احبار27
1یہُوواہنؔ ووٚن بیٚیہِ موسیٰؔ ہس،2"میٲنہِ بدلہٕ ون اسرائیل کٮ۪ن لوٗکن یِم کتھٕ: "ہرگاہ کانٛہہ شخصس سنٛجیدگی سان کٲنسہِ دوٚیمس شخصس صرف یہُوواہسؔ سٕنٛدِ خٲطرٕ پننُ پان الگ کرنُک وعدہ کرِ، یہُوواہسؔ سپدِ تمس شخصس آزاد کرنہٕ خٲطرٕ تیار ہرگاہ سُہ ذمہٕ دار شخص کاہنس اکھ رقم ادا کرِ۔ کاہنس پزِ تمہِ رقمُک حساب چٲندِ ہنٛدیو سِکو مطٲبق کرُن یِم یہُوواہؔ سٕنٛدِس خٟمس منٛز ورتاونہٕ یوان چھِ۔3یِم چھِ تَم رقم یِم یہُوواہنؔ امہِ قسمٕکؠ معاہدٕ کرنہٕ باپتھ مقرر کٔرؠ متٕؠ چھِ: چٲندِ ہنٛدؠ پنژاہ سِکہٕ تِمن مردن ہنٛدِ باپتھ یِمن ہنٛز وانٛس وُہ وری پؠٹھٕ شیٹھ وری چھِ؛4چٲندِ ہنٛدؠ ترہ سِکہٕ تِمن بالغ زنانن ہنٛدِ باپتھ یِمن ہنٛز وانٛس وُہ وری پؠٹھٕ شیٹھ وری چھِ۔5چٲندِ ہنٛدؠ وُہ سِکہٕ یِن تِمن جوان مردن دِنہٕ یِمن ہنٛز وانٛس پانٛژھ وری پؠٹھٕ وُہ وری چھِ؛ چٲندِ ہنٛدؠ داہ سِکہٕ تِمن جوان زنانن ہنٛدِ باپتھ یِمن ہنٛز وانٛس پانٛژھ وری پؠٹھٕ وُہ وری چھِ؛6چٲندِ ہنٛدؠ پانٛژھ سِکہٕ تِمن لڑکن ہنٛدِ باپتھ یِمن ہنٛز وانٛس اکھ ریتھ پؠٹھٕ پانٛژھ وری چھِ۔7چٲندِ ہنٛدؠ پنداہ سِکہٕ یِن تِمن مردن دِنہٕ تِمن ہنٛز وانٛس شیٹھ وری زیادٕ چھِ؛ چٲندِ ہنٛدؠ داہ سِکہٕ تِمن زنانن ہنٛدِ باپتھ یِمن ہنٛز وانٛس شیٹھ وری علاوٕ چھِ۔8ہرگاہ سُہ معاہدٕ کرن وول شخص غریب چُھ سُہ گژھِ کاہنس برونٛہہ کنہِ استادٕ کرنہٕ یُن کاہن تھاوِ قٟمت معاہدٕ کرن وٲلؠ سٕنٛدِ طاقتہٕ مطٲبق۔9ہرگاہ کانٛہہ اکھاہ یہُوواہسؔ اکھ قٲبلِ قبول گوپنُ دِنُک وعدہ کرِ، سُہ گپُن چُھ یہُوواہسؔ سؠٹھاہ خاص؛ یوس صرف تمؠ سُنٛد چُھ۔10سُہ نفر گژھِنہٕ تمس وعدہ دِتمٕتس چاروٲیس بدلاون۔ سُہ گژھِ نہٕ رٕتِس بدلہٕ موٚڑ نیاز کرُن۔ ہرگاہ تمؠ سۅ کۅشش کٔر تیلہِ چھِ دوشوے یہُوواہسؔ قربان کرنؠ۔11ہرگاہ تمؠ سُہ گپُن یہُوواہسؔ نیاز کرُن یژھِ یوس نہٕ قٲبلِ قبول آسہ، سُہ گژھِ تمس گُپنس کاہنس نِشہ واتناون۔12کاہن کرِ تمس گپنہٕ سنٛز حالت وچھتھ تمؠ سُنٛد قٟمت مقرر۔ تی آسہ گپنہٕ سُنٛد قٟمت۔