پیدٲیش37
1یعقوبؔ لوٚگ کنعانچہِؔ سرِ زمینہِ پیٚٹھےٕ بسنہِ، یتہِ تمسُنٛد مول گۅڈٕ بسان اوس۔2یعقوبؔنِس خاندانس سٟتؠ سپُد یتھ کنؠ۔ ییٚلہِ تمسُنٛد نیٚچو یوسفؔ سداہ وہُر ووت تہٕ سُہ دراو پننٮ۪ن کینٛژن زِٹھیٚن باین سٟتؠ تیٖر تہٕ ژھاولؠ رچھنہِ۔ تِم ٲسؠ تمسنٛدِس مٲلؠ سنٛزن لونڈین، بِلہاؔ تہٕ زلفہؔ ہنٛدؠ نیٚچو۔ یوسفنؔ وُن پننِس مٲلِس تِمن بُرٕ کامیٚن متلق یمہٕ تمسنٛدؠ بٲے کران ٲسؠ۔3یعقوبؔ اوس پننیٚو شُریٚو منٛزٕ یوسفَس سٟتؠ زیادٕ محبت ورتاوان تکیازِ یوسفؔ اوس تمہ وزِ زامُت ییٚلہ یعقوبؔ بُجرس منٛز اوس۔ یعقوبنؔ بناوٕنو یوسفسؔ خٲطرٕ نٔرؠ دار اکھ خوبصورت پۅشاک۔4ییٚلہِ یوسفؔ سنٛدیو بڈیٚو بایو زون زِ سون مول چُھ اسہِ ساروےٕ منٛزٕ أمِس زیادٕ پیار کران تہٕ تِم لٔگؠ تمِس سٟتؠ نفرت کرنہِ۔ تِم ٲسؠ نہٕ تس سٟتؠ سیٚود کتھ کران۔5اکہِ رٲژ وُچھ یوسفنؔ خاب۔ تہٕ تمؠ وُن پنُن سُہ خاب پننٮ۪ن باین، یمہِ کِنؠ تِم تمِس سٟتؠ زیادے نفرت کرنہِ لٔگؠ۔ یہ کینٛژھا سپُد تہِ چُھ یِتھ پٲٹھؠ:6تمؠ وُن تِمن، "میٚون خاب بوزیٚو!7خابس منٛز ٲسؠ أسؠ کٕنکہٕ گیٚجہِ گنٛڈان۔ میانؠ گیٚڈ گییہِ اچانک کھڑا، تُہنٛزٕ گیٚجہِ گییہِ میانہِ گیٚجہِ انٛدؠ انٛدؠ جمع تہٕ کۅرُکھ تتھ برُنٛہہ کنہِ سٔجدٕ۔8تمسنٛدیو بایو وُن تمِس، "ژٕ ما چُھکھ زانان زِ کُنہِ دوٚہہ کرکھ ژٕ اسہِ پٮ۪ٹھ حکومت؟ ژٕ چُھکھا سون بادشاہ بنُن یژھان؟" تمہٕ لگؠ تمِس سٟتؠ پرانہِ کھۅتہٕ زیادٕ نفرت کرنہٕ تکیازِ تمؠ وُن تِمن پننِس خابس متعلق۔9پتہٕ وُچھ تٔمؠ بیاکھ خاب تہٕ سُہ خاب تہِ بوو تٔمؠ پننٮ۪ن زِٹھیٚن باین۔ تمؠ وُن: یہ بوزیٚو، "مےٚ وُچھ بیٚیہِ اکھ خاب۔ اتھ خابس منٛز وُچھ مےٚ آفتاب، زون تہٕ بیٚیہِ کاہ تارک پانس سجدٕ کران۔10تمؠ وُن پننِس مٲلِس تہِ اتھ متعلق۔ تمسنٛدؠ مٲلؠ سٕدرٕ سُہ تہٕ وُننَس ژٕ کیاہ چُھکھ اتھ خابس تعبیر کڑان؟ ژےٚ چُھیا باسان زِ امہِ خابُک مطلب چُھ زِ چٲنؠ موج، بہٕ تہٕ چٲنؠ بٔڈؠ بٲے جُکن زمینہِ پٮ۪ٹھ اکہِ دوٚہہ ژےٚ برونٛہہ کنہِ؟11یوسفؔ سنٛدیو بڈیٚو بایو کوٚر تس سٟتؠ ناراضگی ہُنٛد اظہار۔ مگر تمسُنٛد مول اوس سونچان زِ اتھ خابس کیاہ ہیٚکہِ تعبیر ٲسِتھ۔12اکہِ دوٚہہ گو یوسف سُنٛد بوٚڈ بوے پننِس مٲلؠ سںنٛدین تیٖرن تہٕ ژھاولیٚن نظر گُذر دنہٕ خٲطرٕ یم سِکمسؔ نکھٕ کھہَس منٛز ٲسؠ۔