احبار16
1ہارونؔ سٕنٛدیو دُیو نیٚچیو ہنٛدِ مرنہٕ پتہٕ سُپد یہُوواہؔ موسیٰؔ ہس سٟتؠ ہمکلام، تکیازِ تِمو ٲس یہُوواہسؔ غٲر شرعی اندازس منٛز مشکہٕ تُجہ زٲجمژ۔2تمؠ ووٚن تس، "پننِس بٲیس ہارونسؔ وُن زِ سُہ گژھِ نہٕ سؠٹھاہ پاک جایہِ کُن، یوسہٕ انٛدرمِس پردس منٛز چھِ، یتھ منٛز مقدس صندوق تہٕ تمیک سرپوش چُھ، یتٮ۪ن بہٕ تتھ ابرس منٛز موجود چُھس یُس تتھ پٹھٕ کِنؠ چُھ۔ ہرگاہ ہارونؔ تتھ کمرس منٛز تمہِ وِزِ ژاو یُس نہٕ موزون آسہ، سُہ سپدِ مارٕ۔3ییٚلہِ ہارونؔ مقدس خٟمکس سؠٹھاہ پاک جایہِ منٛز دٲخل سپدِ، سُہ گژھِ پننؠن گناہن ہنٛدِ باپتھ أکس دانٛدس خش کرُن، بیٚیہِ گژھِ اکھ کٹھ نیاز باپتھ مارٕ یُن یمِس کاہن قربان گاہس پؠٹھ پوٚرٕ پٲٹھؠ زالہِ۔4پتہٕ گژھِ ہارونؔ سران کرُن تہٕ مقدس پوشاک لاگُن کپرک انٛدرِم پلو بیٚیہِ کُرتہٕ لاگُن، کٔلس دستار گنڈُن، کمرس کمربند گنڈُن، سینہٕ بند لاگُن۔5اسرائیلٕکؠ لوٗکھ گژھن تمس نِشہ زٕ ژھاولؠ واتناونؠ یِم تِہنٛدین گناہن ہنٛدِ باپتھ مارِ ینؠ، بیٚیہِ اکھ کٹھ گژھِ مارنہٕ یُن تہٕ قربان گاہس پؠٹھ صوبوٗتُے زالنہٕ یُن۔6ہارونؔ گژھِ سُہ دانٛد مےٚ قربان کرُن یتھ بہٕ تمؠ سٕنٛدؠ تہٕ تمؠ سنٛدین گرِکؠن بٲژن ہنٛدؠ گناہ معاف کرٕ۔7پتہٕ گژھِ سُہ زٕ ژھاولؠ مقدس خٟمکس دروازس پؠٹھ واتناوُن۔8سُہ گژھِ چیرِ ترٲوتھ فٲصلہٕ کرُن زِ کُس ژھاول ییہِ میانہِ خٲطرٕ قربان کرنہٕ تہٕ کُس ژھاول ییہِ یلہٕ تراونہٕ۔9یُس ژھاول چیرِ ترٲوتھ مےٚ قربان کرنہٕ خٲطرٕ ژارنہٕ آو سُہ گژھِ ہارونؔ مےٚ نِشہ أننُ۔ یہِ آسہ لوٗکن ہنٛدین گناہن ہنٛدِ خٲطرٕ اکھ نیاز۔10ہارونؔ گژھِ بیاکھ ژھاول تہِ مےٚ نِشہ أننُ مگر سُہ چُھ نہٕ مارُن۔ سُہ ییہِ زندۓ ییٚلہ تراونہٕ۔ ییٚلہِ ہارونؔ تمس وجارس کُن روانہٕ کرِ، بہٕ بخشہِ لوٗکن ہنٛدؠ گناہ۔11پتہٕ واتناوِ ہارونؔ تمس ہکھرس پننہِ باپتھ بیٚیہِ پننؠن گرکؠن بٲژن ہنٛدِ باپتھ اکہِ نیازِ رنگؠ مےٚ نِشہ۔ سُہ گژھِ تمس ہکھرس پننؠن گناہن ہنٛدِ خٲطرٕ قربان کرُن، تہٕ سُہ گژھِ خوٗن أکس بانس منٛز رٹُن۔12پتہ گژھِ سُہ سرتل قربان گاہ منٛز کینٛہہ تنگل تُلُن تہٕ تِم وُدٕ دانہِ منٛز برُن۔ پتہٕ گژھِ سُہ پننؠن اتھن منٛز اصل پٲٹھؠ پشمٕژ خوشبو برُن۔ تمہِ پتہٕ گژھِ سُہ خوشبو بیٚیہِ وُدٕ دٲنؠ تُلُن تہٕ مقدس خٟمکس منٛز پردس اندر سؠٹھاہ پاک جایہِ منٛز اژن۔13سُہ گژھِ خوشبو تہٕ وُدٕ دٲنؠ یہُوواہسؔ برونٛہہ کنہِ تھوٚن۔ دزونہِ خوشبو سٟتؠ کھسہِ مقدس صندوقکہ سرپوشہِ پؠٹھؠ اکھ اوٚبر ہیٚور کُن۔ ہرگاہ سُہ یِمن ہدٲیتن پؠٹھ عمل کرِ، سُہ سپدِ نہٕ تیلہِ یہُوواہسؔ نیاز پیش کرنہٕ وِزِ مارٕ۔14ہارونؔ گژھِ پتہٕ تتھ بانس منٛز پننٕؠ انوٚگجؠ بوٚڈناون تہٕ مقدس صندوقکس سرپوشش کینٛہہ خوٗن چھکن، بیٚیہِ گژھِ کینٛہہ خوٗن صندوقس برونٛہہ کنہِ ستہِ لٹہِ چھکُن۔15ہارونؔ گژھِ پتہٕ مقدس خٟمہ منٛز نیٚبر کُن نیرپن تہٕ ژھاولِس خش کرُن، یُس لوٗکن ہنٛدِین گناہن ہنٛدِ باپتھ اکھ نیاز آسہ۔ پتہٕ گژھِ سُہ کینٛہہ خوٗن پردس پٔتؠ کِنؠ سؠٹھاہ پاک جایہِ منٛز أننُ۔ سُہ گژھِ تتہِ کینٛہہ خوٗن مقدس صندوقس سرپوشش تہٕ صندوقس برونٛہہ کنہِ چھکُن، یتھٕ پٲٹھؠ تمؠ دانٛدٕ سٕنٛدِس خوٗنس کوٚر۔16یہِ کرنہٕ سٟتؠ کرِ سُہ سؠٹھاہ پاک جایہِ شوٗژ۔ بیٚیہِ گژھِ سُہ مقدس خٟمس کینٛہہ خوٗن چھکُن، تکیازِ بہٕ چُھس اسرائیل کٮ۪ن لوٗکن ہنٛدِس ڈیرس منٛزس موجود یتٮ۪ن خٟمہ چُھ، یِم لوٗکھ چھِنہٕ گناہ کرنہٕ سببہٕ مےٚ لایق روٗدِمٕتؠ۔17ییٚلہِ ہارونؔ مقدس خٟمس منٛز سؠٹھاہ پاک جایہِ اندر شوٗژ کرنہِ گژھِ بیٚیہِ کٲنسہِ أکس تہِ گژھِنہٕ مقدس خٟمکس دوٚیمس جصص منٛز دٲخل سپدنُک اجازت دِنہٕ یُن۔ ہارونؔن ییٚلہِ تِم رسمہٕ پوٚرٕ آسن کرِمژٕ یِمو سٟتؠ بہٕ تمؠ سٕنٛدؠ، تمؠ سنٛدین گرِکؠن بٲژن تہٕ تمام اسرائیل کٮ۪ن لوٗکن ہنٛدؠ گناہ معاف کرٕ، تمہِ پتہٕ آسہ کٲنسہِ کاہنس مقدس خٟمس اندر دٲخل سپدنُک اجازت۔