نحمیاؔہ9
1دوٚیہ دوٚہؠ پتہٕ آے اسرائیلی لوٗکھ بیہِ سمِتھ، پننؠن گونہن پٮ۪ٹھ افسوس کرنہٕ موکھٕ، تم رودؠ فاقے۔ تِمو لٲگؠ جنٛدٕ پلو تہٕ کلن بٔرکھ لژھ۔ 2اسرائیلی لوٗکو کوٚڈ پنُن پان الگ پر ملکو پٮ۪ٹھٕ آمتیٚو لوٗکو نِشہ۔ تم سمییہ تہٕ کوٚرکھ پننیٚو گونہو نِشہ توبہٕ تہٕ پننؠن جدن ہنٛدین ویکھتیٚن کارن ہُنٛد اعتراف۔3لاوی رودؠ أتؠ تہٕ بوزٕکھ یہُوواہؔ سنٛز تورات پورٕ تریٚن گھنٹن۔ مذید تریٚن گھنٹن رودؠ پننٮ۪ن گونہن ہُنٛد اعتراف کران تہٕ اوٕ پتہٕ نمییہِ بوٚن تہٕ کٔرکھ پننِس خدایہ سنٛز عبادت۔4کینٛہہ لاوی یمن منٛز یسوعؔ، بانیؔ، سبنیاہؔ، بُنّیؔ، سرِبیاہؔ تہٕ بیہِ زٕ زٔنؠ یمن منٛز بانیؔ تہٕ کنعانؔ اوس، رودؠ ہیرٕ پاوین پٮ۪ٹھ ودٕنؠ۔ غمزدٕ لہجس منٛز بڈٕ بڈِ پننِس خدایس التجا کران۔5پتہٕ ووٚن کینٛژو لاوی لوکو یمَن منٛز یسوعؔ، قدمی ایلؔ، بانیؔ، حسبنیاہؔ، سرِبیاہؔ، ہودیاہؔ، سبنیاہؔ، فتحیاہؔ ٲسؠ لوٗکن "ؤتھِو تھوٚد تہٕ کٔریو تعریف پننِس خدایس، یُس ہمیشہٕ قٲیم چُھ حیات چُھ تہٕ روزِ تہِ۔ "تہٕ مبارک چُھ تُہنٛد شاندار ناو! یہِ گژھہِ سارنٕے نعمتن تہٕ تعریفَن ہیٚور۔6ژےٕ چُھکھ سون یہُوواہؔ بیہِ نَہ کانٛہہ، ژیی بنٲوِتھ آسمان یم سارنی بالا تر چھِ، تہٕ یہِ کینٛژھا آسمانن منٛز چُھ زمینہٕ ہیٚور ژیی بنٲوتھ زمین تہٕ یہِ اتھ پٮ۪ٹھ چُھ، ژیی بنٲوِتھ سمندر تہٕ یہِ تمن منٛز چُھ، ژےٕ چُھکھ یُس زندٕ زُوَن زُوو بخشان چُھ۔ تہِ سورےٕ یہِ آسمانن منٛز چُھ زمینہِ ہیٚور چُھ چھی ژیی عبادت کران۔ 7ژےٕ چُھکھ یہُوواہؔ! بس ژےٕ چُھکھ خدا۔ یمؠ ابرامؔ ژٲرِتھ اوٚن کٔڈتھ اُورؔ شہرٕ منٛزٕ یتہِ کلدینی روزان ٲسؠ۔ ژیی بنووٕتھن سُہ ابرہامؔ 8ژیٚہ وُچِھتھ زِ سُہ چُھ دِل و جانہٕ چون وفادار بنٛدٕ۔ ژےٚ دِتتھ تس وعدہ رتہٕ سٟتؠ لٮ۪کِھتھ زِ ژٕ بخشکھ تس تہٕ تسنٛدین زُرین اکھ زمین۔ یہےَ چھےٚ سۅ زمین یتھ پٮ۪ٹھ کنعانی، حِتی، اموریؔ، فِرزی، یبوسی تہٕ جِرجاس لسان بسان ٲسؠ۔ ژےٚ کرُتھ تی یمیٚک ژےٚ وعدہ کوٚرمُت اوسُتھ تہٕ ژٕ چُھکھ ہمیشہٕ رُتےٕ کران۔9ژےٚ وچُھتھ پانہٕ یمو مِصری لوکو کوتاہ بدترین سلوک کوٚر سانین اجدادن سٟتؠ۔ ژےٚ بوزَتھ پانہٕ تہنٛزٕ ودن کریکہٕ "مددٕ باپتھ" ییٚلہِ تم بحرِ قُلزمسؔ نکھٕ وٲتؠ۔10ژےٚ ٲسےٕ خبر زِ مِصری حٲکم کٲتیاہ بُتھؠ پھرؠ چھِ تہٕ سانیٚن اجدادن سٟتؠ کوتاہ بُرٕ سلوٗک کوٚر تِمو۔ اوے تہٕ ہٲوِتھ ژےٚ معجزٕ فرعونسؔ ، تسنٛدین عہدٕدارن تہٕ مِصری لوٗکن۔ أمؠ کوٚر ثٲبت چون پوٚز خدا آسُن۔ ژےٚ کۅرتھ پنُن پان معروف تہٕ ونتہِ چُھوو معروف۔11ژےٚ کۅرتھ سمندر دون حصن منٛز تقسیم سارنی اسرائیلی لوٗکن دیدمان۔ تہٕ دیُت تھکھ سمندرس تار خوشک زمینہِ پیٚٹھؠ مگر مِصری فوج کۅرتھن آبس منٛز غرق۔ تم پٔھٹؠ اکہ کنہِ ہنٛدؠ پٲٹھؠ سرٔنِس آبس منٛز۔12دوٚہس پکنٲوؠ تھکھ ژےٚ پنٕنؠ لوٗکھ أکِس اُبرٕ لنٛگس پتہٕ پتہٕ یُس تھمب ہیٚو اوس تہٕ راتس أکِس چمکہٕ ونِس نارٕ الاوس یُس اکھ بوٚڈ تھمب ہیٚو اوس۔ یہِ رود تِمن برونٛہہ برونٛہہ وتھ گاشراوان تہٕ منٛزلس کُن پکناوان۔13ییٚلہِ سٲنؠ اجداد سیناؔ کیٚن بالن کُن ٲسؠ ژٕ آکھ تِمن برونٛہہ کُن تہٕ آسمانو پیٚٹھؠ لویہِ تھکھ صدا۔ ژےٚ دِتُتھ تمن رُت ھِدایت تہٕ عملہِ لایکھ قانون۔ ژےٚ دتِتھؠ تمن رٕتؠ ضٲبطٕ تہٕ حکم۔14ژےٚ ہیٚچھِ نٲوتھکھ تِم سبات کیٚن دوٚہُن ہنٛدؠ رسٕم۔ یہِ دوٚہہ چُھ باقیو دوٚہو منٛزٕ خاص۔ پننِس خٲدم موسیٰؔ سٕنٛدِ دٔسؠ دتِتھ ژےٚ لوٗکن احکام قانون تہٕ اصول۔15ییٚلہِ تم بۅچھِ ۂتؠ ٲسؠ ژےٚ سوزتھکھ آسمٲنؠ غذا، ییٚلہ تم تریشہِ ۂتؠ ٲسؠ ژےٚ دِژٕتھ تِمن کنہِ پلہٕ منٛزٕ تریش۔ ژےٚ ونُتھ تِمن کنعانٕچ زمین حٲصِل کرنہٕ مۅکھٕ یۅسہ دِنٕچ ژےٚ تِمن وعدہ اوسُتھ کوٚرمُت۔ 16مگر سٲنؠ اجداد ٲسؠ کِبری تہٕ عقلہِ ڈٔلمتؠ، تِمو کوٚر چٲنؠ حکم ماننَس اِنکار۔17تِمو کوٚر چٲنؠ عبادت کرنس اِنکار۔ تِمن چھِنہٕ چٲنؠ معجزٕ یاد یم ژےٚ یہنٛدِ باپتھ کٔرِتھ۔ تِمن آیہ عقل کھیٚنہٕ تہٕ ژےٚ خلاف کٔرکھ بغاوت۔ تِمو کوٚر پنُن زیُٹھ کھڑا یُس تِمن واپس مِصر نیہ ہے۔ یتہِ تِمن واپس غلامی ہُنٛد طوق نٲلؠ گژھِ ہے۔ مگر ژےٕ چُھکھ سون مہربان خدا۔ اسہِ بخشن وول خدا۔ ژےٕ چُھکھ اسہِ پٮ۪ٹھ مہربان تہٕ رحیم۔ ژٕ چُھکھ نہٕ ؤلؠ شرارتس لاینہٕ یوان۔ اتھ برعکس چُھکھ ژٕ اسہِ لول بران۔ اوے ترٲوِتھ نہٕ ژےٚ سٲنؠ اجداد بیکس سیٚکہِ سحراون منٛز تنِ تنہا۔18بےشک تھٲوتھکھ نہٕ ژےٚ تم تنِ تنہا۔ یوٚدوے تِمو پننہِ باپتھ اکھ وُژھ معبودن ژور۔ ییٚلہِ زن تِمو اکھ پۅتُل گوٚر یُس ؤژھِس ہیٚو اوس۔ أمِس ؤژھِس متعلق ووٚن یمو زِ سُہ چُھ سون خدا، یمؠ أسؠ مِصرٕ منٛزٕ نیٚبر أنؠ کٔڈتھ۔ یہِ ؤنِتھ کٔر تِمو چٲنؠ بے انتِہا بے عزتی۔ 19چونکہِ ژٕ چُھکھ ہمیشہٕ مہربان رودمُت، ژےٚ تٲوتھکھ نہٕ تم سیٚکہ سحراوس منٛز تنِ تنہا تہٕ بیکس۔ دوٚہس رود تمن اکھ تھمب ہیٚو اُوٚبرٕ لونٛگ چانہِ یژھایہِ ہُنٛد وتہٕ ہاوُک بنِتھ تہٕ روتلہِ اکھ تھمب ہِشؠ نارٕ مشٲلؠ، بس تُہنٛدِ منٛزلٕچ وتھ گاشہٕ راوان۔20ژےٚ تھووُتھ یمن خٲرُک فرشتہٕ ہِدایتہٕ باپتھ آیہ تن۔ ژےٚ سوزتھکھ آسمٲنؠ کھیٚن ییٚلہِ تِم بۅچھِ ہتؠ ٲسؠ۔ تہٕ سوٗزتھکھ تریش ییٚلہِ تم تریشہٕ ہتؠ ٲسؠ۔21ژَتجہن ؤرین تھووُتھ ژےٚ سہراوس منٛز تِہنٛد خیال۔ اتھ سٲرسےٕ وقتس میوٗل تمن پننہِ ضروٗرتُک پرٛتھ کانٛہہ چیز۔ یمن رٔنیو نہٕ پنُن اکھ پلو تہِ تہٕ نَہ کھۅتکھ پٔکؠ پٔکؠ کھۅرن ورم ییٚلہِ زن تم تھکہٕ روس پکان روٗدؠ۔22ژےٚ کۅرتھ سانیٚن اجدادن تِتھیٚن دُشمَنن خلاف مدد یمن واریہن قومن پٮ۪ٹھ حکومتھ ٲس تہٕ تِہنٛدس فوجس دیاونووُتھ شکس۔ امہِ سٟتؠ دِتُتھ ژےٚ سانین اجدادن یتھ سٲرسےٕ علاقس منٛز بسنُک موقعہ۔ تِمو کٔر حٲصل سۅ زمین تہٕ تم علاقہٕ یمن شاہِ حسبونؔ راج کران اوس پننہِ شہرٕ سیحونؔ پٮ۪ٹھٕ۔ تہٕ سۅ زمین یۅسہ بادشاہ عوجؔ سٕنٛدِس راجس منٛز ٲس۔23ژےٚ بخشِتھ سانین اجدادن تیتؠ شُرؠ زَنتہٕ آسمانس تارکھ۔ ژےٚ واتنٲوتھکھ تِم یتھ علاقس منٛز۔ یوٚت واتناونُک ژےٚ تہنٛدین مالیٚن ماجَن ونمُت اوسُتھ یہِ پننِس تلفس تل اننہٕ باپتھ۔ یُتھ تم تتہِ بسِتھ ہیٚکہٕ ہن۔24تِہنٛدؠ شُرؠ مُرؠ وٲتؠ اوٚت تہٕ کوٚرُکھ اتھ زمینس قبضہٕ۔ ژےٚ بنٲوتھکھ تِم اتھ لایکھ زِ تم دِن شِکس اتہِ بسن والٮ۪ن۔ یم کنعانؔ نسلٕکؠ ٲسؠ۔ ژےٚ کٔرؠ تھکھ تم اتھ لایکھ زِ تم لبن اتہِ روزن والین رازن پٮ۪ٹھ فتح تہٕ بسن أتؠ۔ تِمو کوٚر تی یہِ تِمو یمن دشمن لوٗکن سٟتؠ کرُن یوٚژھ۔25سانیٚو اجدادو کٔرؠ تم شہر فتح یمن انٛدؠ انٛدؠ فصیل تہٕ ذرخیز زمین ٲس۔ تہٕ تِمو أنؠ قبضس تل تم گرٕ یِم اصل چیزو سٟتؠ بٔرِتھ ٲسؠ، گۅڈے کھننہٕ آمٕتؠ کریرؠ، واریاہ دچھہِ باغ، تہٕ زیتون کُلؠ تہٕ میٚوٕ کُلؠ۔ تِمو یہِ یوٚژھ تہِ کھیٚوکھ تہٕ کھژٕکھ چربی۔ تِمو تُل تمن سارنی چیزن ہُنٛد لطف یہِ ژےٚ تِمن عنایت کۅرتھ۔26مگر تم گییہِ ژےٚ بُتھؠ پِھرؠ۔ تِمو کوٚر چانین حکمن ہُنٛد اِنکار۔ تِمو کٔرؠ تم پیغمبر قتل یمو ونُکھ ژےٚ کُن واپس پھیرنہٕ باپتھ۔ تِمو کوٚر تہٕ وونُکھ ژےٚ خلاف۔ تِمو ووٚن ژےٚ خلاف اورُک یورُک تہٕ لٔگؠ بُتھِ۔27لہٰذا دیاوٕنوتکھ پننؠن دشمنَن اتھِ شکس تہٕ انتھکھ تلفس تل۔ وُنؠ گو یتُھے تمن دشمنو ایزا لوگ دیٚون تِمو لویی ژےٚ ناد۔ ژےٚ بوزِتھ تہنٛدؠ آلو آسمانہٕ پٮ۪ٹھٕ۔ مگر ژےٕ چُھکھ مہربان۔ ژےٚ سوزؠ تھکھ پنٕنؠ لوٗکھ تمن مدتس۔ یمو زٹھیٚو أنؠ یم دشمنو نِشہ مۅکلٲوِتھ۔28مگر یُتھے یمن سہولیت تہٕ امن میوٗل، سانیو اجدادو لاجہِ بیٚیہِ بد تہٕ ویٚکھتؠ کتھٕ ژےٚ کُن۔ ژےٚ بوزُتھ یہُنٛد پانے۔ لہٰذا أنؠ تھکھ دشمن بُلاوِتھ یمو یمہٕ زیر کٔرؠ تہٕ یمن پٮ۪ٹھ پنُن راج قٲیم کوٚر۔ مگر ییٚلہ ییٚلہِ یم واپس ژےٚ کُن پھیرؠ تہٕ ژےٚ مَدتہٕ باپتھ ناد لویہِ ہے، ژےٚ بوزتھکھ آسمانہٕ پیٚٹھےَ۔ ژےٚ مۅکلٲوتھک یم بار بار تکلیفو تلہٕ۔ تکیازِ ژٕ چُھکھ مہربان تہٕ رحیم۔29ژےٚ کٔرؠ تھکھ تِم خبردار پننہِ بنٛدگی کُن واپس ینہٕ باپتھ تہٕ چٲنؠ حکم ماننہٕ باپتھ۔ مگر تمَن کھۅت وزِ وزِ کاڈین تہٕ بیٚیہِ بیقل۔ تم ٲسؠ نہٕ چٲنؠ حکم بوزنہٕ خٲطرٕ تیارےٕ۔ تِمو کٔرؠ گناہ چٲنؠ حکم نَہ مٲنِتھ۔ یوٚدوے اکھ انسان یمن مٲنتھےٕ زُوان چُھ۔ چٲنؠ حکم مٲنؠ نہٕ یمو زٲنِتھ مٲنِتھ۔ یم بنییہِ احمق تہٕ کوٚرکھ اِنکار چٲنؠ حکم ماننَس۔30واریہس کالس رودُکھ ژٕ یمَن متعلق صبٕر کران۔ ژےٚ کٔرؠ تھکھ یم خبردار یہنٛدین پیغمبرن پٮ۪ٹھ فرشتو دٔسؠ شیٚچھ سوزِتھ۔ تِمو بوزٕ نَہ یمہٕ شیٚچھِ تہِ۔ لہٰذا أنؠ تھکھ ژےٚ ہمساییگی منٛزےٕ یمن دُشمن بُلاوِتھ یمو یم تلفس تل أنؠ31چونٛکہ ژٕ رودُکھ یمن پٮ۪ٹھ مہربان۔ اوے کٔرتھکھ نہٕ یم ژےٚ ژکہِ پیٚٹھےَ بُرباد۔ ژےٚ ترٲوتھکھ نہٕ یم زنٛہے بےٚکس۔ یقینن چُھکھ ژےٕ بوٚڈ رحیم تہٕ کریم۔32سانہِ خدایہ، ژےٕ چُھکھ عظیم طاقتہٕ وول تہٕ غلبہٕ وول۔ ژےٕ چُھکھ ہمیشہٕ وعدہ وفا کران تہٕ ہمیشہٕ ژُکہِ سان محبت کران۔ وُنؠ چھی أسؠ بس چٲنؠ عبادت کران۔ سانین مشکِلاتن متہٕ دیٖتو کِنہٕ ڈول۔ تِم تمام مشکِلات تہٕ مصیبت أنؠ تو نظرن منٛز یم سانین رازن، سانٮ۪ن زِٹھین، پیغمبرن، کاہنن تہٕ اجدادن آے۔ أسؠ چھِ یم مصیبت لگاتار للہٕ ناوان ینہٕ پٮ۪ٹھٕ اسُورؔ کیٚو رازو اسہِ پٮ۪ٹھ فتح لٔب۔ از تہِ چھِ أسؠ یمنےٕ مصیبتن منٛز ہیٚنہٕ آمٕتؠ33اسہِ چھےٚ خبر ژےٚ کۅرتھ اسہِ پٮ۪ٹھ پوٗرٕ انصاف یم مصیبت ۅتلٲوِتھ۔ آ! أسؠ چھِ أتھؠ لایق۔ یہِ گُدرُن چھےٚ سٲنؠ کمٲے۔ اسہِ کٔرؠ ویٚکھٕتؠ کار۔34برونٛہہ کالہِ مانؠ نہٕ سانیٚو رازو، زِٹھیٚو تہٕ کاہنو تہٕ سانیٚو اجدادو چٲنؠ حکم تہٕ قانون۔ تِمو کوٚر چانین احکامن نَہ بوزُن۔ نَہ بوٗزِکھ چٲنؠ تنٛمبہٕ۔35تمن ٲسؠ پنٕنؠ بادشاہ۔ تِمو تُل پوٗرٕ لطف یمہِ زمینُک یۅسہ ژےٚ تِمن بخشِتھ تہٕ بیٚیہِ چانیٚن عنایِتن ہُنٛد۔ مگر توتہِ کٔر نہٕ تِمو چٲنؠ بندٕگی۔ تِمو کرِنہ بد کامہِ کرنہِ بنٛد۔36سانہِ حالٕژ کُن وُچھو۔ از چھِ أسؠ تتھ زمینس پٮ۪ٹھ غلامن ہنٛز زنٛدگی گُذاران۔ یۅسہ ژےٚ سانین جدن بخشِتھ۔ ژےٚ دژٕتھ تمن یہِ زمین تاکہِ تِم تُلن لطف تِمن چیزن ہُنٛد یم ژٕ اتہِ وپداوان چُھکھ۔ مگر از کرتہٕ اسہِ کُن توجہ۔ أسؠ چھِ غلام یتھ زمینَس پٮ۪ٹھ۔37یمن رازن ژےٚ اسہِ پٮ۪ٹھ راجُت دِتمُت چُھتھ چھِ امہِ زمینچہِ وۅپزٲژ ہُنٛد مزٕ تُلان۔ امہِ موجُب زِ اسہِ کٔرؠ گناہ۔ یم بادشاہ چھِ اسہِ تہٕ سانین چارواین پٮ۪ٹھ حکومت کران۔ تِمن یہِ مرضی گژھِ تہِ چھِ کران۔ أسؠ چھِ عذاب محسوس کران۔38تہِ وُچِھتھ چھِ أسؠ سٲری اسرائیلی اکھ پۅختہٕ مہادٕ کران۔ یُس أسؠ کاغذس پٮ۪ٹھ تحریر کرو۔ أسؠ لیٚکھو پننؠن زِٹھین ہنٛدؠ، لاوی لوٗکن ہنٛدؠ تہٕ کاہنن ہنٛدؠ ناو تہٕ کرو یہِ کاغذ منظوری سٟتؠ مُہر بنٛد۔
Bridge Connectivity Solutions Pvt. Ltd.