یشوع17
1یہِ چُھ تمہِ زمیٖنہِ ہُنٛد فہرست یۅسہ منسیؔ سٕنٛدِ خاندانس دِنہٕ ٲس آمٕژ۔ منسیؔ سُنٛد زیُٹھ نیٚچو اوس کیرؔ تہٕ تمہِ سُنٛد زُر اوس جِلعادؔ۔ تمسٕنٛدِس اولادس آیہِ مکِیر سٕنٛدِس اعزازس منٛز جِلعاد تہٕ بسن کٮ۪ن علاقن منٛز زمینہٕ دِنہٕ یُس اکھ عظیم سپٲہی اوس۔2منسیؔ سنٛدٮ۪ن دوٚیمٮ۪ن خاندانن تہِ ٲس زمین دِنہٕ آمٕژ: ابیعزرؔ، خلقؔ، اسیری ایلؔ، سِکم، حفرؔ تہٕ سمِیدع۔ یِم ٲسؠ منسیؔ سنٛدٮ۪ن اولادن ہنٛدؠ ناو یُس پانہٕ یوسفؔ سُنٛد نیٚچو اوس۔ پٮرٮ۪تھ خاندانہٕ خٲطرٕ ٲس زمین دِنہٕ آمٕژ۔3جلعاد سنٛدِ نسلہٕ منٛزٕ اوس صِلافحادؔ بن حفرؔ۔ یُس مکِیر سُنٛد نیٚچو تہٕ منسیؔ سُنٛد زُر اوس۔ أمِس اوسنہٕ کانٛہہ اولاد۔ أمِس آسہ کورے یاژٕ۔ تہٕ تہنٛدؠ ناو ٲسؠ محلاہؔ، نُوعاہؔ، حُجلاہ مِلکاہؔ تہٕ تِرضاہؔ۔4یِم مستورات گییہِ الِیعزرؔ سارنےٕ کاہنن ہنٛدؠ زِٹھؠ یسوعؔ تہٕ باقین اسرائیلی زِٹھٮ۪ن نِش۔ تِمو ووٚن، "أسؠ چھِ یژھان زِ توٚہؠ دِیو اسہِ کینٛہہ زمین تکیازِ خداین اوس موسیٰؔ ہس ووٚنمُت زِ سُہ دِیہ اسہِ کینٛہہ زمین، یتھٕ پٲٹھؠ زن توٚہہِ سانٮ۪ن خاندانن ہنٛدٮ۪ن مردن دِژٕو۔ "چنانچہ الِیعزرؔ کوٚر تی یہِ خداوندن حکم اوس دیُتمُت: أمؠ دِژ تِمن کینٛہہ زمین یتھٕ پٲٹھؠ امؠ تہنٛدٮ۪ن پِترن خٲطرٕ کوٚر۔ 5چنانچہ منسیؔ سٕنٛدِس خاندانس نِش ٲسؠ یردن دریاو کِس مغربس منٛز زمینٕکؠ داہ حصہٕ تہٕ جلعادؔ تہٕ بسنس منٛز دریائے یردن کِس مشرقس منٛز زٕ حصہ6منسیؔ خاندانکٮ۪ن مستوراتن تہِ آیہِ مردن ہنٛدؠ پٲٹھؠ دریاوِ مغرب پاسہٕ زمیٖن دِنہٕ۔ جلعادِکؠ باقےٕحِصہٕ ٲسِکھ منسیؔ کعن باقی لوٗکن دِتؠ مٕتؠ۔7منسیؔ ہنٛدِس خاندانس یۅسہ زمین دِنہٕ ٲس آمٕژ سۅ ٲس تتھ زمیٖنہِ درمیان یتہِ آشرؔ خاندان روزان اوس تہٕ سکِمؔ نزدیک مکمیتؔاہ جایہِ۔ سرحد اوس جنوبس منٛز تفوحؔ کِس ناگس تام پھٔہلِتھ۔8تفُوحؔ شہرس نزدیکٕچ زمین ٲس منسیؔ خاندانچ۔ مگر تفوحؔ اوس پانہٕ افرائیمؔ خاندان کِس سرحد پٮ۪ٹھ تہٕ اوس درحقیقت افرائیمین ہُنٛد۔9سرحد اوس جنوب طرفہٕ قاناؔ کۅلہِ تام پھٔہلِتھ تہٕ کۅلہِ ہنٛدِس جنوبس منٛز ٲسؠ سٲری منسیؔ یِکؠ شہر۔ منسیؔ یُک سرحد اوس قاناہؔ کۅلہِ ہنٛدِ شمالہٕ طرفہٕ۔ یہِ اوس بحیرہ رومؔ تام پھٔہلِتھ۔