خروج10
1پتہٕ ووٚن یہُوواہنؔ موسیٰؔ ہس، "گژھِ بادشاہس نِشہ۔ مےٚ چُھ سُہ تہٕ تسنٛدؠ دربٲرؠ ضدی بنوومٕتؠ۔ مےٚ چُھ یہِ أمؠ سببہٕ کوٚرمُت یتھ زن مےٚ پنٕنؠ معجزٕ تِمن پؠٹھ اصل پٲٹھؠ ظٲہر کرنس وار ییہِ۔2مےٚ چُھ یہِ بیٚیہِ أمؠ سببہٕ کوٚرمُت یتھ زن ژٕ پننؠن شُرؠن بیٚیہِ پننؠن شُرؠن ہنٛدین شُرین ووٚننکھ زِ مےٚ کیاہ کوٚر مِصرِین تہٕ تِمن کمہٕ کمہٕ نشٲنی ہاومکھ۔ پتہٕ زانو توٚہہِ سارنےٕ زِ بہٕ چُھس یہُوواہؔ۔3أتی گۓ موسیٰؔ تہٕ ہارونؔ بادشاہس نِشہ تہٕ ووٚن ہس، "یہُوواہؔ خدا، یمِس أسؠ عِبرٲنؠ عبادت چھِ کران، چُھ یہِ ونان، "ژٕ کوٚت تام روزکھ مےٚ نِشہ بُتھ پِھران؟ میانؠن لوٗکن دِ گژھنہٕ یُتھ تِم وجارس منٛز میٲنؠ عبادت کرن!4ہرگاہ ژٕ دِکھ نہٕ تِمن گژھنہٕ، بہٕ چُھسے ژےٚ آگٲہی دِوان زِ پگاہ سوٗزے بہٕ چٲنس مُلکس منٛز ہالو۔5تِم بِہن سٲرسےٕ زمیٖنس پؠٹھٕ یُتھ نہٕ ژٕ سۅ وُچِھتھ تہِ ہیککھ۔ تِم کھؠن تہِ سورےٕ یہِ ڈوٹھن سٟتؠ اوس نہٕ تباہ گومُت۔ تِم کھؠن چٲنؠن کٔلین ہنٛدؠ تِم سٲری میٚوٕ یِم تِمن پؠٹھ کھٔتؠ مٕتؠ چھِ۔6چٲنؠ مکانہٕ بیٚیہِ چٲنؠن ملٲزمن ہنٛدؠ مکانہٕ تہٕ سارنےٕ مِصرٕ کیٚن لوٗکن ہنٛدؠ مکانہٕ ین تِمو سٟتؠ برنہٕ۔ تتہِ آسن تیتؠ ہالو یِم چٲنیو والدینو یاہ چٲنیو جدو تہٕ جدو ہنٛدؠو جدو ینہٕ پؠٹھٕ تِم بُترٲژ پؠٹھ آیہِ ازتام آسیٚکھ نہٕ زانٛہہ تہِ وُچھمُت!" موسیٰؔ تہٕ ہارونؔ درایہِ پتہٕ بادشاہس نِشہ واپس۔7بادشاہ سنٛدیو ملٲزمو ووٚن بادشاہس، "یہِ چُھ سانہٕ خٲطرٕ بیٛاکھ اکھ ژھل! اسرائیل ین دِیو گژھنہٕ یُتھ تِم پننِس خدایس یہُوواہسؔ عبادت کرن۔ توٚہؠ زانیو زِ سون ملک مِصر چُھ برونٛٹھے تباہ سپدمُت۔"8بادشاہس دِیتُ کس تام حکم زِ موسیٰؔ تہٕ ہارونؔ أنہوٗکھ مےٚ نِشہ واپس۔ تٔمؠ ووٚن تِمن، "گژھو تہِ کٔرِو پننِس خدایس یہُوواہسؔ عبادت۔ مگر کُس گژھِ؟"9موسیٰؔ ہن دِیتُ جواب، "اسہِ چھِ ہر أکِس گژھنچؠ ضرورت، یِمن منٛز جوان تہٕ بڈٕ شٲمل چھِ۔ اسہِ چھِ پنٕنؠ نیٚچوؠ، کورِ، تیٖرین ہنٛدؠ جب بیٚیہِ ژھاوجین تہٕ چارواین ہنٛدؠ کھؠلؠ سٟتؠ نِنچؠ ضرورت تکیازِ اسہِ سارنےٕ چُھ یہُوواہؔ سٕنٛدِس احترامس منٛز اکھ جشن مناون۔10بادشاہن دِیتُ جواب، "بہٕ دِمہونہٕ تُہنٛدین شُرؠن تہٕ زنانہن توٚہہِ سٟتؠ گژھنہٕ تکیازِ مےٚ چُھنہٕ سمجھ یوان زِ یہُوواہؔ ہیٚکہ توٚہہِ کانٛہہ مدد کریتھ۔ خبردار روزیٚو زِ توٚہہِ ما ییہِ کانٛہہ خراب واقع پیش!11ییٚلہِ توٚہؠ ونان چُھو، صرف گژھو مرِد یہُوواہسؔ عبادت کرنہِ۔ بیٚیہِ گژھِ نہٕ کانٛہہ اکھ!" پتہٕ کڈنٲوؠ بادشاہن موسیٰؔ تہٕ ہارونؔ پانس نِشہ دوٗر۔12پتہٕ ووٚن یہُوواہنؔ موسیٰؔ ہس، "پنُن اتھٕ وہراو مِصرس پٹھٕ تہٕ ہالو یِن کھٔسِتھ تہٕ بِہن مُلکس پؠٹھٕ۔ تِم کھؠن مُلکس منٛز سۅ سٲری سبزی یۅسہ ڈوٹھٕ تلہٕ بچیمٕژ ٲس۔13أتی کوٚڈ موسیٰؔ ہن پنُن عاصہٕ زن تہِ اوس سُہ مِصرٕ کِس ملکس پؠٹھ کڈان۔ یہُوواہنؔ اوٚن مشرقہٕ کِنؠ اکھ واو یُس سٲرسےٕ دوٚہس تہٕ رٲتس ملکس منٛز جٲری روٗد۔ أمؠ ٲسؠ صبحس ہالو أنؠ مٕتؠ۔14ہالو گۓ مِصرٕ کِس سٲرسےٕ مُلکس پؠٹھ کھٔسِتھ۔ تِم بیٖٹھؠ سٲرسےٕ مُلکس منٛز۔ تتہِ ٲسؠ نہٕ یٖتؠ بے شمار ہالو زانٛہہ تہِ آمٕتؠ تہٕ نہٕ یِن امہِ پتہٕ دُبارٕ زانٛہہ۔15زمیٖنچؠ سٲرٕے سطح آیہِ تِمو سٟتؠ ولنہٕ تہٕ سۅ گییہِ سیاہ۔ تِمو کھۓ تِم سٲری کٔلؠ کٔٹؠ یِم تتھ زمیٖنس پؠٹھ ٲسؠ بیٚیہِ تہِ سورے یہِ کٔلین پؠٹھ ڈوٹھٕ نِشہ بچوومُت اوس۔ یہِ کینٛژھا سٲرسےٕ مِصرس منٛز سبزی کٔلین کٔٹؠن پؠٹھ ٲس تہِ موٚکلٲو تِمو سورے۔16بادشاہن دِیتُ ہارونسؔ تہٕ موسیٰؔ ہس ؤلؠ ؤلؠ ناد تہِ ووٚننکھ، "مےٚ کوٚر یہُوواہسؔ، تُہنٛدس خدایس تہٕ توٚہہِ برونٛہہ کنہِ گناہ۔17یمہِ وزِ ہیکواہ توٚہؠ مےٚ اکہ لٹہِ گناہ معاف کٔریتھ؟ مہربٲنی کٔرِتھ کٔرِو یہُوواہسؔ، تُہنٛدس خدایس دُعا۔ تمِس منٛگؠ تو زِ سُہ کرِہے یِمن ہالون دفع تکیازِ یِم مارن اسہِ۔"18أتی درایہِ موسیٰؔ تہٕ ہارونؔ بادشاہس نِشہ تہٕ کوٚرکھ یہُوواہسؔ کُن دُعا۔