خروج36
1بضلی ایلؔ تہٕ اہلیابؔ کرن یہِ کٲم باقی سارنےٕ ہُنرمنٛد لوٗکن سٟتؠ۔ یہُوواہنؔ چھےٚ تِمن ہُنر مندی عطا کرمٕژ تہٕ تِم چھِ تتھ قٲبل زِ تِم کرن مقدس جاۓ تمؠ سٕنٛدیو حکمو مطٲبق تعمیٖر۔"2لہٰذا موسیٰؔ ہن اوٚن بضلی ایلؔ تہٕ اہلیابؔ ناد دِتھ بیٚیہِ تِم باقی سٲری کٲرگر یِمن یہُوواہنؔ ہُنر عطا کرمٕژ ٲسؠ تہٕ یِمو سۅ کٲم انجام دِنس منٛز شٲمل سُپدن یوٚژھ۔3تِمو رٔٹؠ تِم سٲری نیاز موسیٰؔ ہس نِشہ مقدس خٟمہ تعمیٖر کرنہٕ خٲطرٕ یِم اسرائیل کیٚو لوٗکو تمس نِشہ أنؠ مٕتؠ ٲسؠ۔ پوٚز اسرائیلٕکؠ لوٗکھ رودؠ خوشی سان پرٛتھ دوٚہہ صبحکہِ وقتہٕ زیادٕ زیادٕ نیاز ہمیشہ انان۔4نتجہ دراو یہِ زِ مقدس خٟمہ تعمیٖر کرن والیٚو ساروے کٲرگرو ترٲوؠ پنٕنؠ کٲم تہٕ وٲتؠ موسیٰؔ ہس نِشہ۔5کٲرگرو ووٚن تمس، "اسرائیلٕکؠ لوٗکھ چھِ تمہِ کھۅتہٕ واریاہ گنہٕ زیادٕ چیز انان یِم اسہِ یہُوواہؔ سٕنٛدِ حکمہٕ مطٲبق تعمیٖر کرنہٕ خٲطرٕ ضرورت چُھ!"6لہٰذا موسیٰؔ ہن ووٚن تِمن زِ سٲرسےٕ خٟمس منٛز کریو اعلان، "پریتھ کانٛہہ گژھِ مقدس خٟمہ خٲطرٕ نیاز أننُ بند کرُن!" ادٕ کٔرؠ لوٗکو نیاز أننٕؠ بند۔7سۅ سٲرےٕ کٲم اند واتناونہٕ خٲطرٕ یہ لگہ ہے تِمن اوس تمہِ کھۅتہٕ سؠٹھاہ زیادٕ سامان دستیاب۔8کٲم کرن والیٚن منٛز یِم واریاہ زیادٕ ہُنر منٛد ٲسؠ تِمو بنووٚ مقدس خٟمہ یتھ منٛز تِمو داہ زیٹھؠ زٲویل کتنہٕ آمتہِ کپرکؠ پردٕ استعمال کٔرؠ۔ أکؠ کٲرگرن تُلؠ اسمانؠ، بنفشی تہٕ ووزل پن تہٕ سٕژنہِ سٟتؠ بناوِن تِمن پردن پؠٹھ تِم نقشہ یِمن کروبی ملٲیکن ہنٛزٕ شکلہٕ بنیہِ یِم وعدہ کس صندوقس پیٚٹھؠ کنہِ چھِ۔9پریتھ کانٛہہ پردٕ اوس ساڑٕ ژودہ میٹر زیوٹھ تہٕ زٕ میٹر خجرٕ۔ تِم سٲری ٲسؠ أکی میٖژٕکؠ۔10تِمو کوٚر پانٛژن پردن کُنے واٹھ تہٕ باقی پانٛژھ پردٕ رلٲوِکھ تہٕ کوٚرہکھ الگ واٹھ۔11تمؠ بنوو پریتھ سیٹس نیٖلہ کٔپرُکؠ حٲشیہِ تہٕ تِمن مٔڑین پریتھ سیٹس نیٚبرِمہ طرفہٕ اندس تام۔12تمؠ لٲگؠ گوٚڈنکِس سیٹس پنژاہ حٲشیہِ تہٕ دوٚیمس سیٹس پنژاہ حٲشیہِ یتھ زن تِم پانہٕ وٲنؠ مقابلہٕ ٲسؠ۔13تمؠ کٔرؠ پنژاہ سۅنہٕ سٕنٛدؠ کٔیل تیار تہٕ گنڈین تِم دوشوے سیٹ یکجاہ تِمن سٟتؠ یمو سٟتؠ مقدس خٟمک اکھ حصہٕ تیار سُپد۔14تمؠ بنوو مقدس خٟمچؠ غلاف پشمینہِ کٔپرِکیو کاہو ٹکرو سٟتؠ۔15تِم کٔپرکؠ کاہوے ٹکرٕ ٲسؠ ہیوؠ: زیچھر پنداہ میٹر تہٕ خجر زٕ میٹر۔16تمؠ جورؠ تِمو منٛزٕ پانٛژھ کٔپرک ٹکرٕ یکہٕ وٹہٕ یِمن اکھ سیٹ بنوو تہٕ باقی شیٚن کٔپرٕ کین ٹکرن بنووُن یکہٕ وٹہٕ کرِتھ بیاکھ سیٹ۔17تمؠ کٔرؠ ہتھ نیٖلہ کٔپرکؠ ولتؠ تیار تہٕ تِمو منٛز لٲگنؠ پنژاہ اکِس سیٹس نیٚبرؠ کِنؠ اندس تام تہٕ پنژاہ بییٚس سیٹس نیٚبرؠ کِنؠ اندس تام۔