لوق12
1امی ساعتہٕ، گییہِ ساسہٕ بدؠ لوٗکھ یسوعؔ ہس انٛدؠ انٛدؠ جمع۔ تتہِ ٲسؠ واریاہ لوٗکھ یِم اکھ أکِس کھوٗر منٛڈان ٲسؠ۔ گوٚڈٕ لوٚگ سُہ پننؠن شٲگردن وننہِ، "ہوشیار روزِو زِ توٚہؠ مٕہ بٔنیٚو فریسین ہُنٛدؠ پٲٹھؠ، یِم عوامس منٛز مذہبی چھِ لاگان مگر ژوٗرِ پٲٹھؠ چھِ غلط کامہِ کران۔2یہِ چُھ لوٗکن ہُنٛدِ خٲطرٕ بےفٲیدٕ زِ تِم کرن پنٕنؠ گناہ پردس تل تھاونچ کوٗشش۔ کنہِ دوٚہہ کرِ خدا پرٛیتھ أکِس تتھ متعلق زانیاب یہِ لوٗکھ کٔھٹِتھ تھاونچ کوٗشش چھِ کران۔3کنہِ دوٚہہ بوزن لوٗکھ تہِ سورےٕ عوامس منٛز یہِ ژےٚ بادشاہ پٲٹھؠ ووٚنمُت ٲسِتھ۔ کنہِ دوٚہہ بوزٕناوِ کانٛہہ اکھا کریکہٕ دِتھ پرٛیتھ أکِس تہِ یہِ ژےٚ ٲسِتھ کمرس منٛز فِسرارے کٔرمٕژ۔4میانیٚو دوستو، ہُشیٲری سان بوٗزو! تِمن لوٗکن مہٕ کھوٚژِو۔ تِم ہیکن توٚہہِ قتل کٔریتھ، مگر تمہِ پتہٕ ہیکن نہٕ تِم توٚہہِ زیادٕ کینٛہہ تہِ کٔریتھ!5بہٕ ونہٕ توٚہہِ کسَ شوٗبہِ پٔزؠ پٲٹھؠ کھوٗژن۔ توٚہہِ پزِ خدایس کھوٗژن۔ تمِس چُھنہٕ صرف لوٗکھ مارٕ کرنُک اختیارےٕ یوت، بلکہ تمِس چُھ بیٚیہِ تِم جہنمس ترٛاونکُ اختیار تہِ! آ، یہِ چُھ خدا یمِس توٚہہِ پٔزؠ پٲٹھؠ کھوژُن پزِ۔6ژٔرؠن متعلق سونٛچو۔ تِمن چُھ تیوٗتتاہ کم قیمت آسان زِ توٚہؠ ہیکیو تِم پانٛژھ صرف دوٗن ٹکن مٔلؠ ہٮ۪تھ۔ تمہِ پتہٕ تہِ چُھنہٕ خدا تِمو منٛزٕ کٲنسہِ أکِس تہِ مشراوان!7ہتاکہ خدایس چُھ یہِ تہِ معلوم زِ تُہنٛدس کلس منٛز کٔژ مس وال چھِ۔ مہَ کھوٗژو، تکیازِ خدایس نِش چُھو توٚہہِ واریہو ژریٚو کھۅتہٕ زیادٕ قدر۔8بیٚیہِ چُھس بہٕ توٚہہِ ونان زِ اگر لوٗکھ ونن باقین زِ تِم چھِ میٲنؠ شٲگرد، تِیلہِ ونہٕ بہٕ آدمؔ سُنٛد اولاد، خدایہِ سنٛدین فرشتن زِ تِم لوٗکھ چھِ میٲنؠ شٲگرد۔9ہرگاہ تِم ونن باقین زِ تِم چھِنہٕ میٲنؠ شٲگرد، پتہٕ ونہٕ بہٕ خدایہِ سنٛدین فرشتن زِ تِم چھِنہٕ میٲنؠ شٲگرد۔10بہٕ ونہٕ توٚہہِ یِتہِ زِ ہرگاہ لوٗکھ مےٚ آدمؔ سٕنٛدِس اولادس متعلق بدرَد ونن، خدایہِ کرِ تِمن تہِ تمہِ خٲطرٕ معاف۔ مگر ہرگاہ لوٗکھ پاک روحس متعلق بدرَد ووٚنُن، خدایہِ کرِ نہٕ تِمن تہِ معاف۔11ادٕ ییٚلہِ لوٗکھ توٚہہِ ہیکلس منٛز مذہبی سردارن برونٛہہ کنہِ سوال پرٛژھنہٕ خٲطرٕ نِنوٗو بیٚیہِ تِمن لوٗکن نِشہ یِم ملکس منٛز حٲکم آسن، فِکر گژھِ نہٕ کرٕنؠ زِ توٚہؠ کتھٕ پٲٹھؠ دِیو تِمن جواب یا توٚہہِ کیاہ پزِ ونُن،12تکیازِ پاک روح ونہِ توٚہہِ تمہِ ساعتہٕ زِ توٚہہِ کیاہ پزِ ونُن۔"13پتہٕ ووٚن لوٗکن ہُنٛدس ہجومس منٛز اکؠ نفرن یسوعؔ ہس، "ووستادٕ، میٲنس بٲیس وُن سُہ دِیہ مےٚ مٲلؠ وراثتہٕ منٛزٕ حصہٕ!"14 پوٚز یسوعؔن ووٚن تمِس، "انسانہ، بہٕ چُھس نہٕ کٲنسہِ اکؠ اکھ جج بنوومُت زِ بہٕ دِمہٕ لوٗکن ہُنٛدس جاییٔدادس متعلق فٲصلہٕ!"15پتہٕ ووٚن تٔمؠ لوٗکن ہُنٛدس سٲرسےٕ ہجومس، "ہوش تھٲوِو لالچہِ نِشہ روزیٚو دوٗر! کٲنسہِ نفرٕ سنٛز زندگی چھِنہٕ قبضہٕ کِہِ کثرت سٟتؠ بنیمٕژ۔"16یسوعؔن ؤنؠ پتہٕ تتھ ہجومس یہِ دلیل" أکِس خاص امیر نفرٕ سنٛزِ زمیٖنہِ وۅپدؠو واریاہ فصٕل۔17تٔمؠ سونچ پانس سٟتؠ، "مےٚ چھِنہٕ پتاہ بہٕ کیاہ کرٕ، تکیازِ مےٚ چھِنہٕ زیادٕ جاۓ ییٚتہِ زن بہٕ پنُن سورےٕ فصٕل ذخیرٕ کرٕ!18پتہٕ سونچ تٔمؠ پانس سٟتؠ، مےٚ چھِ پتاہ بہٕ کیاہ کرٕ! بہٕ والکھ پننہِ کُچھِ تہٕ بناوکھ تِم بجہِ! پتہٕ ہیٚکہٕ بہٕ پنُن سورےٕ فصل بیٚیہِ باقیو چیز تِمن بجن نٔوؠن کُچھن منٛز ذخیرٕ کٔریتھ۔19پتہٕ وُنہٕ بہٕ پننِس پانس، "وُنؠ کوٚر مےٚ سیٹھاہ مٲل جمع یُس مےٚ واریہن ورؠ ین پوشہِ۔ لہٰذا مےٚ چھِنہٕ فِکر کرنچؠ ضرورت۔ بہٕ کھؠمہٕ تہٕ چیمہٕ بیٚیہِ کرٕ عٲش!"20پوٚز خداین ووٚن تمِس، "ہیۓ نادان انسانہ! از رٲژ منٛز یِیی ژےٚ زُو کڈنہٕ! پتہٕ یِم سٲری چیز ژےٚ پننہِ خٲطرٕ جمع چُھتھ کرِمٕتؠ تِمن ہُنٛد مٲلکھ بنہِ بیٚیہِ کانٛہہ، نہٕ کہ ژٕ!"21یسوعؔن کٔرؠ یہِ دلیل یہِ وُنہٕ سٟتؠ ختم، "ییہِ سپدِ تِمن یِم چیز صرف پننہِ خٲطرٕ جمع چھِ کران تہٕ تِمن چیزن چھِنہٕ قدر کران یِمن خدایہِ سیٹھاہ قدر تھاوان وٲلؠ مانان چُھ۔