10جنوبچ زمین ٲس افرائیمینؔ ہنٛز تہٕ شمالچ زمین ٲس منسیؔ خاندانن ہنٛز۔ بحیرہ رومؔ اوس منسیؔ یُک سرحد۔ آشرُؔک خاندان اوس سرحد کہِ شُمال طرفہٕ۔ ییٚلہِ زن اشکارُکؔ خاندان مشرقسؔ منٛز اوس۔11مگر اتہِ ٲسؠ اشکارؔ تہٕ آشرؔ خاندانن دِنہٕ آمتیٚن علاقن انٛدر شہر انٛدؠ پٔکؠ کٮ۪ن گامن سٟتؠیِم ٲسؠ دراصل منسیؔ ہنٛدٮ۪ن خاندان کٮ۪ن لوٗکن دِنہٕ آمٕژ۔ یِم شہر ٲسؠ بیت شانؔ، اِبلیعامؔ، دورؔ، عین دورؔ، تعانکؔ تہٕ مجِدوؔ تہٕ فہرستس منٛز تریٚیِم شہر نافتؔ۔12منسیؔ خاندانٕکؠ لوٗکھ ہیٚکہٕ نہٕ تتھ شہرس منٛز روزن والیٚن لوٗکن تتہِ نیرنس پٮ۪ٹھ مجبور کٔرِتھ۔ توے ٲسؠ کنعٲنؠ لوٗکھ پننِس مُلکس منٛز روزان۔13ییٚلہِ اسرائیلی مضبوط گے تہٕ تِمو کٔرؠ یِم کنعٲنؠ غلام بنٲوِتھ کام کرنہٕ باپتھ مجبور مگر تِم ہیٚکؠ نہٕ یِمن نِش زمین تھَپہِ نِتھ۔14یوسف سٕنٛدؠ اولادو یعنی افرائیمؔ تہٕ منسیؔ سٕنٛدؠ خاندان ووٚن یسوعسؔ، "توٚہہِ دِتو اسہِ صرف اکُے رقبہٕ، مگر سٲنِس خاندانس منٛز چھِ واریاہ لوٗکھ۔ پرٮ۪تھ انٛدٕ چھےٚ خداوندن اسہِ برکتھ کٔرمٕژ۔ تیٚلہِ کیازِ دِژٕو توٚہہِ اسہِ روزنہٕ باپتھ زمینُک اکھ کوٚکُٹ حصہ؟"15یسوعن ووٚ تِمن، "یوٚدوے توٚہہِ نِش واریاہ لوٗکھ چھِ، امہِ خٲطرِ نیرِو تہٕ ژٔٹیٚو جنگلٕکؠ کُلؠ تہٕ بنایِو پننٮ۪ن فصلن تہٕ پانس خٲطرٕ روزن جاے فِرزی تہٕ رفایم کٮ۪ن ملکن منٛز۔ توٚہہِ پزیٚو یی کرُن، تکیازِ کوٚہستٲنؠ ملک چُھ تہنٛدِ روزنہٕ خٲطرٕ تتہِ واریاہ تنگ"16افرائیمؔ تہٕ منسیؔ خاندانکٮ۪و لوٗکو دیُت جواب، "کوٚہستٲنؠ ملک چُھنہٕ سانہٕ باپتھ تیوٗت بوٚڈ۔ مگر اتہِ روزن والٮ۪ن کنعٲنین ہنٛدِ موجُب ہیٚکو نہٕ أسؠ مٲدانس منٛز پھٔلِتھ۔ بیت شانؔ تہٕ اتھ انٛدؠ پٔکؠ کٮ۪ن گامن منٛز کنعٲنؠ یس نزدیک چھِ شِسترو ڈٔلہٕ وٲلؠ رتھ۔"17یسوعنؔ دیُت بنی یوسفؔ افرائیمؔ تہٕ منسیؔ یس جواب، "تُہنٛد قوم چُھ پزی واریاہ زیادٕ تہٕ سٮ۪ٹھا طاقتور۔ تہٕ ؤنؠ دِمو بہٕ توٚہہِ بیٚیہِ اکھ زمین:18کوٚہستٲنؠ ملک تہِ بنہِ تُہنٛد۔ توٚہہِ پٮ۪نو کُلؠ ژَٹٕنؠ تاکہِ یہِ بنٲیو توٚہؠ پنُن، تہٕ تُہنٛدِ روزنہٕ باپتھ ییہِ جاے بناونہٕ۔ توٚہؠ کٔڑؠ ووکھ کنعٲنؠ نٮ۪بر، اگرچہ تِم مضبوط آسن تہٕ تِمن نِش آسن شِسترو ڈٔلہٕ وٲلؠ رتھ۔"
Bridge Connectivity Solutions Pvt. Ltd.