِ تہِ چیزس متعلق مہٕ کرِو فِکِر۔ تمہِ بجایہ، منٛگِو ہر حالتس منٛز خدایس، تہٕ تمس ونیو برابر تیی یہِ توٚہہِ ضرورت چھِ، تہٕ تمس منٛگِو پننہِ باپتھ مدد۔ بییٚہِ کریو تتھ سارسے پیٚٹھ خداے سُنٛد شُکر یہِ سُہ تُہندِ خٲطرٕ کران چُھ۔7نتجہِ نیرِ یہِ زِ خداے کرِ تُہنٛز تمام فِکِر دور، سُہ کرِ تُہندس سونچنس تہٕ محسوس کرنس حفاظت، چونکہ توٚہؠ چھُو یسوع مسیحسؔ سٟتؠ شٲمل سپدمٕتؠ ۔8ٲخرس پیٚٹھ، میانیو ایمان باجو، تتھ پیٚٹھ کٔریو غور یہِ کینٛژھا پوٚز چُھ، قٲبلِ عزت چُھ، حق چُھ، بے داغ چُھ، خۅش یونؠ چُھ، قٲبلِ تعریف چُھ، رُت چُھ، تعریفن لایق چُھ: یمے چھِ تِم کتھہٕ یِمن متعلق شۅبہِ توٚہہِ ہمیشہِ غور کرُن۔9تِم چیز کریو لگاتار یِم مےٚ توٚہؠ ہیٚچھنٲومٕتؠ چھُو بییٚہِ یِم مےٚ نِشہٕ توٚہہِ بوزوٕ بییٚہِ یہِ توٚہہِ یِم چیز مےٚ کران وُچھمٕتؠ چھُو۔ ہرگاہ توٚہؠ یِم چیز کریو، سُہ خداے یُس اسہِ سلامتی عطا کران چُھ روزِ توٚہے سٟتؠ۔10مےٚ چھِ واریاہ خۅشی تہٕ خداوندٕ سُنٛد چُھس شُکر گُذار، تکیازِ کینٛژؠ کٲلؠ سوزِو مےٚ پۅنٛسہِ، توٚہہِ چھُو بییٚہِ اکہِ لٹہِ ہوومُت زِ توٚہہِ چھُو میٲنؠ فِکِر۔ بے شک ٲسوٕ توٚہہِ ہمیشہِ میٲنؠ فِکِر، مگر توٚہہِ اوسو نہٕ یہِ ہاونُک کانٛہہ موقعہٕ۔11یہِ مہٕ سونٛچِو زِ بہٕ چُھس یہِ ونان تکیازِ مےٚ چھےٚ فِکِر زِ مےٚ چھےٚ کُنہِ چیزچ کٔمی یِمن ہنٛز مےٚ ضرورت چھِ۔ بلکہ، مےٚ چُھ ہیٚچھمُت زِ بہٕ کُنہِ تہِ صورتہٕ حالس منٛز آسہِ خۅش روزُن۔12مےٚ چُھ ہیٚچھمُت خۅش کتھہٕ پٲٹھؠ چھِ روزان ییٚلہِ نہٕ مےٚ کہنؠ آسہِ یہِ مےٚ ضرورت چھِ تہٕ خۅش کتھہٕ پٲٹھؠ چُھ روزان ییٚلہِ مےٚ ضرورت کھۅتہٕ زیادٕ آسہِ۔ مےٚ چُھ ہیٚچھمُت خۅش کتھہٕ پٲٹھؠ چُھ روزُن ییٚلہِ بہٕ فاقےٕ آسہٕ تہٕ ییٚلہِ مےٚ کھینہٕ باپتھ واریاہ غذا آسہِ۔ مےٚ چُھ ہیٚچھمُت کتھہٕ پٲٹھؠ چُھ سارنےٕ وقتن پیٚٹھ تہٕ تمام حالاتن منٛز خۅش روزان۔