متی22
1یسوعن ونہِ یِمن یہُودؠ سردارن باقی تمثیلہٕ۔ یہِ چھےٚ تِمو منٛزٕ اکھ تمثیل۔2"آسمانہٕ پیٚٹھٕ بادشٲہی کرن وول خدا چھُ زٲنؠ تو اکھ بادشاہ یمؠ پننٮ۪ن نوکرن ووٚن زِ تِم رنن اکھ خاندرٕ سال تسنٛدِس نیٚچِوؠ سنٛدِ باپتھ۔3ییٚلہِ سال تیار سپُد، بادشاہن ووٚن نوکرن زِ تِم گژھن سالس بُلاونہٕ آمتٮ۪ن پژھٮ۪ن ونن زِ ولِو سال چھُ تیار۔ نوکر گَے تہٕ ووٚنُکھ پژھٮ۪ن۔ ووٚنؠ گوو بُلاونہٕ آمٕتؠ پٔژھؠ ٲسؠ نہٕ یژھان یُن۔4اوے سوزؠ بادشاہن پنٕنؠ نوکر بیٚیہِ یِمن سارنےٕ لوٗکن دُبارٕ وننہِ سالس یِنہٕ باپتھ۔ یِمن نوکرن ووٚن أمؠ، "ؤنِو تِمن لوٗکن یِم مےٚ سالس بُلٲوؠ مٕتؠ چھِ زِ سال چھُ تیار" بادشاہ چھُو ونان توٚہہِ مےٚ چھُ سال تیار کوٚرمُت۔ دانٛد تہٕ مذید ہکھر چھِ مارنہٕ تہٕ رننہٕ آمٕتؠ۔ پرٛتھ کانہٛہ چیز چھُ تیار۔ ووٚنؠ چھےٚ سالس بس تہنٛدِ یِنچ تٲر۔5مگر ییٚلہِ نوکرو تِمن یہِ ووٚن، تِمو دیُت نوکرن ہنٛدِس وننس کنہٕ ڈول۔ کینٛہہ گَے پننٮ۪ن کھہَن منٛز۔ باقی گے پننٮ۪ن پننٮ۪ن کار بار چٮ۪ن جاین۔6باقیٚو رٔٹؠ یِم نوکر تہٕ کوٚرُکھ یِمن سٟتؠ ویکھُت ویوہار تہٕ ژھنِکھ مٲرِتھ۔7ییٚلہِ بادشاہن یہِ سورےٕ سپدُت بوز، سُہ گوو نارُو نار۔ أمؠ دیُت پننٮ۪ن سپہن حکم زِ نیر تہٕ ژھنؠ ووکھ مٲرِتھ یِم سٲری قٲتِل تہٕ زٲلِو یہنٛدؠ شہر۔8ییٚلہِ امسنٛدیٚو سپہو یہِ کوٚر، بادشاہن ووٚن بیٚین نوکرن۔ مےٚ کوٚر یہِ سال تیار، مگر بُلاونہٕ آمٕتؠ لوٗکھ چھِنہٕ یہِ سال کھٮ۪نس لایق۔9لہٰذا گٔژھِو شہرکٮ۪ن وتہٕ مِلونن پیٚٹھ تہٕ ؤنِو اتہِ سارنےٕ سمکھن والیٚن زِ ؤلِو خاندر سالس۔10اوے گے نوکر یِمن جاین تہٕ سمبرٲوِکھ لوٗکھ یِم تہِ اتہِ سمکھیاکھ۔ یِمو سمبرٲوؠ رٕتؠ تہِ تہٕ بد تہِ۔ تہٕ أنِکھ دیوان خانس منٛز ییٚتہِ خاندرٕ سال تیار اوس۔ دیوان خان آو لوٗکو سٟتؠ بٔرِتھ۔11ووٚنؠ گوو ییٚلہِ بادشاہ دیوان خانس منٛز لوٗکن وُچھنہِ ژاو، تٔمؠ ڈیونٛٹھ اتہِ اکھ نفرا یمِس پژھٮ۪ن دِنہٕ آمٕتؠ مخصوص پلو لٲگِتھ ٲسؠ نہٕ۔12بادشاہن ووٚن أمِس، "ہے یارٕ۔ ژٕ پزہی نہٕ یتھ دیوان خانس منٛز اژُن تکیازِ ژےٚ چھی نہٕ پلو لٲگِتھ یِم سالس یِنہٕ وٲلؠ پٔژھؠ لاگان چھِ" أمؠ نفرن ووٚنُس نہٕ کہین۔ تکیازِ تس ٲس نہٕ خبرٕے زِ ونُن کیا چھُ۔13أمہِ پتہٕ ووٚن بادشاہن نوکرن۔ "گنڈِو یمِس نفرس نرِ زنگہٕ تہٕ لٲے وُن نٮ۪بر یتہِ انہِ گوٚٹےٕ انہِ گوٚٹ چھُ۔ یتہِ لوٗکھ کریکہٕ دِوان چھِ تہٕ دگہِ سٟتؠ دند ٹکان چھِ۔14امہِ پتہٕ ووٚن یسوعنؔ، "یمہِ تمثیلہِ ہنٛدؠ نۅکتہٕ چھِ یہِ زِ خداین بُلٲوؠ واریاہ پانس کُن مگر چھرا چھِ کینٛژے یِم تٔمؠ ژٲرؠ نکھہٕ روزنہٕ باپتھ۔15یسوعنؔ ووٚن امہِ پتہٕ زِ فریسی آے سٔمِتھ تس میلنہِ اوٕ کِنؠ تاکہِ تِم ونناون امِس تہ یُس تمن یسوعسؔ پیٚٹھ راہ کھالنُک موقعہٕ میلہِ۔16تِمو سوزؠ پنٕنؠ کینٛہہ شٲگرد کینٛژن یہُودین سٟتؠ یِم ہیرودیسؔ سنٛدؠ حٲمی ٲسؠ، یُس گلیلس پیٚٹھ راج کران اوس۔ تِمو ووٚن یسوعسؔ، "استاد۔ اسہِ چھےٚ خبر زِ ژٕ چھُکھ پزؠ یور تہٕ ژٕ چھُکھ سُہ پزر ونان یہِ اسہِ خدا کرُن ونان چھُ۔ أسؠ چھِ یِتہِ زانان زِ ژٕ چھُکھ نہٕ پنٕنؠ تعلیم بدلاوان یا پننہِ تعلیمہِ ترمیم کران۔ یہِ زن توٚہہِ متعلق کینٛہہ ونان چھِ یمہِ قسمٕکؠ لوٗکھ تہِ تِم آسن۔17اوے ونتہٕ ووٚنؠ اسہِ یتھ معاملس منٛز یہِ چھا ٹھیک کِنہٕ نہ زِ أسؠ چھِ رومن حکومژن محصول بران۔18ووٚنؠ گو یسوعؔ اوس زانان زِ تہنٛدِ پرژھنُک غرض کیا چھُ۔ تِم ٲسؠ أمِس تیُتھ کینہٛ ونناوُن یژھان یُس أمِس یا تہِ یہُودؠ حکمرانن تہٕ نتہٕ رومی حکمرانن نِش راہ لد بناوِ۔19مےٚ ہٲوؠ تو اکھ سِکہٕ یُس لوٗکھ محصول برنہٕ باپتھ ورتاوان چھِ۔ بس تِمو ہوو تٔمِس دینار ناوُکھ اکھ سِکہٕ۔20تمؠ ووٚن تِمن، "یتھ سِکس پیٚٹھ کمؠ سنٛز تصویر چھےٚ تہٕ کمؠ سُنٛد ناو چھُ؟"21تِمو ووٚنُس اورٕ، "اتھ پیٚٹھ چھےٚ تصویر رومی حکمران سنٛز تہٕ ناو تہِ امؠ سُنٛدےٕ۔ امہِ پتہٕ وون أمؠ یِمن۔ لہٰذا دِیو سرکارس یہِ سرکارُک چھُ تہٕ خدایس یہِ خدایہِ سُنٛد چھُ۔22ییٚلہِ تِمو نفرو یسوعؔ سُنٛد بوز، تِم سپٕدؠ ششدر زِ امہِ جواب سٟتؠ ہیٚکہِ نہٕ أمِس کانہٛہ تہِ راہ کھٲلِتھ۔ اوٕ پتہٕ دراے تِم یسوعسؔ نِش۔23أتھؠ دوٚہس منٛز آے یسوعسؔ نِش کینٛہہ صدوقی۔ یِمن مرنہٕ پتہٕ لوٗکن ہنٛدِس دبارٕ زندگی پراونس پیٚٹھ ایمان چھُنہٕ۔ تِمو پرُژھ یسوعسؔ،24"استاد، موسیٰ ہن لیٚوکھ پننٮ۪ن صحیفن منٛز، یودوے اکھ انسان بے اولاد مرِ، امسُنٛد بوے گژھِ امسنٛزٕ مونٛڈ زنانہِ سٟتؠ نیتھٕر کرُن تاکہِ تس روزِن امسُنٛد بچہٕ۔ یہِ بچہٕ ییہِ ماننہٕ مرن وٲلؠ سُنٛد۔ یتھٕ پٲٹھؠ پکہِ مرن وٲلؠ سُنٛد نسٕل تہِ۔25أکِس ٹبرس منٛز ٲسؠ ستھ لڑکہٕ۔ بٔڈؠ أکؠ کوٚر أکِس کورِ سٟتؠ خاندر۔ یِمن دون بٲژن اوسنہٕ کانہٛہ شُرا مُراہ۔ تہٕ أتھؠ منٛز مود مرٕد۔ اوے کوٚر دویِم بٲے مونڈِ سٟتؠ نیتھٕر۔ سُتہِ مود بے اولاد۔26یہِ سپُد تریمِس بٲیِس سٟتؠ تہِ تہٕ باقے ژون باین سٟتؠ تہِ۔ یِمو اکہِ اکہِ أمِس مونٛڈِ سٟتؠ نیتھٕر کوٚر، پوٚز کانہٛہ بچہٕ زاکھ نہٕ۔27چھیکرس مۅیہِ یہِ زنان تہِ۔28اوے تہِ ییٚلہِ خدا ٲخر وقتہٕ مۅردن زندِ کرِ، یِمو ستو منٛز کُس اکھا آسہِ أمِس زنانہِ ہند خاندار۔ یہِ کتھ تھٲیو ژٮ۪تس زِ یِمو ساروٕے کوٚر أمِس سٟتؠ اکھ اکِس پتہٕ نیتھٕر۔29یسوعنؔ ووٚنُکھ توٚہہِ چھےٚ یقیناً غلطی یتھ پٲٹھؠ سونچس منٛز۔ توٚہہِ چھنہٕ خبرےٕ صحیفن منٛز کیا چھُ لیکھِتھ۔ توٚہؠ چھُو نہٕ یہِ زانان زِ خدایس چھےٚ قدرت لوٗکھ دُبارٕ زندٕ کرنچ۔30پزر چھُ یہِ زِ یہِ زنان چھنہٕ کٲنٛسہِ ہنٛز آشِنؠ تکیازِ ییٚلہِ خدا سارنےٕ مۅردن دُبارٕ زندگی بخشہِ۔ کانہٛہ تہِ آسہِ نہٕ نیتھرٕ وول۔ بلکہِ آسن سٲری لوٗکھ زنتہٕ فرشتہٕ آسمانن پیٚٹھ یِمنہٕ نیتھٕر چھِ کران۔31مگر مودمٕتٮ۪ن ہنٛدِس بیٚیہِ زنٛدٕ گژھنس متعلق چھُ خدا یُتھ ہِیوٗ ونان۔ مےٚ چھُ یقین توٚہہِ آسیٚو یہِ بوزمُت ابرہام، اسحاق تہٕ یعقوب سنٛدِ مرنہٕ پتہٕ واریاہہِ کٲلؠ ووٚن خداین موسیٰ ہس،32بہٕ چھُس سُہ خدا یمِس ابرہام عبادت کران رود، یمِس اضحاق عبادت کران رود تہٕ یمِس یعقوب عبادت کران اوس۔ مۅردٕ لوٗکھ چھِنہٕ عبادت کران۔ یِم چھِ زنٛدٕ لوٗکھ یِم خدایہِ سنٛز عبادت کران چھِ۔ اوے چھُ اسہِ یقین زِ تُہنٛد روح چھُ زنٛدٕ!"33ییٚلہِ لُکہٕ ہجومن یسوع سنٛز یہِ تعلیم بوز، تِم آے وۅلسنس۔34مگر ییٚلہِ فریسیو بوز زِ یسوعن دیُت صدوقین جواب زِ تِمو ہیوٚک نہٕ سونٛچ تھےٕ واپس کیا ونو۔ فریسی سمییہ تاکہِ بناون منصوبہٕ زِ أمِس کیا ونن۔ ادٕ آے أمِس نِش۔35یِمو منٛزٕ اوس اکھ نفر یُس شریعتُک مٲہر اوس، یمؠ خدایہِ سنٛدؠ طرفہٕ موسیٰ ہس دِنہٕ آمتٮ۪ن قانونن ہنٛز پوٗرٕ زانکٲری حٲصِل ٲس کٔرمٕژ۔ سُہ اوس یسوعس سٟتؠ بحث کرُن یژھان۔ توے پرُژھ أمؠ أمِس،36"اُستاد، خدایہِ سنٛدِ طرفہٕ موسیٰ ہس میلن والیٚو حکمو منٛزٕ کُس اکھ چھُ ساروٕے کھۅتہٕ اہم؟37یسوعن دیُتُس پننِس جوابس منٛز صحیفن ہُنٛد حوالہٕ، "توٚہہِ پزِ خداوندس پننِس خدایس زُو جان لول برُن پننہِ دماغہٕ سان۔ تمِس ہٲیِو زِ توٚہؠ چھُو تس لول بران یمہِ آیہِ تہِ توٚہؠ خوٲہِش کٔرِو، تمہِ سارے کِنؠ یہِ توٚہؠ محسوس کرِو تہٕ تمہِ سارے کِنؠ یہِ توٚہؠ سونٛچِو۔38یہِ چھُ ساروٕے کھۅتہٕ اہم حکم یُس موسیٰ ہس خداین دیُت۔39دویِم ساروٕے کھۅتہٕ اہم حکم یتھ سارنےٕ پزِ مانُن، چھُ: توٚہہِ پزِ تِمن سارنےٕ لوٗکن تیوتاہ لول برُن یوٗتاہ توٚہؠ پانس بران چھُو۔40یِم زٕ حکم چھِ تمن سارنےٕ حکمن ہنٛز بنیاد یِم موسیٰ ہن لیکھؠ مٕتؠ صحیفن منٛز تہٕ بیٚیہِ تمام نبین ہنٛدٮ۪ن لیکھن ہند۔41ییٚلہِ زن وُنہِ فریسی أتی سٔمِتھ ٲسؠ، یسوعنؔ پرُژھ تِمن،42"مسیحسؔ متعلق کیا راے چھےٚ توٚہہ؟ سُہ کہُنٛد زُر چھُ؟" تِمو ووٚن أمِس، "سُہ چھُ بادشاہ داوود سُنٛد زُر"43یسوعنؔ ووٚن تِمن، "یودوے مسیحؔ بادشاہ داوودؔ سُنٛد زُر چھُ، تیٚلہِ ما پزِ تس داودسؔ أمِس خداوند ونُن۔ ییٚلہِ داودنؔ ووٚن زِ أمِس ووٚن یی ونُن پاک روحن۔44داودنؔ لیٚوکھ یہِ صحیفن منٛز مسیحسؔ متعلق: "خداین ووٚن میٲنِس خداوندس۔ بیٚہہ یتنس دۅچھِنؠ کِنۍ یتہِ بہٕ ژےٚ واریاہ عزت کرے باقےٕ سارنےٕ ہنٛدِ کھۅتہٕ زیادٕ۔ ییٚلہِ زن بہٕ چٲنؠ دشمن چانٮ۪ن قدمن تل تھوکھ۔45اوے ییٚلہِ زن بادشاہ داوود مسیحسؔ میون خداوند ونان چھُ، مسیحؔ ہیٚکہِ نہٕ کانہٛہ داوود سُنٛد زُر ٲسِتھ۔ سُہ گژھِ داود سنٛدِ کھۅتہٕ عظیم آسُن۔46کانہٛہ تہِ، یِمو یسوعؔ سُنٛد ونُن بوز، ہیوٚک نہٕ اکھ لفظ تہِ سونٛچِتھ یس تِم یورٕ یسوعسؔ ؤنتھ ہیٚکہٕ ہن۔ أمہِ پتہٕ کوٚر نہٕ کٲنٛسہِ تہِ جُرعت أمِس پھسراونہٕ باپتھ کانہٛہ سوال پرژھنُک۔
Bridge Connectivity Solutions Pvt. Ltd.