خروج30
1ژٕ بناو وُدٕ زالنہٕ خٲطرٕ کیکر لکٕرِ ہُنٛد اکھ قربان گاہ۔2یہِ گژھِ مربع آسُن تہٕ یمیک ہر کانٛہہ طرف گژھِ ڈوڈ میٹر زیوٹھ تہٕ تھزر اکھ میٹڑ آسن۔ تتھ بناو ہینٛگ یِم تمی منٛزٕ گژھن نیرٕنؠ یتھٕ پٲٹھؠ قربان گاہس تمی لکٕرِ گیلہِ منٛز کڈِیتھ۔3خٲلص سۅنہٕ سٟتؠ ؤلُن تمیک پش بیٚیہِ ژور طرف ہنٛگ ہٮ۪تھ۔ تتھ سٲرسےٕ أنٛدؠ أنٛدؠ کھال اکھ سۅنہٕ سُنٛد لیس۔4سۅنہٕ سٕنٛدؠ زٕ کٔرؠ بناو تہٕ تِم دباوکھ قربان گاہچہِ لیسہِ بوٚنہٕ کنہِ تمیکؠن دوٚشوٕنی طرفن۔ یِمن کٔرین منٛز یِن ڈنڈٕ تراونہٕ یِمو سٟتؠ سُہ تُلنہٕ ییہِ۔5یِم ڈنڈٕ بناوکھ کیکر لکٕرِ ہنٛدؠ تہٕ تِمن جر سۅن۔6وُدُک قربان گاہ تھو تتھ پردس نیٚبرٕ کنہِ یُس وعدہ کس صندوقس برونٛہہ کنہِ اوزان چُھ۔ سُہ صندوق یتھ اکھ کنہِ ہنٛد سرپوش پؠٹھٕ چُھ یتؠن بہٕ ژےٚ سٟتؠ کلامہٕ کرٕ۔7ہارونسؔ چُھ یتھ صندوقس پؠٹھ پریتھ دوٚہہ صبحس خۅشبودار وُدٕ زالُن ییٚلہِ سُہ ژانگؠن آسہ صاف کران،8تہٕ تمس چُھ کینٛہہ شامس زالُن ییٚلہِ سُہ ژٲنگؠ زالہِ۔ یہِ وُدٕ گژھِ ہمیشہ سارنےٕ ہنٛدِ خٲطرٕ پشت در پشت میانہِ باپتھ روزن دَزان۔9تمہِ قسمُک کانٛہہ تہٕ وُدٕ یا کانٛہہ جانور یا کنہِ قسمُک اوٚٹ گژھِ نہٕ قربان گاہس پؠٹھ زالُن یمیٛک نہٕ مےٚ ووٚنمُت آسہ یا تتھ پؠٹھ گژھِ نہٕ کانٛہہ تہِ شراب نیازکس صورتس منٛز تراوُن۔10ہارونسؔ چُھ سٲلانہٕ جانور سنٛزِ قۅربٲنی ہُنٛد پاک خوٗن قربانہٕ گاہ کؠن ہنٛگن پؠٹھ تراون یتھ زن لوٗکو ہنٛدِ دسؠ خراب کرنہٕ آمژن کامؠن ہنٛد کفارٕ ادا سپدِ تہٕ قربان گاہ سپدِ صاف تہٕ پاک۔ امی طریقہٕ چُھ پریتھ اکِس میرِ کٲننس پشت در پشت قربان گاہ ہمیشہ خٲطرٕ صاف تھوُن۔ تہٕ قربان گاہ روزِ سؠٹھاہ پاک یُس مےٚ یہُوواہؔ سٕنٛدِ ناوٕ وقف چُھ۔"11یہُوواہنؔ ووٚن موسیٰؔ ہس،12"ییٚلہِ تہِ زانٛہہ ژےٚ اسرائیل کٮ۪ن لوٗکن ہنٛز مردم شمٲری کرناوکھ تہٕ پریتھ اکِس مردس چُھ پنٕنؠ زندگی بچاونہٕ خٲطرٕ اکھ فِدییہِ ادا کرُن امہِ سٟتؠ بچاوکھ بہٕ تِم وبٲییٔ بؠماریو نِشہ۔13ییٚلہِ اکھ مرد اکِس گنٛزراون وٲلِس برونٛہہ کَنؠ پکہِ تمس چُھ چاندِ ہنٛد اوٚڑ مثقال ہیکل کہِ حسابہٕ مطٲبق ادا کرُن یُس تقریقبن کاہ گرام چُھ۔ یہِ اوٚڑ مثقال چُھ مےٚ یہُوواہسؔ اکھ نیاز۔14یمِس وانٛس وُہ ورؠ چھِ سُہ دییہِ گنٛزراونہٕ وِزِ یہُوواہسؔ کُن نیاز۔15امیرس تہٕ غریبس چھے یہِ رقم نیاز کِس صورتس منٛز پنٕنؠ زندگی بچاونہٕ خٲطرٕ مےٚ یہُوواہسؔ کُن برابر دِین۔16اسرائیل کیٚن لوٗکن نِشہ کر یہِ زندگی بچاونہٕ خٲطرٕ رقم حٲصل تہٕ تمہِ سٟتؠ کر مقدس خٟمس کٲم۔ یہِ پایہ مےٚ یہُوواہسؔ یاد زِ اسرائیل کیٚو لوٗکو چھِ پنٕنؠ زندگی بچاونہٕ خٲطرٕ پونٛسہٕ ادا کوٚرمُت۔"17یہُوواہنؔ ووٚن موسیٰؔ ہس،18"سرتٔلہِ ہُنٛد بناو اکھ ٹب تہٕ تمہِ خٲطرٕ بناو سرتٔلہِ ہنٛز چوٗکؠ سۅ تھو مقدس خٟمس تہٕ قربان گاہس منٛزس تہٕ تتھ منٛز تراو آب۔