یشوع1
1ییٚلہ یہُوواہؔ سُنٛد بنٛدٕ موسیٰؔ یمہِ عالمہٕ دراو، یہُوواہنؔ دیُت حکم نُونؔ سٕنٛدِس نیٚچوِس یسوعسؔ یُس زن موسیٰؔ سنٛدٮ۪ن خٲدمن ہُند زیُٹھ اوس تہٕ وننَس،2"ژےٚ چھَے خبرےٕ زِ موسیٰؔ دراو۔ لہٰذا گنڈ کمر گژھِ وۅنؠ تیار یِم سٲری پننؠ لوٗکھ ہٮ۪تھ یردن دریاوس اپور ترنہٕ باپتھ۔ اژ تتھ زمیٖنس منٛز یُس بہٕ جلدٕے اسرائیل ین بخشہٕ۔3یپٲرؠ یپٲرؠ توٚہؠ اتھ زمیٖنس پھیرِو یۅسہ بہٕ دِمہٕ توٚہہِ، یمیُک مےٚ موسیٰؔ سنٛدٮ۪ن تمام لوٗکن وعدہ دیُت۔ 4یہِ زمین آسہ جنوبس منٛز بیابان پٮ۪ٹھٕ شمال مغربس منٛز لبنان پہاڑن تام دریائے فرات تام، تہٕ مغربس منٛز بحیرہ رومؔ تام، اتھ منز ییہِ سُہ سورےٕ علاقہٕ یتہِ زن حِتیِکؠ لوٗکھ لسان بسان چھِ۔5ییتِس کالس توٚہؠ اتہِ لسان بسان روزیٚو توٚہہِ ہیٚکنہٕ ہرگز تہِ کانٛہہ تلفس تل أنِتھ۔ بہٕ روزٕ توٚہہِ ڈکھَس برابر تِتھے پٲٹھؠ یتھٕ پٲٹھؠ زَن بہٕ موسیٰؔ ہسؔ اوسُس۔ بہٕ چُھس توٚہہِ سٕتؠ وعدہ کران زِ بہٕ مشراوو نہٕ توٚہؠ زانہٛہ تہِ نَہ تراوَو توٚہؠ اورؠ۔ 6باہمت بن تہٕ تھاو حوصلہ، تکیازِ ژےٚ چھےَ یمن لوٗکن وتھ ہاوٕنؠ تاکہِ یِم انن تتھ زمینہِ پننس تلفس تل، سۅ زمین یوٚس مےٚ یہنٛدٮ۪ن بُزرگن دِنُک وعدہ کوٚرمُت چُھ۔7بس روز باہمت تہٕ سیٹھاہ بہودُر۔ پورٕ یقین تہٕ وثوقہ سان اپناوُکھ تم قانون یِم ژٕ میٲنؠ بندٕ موسیٰؔ ہن ہٮ۪چھنووُکھ۔ اکہِ اکہِ کر یِمن پٮ۪ٹھ عمل۔ یوٚدوے ژٕ یہِ کرکھ، کامیاب روزَکھ یوٚت یوٚت تہِ ژٕ گژھکھ۔ 8پانہٕ وٲنؠ کٔرِو کتھ تتھ شریعتچہِ کتابہِ پٮ۪ٹھ یۅسہ توٚہؠ موسیٰؔ ہن پرنٲیِوٕ تہٕ ہچھنٲیِوٕ۔ اتھ منز بیان سپدیمتین قانونن پٮ۪ٹھ کٔرِو بار بار تہٕ دوٚہہ راتھ پانہٕ وٲنؠ کتھ۔ یِم قانون پاننٲیِو تہٕ عمل کٔرِو امہِ کِس وننس پٮ۪ٹھ۔ تہٕ یِم چُھو توٚہہِ ہٮ۪چھناوان زندٕ روزُن تاکہِ توٚہؠ بنیو خوشحال تہٕ کامیاب۔9یِنہ ہرگِز میون یہِ حکم مشراوکھ زِ ژٕ بن باہمت تہٕ حوصلہ منٛد۔ یِنہ کانٛہہ بیم یا بے نال ؤلی یا پس ہٮ۪متھ سپدکھ۔ بہٕ یہُوواہؔ! چون خدا روزی ہر وزِ ژےٚ سٟتؠ سٟتؠ یوٚت یوٚت تہِ ژٕ گژھکھ۔"