13کینٛژِ کٲلؠ پتہٕ وُن یعقوبنؔ یوسفَسؔ، "چٲنؠ بٲے چھِ سِکمَسؔ نِش تیٖر تہٕ ژھاولؠ رچھنہِ۔ بہٕ چُھس یژھان ژٕ گژھکھ تور تِمن سمکھنہٕ خٲطرٕ۔ "یوسفنؔ ونُس، "آ بہٕ گژھٕ۔"14یعقوبنؔ ونُس، "گژھِ تہٕ وُچھ زِ تم چھا ٹھیکھےٕ تہٕ جب چھا ٹھیک پٲٹھی رچھان۔ تورٕ یِتھ وَن مےٚ پوٗرٕ تفصیل۔ "یتھ کنؠ سوز یعقوبنؔ یوسفؔ تمہِ وادی پٮ۪ٹھٕ یتہِ تِم روزان ٲسؠ، یہ وادی ٲس حبرون جایہ، پننٮ۪ن باین ژھانڈنہِ۔ پتہٕ ووت یوسفؔ سِکم شہرس نزدیک۔15ییٚلہِ سُہ پننٮ۪ن باین ژھانٛڈان ژھانٛڈان کھہَن پھیران اوس تہٕ اکؠ نفرن وُچھ سُہ تہٕ تٔمؠ پرُژھس، ژٕ کُس چھہَن ژھانٛڈان؟16یوسفنؔ ونُس یورٕ، "بہٕ چُھسکھ پنٕنؠ بٔڈؠ بٲے ژھانٛڈان۔ توٚہؠ ہیٚکوا مےٚ ؤنِتھ زِ تِم کتِتھ آسن پننٮ۪ن تیٖرن تہٕ ژھاولیٚن رچھان؟17تٔمؠ نفرن دِتُس جواب، "تمہٕ چِھیی نہٕ وُنؠ یتہِ۔ بہٕ اوسُس بوزان تِمو منٛزٕ اوس اکھ ونان، "ؤلیٚو أسؠ گژھو تیر تہٕ ژھاولؠ ہیٚتھ دوتینؔ شہر کُن۔ "لہٰذا دراو یوسفؔ اتہِ تہٕ گو شمالس کُن، تہٕ وُچِھن پنٕنؠ زٹھؠ بٲے دوتینؔ شہرس نکھٕ۔18مگر تِمن گو سُہ دوٗرے نظرِ یِتھےٕ تِمو سُہ وُچھ تمو کٔر سُہ قتل کرنٕچ سٲزِش۔19تِم لٔگؠ اکھ اکِس وننہِ زِ یہ چُھ خاب وچُھن وول۔20"ؤلیٚو، أسؠ ماروون یہ تہٕ لاش ژھنہٕ وون دۅبس۔ پتہٕ ونو لوٗکن زِ سُہ روٚٹ أکؠ جنٛگلی جانورن، مورُن تہٕ کھیوٗن۔ تہٕ پتہٕ لگہ اسہِ پانے پےَ زِ امسنٛدؠ خاب کتھٕ کنؠ گژھن پوٗرٕ!"21رُوبِنؔ بوز زِ یِم کیاہ چھِ یہ ونان، اوٕ کِنؠ کٔر تٔمؠ تِم سمجھاونٕچ کوشش زِ یوسفؔ کروون نہٕ قتل۔ تمؠ وُن تِمن، "نہ، اسہِ پزِ نہٕ یہ قتل کرُن۔22زُوو کڑووس نہٕ! أسؠ تراوون یہ صحراوس منٛز یتھ چہَس، مگر اسہِ پزِ نہٕ أمِس کانٛہہ نقصان واتناوُن۔ "رُوبِننؔ وُن یہ تٲوِن تِم أتی، غرض اوسس یوسفؔ بچاوُن تہٕ پتہٕ سُہ پننِس مٲلِس نش واتناوُن۔23یُتھےٕ یوسفؔ تتھ جایہ ووت یتِتھ تمسنٛدؠ بٔڈؠ بٲے بہِتھ ٲسؠ، تِمو روٚٹ سُہ تہٕ ژھنؠ ہَس گۅڈ زیٹھؠ نرؠ دار پلو ژٔٹِتھ۔24پتہٕ روٚٹُکھ تہٕ ژھنُکھ چہَس۔ یہ چاہ اوس ہوٚکھمُت، اتھ اوس نہٕ آبےٕ25ییٚلہِ تِم کھیٚن کھیٚنہِ بیٹھؠ تِمن پییہِ نظر، دوٗرِ اوس اکھ قٲفلہٕ پکان یُس اسماعیلؔ سنٛدین اولادن ہُنٛد جِلعادؔ علاقہٕ پٮ۪ٹھٕ یوان اوس۔ تہنٛدین اونٹن پٮ۪ٹھ آسہٕ مسالہٕ بوٚہرِ تہٕ مُشکہٕ دار رال بٔرِتھ۔ تِم ٲسؠ مِصر علاقس کُن تِم چیز کننہٕ باپتھ گژھان۔26یہُوداؔ ہن وُن پننٮ۪ن زِٹھیٚن تہٕ کانٛسیٚن باین، "اگر أسؠ پنُن لۅکُٹ بوے ماروون تہٕ امسنٛز لاش دباوون، اسہِ کیاہ فٲیدٕ نیرِ؟27لہٰذا کرو أسؠ کٲم أمِس نقصان واتناونہٕ بجایہ ژھنوون یہ یِمن نفرن کنِتھ یِم اسماعیلؔ سنٛدیو اولادو منٛزٕ چھِ۔ یمہٕ مٔشرٲیو زِ سُہ چُھ سون لۅکُٹ بوے!" لہٰذا سَپدؠ تِم اتھ کتھِ پٮ۪ٹھ سٲرے رٲضؠ۔28ییٚلہ مدیانٕکؠ تِم تٲجِر نکھٕ وٲتؠ تہٕ یوسفؔ سنٛدیو بایو کھول سُہ چہہٕ منٛزٕ واپس۔ پتہٕ کُن تِمو سُہ مِدیان کیٚن نفرن چاندِ ہنٛدیٚن وُہَن سِکن۔ تِمو تٲجرو نیٚو یوسفؔ پانس سٟتؠ مِصر۔29ییٚلہِ رُوبِنؔ واپس پھیرتھ چہَس نِشہ آو تہٕ اتہِ وچُھن نہٕ پنُن لۅکُٹ بوے یوسفؔ کُنی۔ تمِس پیٚو تیٚوت غم زِ تمؠ ژٔٹؠ پانس پلو۔30سُہ گو پننٮ۪ن لۅکٹٮ۪ن باین نِشہ واپس تہٕ وُننکھ، "لڑکہٕ چُھیی نہٕ چہَس منٛز! بہٕ کیاہ زن کرٕ وُنؠ؟"31تِمن ٲس نہٕ ہمتھےٕ مٲلِس یہ وننٕچ زِ تِمو کیاہ کیاہ کوٚر۔ لہٰذا نیٚو تِمو اتھ متعلِق اکھ دلیل بناونُک فٲصلہٕ۔ تِمو لوٚب یوسفؔ سُنٛد سُہ کۅرتہٕ یتھ زیٹھؠ نٔرؠ ٲسؠ۔ پتہٕ کوٚر تِمو اکھ ژھاوج زبح تہٕ تمسنٛدِس خوٗنس منٛز بُڈوکھ سۅ کُرتٕنؠ۔32تمو نیٚو سُہ کۅرتہٕ پننِس مٲلِس نِش تہٕ وُنہَس، "یہ وُچھ، اسہِ لوٚب یہ۔ یہ چُھنا چٲنِس نیٚچوؠ سُنٛد کۅرتہٕ؟"33تٔمؠ پرزٕنوو سُہ تہٕ ونُن، "آ، یہ چُھ میانِس نیٚچوؠ سُنٛد۔ کانٛسہِ وحشی جانورن آسہ سُہ حملہٕ کرِتھ مورمُت! مےٚ چُھ یقین زِ تمؠ جانورن آسن یوسفسؔ ٹُکرٕ کٔرمٕتؠ!"34یعقوبؔس پیٚو آسمان پٮ۪ٹھ، تمؠ ژٔٹؠ پانس پلو۔ تمؠ وول پانس ٹاٹھ تہٕ ہیٚوتُن ماتم۔35تمسنٛدؠ سٲری شُرؠ آے تمِس دِلاسہٕ دنہِ۔ مگر تمؠ دیُت نہٕ تِمن کُن توجُہ۔ تمؠ وُن، "نہ، بہٕ کرٕ تۅتام ماتم یۅتام بہٕ مرٕ تہٕ پننِس نیٚچوِس نِش واتہٕ۔ "مگر یوسفؔ سُنٛد مول رود تتھ پٮ۪ٹھ ہیٚتھےٕ ودان یہ تسنٛدس نیٚچوِس سٟتؠ پیش آو۔36اتھ دوران واتنوو مِدیان کیٚو نفرو یوسفؔ مِصر۔ تتہِ نیوکھ فوطیفارسؔ نِشہ یُس بادشاہ سنٛدیو افسرو منٛزٕ اکھ اوس۔ سُہ اوس تِمن سِپہَن ہُنٛد سردار یِم بادشاہ سنٛدؠ محٲفِظ ٲسؠ۔
Bridge Connectivity Solutions Pvt. Ltd.