18تمؠ بنایہِ سرتلہِ ہنٛدؠ پنژاہ چھلہٕ یِمو سٟتؠ خٟمہ جورنہٕ آو یُتھ سُہ اکھ بوٗڈ ٹکرٕ تیار سُپد۔19خٟمس ولنہٕ خٲطرٕ کٔر تمؠ سُرخ کٹن ہنٛزو بستو سٟتؠ بیاکھ اکھ غلاف تیار تہٕ خٟمس پؠٹھٕ تراونہٕ خٲطرٕ کرِن چِھرن ہنٛزو بستو سٟتؠ اکھ غلاف تیار۔20تمؠ بنوو مقدس خٟمہ خٲطرٕ ککر لکٕرِ ہنٛد اکھ وۅدٕنؠ تختہٕ۔21پریتھ تختُک زیچھر اوس پانٛژھ میٹر تہٕ خجر دُوٚن میٹر۔22تمؠ بنٲوؠ پریتھ تختس تلہٕ کنہِ زٕ میخہٕ اکِس بییٚس سٟتؠ جورنہٕ باپتھ۔ تِمے بنٲوؠ روزن جایہِ ہنٛد خٲطرٕ سٲری تختہِ یتھے پٲٹھؠ۔23تمؠ بنٲوؠ مقدس خٟمس جنوب طرفہٕ خٲطرٕ وُہ تختہٕ۔24تمؠ بنٲوؠ چٲندِ ہنٛدؠ ژتجہہ کھوٗرؠ یِم زن وُہن تختن تلہِ کنہِ روزن۔ تمؠ لٲگؠ زٕ کھوٗرؠ پریتھ تختس تہٕ تِم کرن دوٚن میخن سٟتؠ بند۔25مقدس خٟمہ کہِ شمال طرفہٕ خٲطرٕ بنٲوؠ تمؠ وُہ تختہٕ26تہٕ تِمن ہنٛدِ خٲطرٕ بنٲون چٲندِ ہنٛدؠ ژتجہ کھوٗرؠ۔ تمؠ لٲگؠ پریتھ تختس زٕ کھوٗرؠ۔27مقدس خٟمہ کہِ پتمہِ طرفہٕ یُس مغربہ اندٕ اوس، تمؠ بنٲوؠ تمہِ خٲطرٕ شے تختہٕ۔28تِمو بنٲوؠ مقدس خٟمہ کؠن پتمیٚن کونن ہنٛدِ خٲطرٕ زٕ تختہٕ۔29تمؠ رلٲوؠ تِم اکھ اکِس ستؠ ہیرِ تہٕ بوٗنہٕ۔ تمؠ کٔرؠ تِم پؠٹھٕ کنہِ یکہٕ وٹہٕ اکہِ ہوکہٕ سٟتؠ بند۔ تمؠ کوٚر تِمن دوشونی یی یتھ زن تِم کونن ہنٛدؠ ٹکرٕ بنیہِ۔30تمؠ بنٲوؠ ٲٹھ تختہٕ تہٕ چٲندِ ہنٛدؠ شُراہ کھوٗرؠ، زٕ کھوٗرؠ پریتھ تختہٕ باپتھ۔31تمؠ بناوِ ککر لکٕرِ ہنٛزٕ کرِ۔ مقدس خٟمس شمالہٕ طرفہٕ تختن ہنٛدِ خٲطرٕ بناوِن پانٛژھ کرِ،32پانٛژھ کرِ بناوِن تختن ہنٛدِ خٲطرٕ مقدس خٟمس جنوب کہِ طرفہٕ تہٕ پتمِس حصس منٛز مغرب کہ طرفہٕ خٲطرٕ بناوِن تختن ہنٛدِ خٲطرٕ پانٛژھ کرِ۔33تمؠ ترٲوؠ تختن منٛز باگ کرِ یۅسہ اندٕ پؠٹھ اندس تام برابر ٲس۔34تمؠ جورِ تختن تہٕ کٔرِن سۅن۔ بیٚیہِ بناوِن سۅنہٕ سٕنٛدؠ دٲیرِ، کرِ تختن سٟتؠ دباونہٕ خٲطرٕ۔35تمؠ بنوو اکھ زٲویٛل پردٕ یتھ پؠٹھ أکؠ مٲہر کٲرگرن کٔر تتھ پؠٹھ سٕژنہِ سٟتؠ نیوٗل، بنفشی، تہٕ ووزلہ پنَہٕ سٟتؠ کٲم تہٕ تتھ پؠٹھ نقشہ کھٲلتھ بنیہِ کروبی ملٲیکن ہنٛزٕ شکلہٕ یِم وعدہ کس صندوقس ہیرِ کنہِ چھِ۔36تمؠ بنٲوؠ ککر لکٕرِ ہنٛدؠ ژور تھمب پردن ہنٛدِ خٲطرٕ۔ تمؠ جورِ تِمن تہِ تمیکؠن کنڈن سۅن۔ تہٕ تِمن بناوِن چٲندِ ہنٛدؠ ژور کھوٗرؠ۔37تمؠ بنوو خٟمس منٛز دٲخل سپدنچہِ جایہِ خٲطرٕ اکھ پردٕ یُس أکؠ مٲہر وونن وٲلؠ نیٖلہ، بنفشی تہِ ووزلیو زٲویٛلیو پنو سٟتؠ بنوومُت اوس۔38تمؠ بنٲوؠ بیٚیہِ پانٛژھ تھمب یِمن پؠٹھ کُنڈٕ ٲسؠ۔ تمؠ جورِ تِمن تھمبن ہنٛدین کٔلن تہٕ تِمن ہنٛزن تَھپن سۅن تہٕ تِمن تھمبن بنٲوِن سرتلہِ ہنٛدؠ کھوٗرؠ۔
Bridge Connectivity Solutions Pvt. Ltd.