22پتہٕ ووٚن یسوعؔن پننؠن شٲگردن، "امی دلیلہِ سٟتؠ پزِ توٚہہِ کینٛہہ ہیٚچُھن۔ مہَ بٔریو تتھ متعلق غم زِ توٚہہِ گژھِ زندٕ روزنہٕ خٲطرٕ کٲفی غذا کھؠنہِ خٲطرٕ آسن یا پنُن پان گرم تھونہٕ خٲطرٕ کٲفی پلو لاگنہٕ باپتھ آسٕنؠ۔23بہرحال، تہنٛز زندگی چھِ تمہِ غذا کھوٗتہٕ زیادٕ اہم یُس توٚہؠ کھیوان چُھو، بیٚیہِ تُہنٛد بدن چُھ تمہِ پوشاکہٕ کھوٗتہٕ زیادٕ اہم یُس توٚہؠ لاگان چُھو۔24 جاناوارن متعلق سونٛچِو۔ تِمن چھِنہٕ بیوٛل ووُان، تِم چھِنہٕ فصٕل لونان۔ تِمن چھِنہٕ کُٹھؠ یا عمارٔژٕ آسان یِمن منٛز تِم فصٕل ذخیرٕ کرن، پوٚز خدایہِ چُھ تِمن غذا سوٗزان۔ بیٚیہِ چُھو توٚہؠ یقیٖنن جاناوارو کھوٗتہٕ سیٹھاہ زیادٕ اہمیت تھاوان۔25 توٚہہِ منٛزٕ ہیٚکہ نہٕ کانٛہہ اکھ تہِ فِکر کرنہٕ سٟتؠ پننہِ زندگی ہُنٛد اکھ منٹ تہِ بڑٲوتھ!26ادٕ ییٚلہِ نہٕ توٚہؠ تہِ معمولی کٲم ہیکیو کرتھ، توٚہہِ پزِ نہٕ یقیٖنن بیٚیہِ کُنہِ چیزس متعلق فِکر کرٕنؠ۔27پوشن متعلق سونٛچو زِ تِم کٔمہِ انٛدازٕ چھِ بڈان۔ تِم چھِنہٕ پونٛسہٕ کماوُنہٕ خٲطرٕ کٲم کران، بیٚیہِ چھِنہٕ تِم پنُن پوشاک پانہٕ بناوان۔ پوٚز بہٕ ونہٕ توٚہہِ زِ بادشاہ سلیمانؔ یُس واریاہ کال برونٛٹھ اوس شاندار پوشاک لاگان، مگر تٔمؠ لوٗگہ نہٕ زانٛہہ شوبہٕ وُن تتھ پوشاک یوٗتھ أکِس پوشش آسن چُھ۔28خدایہِ چُھ کُلین خوب صورت بناون، اگرچہ تِم صرف کم وقتس زندٕ چھِ روزان۔ لوٗکھ چھِ تِمن ژٹان پتہٕ چھِ تِمن دانس منٛز لایان۔ پوٚز توٚہؠ چُھو خدایس نِش سیٹھاہ قٟمتی سُہ کرِ توٚہہِ تمہِ کھۅتہٕ زیادٕ رٲچھ یوٗتاہ سُہ کُلین ہنٛز رٲچھ کران چُھ۔ توٚہہِ پزِ خدایس پؠٹھ تمہِ کھوٗتہٕ زیادٕ بھروسہٕ کرُن یوٚت توٚہؠ وُنکٮ۪ن کران چُھو۔29یوٚت تام زن تہنٛز کتھ چھِ، پریشان مہٕ روزِو توٚہؠ زِ ٲسؠ کیا کھؠمو تہٕ چؠمو، تہٕ یِمن چیزن متعلق مہَ روزیٚو پریشان۔30یمہِ ساتہٕ تِم یِم خدایس چھِنہٕ زانان، چھِ یِمن چیزن متعلق پریشان روٗزان، توٚہہِ ہیکیو بھروسہٕ وٲلؠ تہِ ٲسِتھ زِ تُہنٛدس آسمان کسِ ببس چُھ معلوم زِ توٚہہِ چھِ تِمن ہنٛز ضرورت۔