احبار14
1یہُوواہنؔ ووٚن موسیٰؔ ہس بیٚیہِ،2مسلچہِ لٲگ دار بٮ۪مارِ نِشہ یُس نفر بلیٚومُت آسہ تمؠ سٕنٛدِ خٲطرٕ چُھ یہِ شرع۔3باقی لوٗکھ گژھن کاہنس تمس نفرس متلق خبر دِنؠ۔ کاہن گژھِ ڈیرٕ بؠبر تہٕ تمس کرِ ملاحظ۔ ہرگاہ مسلچ سۅ بٮ۪مٲرؠ آسہ بٔلیمٕژ،4کاہن وُنہِ زِ کٲنٛہہ أنہِ زٕ تِم جاناوار یِم یہُوواہسؔ قٲبلِ قبول آسن، تِمن سٟتؠ أنہِ کینٛہہ دیودٲرؠ زِیُن، کینٛہہ سُرخ ییرٕ پن تہٕ کینٛہہ زوفہ۔5پتہٕ دییہِ کاہن حکم زِ اکھ جاناوار گژھِ أکس کترِوِس بانس پؠٹھ رٔٹتھ مارنہٕ یُن یتھ منٛز صاف ناگہٕ آب آسہ۔6کاہن بوٗڈناوِ بییٚس جاناوارس، دیودٲرؠ زِیُن، سُرخ ییرٕ پن تہٕ زوفہ ہٮ۪تھ تتھ آبس منٛز یتھ منٛز ونؠ مارٕ آمتِس جانور سُنٛد خوٗن چُھ۔7پتہ چھکہِ سُہ کینٛہہ آب تہٕ خوٗن تمس بلیوٚمِتس نفرس ستہِ لٹہِ۔ پتہٕ کرِ سُہ اعلان زِ تمس نفرس چُھ باقی لوٗکن سٟتؠ روٗزنس دُبارٕ اجازت دِنہٕ یوان۔ کاہن تراوِ بییٚس جاناوارس یلہٕ تہٕ تمس دِیہ وٕڑو کرنُک اجازت۔8پتہٕ گژھِ ٹھیک سٕپدمُت نفر پننٕؠ پلو چھلُن، پننُ مس کٲسُن بیٚیہِ سران کرُن۔ یِمؠ کامہِ کرنہٕ پتہٕ چُھ تمس ڈیرس منٛز واپس ینُک اجازت، مگر سُہ گژھِ پننِس خٟمس بؠرٕ کنہِ سٔتن دوٚہُن ٹھہرُن۔9سٔتمہِ دوٚہہ گژھِ سُہ پننُ مس ریش بیٚیہِ بُمہٕ ہٮ۪تھ دُبارٕ کٲسُن۔ پتہٕ گژھِ دُبارٕ پننٕؠ پلو چھلُن بیٚیہِ سران کرُن۔ یِم کامہِ کرنہٕ پتہٕ ییہِ تمس باقی لوٗکن سٟتؠ روزنُک اجازت دُبارٕ دِنہٕ۔10سُہ نفر گژھِ دوٚیمہِ دوٚہہ کُنہِ نۅقصہٕ ورٲے زٕ برٕ کٹھ تہٕ وٲرؠ شنؠ اکھ برٕ گٔب أننُ۔ بیٚیہِ گژھِ سُہ نیاز باپتھ أننُ تقریبن ساڑ شےٚ کلو زٲویُل اوٚٹ، یتھ زیتون تیٖل رلٲوِتھ آسہ بیٚیہِ اکہِ کلووُک ترٛیِم حصہٕ زیتون تیٖل۔11اعلان کرن وول کاہن گژھِ تمس مسلچ بؠمارِ نِشہ ٹھیک سپدن وٲلِس نفرس بیٚیہِ تمؠ سنٛدین نیازن مقدس خٟمکس دروازس نِشہ أننُ۔