13ہرگاہ سُہ گپُن دِنہٕ وول نفر پتہٕ سُہ گپُن واپس مٔلؠ ہوٚن یژھِ، سُہ گژھِ کاہنس سُہ قٟمت بیٚیہِ تمیٛک پٲنژم حصہٕ علاوٕ ہٮ۪تھ ادا کرُن۔14یتھۓ پٲتھؠ، ہرگاہ کانٛہہ شخص پننُ گرٕ یہُوواہسؔ شوٗژ سپدنہٕ خٲطرٕ نیاز تھاوِ، أتی کرِ کاہن أمچ حالت وچھتھ تمیٛک قٟمت مقرر۔ یہِ کاہن ونہِ تیٖ آسہ تمیٛک قٟمت۔15ہرگاہ سُہ نفر یُس پننُ گرٕ یہُوواہسؔ شوٗژ روزنہٕ باپتھ دِیہ پتہٕ یژھِ تتھ واپس مٔلؠ ہوٗن، سُہ گژھِ تمیٛک قٟمت بیٚیہِ تمہِ قٟمتُک پٲنژم حصہٕ زیادٕ ادا کرُن تیلہِ سپدِ سُہ گرٕ تمؠ سُنٛد دبارِ۔16ہرگاہ کانٛہہ شخص پننٕؠ تہٕ پننہِ عیالچؠ کینٛہہ وراثت یہُوواہسؔ نیاز کرِ تمیٛک قٟمت ییہِ تمہِ بیلہِ مطٲبق کرنہٕ یوس تتھ زمیٖنس وونہٕ باپتھ ضرورت آسہ۔ یریتھ زٕ ہتھ تہٕ وُہن کلو بیالِس بدلہٕ یِن چٲندِ ہنٛدؠ داہ سِکہٕ دِنہٕ۔17ہرگاہ کانٛہہ شخص پننُ گرٕ شادمٲنی ہنٛدس وریس منٛز یہُوواہسؔ نیاز دِیہ، تمیٛک قٟمت آسہ پوٚرٕ رقم۔18پوٚز ہرگاہ کانٛہہ شخص شادمٲنی ہنٛدِ ورؠ یہِ پتہٕ پننُ کھہہ یہُوواہسؔ نیاز کرِ کاہن کرِ شمار تِمن ورؠ یِن یِم ینہِ وٲلِس شادمٲنی ہنٛدس ورؠ یس تام آسن، ہرگاہ زیادٕ وری آسن نہٕ تیلہِ آسہ پوٚرٕ قٟمتہٕ کھۅتہٕ کم قٟمت۔19ہرگاہ سُہ کھاہ یہُوواہسؔ نیاز کرن وول یژھِ سُہ واپس مٔلؠ ہوٗن سُہ گژھِ اکھ تمیٛک قٟمت بیٚیہِ تمہِ قٟمتُک پٲنژم حصہٕ علاوٕ ادا کرُن تیلہِ سپدِ سُہ کھاہ دبارٕ تسنٛد۔20ہرگاہ سُہ تتھ مٔلؠ ہیٚکہ نہٕ ہٮ۪تھ یا ہرگاہ تمؠ سُہ بیٚیہِ کٲنسہِ کُننہٕ آمُت آسہ، تمس ییہِ نہٕ سُہ زانٛہہ تہِ مٔلؠ ہینُک دُبارٕ اجازت دِنہٕ۔21سُہ کھاہ ییہِ شادمٲنی ہنٛدس وریس منٛز ہمیشہ خٲطرٕ یہُوواہؔ سٕنٛدِ خٲطرٕ اکھ پاک تحفہٕ کس صورتس منٛز الگ کرنہٕ تہٕ ییہِ کاہنس دِنہٕ۔22ہرگاہ کانٛہہ اکھ مٔلؠ ہیٚژمٕژ زمیٖن یہُوواہسؔ نیاز تھاوِ یۅسہ نہٕ تمؠ سنٛز وراثت منٛز چھِنہٕ،23کاہنس پزِ دوٚیمس شادمٲنی ہنٛدس وریس تام ورؠ ین ہُنٛد شمار کرُن یُتھ تمیُک قٟمت مقرر سپدِ، تہٕ تمس شخصس پزِ تمہِ دوٚہہ سُہ رقم کاہنس ادا کرُن، پتہٕ بنہِ سۅ زمیٖن تمؠ سنٛز تہٕ سُہ رقم بنہِ یہُوواہؔ سنٛدِ خٲطرٕ اکھ مقدس تحفہٕ۔