یوحنا5
1یِمو واریہو واقہو پتہٕ وٲژ بیاکھ یہُودؠ عید۔ تہٕ یسوعؔ دراو یروشلمؔ کُن یہِ عید مناونہِ۔2یروشلمؔ شہرس منٛز چھےٚ اکھ جاے کٹہٕ دروازٕ نٲوؠ یہِ چُھ شہرس منٛز اژنُک اکھ دروازٕ۔ أتھؠ دروازس نکھہٕ چُھ اکھ حوض یتھ یہُودؠ پننہِ عِبرٲنؠ زبٲنؠ منٛز بیت حسدا ونان چھِ۔ اتھ نکھے چھِ پش دِش دِتھ پانٛژھ برانٛد۔3اتھ پٮ۪ٹھ ٲسؠ ڈاپھ ترٲوِتھ بسیار لوٗکھ۔ یِم لوٗکھ چھِ رنگہٕ رنٛگہٕ مرضن منٛز ہٮ۪نہٕ آمٕتؠ۔ کینٛہہ چھِ أنؠ تہٕ کینٛہہ زنٛگو کِنؠ معذور۔4یِم ٲسؠ اتہِ ڈاپھ ترٲوِتھ تکیازِ خداوندٕ سنٛدِ طرفہٕ اوس گاہ بٮ۪گاہ کانٛہہ فرشتہٕ وسِتھ اتھ آبس کھُلو دِوان۔ آبس یہِ کھُلو لگنہٕ پتہٕ یُس تہِ گۅڈنیُک نفر اتھ حوضس منٛز وسہِ ہے سُہ اوس پننہِ کُنتہِ مرضہٕ نِش شِفا لبان۔5أتھؠ بیت حسدا ناوکس حوضس پٮ۪ٹھ اوس اکھ نفر یُس پتمیٚو ارتٲجہو ؤرؠ یو پٮ۪ٹھٕ پنٕنؠ مرض للہٕ وان اوس۔6یسوعؔ وُچھ یہِ مریض اتہِ ڈاپھ ترٲوِتھ تہٕ زونُن زِ یہِ چُھ اتہِ واریاہ کالہٕ پٮ۪ٹھٕ پراروُن۔ تٔمؠ پرُوژھ أمِس نفرس، "کیاہ ژٕ چُھکھا بلُن یژھان؟7أمؠ مریضن ووٚنُس اورٕ، "جناب مےٚ چُھنہٕ کانٛہہ تہِ یُس مےٚ یتھ آبس منٛز کھلو لگنہٕ پتہٕ دکہٕ دِیہ ہے۔ میانہِ اور واتنہٕ برونٛہےٕ چُھ کانٛہہ نتہٕ کانٛہہ اتھ منٛز وتھمُت آسان تہٕ بلیومُت آسان۔ لہٰذا کتہِ بلہٕ بہٕ۔8یسوعؔ ووٚنُس، "ووٚتھ تھوٚد۔ تُل پنٕنؠ یہِ وۅتھرٕنؠ راد تہِ یتھ پٮ۪ٹھ بیہِتھ چُھکھ تہٕ دِ قدم تہٕ لاگ پکُن۔9یسوعؔن بلروو یہِ شخص امی دمہٕ تہٕ أمؠ نفرن تُج پنٕنؠ وۅتھرٕنؠ راد تہٕ دراو۔ یہِ سپُد یہودٮ۪ن ہنٛدِ آرامہٕ کہِ دوٚہہ یتھ سبت ونان چھِ۔10چونکہِ یہِ اوس یہودٮ۪ن ہنٛدِ آرامُک دوٚہہ، یہُودؠ زِٹھیٚو ووٚن أمِس نفرس یُس یسوعن بٔلروو، "از چُھ آرامُک دوٚہہ۔ ژےٚ چھُے نہٕ أزکہِ دوٚہہ پننہِ وۅتھرنہِ تُلنُک اجازت تکیازِ یہِ گٔیہٕ کٲم۔11یسوعؔ سٕنٛدؠ دٔسؠ بلیمٕتؠ نفرن ونُکھ یورٕ، "تٔمؠ نفرن یمؠ بہٕ بلرووُس ووٚن مےٚ یہِ وۅتھرٕنؠ راد تُلنہٕ باپتھ تہٕ پکنہٕ باپتھ۔12یِمو یہُودؠ زِٹھیٚو پرُژھُس" کٔمؠ وۅنُے ژےٚ یہِ پنٕنؠ راد تُلنہٕ باپتھ تہٕ پکہٕ باپتھ۔