12پتہٕ گژھِ کاہن أکس برٕ کٹھس أننُ تہٕ زیتون تیٖل ہٮ۪تھ تھوٚد تُلتھ ہاون زِ یہِ نیاز چُھ یہُوواہسؔ غلطی ہنٛدِ خٲطرٕ دِنہٕ یوان تکیازِ سُہ بؠمارِ لد نفر اوس نہٕ یہُوواہسؔ تِم چیز دِنس قٲبل یِم تمس فرض ٲسؠ۔13پتہٕ گژھِ کاہن تمس کٹھس تتھ خاص جایہِ پؠٹھ خش کرُن یتٮ۪ن کاہن باقی قربانن مارن چھِ۔ لوٗکن ہنٛزِ معٲفی دِنہٕ خٲطرٕ نیازکؠ پٲٹھؠ چُھ خدا اتھ غلطی ہنٛد نیاز مانن یۅسہ سؠٹھاہ خاص چھِ لہٰذا مازکؠ مٲلکھ چھِ کاہن۔14کاہن گژھِ جانور سُنٛد کینٛہہ خوٗن تُلن پتہٕ تمس نفرٕ سنٛزِ دٔچھنہِ کنہٕ فژِ، تمس سنٛدِس دٔچھنِس نیٚٹھس تہٕ تمؠ سنٛدِس دٔچھنِس کھوٚرِ نیٚٹھس پؠٹھ مُتھن۔15کاہن گژھِ کینٛہہ زیتون تیٖل تُلن تہٕ پننِس کھوٚرٕس اتھس منٛز تراون۔16پتہٕ گژھِ سُہ پننٕؠ دٔچِھنؠ اوٚنگج تتھ تیٖلس منٛز بوٚڑناوُن تہٕ یہُوواہسؔ برونٛہہ کنہِ ستہِ لٹہِ چھکُن۔17دوٚیِم، کاہن گژھِ پننہِ دٔچھنہِ اتھٕ منٛز کینٛہہ تیٖل تمس نفرٕ سنٛزِ دٔچھنہِ کنہٕ فژِ، تمؠ سنٛدِس دٔچھنِس نیٚٹھس تہٕ دٔچھنہِ کھوٚرٕکس نیٚٹھس پؠٹھ تراون۔ سُہ گژھِ برابر تَمنے ترٛین جاین پؠٹھ سُہ خوٗن تراون یِمن پؠٹھ تمؠ برونٛٹھے خوٗن تراومُت چُھ۔18کاہن گژھِ پننِس دٔچھنِس اتھس منٛز ہُریومُت تیٖل تمس نفرٕ سنٛدِس کٔلس منٛز تراون؛ یہِ ہاوِ زِ یہُوواہنؔ چھِ تمس نفرٕ سٕنٛدؠ گناہ معاف کٔرؠ مٕتؠ۔19کاہن گژھِ برٕ گٔبہِ خش کرُن یِس تمؠ نفرن أنؠ؛ یہِ آسہ تمس نفرٕ سنٛدین گناہن ہنٛدِ خٲطرٕ نیاز یُتھ زن یہُوواہؔ تمس معاف کرِ۔ تمہِ پتہٕ کرِ کاہن بییٚس برٕ کٹھس خش تہٕ قربان گاہس پؠٹھ زالس پوٚرٕ پٲٹھؠ۔20بیٚیہِ زالہ سُہ ٲٹِس بناونہٕ آمٕتؠ نیاز تِم سٲری بزنہٕ باپتھ نیاز ہٮ۪تھ۔ پتہٕ آسہ سُہ نفر ڈیرس منٛز روزنہٕ خٲطرٕ ٹھیک؛ تمس ییہِ باقی لوٗکن سٟتؠ روزنُک اجازت دِنہٕ۔21ہرگاہ کاہنس پوٚرٕ پٲٹھؠ پتاہ چھِ زِ سُہ چُھ غریب تہٕ سُہ ہیٚکہ نہٕ تِم سٲری جانور أنِتھ، سُہ نفر گژھِ کاہن سٕنٛدِ خٲطرٕ اکھ برٕ أننُ یُس کاہن تھوٚد تُلتھ یہُوواہسؔ پیش کرِ۔ یہِ آسہ اکھ قۅربٲنی تکیازِ سُہ بؠمارِ لد نفر اوس نہٕ یہُوواہسؔ سُہ دِنس لایق یوس تمس یہُوواہسؔ ضروٗری دیُن اوس۔ سُہ گژھِ بیٚیہِ تقریبن زٕ کلو اوٚٹ نیاز أننُ یتھ تقریبن اکہِ کلوک تریِم حصہٕ زیتون تیٖل رلٲوتھؠ آسہ؛ یہِ آسہ أٹِس بناونہٕ آمُت اکھ نیاز۔ سُہ گژھِ بیٚیہِ تقریبن زیتون تیٖلکہِ اکہِ کلوک تریِم حصہٕ أننُ۔22سُہ گژھِ بیٚیہِ زٕ قمرؠ یا زٕ کوتر أننُ، اکھ یہُوواہؔ سٕنٛدِ خٲطرٕ تِمن گناہن بخشنہٕ خٲطرٕ یِم تمؠ کٔرؠ مِت چھِ تہٕ بیاکھ کاہن سٕنٛدِ خٲطرٕ یمِس سُہ قربان گاہس پؠٹھ پوٚرٕ پٲٹھؠ زالہ۔23سُہ نفر گژھِ تمی ٲٹھمہِ دوٚہہ تِم چیز کاہنس نِشہ مقدس خٟمکس دروازس تل یہُوواہسؔ پیش کرنہٕ باپتھ أننُ۔24پتہٕ نیہ کاہن برٕس تہٕ زیتون تیٖل جرمُکہ نیازِ باپتھ تہٕ تُلہِ سُہ تِمن یہُوواہسؔ کُن اکہِ نیازِ رنگؠ تھوٚد تہٕ کرِ تس برونٛہہ کنہِ پیش۔25کاہن کرِ برٕس خش بیٚیہِ رٹہِ کینٛہہ خوٗن أکس بانس منٛز سُہ تراوِ تمس نفرس دٔچھنہِ کنہٕ فژِ پؠٹھ، تمؠ سنٛدِس دٔچھنِس نیٚٹھس پؠٹھ بیٚیہِ تمؠ سنٛدِس دٔچھنِس کھوٚرٕ نیٚٹھس پؠٹھ۔26کاہن تُلہِ پتہٕ کینٛہہ زیتون تیٖل تہٕ تراوِ پننِس کھوورِس اتھس منٛز۔27پتہٕ گژھِ سُہ پننٕؠ شہادچؠ اوٚنگج تتھ کُھورِ اتھٕ کس تیٖلس منٛز بوٚڑناون تہٕ کرِ یہُوواہسؔ برونٛہہ کنہِ ستہِ لٹہِ چھرکاو۔28سُہ گژھِ پننہِ اتھٕ منٛزٕ کہ تیٖلہٕ منٛز کینٛہہ تیٖل برابر تمنے جایِن تراون یتٮ۪ن تمؠ خوٗن تراو۔29سُہ گژھِ پننِس اتھس منٛز ہُریومُت تیٖل تمس ٹھیک سپدن وٲلِس نفرٕ سنٛدِس کٔلس پؠٹھ تراون۔ یہِ ہاوِ زِ یہُوواہنؔ چھِ تمؠ سٕنٛدؠ گناہ معاف کٔریمتٕؠ۔30کاہن گژھِ پتہٕ تِمن قمریِن یا کوتر بَچن، یُس تہٕ قٔسم تمؠ نفرن أنومُت چُھ، قربان کرُن۔31اکھ آسہ گناہن ہنٛد نیاز تہٕ بیاکھ ییہِ قربان گاہس پؠٹھ ٲٹِس بناوٕ آمتہِ نیاز ہٮ۪تھ پوٚرٕ پٲٹھؠ زالنہٕ۔ تہِ کران سٟتؠ دِیہ کاہن تمس نفرٕ سنٛدین گناہن ہُنٛد کفارٕ۔