31تٔمؠ بدلہٕ، دِیو توٚہؠ تتھ کنُ توجہ زِ توٚہؠ کیاہ ہیکیو خدایہِ سنٛزِ بادشٲہی خٲطرٕ کٔریتھ۔ ییٚلہِ توٚہؠ کٔرِو، پتہٕ ہیکیو توٚہؠ خدایس پؠٹھ بھروسہٕ کٔریتھ زِ سُہ سوزِ توٚہؠ تہِ سورےٕ یہِ توٚہؠ ضرورت چھِ۔32میانیو دوستو، توٚہہِ پزِ نہٕ کھوٗژن۔ تُہنٛد بب چُھ آسمانس پؠٹھ یژھان زِ توٚہؠ بنو تٔمؠ سنٛزِ بادشٲہی ہُنٛد اکھ حصہٕ یُتھ تٔمیک سٲری فٲیدٕ سپدن توٚہہِ حٲصل۔33لہٰذا پنٕنؠ چیز ژٕھنِو کٕنتھ پونٛسہٕ دِیو تِمن لوٗکن یِمن غذا یا پوشاک یا اکھ روٗزن جاے ضرورت چھِ۔ پننہِ باپتھ بنٲیو تِتھؠ بٔٹوٕ یِم نہٕ پرانن۔ میٚون مطلب چُھ آسمان کسِ خزانس منٛز کٔرِو جمع یُس لازوال چُھ۔ تتہِ ہیٚکہ نہٕ کانٛہہ ژوٗر فَریتھ بیٚیہِ ہیٚکہ نہٕ تُہنٛدس پوشاکس کیٚوم تباہ کٔریتھ۔34بہرحال، یہِ کینٛژھا توٚہؠ رٔژھرِتھ تھٲیِو، توٚہؠ سونٛچو امے مطٲبق تہٕ گُزٲرِو اتھ پٮ۪ٹھ پنُن وق۔35ہمیشہِ روزیٚو خدایہِ سنٛز کٲم کرنہٕ خٲطرٕ تِمن لوٗکن ہُنٛدؠ پٲٹھؠ کمر گنٛڈتھ، یِمو پنٕنؠ کامہِ پلو نٲلؠ آسن تراوٕمتؠ بیٚیہِ آسن رٔٲتہِ راتس ژٲنگؠ تھاوان دز وٕنؠ۔36تِمن خدمت گارن ہنٛدؠ پٲٹھؠ روزیٚو میانہِ واپس ینہِ خٲطرٕ تیار یِم زن پننِس مٲلکہ سُنٛد انتظار کران چھِ یُس اکہ خاندرکہ سالہٕ پؠٹھٕ واپس ینہٕ وول چُھ۔ تِمن چُھ انتظار آسان تسٕنٛدِ خٲطرٕ دروازٕ مٔژاونس یتھےُ سُہ واتہِ تہٕ کرِ تیٚوتھُےٕ دروازس ٹھُک ٹھُک۔37یہِ آسہ سیٹھاہ رُت تِمن خدمت گارن ہُنٛدِ خٲطرٕ ہرگاہ تِم پنُن مٲلک واپس ینہٕ وزِ بیدار آسن چھِ۔ مےٚ دِیو یہِ توٚہہِ ووٚننہٕ: سُہ دِیہ تِمن انعامہٕ پانہٕ تِہنٛد خدمت گار بنتھ، تِمن ونہِ بہیو تہٕ کھؠن پیش کرتھ روٗزک خدمتس۔38ہرگاہ سُہ شامس ژیٖرؠ یا نیصف رٲژ گرٕ ییہِ، ہرگاہ سُہ چُھ وچھان زِ تسنٛدؠ خدمت گار چھِ بیدار بیٚیہِ تیار تسٕنٛدِ خٲطرٕ، سُہ سپدِ تِمن پؠٹھ سیٹھاہ خوش۔39بہٕ چُھس یژھان توٚہؠ کٔرِو یتھ پؠٹھ غور: ہرگاہ اکہ گرکس مٲلکس اوس معلوم زِ اکھ ژوٗر اوس ینہٕ وول، تمہِ وزِ روزِ سُہ بیدار تہٕ ژوٗرس دِتن نہٕ پننِس گرس فرنہٕ۔