13بہرحال یسوعؔ سٕنٛدِ أمِس بلرٲوؠ مٕتِس نفرس ٲس نہٕ خبرےٕ زِ سُہ کٔمؠ بلروو تکیازِ یسوعؔ اوس لۅتہِ پٲٹھؠ کٲنٛسہِ ہنٛزن أچھن منٛز ینہٕ ورٲے درامُت۔14کینژِ کٲلؠ وُچھ یسوعنؔ یہِ بلیومُت نفر ہیکلس، عبادت گاہ، منٛز تہٕ ووننس۔ ؤنؠ چُھکھ ژٕ اوٚر۔ یُتھنہٕ یمہِ اپور کانٛہہ اتُر وتُر کرکھ تہٕ کینٛہہ پرانہِ مرضہٕ کھۅتہٕ ووکھٕ مرض گٔژھۍ اگادِ۔15یہِ نفر دراو تہٕ ووت یہودٮ۪ن نِش تہٕ ووننکھ، "سُہ نفر یمؠ بہٕ بلرووُس چُھ یسوعؔ۔16لہٰذا لوگ یہُودؠ زِٹھیٚو یسوعؔ تنگ کرُن تکیازِ سُہ اوس معجزٕ کٔرِتھ یہُودؠ مزہبی رسمہٕ حسابہٕ آرامکہ دوٚہہ لوٗکن بلراوان۔17یسوعؔ ووٚن یمن یہُودؠ لوٗکن، "میون مول خدا تہِ چُھ از کامہِ منٛزےٕ لہٰذا چُھس بہٕ تہِ کٲم کران۔18یہِ وننہٕ کِس نتیجس منٛز لٔگؠ یہُودؠ زِٹھؠ أمِس ورٲے پتہٕ مارنہٕ باپتھ۔ یہِ زن یمو برونٛہہ تہِ کوٚرمُت اوس۔ تِم ٲسؠ یژھان أمِس مارُن تکیازِ سُہ اوس نَہ صرف تِمن پتھ لگتھ آرام کٮ۪ن دوہن اِنکار کران بلکہ اوس تسُنٛد مول یہِ ؤنِتھ زِ خدا چُھ خدایس برابر۔19یمن الفرامن پٮ۪ٹھ یسوعؔن ووٚن یِمن یہُودؠ زِٹھٮ۪ن، "بہٕ چُھسو پزر ونان۔ بہٕ تسُنٛد نیٚچو ہیٚکنہٕ پننہِ اِرادٕ یا حکمہٕ کہین کٔرِتھ۔ بہٕ ہیٚکہٕ تی کٔرِتھ یہِ بہٕ خدا پنُن مول وچُھن کران۔ یہِ کینژھا مول کرِ۔ بہٕ تسُنٛد نیٚچو تہِ چُھس تی کران۔20یہِ چُھ پوٚز تکیازِ مول چُھ مےٚ نیٚچوِس لول بران۔ تہٕ مےٚ چُھ تمہ پرٮ۪تھ کامہِ نِشہ زٲنؠ یاب کران یہِ سُہ کران چُھ۔ مول کرِ مےٚ تِمو معجزٲتی کامٮ۪و نِش تہِ با خبر یِمہٕ تِمو معجزو کھۅتہٕ عظیم آسن یِم بہٕ ازتام کران رودُس۔ تاکہِ توٚہؠ روزیٚو ششدر۔21یہِ سپدِ تکیازِ بہٕ تسُنٛد نیٚچو بخشہِ پوشوٕنؠ زندگی تِمن سارنےٕ یِمن بہٕ یژھٕ تِتھے پٲٹھؠ یتھٕ پٲٹھؠ زن مول مودؠ مٕتٮ۪ن دُبارٕ زندگی بخشان چُھ۔22یہِ چُھ پوٚز تکیازِ مول چُھنہٕ کٲنسے پرکھاوان۔ یہِ عدالتہٕ لاگنچ کٲم چھےٚ تٔمؠ مےٚ دِژمٕژ۔23مٲلؠ کوٚر یہِ تاکہِ سٲری کرن مےٚ عزت۔ تسٕنٛدِس نیٚچوِس یتھٕ پٲٹھؠ لوٗکھ میٲنِس مٲلِس عزت بخشان چھِ۔ سُہ کانٛہہ تہِ یُس نہٕ مےٚ عزت کرِ چُھنہٕ میٲنِس مٲلِس تہِ عزت کران یمؠ بہٕ یور زمیٖنہِ پٮ۪ٹھ سوزُس۔24بہٕ چُھسو توٚہہِ لوٗکن پوٚز ونان۔ سُہ پرٮ۪تھ کانٛہہ زوٚن یُس مےٚ مانان چُھ میٲنؠ تعلیم مانان چُھ تہٕ تس خدایس پٮ۪ٹھ پژھ تھاوِ یمؠ بہٕ سوزُس۔ روزِ ہمیشہٕ ہمیشہٕ جنتس تہٕ آسمانن پٮ۪ٹھ پوشہٕ وٕنہِ زندگی سان۔ تہٕ خدا ٹھہراوِ نہٕ تس گناہ گار۔ بلکہ آسہ یُتھ نفر روحٲنی طور مۅردٕ بدلہ روحٲنی طور زندٕ۔25بہٕ چُھسو توٚہہِ پوٚز ونان۔ وقت چُھیِنہٕ وول بوزوے تہٕ سُہ وقت چُھ پزی ووتمُت ییٚلہِ مودمٕتؠ لوٗکھ تہِ میٲنؠ آواز بوزن۔ خدا سٕنٛدِ گۅبرٕ سنٛز آواز۔ تہٕ یِم تہِ یہِ میٲنؠ آواز بوزن پراون پوشوٕنؠ زندگی۔26یہِ چُھ پوٚز تکیازِ مول ہیٚکہِ لوٗکن زندٕ کٔرِتھ تِتھے پٲٹھؠ یتھٕ پٲٹھؠ تٔمؠ مےٚ پننِس نیٚچوِس لوٗکن زندٕ کرنچ صلٲحیت بخشؠ۔27ببن بخُش مےٚ اختیار تمام انسٲنؠ زُریٲژ عدالت لاگنُک تکیازِ بہٕ چُھس آدمؔ سُنٛد اولاد۔28حٲرام مٕہ گٔژھِو زِ مٲلؠ کوٚر یہِ۔ اکھ وقت آسہ ییٚلہِ سٲری مودمٕتؠ میٲنؠ آواز بوزن۔29ادٕ یِن یِم پنٮ۪و قبرو منٛزٕ نیرؠ۔ خدا تُلہِ تِمن زِنٛدٕ یِمو رٕژرچہِ کامہِ آسن کرِمژٕ۔ تہٕ بخشٮ۪کھ پوشوٕنؠ زندگی۔ مگر خدا تُلہِ تِمن تہِ یِمو شَرچہِ کامہِ آسن کرمژٕتاکہِ تِمن دِیہ سزا ہمیشہٕ پوشوُن سزا۔30بہٕ ہیٚکنہٕ پانہٕ کِہین کٔرِتھ۔ بہٕ لاگہٕ عدالت تٔتھؠ پٮ۪ٹھ یہِ بہٕ بوزٕ مٲلِس نِش تہٕ بہٕ لاگہٕ انصاف واجِنؠ عدالت۔ تکیازِ بہٕ چُھس نہٕ پننہِ مرضی کینٛہہ کران۔ یہِ تہِ بہٕ یژھٕ بلکہ چُھس بہٕ تی کران یہِ مےٚ مول یمؠ بہٕ یور سوزُس ونہٕ کرُن۔31یوٚدوے بہٕ کُنے زٚن آسہ پٲنؠ پانس پٮ۪ٹھ گواہ موسیٰؔ سٕنٛدِ شریعتہٕ مطٲبق میٲنؠ گوٲہی روزِ پانہٕ معتبر۔32گر مےٚ چھنہٕ کٲنٛسہِ دوٚیمہِ سنٛز گوٲہی حاجت۔ بہٕ چُھس یہِ توٚہہِ ونان بپتسمہ دِنہٕ وٲلِس یوحناہسؔ متعلق تاہِ خدا کٔریٚو توٚہہِ بخشش۔ بہر حال اکھ نفر چُھ یُس مےٚ متعلق گوٲہی دِوان چُھ تہٕ بہٕ چُھس زانان زِ مےٚ متعلق تس سنٛز گوٲہی چھےٚ معتبر۔33توٚہہِ یہُودؠ زِٹھیٚو سوزِو بپتسمہ دِنہٕ وٲلِس یوحناہسؔ واریاہ نادس تہٕ تٔمؠ وننہٕ نٔو توٚہہِ مےٚ متعلق پزر۔34گز زِ مےٚ چھنہٕ کٲنٛسہِ ہنٛز گوٲہی حاجت مگر بہٕ چُھس یہِ بپتسمہ دِنہٕ وٲلِس یوحناہسؔ متٮعلق ونان تاکہِ خدا بخشہِ توٚہہِ نجات۔35بپتسمہ دِنہٕ وول یوحناؔ یُس خدایہِ سُنٛد پزر توٚہہِ باوان چُھ چُھ زٲنؠ تو اکھ پرٮ۪زلوُن ژونگ۔ توٚہؠ ٲسِو امہِ کِس گاشس منٛز کینٛہہ برنٛز خوشی سان روزنس تیار۔ یہِ اوس سُہ پزر یمیُک تٔمؠ اعلان کوٚر۔36بہر حال بہٕ چُھس توٚہہِ یہِ یوحنا سنٛز گوٲہی کھۅتہٕ تہٕ بوٚڈ تہٕ معتبر گوٲہی پیش کران پانس متعلق تکیازِ یہِ گوٲہی چھےٚ تِمن معجزٲتی کامٮ۪ن ہنٛز یِمہٕ مےٚ خداین انجام دِنُک اجازت بخُش۔ یِمہٕ میانہِ دٔسؠ کرنہٕ یِنہٕ واجنہِ کامہِ چھےٚ ثبوت زِ بہٕ چُھس پانہٕ پنٕنؠ مٲلؠ سوزمُت37امہِ مزید چُھ میون مول یمؠ بہٕ یور سوزُس پانہٕ تہِ گوٲہی دِوان مےٚ متعلق۔ پزر چُھ توٚہہِ منٛزٕ چھنہٕ کٲنٛسہِ تہِ تس سنٛز آواز بوزمٕژ یا سُہ دیدمان وُچھمُت زِ سُہ کیُتھ چُھ۔38توٚہؠ چُھو نہٕ ببہٕ سنٛز تعلیم تہِ مانان۔ مےٚ چھے پتاہ یہِ چُھ پوٚز تکیازِ توٚہہِ چھنہٕ پژھ مےٚ پٮ۪ٹھ یُس خداین پانہٕ سوز۔39توٚہؠ چُھو پانہٕ مقدس کتابہٕ ژٮ۪تھ دِتھ پران تاکہِ توٚہؠ پرٲیو پوشوٕنؠ زندگی۔ یمے مقدس کتابہٕ چُھو توٚہہِ ونان بہٕ کُس چُھس۔40تہٕ توتہِ چُھو توٚہؠ میٲنؠ شٲگرد بننس اِنکار کران تاکہِ توٚہؠ لبیٚو پوشہٕ وٕنؠ زندگی۔41بہٕ چُھس نہٕ کٲنٛسہِ، لوٗکن، ہنٛدِس عزتس مازان۔42بہرحال چُھس یہِ زانان زِ توٚہؠ چُھو نہٕ خدایس لول بران۔43بہٕ چُھس خدا سٕنٛدِ حُمہٕ تہٕ اختیارٕ آمُت مگر توتہِ چُھو نہٕ توٚہؠ مےٚ مانان۔ یوٚدوے بدل کانٛہہ پننہِ اختیارٕ تہٕ حکمہٕ آسہ ہے آمُت توٚہہِ آسہ ہیٚو سُہ قبول کوٚرمُت۔44توٚہؠ چُھو نہٕ مےٚ شاید پژھ یٮ۪کان کٔرِتھ تکیازِ توٚہؠ چُھو اکھ أکِس عزت کران بجایہ أکِس کُنِس خدا سُنٛد عزت حٲصل کرنہٕ نِش۔45یہِ مٕہ زٲنِو زِ بہٕ آسہ کُنے زوٚن پیش مٲلِس نِش توٚہہِ راہ کھالن وول بلکہ سُہ موسیٰؔ یُس تُہنٛز امید، تہنٛز سفٲرش بنہِ آسہ پانہٕ توٚہہِ راہ کھالن وول۔46سُہ کھالیٚو توٚہہِ راہ تکیازِ یوٚدوے توٚہہِ موسیٰؔ ہس پٮ۪ٹھ پژھ آسہ ہے یوسہٕ توٚہہِ چُھو نہٕ توٚہہِ آسہ مےٚ پٮ۪ٹھ پژھ تکیازِ موسیٰؔ ہن اوسو توٚہہِ وارٕ ووٚنمُت پننہِ توراتہِ منٛز۔ 47چونکہِ توٚہہِ چُھو نہٕ موسیٰؔ سٕنٛدِ لیٚکھؠ مِتِس پٮ۪ٹھ تہِ پژھ۔ شاید کٔرٕو نہٕ توٚہہِ پژھ میٲنِس وننس پٮ۪ٹھ تہِ۔
Bridge Connectivity Solutions Pvt. Ltd.