32یہِ شرع چُھ تمس نفرٕ سٕنٛدِ خٲطرٕ یمِس مسلچ لٲگدار بٮ۪مٲرؠ آسہ تہٕ غریب آسنہٕ سببہٕ آسہ نہٕ عام نیاز أننُک طاقت تھاوان، یُتھ زن سُہ لوٗکن سٟتؠ دُبارٕ ہیٚکہ روٗزتھ۔33یہُوواہنؔ ووٚن موسیٰؔ ہس تہٕ ہارونسؔ بیٚیہِ،34"بہٕ چُھس توٚہہِ کنعان مُلک دِنہٕ وول یُس تُہنٛدین لوٗکن ہنٛز ملکِیت بنہِ۔ ییٚلہِ توٚہہِ تتھ مُلکس منٛز دٲخل سپدیو، سُہ وقت تہِ واتہِ ییٚلہِ بہٕ تُہنٛدس کُنہِ أکس گرس اندر لاوٕ ظٲہر کرناوٕ۔35ہرگاہ تُتھ واقع پیش ییہِ، تمہِ مکانُک مٲلکھ گژھِ کاہنس نِشہ گژھن تہٕ تس ونُن، "میٲنس گرس منٛز چُھ کیاہ تام یوس لاوٕ ہیوؠ بوٚزنہٕ چُھ یوان۔"36پتہٕ وننہِ کاہن تمس نفرس، "لاوس ملاحظ کرنہٕ باپتھ تتھ مکانس منٛز میانہٕ اژنہٕ برونٛہہ کر تمہِ مکانہٕ منٛز پرٛتھ کانٛہہ چیز نیٚبر۔ ہرگاہ ژےٚ تہِ کۅرتھ نہٕ، تیلہِ کرٕ بہٕ اعلان زِ تتھ مکانس منٛز چُھ پرٛتھ کانٛہہ چیز ناپاک سُپدمُت۔"37مٲلکھ ییٚلہِ پننہِ مکانہٕ منٛز پرٛتھ کانٛہہ چیز نیٚبر کرِ تمہِ پتہٕ گژھِ کاہن تتھ مکانس ملاحظ کرنہٕ باپتھ دٲخل۔ ہرگاہ لاون آسن دیوارن پؠٹھ سٔبز یا ووٚزلؠ داغ پٲدٕ کٔرمِت یِم دیوارن ہنٛدِ بتہٕ کھۅتہٕ سرنؠ آسن،38کاہن نیرِ مکانہٕ منٛز نیٚبر تہٕ کرِس سٔتن دوٚہُن ہنٛدِ خٲطرٕ قُلفُ۔39سٔتِمس دوٚہس پؠٹھ گژھِ سُہ دُبارٕ ملاحظ کرنہٕ باپتھ تتھ مکانس منٛز۔ ہرگاہ لاوٕ آسہ دیوارن پؠٹھ پھہلیومُت،40کاہن وننہِ کٲنٛسہِ أکس تِمہٕ سارے کنہِ کڈ دیوارو منٛز نیٚبر یِمن لاوٕ چُھ تہٕ شہرٕ نیٚبر دِ کھوٗڈس منٛز دٲریتھ۔41پتہٕ گژھِ گرُک مٲلکھ مکانکؠ سٲری دیوار انٛدرؠ کِنؠ زولُن، تہٕ زِلنہٕ آمُت سورے کینٛہہ گژھِ شہرِ نیٚبر ژوٚٹہٕ ڈیرس منٛز دٲریتھ دِنہٕ یُن۔42مٲلکھ گژھِ لاوٕ دار کنیو بدلہٕ نیہ کنہِ لاگُن بیٚیہِ گژھِ بدل مؠژ أننُ تہٕ مکانہٕ کؠن دِیوارچن کنؠن پؠٹھٕ لِوُن۔