40اوے روزیٚو توٚہؠ تیار، تکیازِ، بہٕ آدمؔ سُنٛد اولاد، یِمہٕ دُبارٕ تمہِ وزِ ییٚلہِ نہٕ توٚہہِ میٲنؠ پے لگہ۔"41پطرسؔن پرُوژھ، "خداوندٕ، کیاہ یہِ چُھکھا ژٕ ورگہٕ پٲٹھؠ صرف اسی، چٲننن شٲگردن، یوٚت دِوان؟ یا یہِ مثال چھِ ہجومہٕ خٲطرٕ تہِ؟"42یسوعؔن دِتسُ جواب، "بہٕ چُھس یہِ پرٛتھ أکِس سٕنٛدِ خٲطرٕ ونان یُس أکِس وفادار تہٕ گاٹل خدمتگار سٕنٛدِ پٲٹھؠ چُھ یُس پننِس مٲلکہٕ سنٛدِس گرس منٛز أکِس منتظم سٕنٛدِ پٲٹھؠ چُھ۔ تسنٛد مٲلکھ چُھ تمِس باقین خدمتگارن ہُنٛد ذمٕدار بناون، زِ تِمن گژھِ کنہِ حالس منٛز سٔہی وقتس پؠٹھ پنُن غذا واتُن۔43ہرگاہ تٔمؠ سُنٛد مٲلکھ گرٕ آو تہٕ وچُھن زِ سُہ چُھ سۅ کٲم کران، سُہ دِیہ تمِس خدمت گارس انعام۔44بہٕ وُنہٕ ھو توٚہہِ یہِ: سُہ مٲلکھ بنایو تمِس خدمت گارس پننہِ سٲری جایٔیدادک مختار یتھ سُہ مٲلک چُھ۔45پوٚز ہرگاہ سُہ خدمتگار یمِس اختیار آو دِنہٕ پننِس دِلس منٛز ونہِ، میٲنس مٲلک چُھ واریہس وقتس دوٗر گژھن وول۔ پتہٕ لاگہِ سُہ باقین خدمت گارن لاینُؠ۔ بیٚیہِ لاگہِ سُہ پانہٕ سیٹھاہ کھؠن تہٕ چؠون تہٕ روزِ مسَ۔46ہرگاہ سُہ چُھ تہِ کران، تسنٛد مٲلکھ آو واپس تمہِ وزِ ییٚلہِ نہٕ تمِس خدمت گارس روز نہٕ پے۔ پتہٕ دِیہ تٔمؠ سُنٛد مٲلکھ تمِس سخ سزا بیٚیہِ تھاونس تِمن سٟتؠ یِم تمِس وفادٲری سان خدمت چھِنہٕ کرن۔47یمؠ خدمت گارن پننِس مٲلکہٕ سنٛزِ مرضی زٲنتھ تہِ کٔرنہٕ تیاری تہِ کرنس تمِس ییہِ سَختی سان سزا دِنہٕ۔48پوٚز یمِس خدمتگارس یہِ معلوم اوس نہٕ زِ تسند مٲلکھ کیا چُھ یژھان تمِس کرُن، پتہٕ کوٚر تٔمؠ کینٛہہ غلط، تمِس ییہِ معمولی سزا دِنہٕ۔ تِمن خدمت گارن نِش چھِ تمِس مٲلکس واریاہ توقع یِمن تٔمؠ واریاہ بخشمُت چُھ۔ بیٚیہِ تمِس مٲلکس آسن تِمن خدمت گارن نِش تمہِ کھوٗتہٕ زیادٕ توقع یِمن تٔمؠ واریاہ ذمہٕ دٲریہِ آسن عاید کرِمٕژ۔49بہٕ چُھس لوٗکن منٛز روحٲنی جوش برنہٕ باپتھ آمُت۔ بہٕ چُھس یژھان زِ تِم آسہ ہن برونٛٹھےٕ تمن پٮ۪ٹھ کٲم کران!50بہٕ گژھٕ ضرور جلدےٕ خطرناک تکلیفہٕ منٛز گُزرُن۔ بہٕ روٗزٕ توٚت تام دل ملوٗل یۅتام نہٕ بہٕ پننیٚو تکلیفو منٛزٕ نیرٕ۔51توٚہؠ پزِ زانن زِ بہٕ آس نہٕ امہِ سببہٕ زِ لوٗکھ روٗزن پانہٕ وانؠ صلاح سان یکجا۔ نا، تمہِ بدلہٕ چُھ توٚہہِ ضرور سمجھن، لوٗکھ سپدن الگ الگ صفن منٛز کھڑا، أڈؠ مےٚ خلاف تہٕ أڈؠ میٲنس حقس منٛز۔52تیار روزیٚو، تکیازِ یہِ چُھ تہِ یہِ سپدن وول چُھ۔ پانٛژن بٲژن ہُنٛدس گرس منٛز، کینٛہہ انُن مےٚ پؠٹھ ایمان تہٕ کہنٛہہ انُن نہٕ۔ گرٕ منٛزٕ سپدن ترٛےٚ بٲژ باقین بٲژن خلاف کھڑا۔53 گرِکین بٲژن منٛز گژھِ ٹَکراو پٲدٕ۔ اکھ مول گژھِ نیٚچوِس خلاف، یا کینٛہہ نیٚچوؠ گژھن پننٮ۪ن مالٮ۪ن خلاف۔ اکھ موج گژھِ پننہِ کورِ خلاف، یا اکھ کور گژھِ پننہِ مٲجہِ خلاف۔ اکہ ہش گژھِ نوشہِ خلاف، یا اکھ نوش گژھِ پننہِ ہشہِ خلاف۔"54تٔمؠ ووٚن بیٚیہِ لوٗکن ہنٛدین ہجومن، "ییٚلہِ توٚہؠ مغربہ کِنؠ اکھ سیاہ اوٚبُر کھسان وُچھو، توٚہؠ چُھو ؤلؠ ؤلؠ ونان روٗد چُھ پنہٕ وول! تہٕ تی چُھ سپدان۔55ییٚلہِ جنوبہٕ کِنؠ واو چُھ وتھان، توٚہؠ چُھو ونان، گریشمہٕ ژٔنڈ آسہ دوٚہس! توٚہؠ چُھو سہی ونان۔56توٚہؠ ریاکار! اوٚبُر تہٕ واو وچھتھ چُھو توٚہؠ مانان زِ موسمس منٛز کیاہ چُھ سپدن وول۔ توٚہؠ پزِ معلوم سپدن زِ خدایہِ کیاہ چُھ ازؠ کِس زمانس منٛز کران!57توٚہؠ پزِ پرٛیتھ أکِس پانے فٲصلہٕ کرن زِ پوٚز کیاہ چُھ!58اکھ چیز پزِ توٚہہِ یتن کرن۔ توٚہہِ پزِ پننِس داوادارس سٟتؠ معاملہٕ انٛزراونچ کوٗشش کرٕنؠ ییٚلہ توٚہؠ وُنہِ عدالتس کُن وتی پکان چُھکھ۔ ہرگاہ سُہ توٚہؠ ججس برونٛہہ کُن پیش کرنس مجبور کران چُھ، سُہ جج دِیہ فٲصلہٕ زِ توٚہؠ چُھو قصوروار تہٕ توٚہؠ گژھو عدالتکس افسرس خلاف۔ پتہٕ سُہ افسر برِ توٚہؠ جیلس منٛز۔59بہٕ چُھسے ژےٚ ونان زِ ہرگاہ ژٕ جیلس منٛز برَنہٕ آکھ، ژٕ نیرکھ نہٕ زانٛہہ توٚت تام تتہِ نیٚبر یوٚت تام نہٕ ژٕ سۅ رژھ رژھ ادا کرکھ یہِ سُہ جج حکم دِیہ۔"
Bridge Connectivity Solutions Pvt. Ltd.