13تکیازِ مسیحؔ چُھ مےٚ حوصلہٕ بخشان، بہٕ چُھس ہر حالتس منٛز اصل پٲٹھؠ ردِ عمل باوان۔14امہِ باوجود، کوروٕ توٚہہِ صحیح وقتس پیٚٹھ مےٚ مصیبتس منٛز مدد۔15میانیو دۅستو، توٚہؠ چھُو فلپی منٛز پانہٕ زانان زِ تتھ وقتس دوران ییٚلہِ مےٚ گۅڈٕ توٚہہِ رٕژ شیچھ واتنٲو، ییٚلہِ بہٕ مکدُنیہ صوبہٕ پیٚٹھٕ روانہٕ سپدُس، ایمان والین ہنٛزِ مجلس منٛزٕ سوزُو صرف توٚہہِ یوٚت مےٚ امداد یا مےٚ کُنہِ طریقہٕ کوٚروٕ مےٚ مدد!16ہتاکہ ییٚلہِ بہٕ تھِسلُنِیکے شہرس منٛز اوسس، اکہِ لٹہِ کھۅتہٕ زیادٕ لٹہِ سوزِو توٚہہِ مےٚ پونٛسہٕ یِم مےٚ ضرورت ٲسؠ۔17بہٕ چُھس نہٕ یہِ ونان تکیازِ میٲنؠ خوٲہِش چھِ زِ توٚہؠ دِیو مےٚ پونٛسہٕ۔ تمہِ بجایہ، میٲنؠ خوٲہِش چھِ زِ خدا کرؠ نو توٚہہِ بے حساب انعام عطا تُہنٛد مےٚ مدد کرنہٕ سببہٕ۔18توٚہہِ چھُو مےٚ اکھ سؠٹھاہ بوٚڈ انعام عطا کوٚرمُت، تہٕ تمیک نتیجہِ چُھ یہِ زِ مےٚ چُھ تہِ سورےٕ یہِ مےٚ ضرورت چُھ بلکہ زیادے۔ مےٚ نِشہٕ چِھ ضرورت کھۅتہٕ زیادٕ چیز میسر، تکیازِ توٚہہِ سوزُو اپفردتسؔ دسؠ مےٚ پنُن انعام۔ خداے چُھ مانان زِ تُہنز قربٲنی چھےٚ قبوٗل کرنس لایق تہٕ یہِ چُھ تمس پسند ۔19یمِس خدایس بہٕ خدمت چُھس کران، سُہ سوزیٚو توٚہہِ پریتھ کانٛہہ چیز یہِ توٚہہِ ضرورت چھِ، تکیازِ توٚہؠ چھُو یسوع مسیحسؔ سٟتؠ تہٕ سُہ چُھ سارِنےٕ چیزن ہُند مٲلکھ۔20وونؠ، گژھِ ببَ خدایس تعریف سپدنؠ بییٚہِ ہمیشہِ تمس احترام سپدُن! آمین!21تتہِ ونیو خداۓ سٕندٮ۪ن سارنےٕ لوٗکن میٲنؠ سلام۔ تِم سٲری چھِ مسیحؔ یسوع سنٛدؠ تہِ چھےٚ توٚہہِ سارنےٕ سلام پیش کران۔22یتِکؠ خداۓ سنٛدؠ سٲری لوٗکھ چھُو توٚہہِ سلام سوزان۔ یِم ایمان بٲجؠ قیصرؔ سلطان سٕندس محلس منٛز کٲم کران چھِ، خاص پٲٹھؠ توٚہہِ سلام سوٗزان۔23میٲنؠ خوٲہِش چھِ بییٚہِ چُھس خداوند یسوع مسیحسؔ دعا منٛگان زِ سُہ کرِ توٚہہِ سارنےٕ پیٚٹھ رحم۔ آمین۔
Bridge Connectivity Solutions Pvt. Ltd.