ایستر8
1تمہِ دوٚہہ، کوٚر بادشاہ اخسویرسنؔ ہامانُن سورےٕ جایٔداد ملکایہِ آستیرؔ حوالہٕ۔ سُہ اوس یہُودینؔ ہُنٛد دشمن روٗدمت۔ آستیرؔ ووٚن بادشاہس زِ مردکیؔ چُھ تس پِتٕر بوے، سُہ چُھ مےٚ مٲلس برابر۔ یہِ بوزِتھ اننوو بادشاہن مردکیؔ پانس نِش۔2ییٚلہِ بادشاہن ہامانَؔس موتُک سزا لیٚوکھ، تٔمؠ ہیٚژ تس سۅ وٲج واپس یتھ پؠٹھ بادشاہ سنٛز مُہر ٲس تہٕ بادشاہن لٲج سۅ دُبارٕ واپس۔ بادشاہن کڈ پتہٕ سۅ بیٚیہِ نیٚبر تہٕ دِژن مردکیؔ یس، یہِ ہاونہٕ خٲطرٕ زِ مردکیؔ یَس آسن بادشاہ سٕنٛدِ حکمہٕ سٟتؠ بادشاہ سنٛدؠ اختیار۔ آستیرؔ تہِ بنوو مردکیؔ ہامانؔ سٕنٛدِ سٲری جائیدادک تحویل دار۔3پتہٕ آیہِ آستیرؔ کتھ کرنہٕ باپتھ دُبارٕ بادشاہس برونٛہہ کُن۔ تس عٲجزی تہٕ زارٕپارٕ کرنہٕ موکھٕ، تمہِ کوٚر سجدٕ تہٕ پنُن بُتھ تُرووُن بادشاہس کھوٚرن پؠٹھ۔ تمہِ کوٚر تس ودان ودان زارِ پارٕ تہٕ وننس زِ یہُودؠ مارنُک ہامانؔن خوفناک منصوبہ رکٲوؠ تو۔4بادشاہن کوٚڈ آستیرؔ کُن پنُن سۅنہٕ سُنٛد عاصہٕ، لہٰذا ؤژھ سۅ فرشہِ پؠٹھٕ تھوٗد تہٕ بُتھ کوٚرن بادشاہس کنُ۔5پتہٕ ووٚن آستیرؔ، "تہنٛز شان ٲسِن بُلنٛد، ہرگاہ توٚہہ باسان چُھ تہِ کرُن چُھ جان تہٕ ہرَگاہ توٚہؠ مےٚ رٲضؠ چُھو، تیٚلہِ لیکھؠ تو مہربٲنی کٔرتھ اکھ نٔو چِٹھؠ یۅسہ اجاجی ہمداتاؔ سٕنٛدِس نیٚچوؠ سنٛز نیٚبر سوزمَژن چِٹھین رَد کرِ۔ تِہنٛزن چِٹھین منٛز اوس تُہنٛدس سلطنتس منٛز کُنہِ تہِ جایہِ بسان وٲلؠ تمام یہُودؠ ختم کرنُک حکم دِنہِ آمُت۔6بہٕ چھیٚس یہِ اوٕ موٚکھٕ ونان تکیازِ بہٕ کرنہٕ پننؠن لوٗکن ہنٛز سپدن واجِنؠ تبأہی وُچھنؠ برداش۔ تِم چھِ میٲنؠ رشتہٕ دار۔ بہٕ ہیٚکہٕ نہٕ تِمن لوٗکن ہنٛز تبأہی برداش کٔرتھ۔7بادشاہ اخسویرسنؔ ووٚن ملکانہِ آستیرؔ تہٕ یہُودؠ مردکیؔ یَس، "توٚہہ چُھ یہِ پتاہ زِ مےٚ دیُت ہاماؔنُن سورےٕ جائیداد آستیرؔ ملکایہ، تہٕ مےٚ کھالہٕ نوو ہامانؔ پننیٚو خدمت گارو دٔسؠ أکِس لکٕرِ ہنٛدس کوٗٹس پؠٹھ پھاسہِ تکیازِ سُہ اوس یژھان تمام یہُودؠ قتل کرٕنؠ۔