19پتہٕ کوٚر یہُوواہنؔ واوکھ رخ تبدیٖل لہٰذا سُہ ووٚتھ مغربہ کِنؠ تیزی سان تہٕ تٔمؠ تُلؠ تِم سٲری ہالو تہٕ ترٲوِن بحرِ قُلزمسؔ منٛز۔ مِصرٕ کِس مُلکس منٛز روٗد نہٕ کُنہِ تہِ جایہِ اکھ ہالو تہِ۔20پوٚز یہُوواہنؔ بنوو سُہ بادشاہ دُبارٕ ضدی تہٕ تٔمؠ دِیتُ نہٕ اسرائیل ین گژھنہٕ۔21یہُوواہنؔ ووٚن موسیٰؔ ہس، "پنُن اتھٕ زیٹھٕ راو آسمانس کُن یُتھ سٲرسےٕ مِصرٕ کِس مُلکس سپدِ انہِ گوٚٹ، تژھ انہِ گٹہٕ یۅسہ لوٗکھ ہیکن محسوس کٔرِتھ۔22لہٰذا زیٹھٕ روو موسیٰؔ ہن آسمانس کُن پنُن اتھٕ، تہٕ مِصرٕ کِس سٲرسےٕ مُلکس منٛز گوٚو ترٛین دوٚہُن تہٕ ترٛین رٲژن انہِ گوٚٹ۔23کانٛہہ اکھ اوس نہٕ بیِیس ہیکان وُچِھتھ۔ کانٛہہ اکھ ہیوٗک نہٕ اورٕ یور گژھتھ۔ پوٚز تتھ علاقس اوس گاش ییٚتہِ اسرائیلی روٗزان ٲسؠ۔24بادشاہن دِیُت موسیٰؔ ہس ناد تہٕ ووٚننس، "بلکل ٹھیک، توٚہؠ ہیکیو گژھتھ تہٕ یہُوواہسؔ عبادت کٔرِتھ۔ تُہنٛدؠ شُرؠ تہٕ تُہنٛزِ زنانہٕ ہیکن توٚہہِ سٟتؠ گژھتھ۔ مگر تُہنٛدؠ تیٖرین تہٕ ژھاولین ہنٛدؠ کھؠلؠ بیٚیہِ چاروٲے گژھن روٗزنؠ ییٚتی۔25مگر موسیٰؔ ہن دِیُت جواب، "ناہ، ژےٚ چھے بیٚیہِ اسہِ قۅربٲنیہِ تہٕ سختہٕ قۅربٲنی سٟتؠ پکناونہِ دِنہِ یِم ٲسؠ پننِس خدایس یہُوواہسؔ پیش کرو۔26سٲنؠ چاروٲے تہِ گژھن اسہِ بیٚیہِ سٟتؠ آسٕنؠ۔ أسؠ ترٛاوو نہٕ اکھ چارووے تہِ پتھ تکیازِ تِم ہؠتھ گژھو أسؠ یہُوواہسؔ عبادت کرنہِ، سُہ خدا یمِس أسؠ عبادت کران چھِ۔ اسہِ چھِنہٕ خبر زِ یہُوواہسؔ عبادت کرنہٕ خٲطرٕ کیاہ پییٚہِ اسہِ ضرورت یوٚت تام أسؠ توٚت واتو یوٚت اسہِ گژھن چُھ۔"27مگر یہُوواہنؔ تھوٚو بادشاہ ضدِ پؠٹھ۔ بادشاہن دِیُت نہٕ اسرائیل ین گژھنُک اجازت۔28بادشاہن ووٚن موسیٰؔ ہس تہٕ ہارونسؔ، "ییٚتہِ نیرو نیٚبر! ہوش سان روزیٚو زِ مےٚ نِشہ یی زیٚو نہٕ دُبارٕ زانٛہہ! یمہِ دوٚہہ بہٕ وُچھو توٚہؠ دُبارٕ، بہٕ کرناوہو کٲنسہِ ہنٛدؠ دسؠ قتل۔29موسیٰؔ ہس دِیُت جواب، "ژٕ چُھکھ ٹھیک! بہٕ وُچھنہٕ وُنؠ چون بُتھ زانٛہہ!"
Bridge Connectivity Solutions Pvt. Ltd.