24شادمٲنی ہنٛدِ وریہِ سُہ کٕننہٕ آمُت کھاہ بنیاو تمس نفرٕ سنٛز ملکِیت یُس تمؠ سنٛز ملکِیت برونٛٹھےٕ اوس۔25سۅ سٲری ادا کٔرمژٕ چٲندؠ گژھِ مقدس خٟمس منٛز رٲیج چاندِ ہنٛدِ نیٚرخہٕ مطٲبق شمار کرنہٕ ینؠ۔26کٲنٛسہِ أکس تہِ چُھنہٕ اجازت کٲنسہِ گٲو یا چھرٕ سُنٛد یونہٕ بچہ کُنہِ مقصدٕ خٲطرٕ مخصوص کرُن، تکیازِ یونہٕ بچہ چھِ یہُوواہؔ برونٛٹھے سٕنٛدؠ۔27ہرگاہ کانٛہہ اکھ تمس سُہ اکھ جانور دِیہ یوس نہٕ تمس قٲبلِ قبول آسہ، سُہ شخص ہیٚکہ تمس تمؠ سٕنٛدِ قٟمتکہِ علاوٕ پٲنژم حصہٕ ادا کٔرتھ واپس مٔلؠ ہٮ۪تھ۔ ہرگاہ سُہ تمس مٔلؠ ہیٚکہ نہٕ ہٮ۪تھ، تیلہِ گژھِ سُہ جان قٟمتس کٕننہٕ یُن۔28بہرحال، یہُوواہسؔ مخصوص کرنہٕ آمُت غلام، جانور یا وراثتی زمیٖن گژھِنہٕ کٕننہٕ یِن نہٕ گژھِ واپس مٔلؠ ہینہٕ یِن۔ تِم چھِ یہُوواہسؔ نِشہ پاک آسن۔29کانٛہہ نفر یمؠ سۅ کٲم کٔرمژٕ آسہ یِس یہُوواہسؔ نِشہ سؠٹھاہ ناکارٕ آسہ، سُہ گژھِنہٕ یلہٕ تراون۔ لوٗکھ گژھن تمس أکس نفرس یقیٖنن قتل کرنؠ۔30زمیٖنہِ منٛز تمام وۅپدن والیٚو فصلن ہنٛدِ پیداوارن ہنٛدس دہمہِ حصُک مٲلکھ چُھ یہُوواہؔ۔31ہرگاہ کانٛہہ سُہ دہم حصہٕ واپس مٔلؠ ہیوٚن یژھِ، سُہ گژھِ تمٛیک قٟمت بیٚیہِ تمیٛکہِ قٟمتُک پٲنژم حصہٕ علاوٕ ادا کٔرِتھ مٔلؠ ہٮ۪تھ۔32گرکیو دۅیو چاروایو منٛز چُھ اکھ یہُوواہؔ سُنٛد۔ ییٚلہِ اکھ پۅہوٚل تِمن پننہِ لورِ تٔلؠ نیران نیران گنٛزراون چُھ، أتی کرِ سُہ فٲصلہٕ زِ سُہ کٔم دِیہ مےٚ، تمس پزِ پریتھ دٔہمس یہُوواہؔ سٕنٛدِ خٲطرٕ نشان دیُن۔33گژھِ نہٕ تمہِ وِزِ مٲڑین تراوُن تہٕ رٕتٮ۪ن نشان دیُن یا مٲڑین رٕتیٚو سٟتؠ بدلاوُن۔ ہرگاہ سُہ أکس چاروٲیس بییٚس سٟتؠ بدلاوِ، تِم دوٚشوےسپدن یہُوواہؔ سٕنٛدؠ پتہٕ ییہِ نہٕ پۅہوٚلس تِم واپس مٔلؠ ہینُک اجازت دِنہٕ۔34یِم چھِ تِم حکم یِم یہُوواہنؔ موسیٰؔ ہس کوہِ طورس پؠٹھ لوٗکن ونہٕ باپتھ دِیت۔
Bridge Connectivity Solutions Pvt. Ltd.