19ہارونسؔ بیٚیہِ تمؠ سنٛدین نیٚچوٮ۪ن چھِ تتھ ٹبس منٛز پننؠن اتھٕ تہٕ کھوٚر چھلنٕؠ۔20تِمن چھِ مقدس خٟمس منٛز دٲخل سپدنہٕ برونٛہہ اتھٕ تہٕ کھوٚر آبہٕ سٟتؠ چھلٕنؠ یتھٕ پٲٹھؠ گژھن نہٕ تِم مارٕ،21تِمن چھِ پنٕنؠ اتھٕ تہٕ کھوٚر چھلٕنؠ یُتھ نہٕ تِم مارٕ سپدن۔ یہِ روزِ تِمن ہنٛدِ خٲطرٕ بیٚیہِ ہارونؠنؔ پریتھ اکِس ینہٕ وٲلِس نسلہٕ باپتھ ہمیشہ اکھ رسم۔"22یہُوواہنؔ ووٚن موسیٰؔ ہس،23"پننہِ باپتھ کر سؠٹھاہ رٕتؠ مصالہٕ جمع۔ خۅشبودار گوند شےٚ کلوگرام بیٚیہِ تمیٛک اوٚڑ: اصل مشکہٕ دار دالچین ترےٚ کلوگرام، خۅشبودار نرسل ترےٚ کلوگرام،24تہٕ شےٚ کلوگرام مُشکہٕ تُجہ یمیُک وزن ہیکلکہِ حسابہٕ مطٲبق آسہ۔ بیٚیہِ تُل ژور لیٹر زیتون تیٖل۔25یِمو سارِوے چیزو سٟتؠ بناو اکھ مقدس مٲلشہِ تیٖل۔ اکِس مشکہٕ دار رلاون وٲلِس چُھ یہِ مُشکہٕ سٟتؠ رلاون یتھ یہِ اکھ مقدس مٲلشہِ تیٖل بنہِ۔26یہِ تیٖل متھ مقدس خٟمس، مقدس صندوقس،27میزس تہٕ تِمن سارنےٕ چیزن یِم کاہن استعمال کرن، شمع دان ہٮ۪تھ یِم کاہن قربان گاہس منٛز مشکہٕ تجہِ زالنہٕ خٲطرٕ استعمال کران چھِ،28تہٕ کاہن یِم چیز بٔزمٕژ قۅربٲنی پیش کرنہٕ وِزِ استعمال کران چھِ بیٚیہِ سُہ ٹب تہٕ چوٚکؠ۔29امہِ طریقہٕ کرکھ ژےٚ تِم سٲری چیز میانہِ ناوٕ وقف۔ تِم سپدن سؠٹھاہ پاک زِ یُس تہِ کانٛہہ چیٖز تِمن سٟتؠ لگہ سُہ تہِ سپدِ پاک۔30مٲلش کرِتھ کرُکھ ہارونؔ تہٕ تمؠ سٕنٛدؠ نیٚچوؠ مےٚ کُن وقف۔31اسرائیل کٮ۪ن لوٗکن ون، "یہِ تیٖل آسہ ہمیشہ خٲطرٕ تمام ینہٕ والیٚن نسلن ہنٛدِ خٲطرٕ مقدس۔32ژےٚ چھۓ نہٕ یہِ تِمن لوٗکن ہنٛدین جسمن پؠٹھ تراون یِم معمولی آسن یہِ چُھ تراون صرف کاہنن۔ تہٕ ژےٚ چھۓ نہٕ امہِ قسمُک کانٛہہ تہِ تیٖل بناون تکیازِ یہِ تیٖل چُھ فقط میانہِ باپتھ مخصوص تہٕ ژےٚ چھۓ یہِ مقدس مانُن۔33ژےٚ کرُن سُہ نفر اسرائیل منٛزٕ نیٚبر یُس اتھ ہیوؠ مُشِک بناوِ پتہٕ مٔلہِ سُہ کانٛسہِ تسَ نفرس یُس نہٕ کاہن آسہ۔"34بیٚیہِ ووٚن یہُوواہنؔ موسیٰؔ ہس، "واریہن مٔزٕدار مصالہٕ کر ہیوی جمع: میوٗٹھ مصالہٕ، اظفار، بازر، تہٕ شوٗد بخور۔35اکھ عطر بناون وول گژھِ تتھ ننس تہٕ مشکہٕ دار عطرِ منٛز رلاون۔ یہِ آسہ صاف تہٕ پاک۔36تمہِ منٛزٕ ژیٹ کینٛہہ یُتھ سُہ اصل پٲٹھؠ زٲویل بنہِ پتہٕ تُل تمہِ منٛزٕ کینٛہہ تہٕ ژان مقدس خٟمس منٛز تہٕ تراو وعدہ کس صندوقس برونٛہہ کنہِ یتٮ۪ن بہٕ ژےٚ سمکھن چُھسے۔ توٚہہِ سارنے چُھ یہِ مُشِک سؠٹھاہ مقدس مانُن۔37لوٗکھ گژھن نہٕ پننہِ خٲطرٕ امی قسمکؠ مصالہٕ رلاویتھ وُدٕ بناون۔ تِمن چُھ یہِ وُدٕ صرف مےٚ یہُوواہؔ سٕنٛدِ باپتھ مقدس مانُن۔38ژےٚ کرُن سُہ نفر اسرائیل منٛزٕ نیٚبر یُس امہِ قسمچؠ عطر بناوِ۔"
Bridge Connectivity Solutions Pvt. Ltd.