18پتہٕ گژھِ ہارونؔ خٟمہ منٛز نیٚبر کُن میون قربان گاہ شوٗژ کرنہِ نیرُن۔ سُہ گژھِ دانٛدٕ سُنٛد کینٛہہ خوٗن تہٕ ژھاولؠ سُنٛد کینٛہہ خوٗن قربان گاہ کؠن کُنن پؠٹھ پریتھ أکس ہینگس متھن۔19ہارونؔ گژھِ پتہٕ پننٕؠ انوٚنگجؠ بانہٕ کس خوٗنس منٛز بوٚڈناوُن تہٕ کینٛہہ خوٗن قربان گاہس پؠٹھ ستہِ لٹہِ چھکُن۔ یہِ کرنہٕ سٟتؠ کرِ سُہ قربان گاہس اسرائی کیٚو لوٗکن ہنٛزو غلط کامیو نِشہ الگ۔ قربان گاہ ییہِ میانہِ باپتھ الگ کرنہٕ۔20ییٚلہِ ہاروننؔ مقدس خٟمس اندر سؠٹھاہ پاک جایہِ بیٚیہِ سارسے مقدس خٟمس تہٕ قربان گاہس صفٲییٔ کٔرِتھ مکلٲمژٕ آسہ، سُہ گژھِ سُہ ژوٚرمُت ژھاوُل آزاد کرنہٕ خٲطرٕ أننُ۔21سُہ گژھِ تمس ژھاولؠ سنٛدِس کٔلس پؠٹھ پننٕؠ اتھ تھاوُن تہٕ اسرائیل کٮ۪ن لوٗکن ہنٛدین گناہن ہُنٛد اعتراف کرُن۔ امہِ سٟتؠ تراوِ سُہ تِہنٛدین گناہن ہُنٛد جرم ژھاولؠ سنٛدِس کٔلس پؠٹھ۔ پتہٕ گژھِ سُہ ژھاوُل أکس منتخب کٔرؠ مِتس نفرس حوالہٕ کرُن یُس تمس ژھاولس وجارس منٛز سوزِ۔22بہٕ تھوٕ نظر ییٚلہِ سُہ ژھاوُل آسہ لوٗکن ہنٛدین گناہن ہُنٛدؠ تمام جرم وجارس منٛز پکناوان یِم تَمو کٔرؠ مٕتؠ چھِ۔23ییٚلہِ ہارونؔ سؠٹھاہ پاک جایہِ منٛز نیٚبر نیرِ تہٕ مقدس خٟمکس بییِس حصس منٛز گژھان آسہ، سُہ گژھِ تِم پلو نیٚبر کرُن یِم تمؠ لٲگمِت ٲسؠ، سُہ گژھِ تِمن خاص پلون تٔتی تھون۔24سُہ گژھِ پتہٕ أکس پاک جایہِ منٛز سران کرُن، تہٕ پننٕؠ اصلی پلو لٲگُن، بیٚیہِ کرِ سُہ تِمن جانورن قربان یِم سُہ قربان گاہس پؠٹھ پننؠن تہٕ اسرائیل کٮ۪ن لوٗکن ہنٛدِ خٲطرٕ پوٚرٕ پٲٹھؠ زالہِ۔ یہُوواہؔ کرِ پتہٕ تِہنٛدؠ گناہ معاف۔25سُہ گژھِ بیٚیہِ تِمن دوٚن قربان کٔرؠ مِتین جانورن ہُنٛد سورےٕ چرب قربان گاہس پؠٹھ زالُن۔26سُہ نفر یمؠ ژھاوُل وجارس منٛز آزاد کرنہٕ باپتھ واتنوومُت آسہ، سُہ گژھِ واپس ینہِ پتہٕ پننٕؠ پلو چھلُن بیٚیہِ سران کرُن۔ تمہِ پتہٕ ہیٚکہ سُہ ڈیرس منٛز دُبارٕ دٲخل سپدیتھ۔