43لِونہٕ پتہٕ ہرگاہ لاوٕ دُبارٕ مکانس منٛز ظٲہر سپدِ،44کاہن گژھِ تتھ مکانس دُبارٕ ملاحظ کرُن۔ ہرگاہ لاوٕ آسہ مکانس منٛز پھہلیومُت تیلہِ چُھ یہِ صاف ظٲہر زِ لاوٕ چُھ تمہِ قسمُک یُس مکانس تباہ کران چُھ، تہٕ تتھ مکانس منٛز ییہِ نہٕ کٲنسہِ تہِ روزنُک اجازت دنہٕ۔45یہِ گژھِ پوٗرٕ پٲٹھؠ گراونہٕ یُن۔ کنہِ، لکٕر، میٚژ۔ بیٚیہِ سٲری چیز گژھن شہرٕ نیٚبر أکس ژھۅٹہٕ ڈیرس منٛز دٲرتھ دِنہٕ ینؠ۔46مکان قلفس تل روٗزنس دوران یُس اکھ تتھ مکانس منٛز دٲخل سپدِ تمس ییہِ نہٕ تمہِ دوٚہہ شام تام باقی لوٗکن سٟتؠ روزنُک اجازت دِنہٕ۔47یُس اکھ تتھ مکانس منٛز تتھ وقتس دوٗران شونٛگہِ یا کھییہِ سُہ گژھِ پننٕؠ پلو چَھلُن۔48ییٚلہ کاہن لِونہٕ پتہٕ تتھ گرس ملاحظ کوٚر، ہرگاہ لاوٕ چُھ نہٕ پھہلیومُت، سُہ کرِ اعلان زِ لوٗکھ ہیکن تتھ منٛز روٗرتھ تکیازِ لاوٕ چُھ ختم گوٚومُت۔49لوٗکن تتھ منٛز رۅٗزنُک اجازت دِنہٕ برونٛہہ گژھِ کاہن زٕ جاناوار، کینٛہہ دیودٲرؠ زیٚن، کینٛہہ ووٚزل ییرٕ پن تہٕ کینٛہہ زوفہٕ أننُ۔50سُہ گژھِ أکس جاناوارس تتھ أکس کترِوس بانس پؠٹھ رٔٹتھ مارن یتھ منٛز اکہِ ناگہٕ منٛز اَنمُت آب آسہ۔51پتہٕ تُلہِ سُہ دیودٲرؠ زیٚن، زوفہٕ، ووزل ییرٕ پن تہٕ بوٚڈناوِ ذبح کٔرؠ مِتس جاناوار سنٛدِس خوٗنس منٛز، بیٚیہِ چھکہِ کینٛہہ خوٗن تہٕ آب تتھ مکانس پؠٹھ ستہِ لٹہِ۔52یِم سٲری چیز کرنہٕ پتہٕ بناوِ سُہ تتھ مکانس مٲلکہٕ سٕنٛدِ باپتھ دُبارٕ شوٗژ تہٕ روٗزنس لایق۔53پتہٕ گژھِ سُہ بییس جاناوارس یلہٕ تراون۔ تہِ کرنہٕ سٟتؠ کرِ سُہ سۅ رسم پوٚرٕ یمہِ سٟتؠ مکان لوٗکن ہنٛدِ روزنہٕ باپتھ دُبارٕ پاک سپدِ۔54یہِ شریعت چُھ لٲگدار بٮ۪مارین، خٲرش لد زخمن ہنٛدِ خٲطرٕ،55لاوٕ خٲطرٕ یُس پلون یا مکانس منٛز آسہ،56تہٕ ورمہٕ خٲطرٕ، زہرٕباد، یا زخمن پؠٹھ چمکہٕ ونؠ داغن خٲطرٕ؛57یِم ہداہات کرن فٲصلہٕ زِ لوٗکن یِیا تِمن چیزن کُن اتھٕ لاگنُک اجازت دِنہٕ یا نہٕ۔"
Bridge Connectivity Solutions Pvt. Ltd.