10امہِ پتہٕ دیُت یسوعنؔ یِمن بنی اسرائیلی زِٹھٮ۪ن حکم،11"نیرِو پھِرنٲیو سٲرسےٕ لشکرس منٛز یہِ پارَے تہٕ کٔرِو تیٲری پننہِ ہیٚکتہٕ تہٕ پننہِ ضرورتہٕ حسابہٕ پانس سٟتؠ پنُن کھیٚن چٮ۪ن تُلنہِ باپتھ۔ توٚہہِ چُھو ترٮ۪ن دوٚہُن انٛدر برونٛہہ کنہِ کِس یتھ یردن دریاوس اپور ترُن۔ تہٕ اپارِ اتھ علاقس قبضہٕ کرُن یُس زَن یہُوواہؔ تُہنٛدؠ خداین توٚہہِ بخشنُک وعدہ کوٚرمُت چُھ۔12امہِ پتہٕ ووٚن یسوعؔن بنی روبن، بنی جد تہٕ منسیؔ قبیلہٕ کٮ۪ن نیصف خانوادن یِم زَن یردن دریاو کِس مشرقس منٛز بسن وٲلؠ ٲسؠ:13"تِم حکم تھٲیِو وارٕ ژٮ۪تس یِم توٚہہِ یہُوواہؔ سٕنٛدؠ بنٛدٕ موسیٰؔ ہن ؤنوٕ۔ موسیٰؔ ہن ووٚن، تُہنٛدؠ خداوندن یہُوواہنؔ چُھ توٚہہِ سُہ علاقہٕ دِنُک وعدہ دیُتمُت ییٚتہِ توٚہؠ مستقل پٲٹھؠ پنٕنؠ بستی قٲیِم کرِتھ ہیٚکو۔ تہٕ أتی و توٚہؠ لسِتھ بسِتھ۔14تہنزٕ آشنہِ، تُہنٛدؠ لۅکٕٹؠ شُرؠ، تہٕ تُہنٛدؠ گُپن ہیٚکن أتی یردن دریاوکس مشرقی علاقس منز لسِتھ بسِتھ، یُس توٚہہ موسیٰؔ ہن دِتو مگر چٲنؠ سٲری سِپاہ تہٕ چٲنؠ پنٕنؠ سٲتھی قبیلہٕ وٲلؠ گژھن باقیو اسرائیلی سٲتھیٚو برونٛہہ برونٛہہ اپور ترٕنؠ، تاکہِ تِمن کرن اتھہٕ روٚٹ۔15ژےٚ پزی تِمن جنگس منٛز مدد کرُن یوٚتام خدا یِمن اسرائیلی سٲتھین کھۅر ٹھٔہراونس قٲبل بناوِ، اتھ علاقس منز یَتھ تِم تلفس تل انن تہٕ یُس خدا تِمن بخشُن یژھان چُھ۔ امہِ پتہٕ یِیو توٚہؠ سٲری واپس پننِس تتھ علاقس کُن یتہِ توٚہؠ پننہِ بستی قٲیِم کٔرِو تہٕ لٔسِو بٔسِو۔ یعنی سُہ علاقہٕ یُس توٚہہِ یہُوواہؔ سٕنٛدؠ بندن موسیٰؔ ہن دیُتمُت اوسو یردن دریاو کِس مشرقس منٛز۔16یورٕ ووٚن روبن تہٕ جد تہٕ منسیؔ ہنٛدؠ نیصف قبیلہٕ والیٚو یسوعسؔ جوابس منٛز، "أسؠ انو چٲنؠ سٲری حکم باعمل یِم ژےٚ اسہِ دِتِتھ تہٕ یوٚت یوٚت ژٕ اسہِ ونکھ گژھُن أسؠ گژھَو۔17أسؠ مانَو چون تِتھے پٲٹھؠ یتھٕ پٲٹھؠ أسؠ موسیٰؔ سُنٛد مانان ٲسؠ۔ أسؠ چھِ دُعا کران زِ یہُوواہؔ روزِن ژےٚ سٟتؠ سٟتؠ تِتھے پٲٹھؠ یتھٕ پٲٹھؠ سُہ موسیٰؔ ہس سٟتؠ اوس۔18أسؠ کرووکھ تِم قتل یِم زَن توٚہہِ خلاف بغاوت کرن تہٕ تُہنٛدؠ حکم ماننس اِنکار کرن۔ اکھ کتھ تھاو ژٮ۪تس، یسوع، ژٕ روز باہمت تہٕ باحوصلہٕ۔
Bridge Connectivity Solutions Pvt. Ltd.