گریند28
1یہُوواہنؔ ووٚن موسیٰؔ ہس مذید،2"اسرائیلی لوٗکن وَن، مےٚ نِش أنیٚو تِم قربٲنیہ یِم قربان گاہس پٮ۪ٹھ زالنہٕ یِن۔ ییٚلہ تِم بُزنہٕ ین تہٕ سۅ مُشٕک گژھِ مےٚ خوش۔ تہٕ تِمن ؤنیٚو زِ تِم انن تِمن منٲسب وقتس پٮ۪ٹھ۔3تِمن ؤنیٚو زِ یہ کینٛژھا تِم پرٛتھ دوٚہہ میانہ باپتھ انن تتھ منٛز گژھن وٲرشِنؠ زٕ کٹہٕ بچہ آسٕنؠ۔ تِمن گژھِ نہٕ کانٛہہ عٲب آسُن۔ تِم گژھن پوٗرٕ پٲٹھؠ قربان گاہس پٮ۪ٹھ بُزنہٕ یِنؠ۔4اکھ انن تِم صُبحٲے تہٕ بیاکھ انن شامس۔5تِم انن زٲیل پیسمٕتؠ ٲٹیٚس زٕ سیر یمہٕ زیتون تیٖلہٕ کِس أکِس لیٹرس سٟتؠ رلٲوِتھ آسن۔6یہ چُھ سُہ نذرانہٕ یُس تِم پرٛتھ دوٚہہ انٕنؠ گژھن۔ تِمو کٔرؠ تمہ نذرانہٕ تمہِ وزِ انٕنؠ شروع ییٚلہ توٚہؠ کوہہِ سینا ہَس پٮ۪ٹھ ٲسیٚو۔ ییٚلہ تمہٕ قربٲنیہ قربان گاہس بُزنہٕ ین تہٕ تہنٛز خوشبو ییہِ مےٚ سیٹھاہ پسنٛد۔7ییٚلہِ تِم اکھ برٕ بُزان آسن تہٕ تِمن پزِ تمہِ وزِ اکھ لیٹر مےَ تہِ مقدس جایہ مقدس قربان گاہس پٮ۪ٹھ تراوُن۔8شامس ییٚلہ تِم بیاکھ برٕ پیش کرن تہٕ تِمن پزِ مےَ تہٕ آٹِچ سۅے قربٲنی انٕنؠ یۅسہ تِم صبحٲے بُزان آسن۔ ییٚلہ تمہٕ بُزنہٕ یوان آسن تہٕ تمہٕ تمِچ مُشِک تہِ آسہ مےٚ سیٹھاہ خوش کران۔9پرٛتھ سبت کہ دوٚہہ پٮ۪ن توٚہہ زٕ کٹہٕ برٕ یمو منٛزٕ ہر کانٛہہ وٲرشُن آسہ، تہٕ عٲبہ بغٲر آسن، تتھ سٟتؠ زیتون تیلس سٟتؠ رلاوِتھ زٕ کِلو زٲویُل اوٹ تہٕ ساڑ ژور لیٹر مےَ نذرانہٕ کرٕنؠ۔10یمہٕ چھےٚ تمہٕ قربٲنیہ یمہ پرٛتھ سبت کہ دوٚہہ قربان گاہس پٮ۪ٹھ بُزنہِ چھےٚ۔ یمہٕ زٕ کٹہٕ برٕ تہٕ شراب آسہ تمہِ نذرانہٕ علاوٕ یُس توٚہؠ پرٛتھ دوٚہہ پیش کران ٲسیٚو۔11پرٛتھ ریتہٕ کہ گۅڈنکہِ دوٚہہ چُھو توٚہہ زٕ ہکھر ؤژھؠ، اکھ کٹھ تہٕ وٲرشِنؠ ستتھ برٕ قربان کرٕنؠ۔ یم سٲری گژھن کُنہِ عٲبہ بغٲر آسٕنؠ۔ یِم سٲری گژھن قربان گاہس پٮ۪ٹھ پوٗرٕ پٲٹھؠ بُزنہٕ یِنؠ۔12تہٕ پرٛتھ کٲنسہِ قربان ہکھرس سٟتؠ گژھِ ستتھ کلو بٲریک پیسمُت اوٹ زیتون تیٖلس سٟتؠ رلاوِتھ پیش یُن کرنہٕ۔ پرٮ۪تھ کٲنٛسہِ کٹس سٟتؠ گژھِ زیتون تیٖلس سٟتؠ رلاوِتھ ژور کِلو زَبر اوٹ نذر کرنہٕ یُن۔13تہٕ پرٛتھ کٹہٕ برس سٟتؠ گژھِ زیتون تیٖل رلاوِتھ اکھ کلو زٲیل اوٹ پیش کرنہٕ یُن۔ ییٚلہ یہ سورےٕ قربان گاہس پٮ۪ٹھ زالنہٕ ییہِ تہٕ امِچ خوش بو باسہِ مےٚ سیٹھہےٕ زبر۔14پرٛتھ ہکھر ؤژھِس سٟتؠ گژھِ زٕ لیٹر مےَ تہِ انُن۔ ہر کانٛسہ کٹَس سٟتؠ گژھِ پانٛژھ پاوٕ مےَ اننہٕ یُن۔ ہر کانٛسہ کٹہٕ برس سٟتؠ گژھِ اکھ لیٹر مےَ انُن۔ یمہٕ قربٲنیہ گژھن پرٛتھ ریٚتکہِ گۅڈنِکہ تٲریخہ اننہِ تہٕ قربان گاہس پٮ۪ٹھ پوٗرٕ پٲٹھؠ بُزنہِ۔15یمو قربٲنیٚو علاوٕ یمہ توٚہؠ بُزان چھوکھ چُھو توٚہہِ قربٲنی باپتھ مےٚ نِش اکھ ژھاوج تہِ انُن یُتھ تُہنٛدؠ سپدٕؠ مٕتؠ گناہ دوٗر ین کرنہٕ۔