8توٚہؠ چُھو یتہِ زانان زِ کانٛہہ اکھ تہِ ہیٚکہ نہٕ میٲنؠ چِٹھؠ منسوخ کٔرتھ یتھ میٚون ناو تہٕ مُہر آسہ۔ یتھٕ پٲٹھؠ ہامانؔن سۅ چِٹھؠ لیٚچھؠ۔ لہٰذا پزِ توٚہہ یہُودینؔ مدد کرنہٕ باپتھ یِتھؠ کٔنؠ کرُن زِ توٚہؠ لیٚکھیو اکھ نُو خط، یتھٕ پٲٹھؠ توٚہہ رُت باسہِ۔ میٚون آسہ توٚہہ اِجازتھ تتھ چِٹھ پؠٹھ میٚون ناو لیٚکھنک تہٕ میانہِ واجہ ہنٛز مُہر تراونُک یۅسہ میانؠ سرکأری مُہر چھےٚ۔"9اوے سوزؠ بادشاہن پنٕنؠ کٲتب۔ تِم آیہِ تہٕ تِمو کٔر سۅ پرٛتھ کانٛہہ کتھ تحریر یۅسہ مردکیؔ ین تِمن لیکھنؠ ؤنؠ۔ تِمو لیچھؠ یہِ چِٹھؠ تُرٛووُہمہِ تٲریخہٕ ورؠ یکہٕ ترٛیمہِ ریتہٕ سیوانکِس ریٚتس منٛز، باہ ورؠ برونٛٹھ یمہِ دوٚہہ اخسویرسنؔ فارس کِس بادشاہ سٕنٛدِ حثیتہٕ استعفیٰ دِتمُت اوس۔ چِٹھؠ آیہِ سلطنتس منٛز یہُودینؔ ہنٛدِ ناوٕ تحریر کرنہٕ، مگر تمیٚک نقل آو شٲہی امیرن، تہٕ پرٛتھ صوبہٕ کیٚن گورنرن تہٕ سردارن سوزنہٕ۔ اخسویرسؔ سٕنٛدِس سلطنتس منٛز ٲسؠ اکھ ہتھ تہٕ ستووُہہ صوبہٕ، یم ہندوستان کہ مشرقہٕ طرفہٕ پؠٹھٕ اِتھوپیاؔ کِس مغربس تام پھلِتھ ٲسؠ۔ کٲتبو لیٚوکھ پرٛتھ صوبہٕ کیٚن لوٗکن پن پننہِ زبٲنؠ تہٕ حرفن منٛز۔ تِمو لیٚوکھ خصوصی طور یہُودینؔ، تہنٛزِ زبٲنؠ تہٕ تہنٛدِنےٕ حرفن منٛز۔10مردکیؔ ین کوٚر چِٹھِ ہنٛدِس پرٛتھ نقلس بادشاہ اخسویرسؔ سنٛدِ ناوٕ سٟتؠ دستخط تہٕ بیٚیہِ ترٲوٕن پرٛتھ کنہِ بادشاہ سنٛزِ تمہِ واجہ سٟتؠ مُہر یۅسہ بادشاہ سنٛز سرکٲرؠ مُہر ٲس۔ تمہٕ چٹھِ آیہِ گُرین پؠٹھ شیٚچھِ گرین ہنٛدِ دٔسؠ پرٮ۪تھ جایہ واتناونہٕ۔ تِم گے تِمن تیز گُرین پؠٹھ سوار یِم صرف بادشاہ سنٛزن کٲمیٚن باپتھ مقرر ٲسؠ۔ تِم گُرؠ ٲسؠ شٲہی طبیلن منٛز تیار گمٕتؠ۔11ہَرکُنہِ چٹھِ منٛز اوس وننہٕ آمُت زِ بادشاہ چُھ سٲرسےٕ سلطنتس منٛز تمام یہُودینؔ متحد گژھنُک تہٕ پانس رٲچھ کرنہٕ باپتھ لڑنُک اجازت دِوان۔ بادشاہ سنٛز چٹھؠ ٲس تِمن یِتہِ اجازت دِوان زِ تِم ہیٚکن تِمن ہتھیار بنٛد جمٲژن ہنٛدین نفرن بُرباد کٔرتھ یِم تِمن پؠٹھ حملہٕ کرن چاہے تِم کُنہِ تہِ صوبس منٛز آسن۔ چٹھؠ ٲس تِمن بیٚیہِ یتہِ اجازت دِوان زِ تِمن پؠٹھ حملہِ کرن والین ہنٛدؠ شُرؠ تہٕ زنانہٕ گژھن قتل کرنہِ، تہٕ تِہنٛد جائیداد گژھن ضبط کرٕنؠ۔12چٹھِ دیُت اخسویرسؔ سلطنت کین سارنےٕ صوبن منٛز تمام یہُودینؔ تمہِ ورؠ یہِ ادار ریتہٕ کِس ترٛوہٲمِس دوٚہس پؠٹھ یہِ کرنس اِجازتھ۔ یہِ اوس تِمن اکی دوٚہہ کرُن۔13چِٹھیٚن منٛز اوس عہدٕدارن لؠکھنہٕ آمُت زِ تِم لاگن یمَن چِٹھیٚن ہُنٛد نقل تتھ جایہِ یتن تمام لوٗکھ یہِ وُچِھتھ ہیٚکن تہٕ زانن بادشاہ سُنٛد یہِ حکم، تہٕ یتھٕ پٲٹھؠ روزَن یہُودؠ پننؠن دشمَنن خلاف لڑنہٕ باپتھ تیار ییٚلہِ سُہ موقہٕ واتہِ۔14بادشاہن کوٚر شیٚچھِ گرین چِٹھؠ ؤلؠ ؤلؠ واتناونُک حکم۔ تٔمؠ سوزؠ تِم پننؠن تیز رفتار گُرین پؠٹھ۔ بادشاہ سنٛدیو عہدٕدارو تہِ کوٚر چِٹھین ہُنٛد نقل ہاوِتھ سوسن شہرچہ رازدانہِ منٛز نَوِ فرمانُک اعلان۔15بادشاہن دیُت مردکیؔ یَس خاص پوشاک لاگنہٕ خٲطرٕ تاکہِ سُہ باسہِ وُنؠ بادشاہ سُنٛد سیٹھاہ اہم عہدٕدار۔ تٔمؠ دِیُت تمِس اکھ نیوٗل تہٕ سفید شٲہی پوشاک، اکھ بوٚڈ سۅنہٕ سُنٛد تاج، تہٕ اکھ لِلنہِ ہُنٛد فیروزی رنگہٕ جامہٕ۔ مردکیؔ درٛاو محلہٕ منٛز سُہ پوشاک لٲگتھ۔ ییٚلہِ سُہ سوسن کیٚو لوٗکو وُچھ تِمو دتؠ خوشی ہنٛدؠ نعرٕ۔16سوسنس منٛز بسن وٲلؠ یہُودؠ گے سیٹھاہ خوش، تہٕ باقی لوٗکو کوٚر تِمن یزتھ۔17یتھ یتھ صوبس تہٕ یتھ شہرس شیٚچھِ گریو چٹھِ واتناوِ یمن منٛز شٲہی فرمانُک اعلان اوس، یہُودینؔ سپز خوشی تہٕ منووُکھ جشن۔ سلطنتس منٛز گوٚو واریہن لوٗکن یہُودینؔ ہُنٛد خوف تہٕ تِم بنییہِ پانہٕ تہِ یہُودؠ۔
Bridge Connectivity Solutions Pvt. Ltd.