لوق10
1تمہِ پتہٕ، کٔرؠ یسوعؔن باقی دُسَتتھ 72 شٲگرد مقرر یِم لوٗکن تٔمؠ سنٛز کتھ بوزنہٕ خٲطرٕ تیار کرہَن۔ تٔمؠ سوٗزؠ تِم زٟ زٟ پرٛیتھ شہرس تہٕ گامس کُن پانس برونٛہہ برونٛہہ یوٚت یوٚت سُہ پانہٕ گژھن وول اوس۔2تٔمؠ ووٚن تِمن، "واریاہ لوٗکھ چھِ مےٚ پؠٹھ ایمان اننَس تیار، پوٚز توٚہہِ منٛز چھِ تِم سیٹھاہ کم یِم بہٕ تِمن مدد کرنہٕ خٲطرٕ نیٚبر سوزکھ۔ لہٰذا منٛگیٚو خدایس دُعا، یُس تِمن سارنےٕ لوٗکن ایمان انُن یژھان چُھ، تمِس کٔریو زارٕپارٕ زِ سُہ سوزِ زیادٕ زیادٕ شٲگرد یِم تِمن مدد کرن۔3وُنؠ گژھیٚو، مگر یہِ تھٲیِو یاد زِ بہٕ چُھسو توٚہؠ نیٚبر پٲغام ہیٚتھ تِمن لوٗکن نِش سوزان یِم تُہنٛدؠ دشمن آسن۔4 پانس سٟتؠ مہ نِیو پونٛسہٕ۔ ٹھیلن منٛز مہ بٔریو زیادٕ سامانہٕ۔ ایزادٕ کھۅربانہٕ نہٕ نِیو۔ وتہِ منٛز ٹھہرزؠو نہٕ، نَہ کٔرؠ زیٚو کٲنٛسہِ سٟتؠ کتھ۔5ییٚلہِ زانٛہہ کُنہِ گرس منٛز أژیو، گوٚڈٕ منٛگؠ زیٚو تتھ گرس منٛز روزن والین لوٗکن ہنٛدِ باپتھ خدایس سلامتی!6ہرگاہ تٔمہِ گرٕکؠ بٲژ خدایہِ سنٛز سلامتی یژھان آسن، تیلہِ باسہِ تِمن سۅ تہِ سلامتی یۅسہ توٚہؠ تِمن پیش کٔریو۔ پوٚز ہرگاہ تِم خدایہِ سنٛز سلامتی آسن نہٕ یژھان، تیلہِ باسہِ توٚہہِ سۅ سلامتی پانس۔7تتھ گرس منٛز روزؠ زیٚو تۅتام یۅتام تمہِ گامہٕ منٛزٕ نیریو۔ اکہ گرٕ منٛزٕ نیرتھ دویمِس گرس منٛز گژھؠ زیٚو نہٕ۔ کھیٚیو تہٕ چیٚیو یہِ کینٛژھا تِم دِنو، تکیازِ اکھ مُزور چُھ صرف مُزورِ ہُنٛد حقدار آسان۔8ہرگاہ توٚہؠ کُنہِ شہرس منٛز أژیو تہٕ لوٗکھ کرنو خوش آوے، یُس غذا تِم دِنو تہِ کھیٚؠ زیٚو۔9تمہِ شہرٕ کیٚن بیمار لوٗکن دِی زیٚو شفا۔ پرٛیتھ أکِس ؤنِو، "خدٲیی بادشٲہی چھےٚ توٚہہِ نکھٕ آمٕژ۔10پوٚز ہرگاہ توٚہؠ کُنہِ شہرس منٛز أژیو تہٕ لوٗکھ کرنو نہٕ خوش آوے، تتہِ کیٚن کوچن منٛز گژھتھ وُنؠ زیٚو،11"اکھ خبردٲری، تِمن خلاف، زِ أسؠ چھِ تُہنٛدِ شہرٕ منٛزٕ نیران نیران سۅ گرد تہِ دٕنان یوسہِ سانیٚن کھۅرن لٲرِتھ ٲس۔ پوٚز توٚہہِ گژھِ ضرور احساس آسُن زِ توٚہؠ وُچھو جلد ییٚلہِ خدایہ سنٛز بادشٲہی پرٛیتھ جایہِ آسہ!12 بہٕ چُھس یژھان توٚہؠ زٲنیٚو زِ تمہِ وزِ ییٚلہِ خدا پرٛیتھ أکِس حساب ہییٚہِ، خدا دییہِ تمہِ شہرٕ کیٚن لوٗکن تمہِ کھۅتہٕ زیادٕ سخت سزا یُس تِمن بدکار لوٗکن دِتُن یِم سدومؔ شہرس منٛز واریاہ برونٛہہ روزان ٲسؠ!13یہِ کوتاہ خوفناک آسہ توٚہہِ لوٗکن ۂنٛدِ خٲطرٕ یِم خرازین تہٕ صیدا شہرن منٛز بسان چھِ۔ بہٕ چُھس یہِ امہِ سببہٕ ونان زِ مےٚ ہاوؠ تمہِ وزِ بٔڈؠ معجزٕ ییٚلہِ بہٕ تُہنٛدین شہرن منٛز اوسس۔ ہرگاہ تِتھؠ معجزٕ صور تہٕ صیدا کیٚن پرانیٚن شہرن منٛز ہاونہٕ آمٕتؠ آسہ ہن، تتہِ کیو تِمو بدکار لوٗکو تہِ آسہ ہِے پننیٚو گُنہَو نِشہ توبہٕ کوٚرمُت۔ تِمو آسہ ہے پتھرِس پٮ۪ٹھ سوٗر مٔلِتھ تہٕ ٹاٹھ ؤلِتھ امیٚک اظہار کوٚرمُت۔14 لہٰذا ییٚلہِ خدا پرٛیتھ أکِس حساب ہیٚیہِ، سُہ دِیہ توٚہہِ تِمو بدکار لوٗکو کھۅتہٕ تہِ زیادٕ سزا یِم صور تہٕ صیدا ہس منٛز بسان ٲسؠ۔15 "مےٚ چُھ توٚہہ لوٗکن تہٕ کینٛہہ ونُن یم کفرنحوم قصبس منٛز روزان چھِ، توٚہؠ ٲسیٚو سونچان زِ خدا کرِ توٚہہ بوٚڈ اٮ۪نام عطا۔ نہ، خدا چُھنہ ہرگِز تہِ توٚہہ کانٛہہ اجر دنہٕ وول۔"16بیٚیہِ ووٚن یسوعؔن شٲگردن، "یُس اکھا تُہنٛد کلام بوزِ سُہ چُھ عملن میٚون بوزان۔ تہٕ یُس اکھا تُہنٛدس کلامس اِنکار کرِ سُہ چُھ عملن مےٚ اِنکار کران۔ تہٕ یُس مےٚ اِنکار کران چُھ سُہ چُھ عملن خدایس اِنکار کران۔"17یِم دُسَتتھ 72 نفر یسوعؔن مقرر کٔرؠ تِم گےَ تہٕ کوٚرکھ تیٖ یہِ تٔمؠ تِمن کرُن ونمُت اوس۔ ییٚلہِ تِم واپس آے، تِم ٲسؠ سیٹھاہ خوش۔ تِمو وُن، "خداوند، ہتاکہِ چانہِ اختیارٕ سٟتؠ مون بدروحو تہِ سون، اسہِ کوٚر تِمن حکم زِ لوٗکو منٛزٕ نیریو نیٚبر!"18 یسوعؔن ووٚن تِمن، "یِمہِ وزِ توٚہؠ تہِ کران ٲسِو، مےٚ وُچھ شیطان آسمانہٕ پٮ۪ٹھٕ اچانک ؤلؠ ؤلؠ وُزملہِ ہنٛدؠ پٲٹھؠ بوٚن وسان!19 بوزیٚو! مےٚ چُھ توٚہہِ بدروحن تہٕ سرفن شِکس دِنہٕ خٲطرٕ طاقت عطا کوٚرمُت۔ تمہِ علاوٕ چُھ مےٚ توٚہہِ سٲنس دُشمن شیطانس تہِ شِکس دِنہٕ خٲطرٕ طاقت دِتمُت۔ توٚہہِ واتہِ نہٕ ہرگز کُنہِ سٟتؠ زرؠر۔20تُہنٛدِ خٲطرٕ چَھےنہٕ صرف یژےٕ خوشی زِ بدروح روزن توٚہہِ تٲبِیع۔ بلکہ پزِ توٚہہِ اوٕ موٚکھٕ زیادٕ خوش روزن زِ خداین چھِ تُہنٛدؠ ناو آسمانن پؠٹھ لیکھمٕتؠ، تکیازِ تمیُک مطلب چُھ یہِ زِ توٚہؠ رودیٚو ہمیشہِ خدایس سٟتؠ۔"21پاک روحن بخٕش یسوعؔ ہس تمہ وزِ سیٹھاہ خوشی۔ ییٚلہ تٔمؠ وُن، "میانہِ ببہٕ خدایہِ، ژٕ چُھکھ پرٛیتھ کُنہِ چیزُک خداوند یہِ زمینَس پؠٹھ بیٚیہِ آسمانس منٛز چُھ۔ بہٕ چُھسے ژےٚ تعریف کران زِ ژےٚ رکٲوِتھ تِم لوٗکھ یِم کتھ سمجھنس منٛز پانس چالاک مانان چھِ۔ تمہِ بجایہ کریتھ ژےٚ تِمہٕ پزٕ کتھٕ تِمن لوٗکن نِش اظہار یِم لۅکٹٮ۪ن شُرین ہنٛدؠ پٲٹھؠ ماننہٕ خٲطرٕ تیار آسان چھِ۔ اوے، میانہِ ببہٕ، تہِ کوٚڑُتھ ژےٚ امہِ سببہٕ تکیازِ یہِ آوے ژےٚ پسنٛد۔22خداین، میٲنؠ ببن چُھ مےٚ سورےٕ کینٛہہ دِتمُت۔ صرف زانہِ ببےٕ یوت پٔزؠ پٲٹھؠ پننِس گۅبرس۔ تہٕ بییٔ یوت، تٔمؠ سُنٛد گۅبُر، زانن پننُ بب اصل پٲٹھؠ۔ پوٚز بہٕ چُھس کینٛہہ لوٗکھ ژاران یِمن بہٕ سُہ ہاون زِ سُہ کُس چُھ۔"23پتہٕ ووٚن یسوعؔن، بلکل پننؠن شٲگردن، "خداین بنٲیو توٚہؠ اتھ لایق زِ توٚہہِ چھُنو اکھ بوٚڈ انعام عطا کوٚرمُت یمہِ سٟتؠ توٚہؠ تِم چیز وُچھان چُھو یِم بہٕ کران چُھس!24بہٕ چُھس یژھان توٚہؠ زٲنیٚو زِ واریہو نبی یو تہٕ بادشاہو یژھاے یِم چیز وُچِھنؠ یِم توٚہہ بہٕ کران وُچھووس۔ مگر تِمو وُچھ نہٕ، تکیازِ تِم ٲسؠ واریاہ کال برونٛہہ زندٕ۔ تِمو آسہ ہے یمہٕ کتھٕ بوزنُک آرِزو کوٚرمُت یمہٕ توٚہؠ مےٚ نِش بوزان چُھو۔ پوٚز تِمو بوزنہٕ تہِ، تکیازِ تِم ٲسؠ واریاہ پتھ کالٕکؠ۔"25تتہِ اوس اکھ یہُودؠ شریعت ہیٚچھناون وول شخص۔ تٔمؠ یوٚژھ یسوعؔ ہس آزماونہٕ خٲطرٕ اکھ مشکل سوال پرِژُھن۔ اوے وُتھ سُہ تھوٚد تہٕ پرُوژھنس، "ووستاد، مےٚ کیاہ چُھ کرُن تاکہِ بہٕ روزٕ ہمیشہ خدایس سٟتؠ؟"26تمِس ووٚن یسوعؔن، "ژےٚ چُھتھ موسیٰؔ سُنٛد شریعت پوٚرمُت یُس تمِس خداین عطا کوٚرمُت اوس۔ سُہ شریعت کیاہ چُھ ونان؟"27 تٔمؠ شخصن دِیت جواب یہِ چُھ شریعتس منٛز لیکھتؠ، "دل و جان بٔریو تہنٛدس خداوند خدایس لول، تہنٛدِ روحہٕ سٟتؠ، تہنٛدِ سٲری طاقتہٕ سٟتؠ بیٚیہِ تہنٛز عقلہٕ سٟتؠ۔ بیٚیہِ بٔریو پننِس ہمسایس توٚت لول یوٚت پنِنِس پانس بران چُھو۔"28 یسوعؔن ووٚنس، "ژےٚ دِتُتھ بلکل سہی جواب۔ ہرگاہ ژےٚ تہِ سورےٕ کرکھ، ژٕ روزکھ ہمیشہِ خدایس سٟتؠ۔"29مگر سُہ شخص اوس یژھان زِ خدا گوٚژھ تمِس خوش گژھن۔ اوے ووٚن تٔمؠ یسوعؔس، "کٔم لوٗکھ چھِ میٲنؠ ہمسایہِ یمن مےٚ پزِ لول برُن؟"30یسوعؔن دیُت جواب، "اکہ دوٚہو، اوس اکھ یہُودؠ شخص یروشلمہٕؔ پؠٹھٕ یرِیحُو کنُ سفر کران۔ کینٛژو ڈاکوہو کوٚر تمِس حملہٕ۔ تِمو نیہ تمِس شخصس سٲری پلو بیٚیہِ تہِ سورےٕ یہِ تمِس نِشہ اوس۔ تِمو کوٚر سُہ اڈٕمور۔ پتہ تروٛوُکھ تٔتی۔31اتفاقن اوس اکھ یہُودؠ کاہن تپٲرؠ وتہِ پکان۔ ییٚلہِ تٔمؠ سُہ شخص وُچھ، مدد کرنہٕ بجایہ دراو سُہ وتہِ بیٚیہِ انٛدٕ۔32یتھٕ پٲٹھؠ، اکھ خدایہِ سنٛدِس گرس منٛز کٲم کرن وول لاوی تہِ ووت تتھ جایہِ تہٕ وچُھن سُہ شخص۔ مگر سُہ تہِ دراو وتہِ بیٚیہِ انٛدٕ۔33پتہٕ آو تمہِ وتہِ سامری علاقک اکھ نفر ییٚتہِ سُہ شخص پیمُت اوس۔ ییٚلہِ تٔمؠ سُہ شخص وُچھ، تمِس آو تسَ پؠٹھ رحم۔34سُہ گوٚو تسَ نِش تہٕ تٔمؠ سنٛدین زخمن مُلُن زیتون تیٖل بیٚیہِ شراب یُتھ زن سُہ ٹھیک سپدِ۔ تٔمؠ گنجہِ تٔمؠ سنٛدین زخمن پؠٹھ دجہِ ریلہٕ۔ پتہٕ تھوٚون پننِس خرس پؠٹھ تہٕ واتناون أکِس سرایہِ منٛز تتہِ کرنس خدمت۔35 صبحس دِتؠ تٔمؠ زٕ چاندِ ہنٛدؠ سکہٕ سرایہِ ہنٛدس مٲلکس تہٕ ووٚننس، "أمِس شخصس تھٲوؠ زِ نظر گُذر۔ ہرگاہ ژےٚ یمہِ رقمہٕ کھوٗتہِ زیادٕ أمؠ سٕنٛدِس علاجس پؠٹھ خرچ سپدی، بہٕ دِمے ژےٚ ییٚلہِ بہٕ واپس یمہٕ۔"36پتہٕ پرُوژھ یسوعؔن تمِس "ترٛیو نفرو وُچھ سُہ شخص یمِس ڈاکوہوو حملہٕ کوٚرمُت اوس۔ ژٕ کسُ نفر وُنکھ اوس تمِس شخصہ سنٛدؠ پوٚز ہمسایہِ؟"37شریعتکؠ ووستادن دِیت جواب، "سُہ اکھ یمِس تمِس پؠٹھ رحم آو۔ "یسوعؔن ووٚن تمِس، "تہِ چُھ ٹھیک۔ لہٰذا ژےٚ پزِ یتھے پٲٹھؠ تمِس أکِس نِش گژھن یمِس چٲنہِ مددتُک ضرورت آسہ۔"38چونکہِ یسوعؔن تہٕ تٔمؠ سنٛدیو شاگردو تھوٚو سفر جٲری، تِم ژایہِ أکِس خاص گامس منٛز۔ تتہِ دِژ مارتھاؔ ناوچہِ اکہ زنانہِ تِمن پنُن گرٕ ینٕچ دعوت۔39تس سنٛز بیٚنہِ، یمِس مریمؔ ناو اوس، بیٖٹھ یسوعؔ سنٛدین کھوٗرن نکھٕ تہٕ بوزن تہِ یہِ سُہ تعلیم دِوان اوس۔40مگر مارتھایٔیؔ ٲس تِہنٛدِ خٲطرٕ کھؠن تیار کرنس متعلق فِکر۔ سۅ گییہِ یسوعؔ ہس نِش تہٕ ووٚننس، "خداوند، میانہِ بیٚنہِ ترٲوِ مےٚ سورےٕ کینٛہہ پانے تیار کرُن۔ ژےٚ چھۓ پتاہ زِ یہِ چُھ نہٕ جان۔ مہربٲنی کٔریتھ ووٚن تسَ زِ سۅ کرِ مےٚ مدد!"41مگر یسوعؔن دِیت تسَ جواب، "مارتھاؔ، مارتھاؔ، ژےٚ چھۓ واریہن چیزن متعلق فِکر۔42مگر اکھ کتھ چھےٚ پزِؠ پٲٹھؠ ضروری زِ تہِ بوز یہِ بہٕ تعلیم دِوان چُھس۔ چونکہِ مریمنؔ ژٲر رٕژ کٲم، بہٕ ونہٕ تس زِ سۅ کرِ کانٛہہ بیٚاکھ کٲم۔"
Bridge Connectivity Solutions Pvt. Ltd.