16پرٛتھ ؤرؠ یکہٕ گۅڈنِکہ ریٚتہٕ آسہ ژۅدٲہمہِ تٲریخہ میانس اعزازس منٛز فسح عید مناونہٕ یوان17خمبیرِ بغٲر ژۅچہٕ ہنٛز عید آسہ دویمہِ دوٚہہ شروع سپدان۔ تہٕ مذید ستن دوٚہُن یۅسہ توٚہؠ ژۅٹ کھیٚوان ٲسیٚو سۅ گژھِ خمبیرِ بغٲر بناونہ یِنؠ۔ 18یمہِ تہوار کہِ گۅڈنِکہ دوٚہہ آسہ توٚہہِ میانہِ عبادتہٕ باپتھ أکسےٕ جایہ سمُن پیٚوان تہٕ امہِ دوٚہہ کٔریٚو نہٕ توٚہؠ پنٕنؠ سۅ کانٛہہ تہِ کٲم یۅسہ توٚہؠ کران ٲسیٚو۔19امہِ دوٚہہ أنیٚو توٚہؠ قربٲنی باپتھ مےٚ نِش زٕ ہکھر ؤژھؠ، اکھ کٹھ تہٕ وٲرشِنؠ ستتھ کٹہٕ برٕ یمہٕ پوٗرٕ پٲٹھؠ بُزنہٕ ینؠ گژھن۔ یمو منٛزٕ گژھِ نہٕ کانٛہہ تہِ نۅقصی آسُن۔20یمو منٛزٕ گژھٕ ہر کانٛسہِ ہکھر ؤژھس سٟتؠ قربٲنی باپتھ زیتون تیٖلس سٟتؠ رلٲوِتھ ترےٚ کلو زٲیُل پیسِتھ آٹیُک اناج آسُن۔ ہر کانٛسہِ کٹس سٟتؠ زیتون تیٖلس سٟتؠ رلاوِتھ زٕ کلو زٲویلہِ آٹیُک اناج نذرانہٕ پاتھ۔21تہٕ ستو کٹہٕ برو منٛزٕ پرٛتھ کانٛسہِ برس سٟتؠ زیتون تیٖل رلاوِتھ اکھ کلو زٲوِلہ آٹیُک اناج نذر کُرن۔22پننٮ۪ن گُنہن ہُنٛد کفارٕ دنہٕ باپتھ أنزیٚون قربٲنی خٲطرٕ اکھ مُونگُر تہِ۔23یمو نذرانو علاوٕ یمہ توٚہؠ پرٛتھ دوٚہہ صبحٲے انان چُھو أنیٚو توٚہؠ یمہٕ قربٲنیہ تہِ۔24ستن دوٚہُن یُس تہ، اناج توٚہؠ پرٛتھ دوٚہہ قربان گاہس پٮ۪ٹھ بُزان چُھو تمِچ خوشبو روزِ مےٚ مُعطر کران۔ یمو جانورو تہٕ شرابہٕ علاوٕ أنیٚو توٚہؠ قربان گاہس پٮ۪ٹھ سُہ اناج تہِ یُس توٚہؠ تتہِ بُزان چُھو۔25تمہِ تہوار کہ ٲخری ستمہِ دوٚہہ پزِ توٚہہ میانؠ عبادت کرنہٕ خٲطرٕ دبارٕ جمع سپدُن تہٕ پنٕنؠ سۅ کام تراوٕنؠ یۅسہ توٚہؠ کران چُھو۔26فصل لوننٕکہِ گۅڈنکہِ دوٚہہ ییٚلہ توٚہؠ گۅڈنیُک اناج مےٚ نِش أنیٚو یُس توٚہہِ لونمُت آسہ تہٕ توٚہہ پزِ میانؠ عبادت کرنہٕ باپتھ جمع سپدُن۔ امہِ دوٚہہ پزِ توٚہہ پنٕنؠ دوٚہہ دوشٕچ کٲم ترک کرٕنؠ۔27توٚہؠ أنیٚو زٕ ہکھر ؤژھؠ، اکھ کٹھ تہٕ وٲرشِنؠ ستتھ کٹہٕ برٕ۔ ییٚلہ تِم پوٗرٕ پٲٹھؠ قربان گاہس پٮ۪ٹھ بُزنہٕ ین تہٕ تمِچ خوشبو ییہِ مےٚ پسنٛد۔28بیٚیہِ أنزیو زیتون تیٖل رلاوِتھ زٲیُل اوٹ تہِ۔ پرٛتھ کانٛسہِ ہکھر ؤژھؠ سنٛدِ باپتھ دوٗن شےٚ سیر تہٕ پرٛتھ کٹس سٟتؠ سۅاد ترےٚ سیر۔29پرٮ۪تھ کٹہٕ برس سٟتؠ اکھ کلو رلاوِتھ زٲیُل اوٹ۔30پننٮ۪ن گُنہن ہُنٛد کفارٕ دنہٕ باپتھ کٔرؠ زیٚون اکھ ژھاوج تہِ قربان۔31یہ قربٲنی تہٕ شرابُک نذرانہٕ آسہ تِمو جانورو تہٕ آٹہِ زٲید یُس توٚہؠ پرٛتھ دوٚہہ قربان گاہس پٮ۪ٹھ زالان چُھو۔ یاد تھاوؠ زیٚو یُس تہِ جانور توٚہؠ قربان کٔرؠ وون تَس گژھنہٕ کانٛہہ عٲب آسُن۔
Bridge Connectivity Solutions Pvt. Ltd.