27یُس دانٛد تہٕ ژھاوُل آو لوٗکن ہنٛدین گناہن ہنٛد کفارٕ خٲطرٕ نیاز کرنہٕ تِمن ہنٛزٕ لاشہِ گژھن ڈیرٕ نیٚبر کڈنہٕ ینہِ تہٕ زالنؠ۔ تِمن جانورن ہُنٛد مسلہٕ تہٕ تِہنٛد انٛدرِم تان بیٚیہِ تِہنٛد گوٚہ گژھِ زالہٕ یُن۔28یُس نفر تِم چیز زالہِ سُہ گژھِ ڈیرس منٛز واپس دٲخل سپدنہٕ برونٛہہ پننٕؠ پلو چھلُن بیٚیہِ سران کرُن۔29سٔتمہِ رؠتکہِ دہمہِ تٲریخکہِ دوٚہہ یُس مےٚ مقرر کوٚرمُت چُھ، توٚہہِ گژھیو روز تھٲونؠ تہٕ کانٛہہ تہِ کٲم گژھِ نہٕ کرنؠ۔ یہِ چُھ تُہنٛدِ خٲطرٕ ابدی فرض۔ توٚہہِ سارنے پیدٲیشی اسرائیل کیٚن لوٗکن تہٕ سارنے ۅپرن یِم توٚہہِ سٟتؠ بسان چھِ۔30ہارونؔ دییہِ تمہِ دوٚہہ تمہٕ رسمہٕ انجام یِمو سٟتؠ بہٕ توٚہہِ سارنے معاف کرٕ تہٕ بہٕ کرہو توٚہؠ سٲری تمام قسمہٕ کیٚو گناہو ہنٛدیو جرمو نِشہ آزاد۔31سُہ اکھ دوٚہہ آسہ تُہنٛدِ خٲطرٕ آرام کرنُک تہٕ توٚہہِ چھِنہٕ سبت دوٚہُن ہنٛدؠ پٲٹھؠ کانٛہہ تہِ کٲم کرنؠ، تمہِ دوٚہہ چُھ توٚہہِ سارسے دوٚہس روزدر روٗزن۔ یہِ چُھ تُہنٛدِ خٲطرٕ ابدی حکم یتھ توٚہہِ سارنے تٲبیدٲری کرنؠ چھِ۔32یمِس کاہنس زیتون تیٖلہٕ سٟتؠ مٲلشؠ کرنہٕ ییہِ تہٕ یہُوواہسؔ خدمت کرنہٕ خٲطرٕ ییہِ باقیو نِشہ الگ کرنہٕ، سُہ کرِ اکھ قۅربٲنی پیش، لاگہِ تِم پلو یِم یہُوواہسؔ احترام کرنہٕ باپتھ الگ چھِ آسن،33تہٕ قۅربٲنیہِ کرِ پیش۔ یہِ کرِ سُہ سؠٹھاہ زیادٕ پاک جایہِ، سٲرسےٕ مقدس خٟمس، قربان گاہس، کاہنن، تہٕ تمام اسرائیل کٮ۪ن لوٗکن شوٗژ کرنہٕ باپتھ، یتھٕ پٲٹھؠ ہاروننؔ کوٚر۔34یہِ آسہ تُہنٛدِ باپتھ اکھ ابدی فرض یتھ توٚہہِ پریتھ ورؠیہِ تٲبیدٲری کرنؠ چھِ، یُتھ بہٕ توٚہہِ اسرائیل کٮ۪ن لوٗکن ہنٛدؠ کٔرمِتؠ گناہ معاف کرٕ۔"
موسیٰؔ کٔر تِمن سارنے ہدایتن ہنٛز تٲبیدٲری یِم یہُوواہنؔ تمس دِیتمٕتؠ ٲسؠ۔
موسیٰؔ کٔر تِمن سارنے ہدایتن ہنٛز تٲبیدٲری یِم یہُوواہنؔ تمس دِیتمٕتؠ ٲسؠ۔
Bridge Connectivity Solutions Pvt. Ltd.