خروج24
1پتہٕ ووٚن یہُوواہنؔ موسیٰؔ ہس۔ "یمہِ پہاڑٕ کس تینتٲلِس پؠٹھ کھس ژٕ بیٚیہِ ہارونؔ تسنٛدؠ نیٚچوؠ ندبؔ تہٕ ابیہوؔ مےٚ نِشہ۔ بیٚیہِ تُلکھ اسرائیلٕکؠ ستتھ 70 زٹھؠ پانس سٟتؠ۔ توٚہؠ سٲری کریو مےٚ دوٗرے پہن روٗزتھ سجدٕ۔2موسیٰؔ، ژےٚ یکھ مےٚ نِشہ کُنے زوٚن۔ باقی یِن نہٕ مےٚ نکھٕ، تہٕ تِمن چُھنہٕ ژےٚ سٟتؠ پہاڑس ہیٚور کھسن۔"3موسیٰؔ دراو تہٕ ونُن تہِ سورے لوٗکن یہِ یہُوواہنؔ تسَ ووٚنمُت اوس۔ سارِوے لوٗکو ووٚن یکجاہ در جواب، "أسؠ کرو تہِ سورے کینٛہہ یہِ یہُوواہنؔ اسہِ کرُن ووٚنمُت چُھ۔"4پتہٕ لیٚوکھ موسیٰؔ ہن تہِ سورے کینٛہہ یہِ یہُوواہنؔ تسَ حکم کوٚرمُت اوس۔ موسیٰؔ ووٚتھ صبحس سُلہِ تہٕ تتھ پہاڑٕ کس دامنس تَل بنووُن اکھ قربان گاہ۔ تٔمؠ لاجہِ بیٚیہِ اسرائیل کیٚن بَہن 12 قبیلن ہنٛدِ خٲطرٕ باہ 12 کَنہِ۔5پتہٕ سوٗزِن اسرائیلٕکؠ کینٛہہ نوجوان مرد یہُوواہسؔ قۅربٲنیہِ زالنہٕ باپتھ یُتھ تِم یہُوواہسؔ کرن کینٛژن دانٛدن ہنٛز قۅربٲنی سلامتی خٲطرٕ پیش۔6موسیٰؔ ہن تُل تِمن قربان کٔرمِتؠن جانورن ہُنٛد اوٚڈ خوٗن بانن منٛز۔ اوٚڈ خوٗن چھکُن قربان گاہس۔7پتہٕ پُر تٔمؠ سُہ عہد نامہٕ زورٕ سان یتھ منٛز تٔمؠ تہِ سورےٕ لیٚوکھمُت اوس یتھ منٛز یہُوواہسؔ تہٕ لوٗکن درمیان عہد نامہٕ اوس، یُتھ زن سٲری لوٗکھ تہِ بوزن۔ پتہٕ ووٚن ساروےٕ لوٗکو، "أسؠ کَرو تہِ سورے کینٛہہ یہِ یہُوواہنؔ تِمن ووٚنمُت چُھ بیٚیہِ کرو تتھ سٲرسےٕ فرمانبردٲری۔"8موسیٰؔ ہن تُل پتہٕ سُہ خوٗن یُس بانن منٛز اوس تہٕ چُھۅکُن لوٗکن کنُ۔ تٔمؠ ووٚن، "یہِ چُھ سُہ خوٗن یُس تصدیق چُھ کران زِ یہُوواہؔ چُھ توٚہہِ تسلیٖم کران۔ تہِ، یہِ توٚہہِ وۅنؠ بوزوٕ تہٕ مونو۔"9موسیٰؔ ہس تہٕ ہارونسؔ سٟتؠ کھتؠ ندبؔ، ابیہوؔ بیٚیہِ اسرائیلٕکؠ ستَتھ 70 بزرگ پہاڑس ہؠور،10تِمو وُچھ خدا، یمِس اسرائیلٕکؠ لوٗکھ عبادت چھِ کران۔ تٔمسٕنٛدیٚن کھوٚرن تل اوس زن تہِ نیٖلم کنہِ ہنٛز چوٗکؠ ہش یۅسہ اسمانکٕؠ پٲٹھؠ صاف ٲس ییٚلہِ نہٕ آسمانس پؠٹھ اوبر آسان چُھ۔11خداین واتنوو نہٕ تِمن اسرائیل کیٚن بُزرگن کانٛہہ تہِ زَرر ییٚلہِ تِمو سُہ وُچھ تہِ۔ تِمو وُچھ خدا، تہٕ کھیٚوکھ تہٕ چوکھ یکجاہ۔12پتہٕ ووٚن یہُوواہنؔ موسیٰؔ ہس، "پہاڑٕ کِس تینتٲلِس پؠٹھ کھس مےٚ نِشہ تہٕ کرِ انتظار۔ بہٕ دِمے ژےٚ کنیو مشکہٕ یِمن پٮ۪ٹھ قانون، بیٚیہِ احکامات مےٚ پانے لؠکھمٕتؠ چھِ یِم ژےٚ لوٗکن ہیٚچھِ ناوکھ۔"13پتہٕ وُتھؠ موسیٰؔ بیٚیہِ تٔمؠ سُنٛد خٲدِم یسوعؔ۔ موسیٰؔ کھوٚت پہاڑس ہؠور خدایس نِشہ۔14موسیٰؔ ہن ووٚن بُزرگن، "ییٚتی کریو قرار یوٚت تام أسؠ واپس یِمو۔ ہارونؔ تہٕ حورؔ روٗزن توٚہہِ سٟتؠ، ہرگاہ کٲنٛسہِ کانٛہہ معاملہٕ پیش آو سُہ ہیٚکہ تِمن نِشہ گژھتھ تہٕ تِم کرن تمیٛک فٲصلہٕ۔15پتہٕ کھوٚت موسیٰؔ پہاڑس پؠٹھ تہٕ اوٚبرن وول سُہ پہاڑ۔16یہُوواہؔ سُنٛد جلال ووٚتھ تتھ سینا پہاڑس پؠٹھ تہٕ اوٚبر روٗد شیٚن دوٚہُن تتھ پہاڑس ؤلِتھ۔ شیٚمہِ دوٚہہ دِیت یہُوواہنؔ موسیٰؔ ہس اوٚبرٕ منٛزٕ ناد۔17اسرائیل کٮ۪ن لوٗکن ہنٛزن نظرن منٛز اوس یہُوواہؔ سٕنٛدِ جلالہٕ سٟتؠ پہاڑٕ کِس تینتٲلس نارٕ سٟتؠ بھسمہٕ سپدان۔18موسیٰؔ روٗد پہاڑٕ کس تینتٲلس پؠٹھ ژتجہن 40 دوٚہُن تہٕ ژتجہن 40 رٲژن۔
Bridge Connectivity Solutions Pvt. Ltd.