اِستِثنا7
1سون خدا یہُوواہؔ نیٚیہ، توٚہہ تتھ ملکس منٛز یتھ پٮ۪ٹھ توٚہؠ جلدےٕ دٲخل سپدِتھ قبضہٕ کٔریٚو۔ ییٚلہِ توٚہؠ برُونٛہہ پکیٚو تہٕ سُہ کڈِ تمہِ ملکہٕ منٛزٕ ستن لُکہٕ جمٲژن یمہٕ تُہنٛدِ کھۅتہٕ زیادٕ طاقتور تہٕ تعدادٕ کِنؠ تہِ زیادٕ چھِ۔ یمہٕ جمٲژ آسن، حِتی، جِرجاس، عمور، کنعان، فِرزی، حوی تہٕ یبوسی لوٗکن ہنٛزٕ۔ 2ییٚلہ سون خدا یہُوواہؔ توٚہہِ تِمن شِکس دِنس لایکھ بناوِ تہٕ توٚہؠ مٲرؠ زیوکھ تِم سٲری۔ توٚہہ پزِ نہٕ تِمن سٟتؠ کانٛہہ تہٕ مہادٕ کرُن، تہٕ نہٕ پزِ تِمن سٟتؠ رحمس کٲم ہیٚنؠ۔3توٚہؠ کٔرؠ زیٚو نہٕ تِمو منٛزٕ کٲنٛسہِ تہِ سٟتؠ خاندر۔ توٚہؠ دی زیٚو نہٕ پننٮ۪ن کورٮ۪ن تِہنٛدین گۅبرن سٟتؠ خاندر کرنُک اجازت، تہٕ نہ دی زیٚو پننٮ۪ن گۅبرن تہنٛزِ کٲنٛسہِ کورِ سٟتؠ خاندر کرنُک اجازت۔4اگر توٚہہِ تہِ کوٚرو، تِم لوٗکھ رٹن تُہنٛدین اولادن یہُوواہؔ تہٕ باقی رسولس ین ہنٛز عبادت کرنہٕ نشہٕ پتھ۔ اگر تہِ سپُد، تہٕ یہُوواہؔ سپدِ توٚہہ پٮ۪ٹھ سٮ۪ٹھاہ ناراض تہٕ سُہ کریٚو توٚہہ جلدی تباہ۔5توٚہہ چُھ تِمن لوٗکن سٟتؠ یتھٕ پٲٹھؠ کرُن: تہنٛزٕ قربان گاہ لہُرٕ ونہِ، تمہٕ کنٮ۪ن ہنٛدؠ ستون پُھٹراونؠ یمہٕ تہنٛدٮ۪ن دیوتاہن ہنٛدِ خٲطرٕ آسن، تمہٕ تھمب ژٔٹؠ زیوکھ یمہٕ تِمہ عیشرہ دیوی ہنٛزٕ پوٗزایہ باپتھ استعمال کران چھِ تہٕ تِہنٛدؠ بنٲومٕتؠ بُت ژھنؠ زیوکھ زٲلِتھ۔ 6توٚہہِ پزِ یہ لٲزمی کرُن تکیازِ توٚہہِ لوٗکن ہنٛز اکھ جماتھ چھےٚ یۅسہ صرف سٲنِس خدا یہُوواہؔ سنٛز چھےٚ۔ تٔمؠ ژٲرؠ نو توٚہؠ دنیاچو تمام لُکہٕ جمٲژو منٛزٕ پنٕنؠ خاص لوٗکھ بننہٕ باپتھ۔7یہ اوس نہٕ اوٕ موٚکھٕ زِ توٚہؠ چُھو باقی جمٲژو کھۅتہٕ تعدادس منٛز زیادٕ یمہٕ توٚہؠ یہُوواہنؔ ژٲرؠ مٕتؠ چُھو۔ توٚہؠ چُھو زمینس پٮ۪ٹھ ساروےٕ کھۅتہٕ لۅکٹیٚو جمٲژو منٛزٕ اکھ۔8بلکہِ چُھ یہ اوٕ موٚکھٕ زِ یہُوواہنؔ کوٚر توٚہہ سٟتؠ محبت تہٕ اوٕ موٚکھٕ تہِ زِ سُہ اوس یی کرُن یژھان یمیُک تٔمؠ تُہنٛدین جدٕاجدادن سٟتؠ وعدہ اوس کوٚرمُت۔ یہےَ وجہ چُھ زِ تمؠ دیُتنو توٚہہ مِصرچہِ غلامی تہٕ مِصرٕ کِس بادشاہ فرعونس نِش نجات۔9مگر یہ مٔشرٲؠ زیٚو نہٕ زِ یہُوواہؔ چُھ سون خدا۔ سُہ چُھ اسہِ پٮ۪ٹھ مہربان۔ سُہ چُھ تِمن لوٗکن ہنٛزن ساسہٕ واد پیٖرین باپتھ پاسدٲری ہُنٛد عہد کران یمہٕ تس سٟتؠ محبت کران چھِ تہٕ تمسنٛدین احکامن پٮ۪ٹھ عمل چھِ کران۔10وۅنؠ یمہٕ تس سٟتؠ نفرت کران چھِ، سُہ چُھ تِمن تمیُک جزا دِوان۔ سُہ دییہِ تِمن سزا تہٕ کریٚکھ جلد تباہ۔11لہٰذا پزِ توٚہہ تِمن تمام احکامن، قٲیِدن تہٕ فرموداتن پٮ۪ٹھ عمل کرٕنؠ یمہٕ بہٕ توٚہہ از دِوان چُھسو۔12اگر توٚہؠ یمن احکامن کُن دھیان دِیو تہٕ ہمیشہٕ یمن پٮ۪ٹھ عمل کریٚو تہٕ سون خدا یہُوواہؔ کرِ تی یہ تٔمؠ تُہنٛدِ باپتھ یُژھمُت چُھ تہٕ سُہ کرٕ کُھلہ دِلہٕ توٚہہِ سٟتؠ محبت یمیُک تٔمؠ تُہنٛدین جدٕاجدان سٟتؠ وعدہ کوٚرمُت چُھ۔13سُہ ورتاوِ توٚہہ سٟتؠ لول تہٕ کریٚو برکت۔ سُہ دییہِ توٚہہِ واریاہ اولاد پٲدٕ کرنٕچ صلاحیت۔ سُہ کرِ تُہنٛدِس زرعاتس برکت، تمیُک نتیجہ نیرِ یہ زِ توٚہہ نشہٕ آسہ مےَ بناونہٕ باپتھ واریاہ پھسٕل تہٕ دچھ تہٕ زیتون تیٖل تہِ آسہ واریاہ زیادٕ۔ توٚہہ نِش آسن واریاہ گٲو تہٕ تیٖر۔ سُہ کرِ تُہنٛدِ باپتھ یہ سورےٕ یتھ ملکس منٛز یمیُک تٔمؠ تُہنٛدین جدٕاجدان دِنُک وعدہ کوٚرمُت چُھ۔14سُہ کرِ توٚہہِ تمہِ نِشہ تہٕ زیادٕ برکت ییژاہ سُہ کانٛسہ دویمہِ جمٲژ برکت کرِ۔ توٚہہ سارنی آسن اولاد۔ تُہنٛدؠ چو چاروٲے تہِ آسن بچہٕ پٲدٕ کرنس قٲبل۔15تہٕ یہُوواہؔ بچاوِ توٚہہ تمام بیماریٚو نشہٕ۔ سُہ کرِ نہٕ توٚہہِ تِمو مہلِک بیمارین منٛز مُبتلا یمن متعلق سٲنؠ جدٕاجداد مِصرس منٛز وٲقف چھِ، بلکہ کرِ سُہ تِمو سٟتؠ تُہنٛدؠ تمام دشمن بیمار۔16توٚہہ پزٕنو تِمن تمام لوٗکن ہنٛزٕ جمٲژ تباہ کرنہِ یِمن پٮ۪ٹھ سون خدا یہُوواہؔ توٚہہِ فتح دِنس قٲبل بناوِ۔ تِمو منٛزٕ کٔرؠ زیٚو نہٕ کٲنٛسہِ پٮ۪ٹھ رحم۔ تہٕ تِہنٛدین معبودن ہنٛز عبادت کٔرؠ زیٚو نہٕ، تکیازِ اگر توٚہؠ تہِ کٔریٚو تہٕ یہ چُھ تِتھس ژھلس منٛز پھسنَس برابر یمہِ منٛزٕ نہٕ توٚہؠ زانٛہہ تہِ بٔچِتھ ہکیٚو۔17پانس سٟتؠ سونچہِ زیٚو نہٕ یہ زِ "یمہ لوٗکھ چھِ سانہِ کھۅتہٕ ژٔرؠ۔ تہٕ أسؠ ہیٚکہٕ ووکھ نہٕ تمہٕ زانٛہہ تہِ کٔڈِتھ۔"18یِمن مہٕ کھۅژیٚو۔ امہِ بجایہ سونچہِ زیٚو زِ سٲنؠ خدا یہُوواہنؔ کیاہ کوٚر مِصرٕ کِس بادشاہ تہٕ تِمن سارنی لوٗکن سٟتؠ یِمن پٮ۪ٹھ تٔمؠ حکومت کٔر۔19تمہٕ ہٲبتناک آفژٕ مہٕ مٔشرٲیو یمہٕ تُہنٛدیٚو جدٕاجدادو مِصرٕ کیٚن لوٗکن پٮ۪ٹھ یوان وُچھٕ تہٕ تمہٕ رنٛگہٕ رنٛگہٕ معجزات یمہٕ خداین تُہنٛدؠ جدٕاجداد مِصرٕ منٛزٕ کڈنہٕ باپتھ کٔرؠ۔ سون خدا یہُوواہؔ کرِ یِمن لُکہٕ جمٲژن سٟتؠ تی یتھ توٚہؠ وۅنؠ کھۅژان چُھو۔20امہِ علاوٕ یتہِ زِ سُہ کھۅژٕ ناوِ تِمن تہٕ سُہ کرِ تِمن ہلاک یمہٕ زنٛدٕ روزن تہٕ توٚہہ نِش ژوٗرِ روزنہٕ باپتھ ژلن۔ 21تِمن لوٗکہٕ جمٲژن مہٕ کھۅژیٚو تکیازِ سون خدا یہُوواہؔ چُھ توٚہہ سٟتؠ۔ سُہ چُھ بوٚڈ خدا۔ سُہ چُھ سُے یس لوٗکھ کھۅژان چھِ۔22سُہ ژھٕنہِ وار وارٕ تِمن لُکہٕ جمٲژن کٔڑِتھ۔ توٚہؠ کٔرؠ زیٚو نہٕ تمہٕ سٲری اکے ساعتہٕ کڈنٕچ کوشِش تکیازِ اگر توٚہؠ تہِ کٔریٚو تہٕ تیٚلہ گژھِ جنگلی جانورن ہنٛدِس تعدادس منٛز تیزی سان اضافہٕ تہٕ توٚہؠ ہکیٚو نہٕ تِمو نشہٕ پان بچٲوِتھ۔ 23امہِ بجایہ، بناوِ یہُوواہؔ توٚہہِ پننٮ۪ن دشمنن اکہِ وقتہٕ أکِس جمٲژ شِکس دِنس قٲبل۔ سُہ کرِ تِمن خوفس منٛز مبتلا یۅتام تِمہ تباہ سپدن۔24سُہ بنایو توٚہہ تِمن بادشاہن شِکس دِنس قٲبل۔ ییٚلہ توٚہؠ تِم مٲرؠ ووکھ، تِہنٛدؠ ناو گژھن مٔشتھےٕ۔ کانٛہہ تہِ جماتھ ہیٚکہ نہٕ توٚہہِ رکٲوِتھ۔ توٚہؠ کٔرؠ ووکھ تمہٕ سٲری تباہ۔25توٚہہ پزن تمہٕ نقشہٕ زالٕنؠ یمہٕ تِہنٛدین دیوتاہن ہنٛدؠ آسن۔ تِمن بُتن پٮ۪ٹھ یُس سۅن تہٕ چانٛدؠ لٲگِتھ آسہ سُہ نِنٕچ خٲہِش کٔرزیٚو نہٕ تکیازِ اگر توٚہؠ سُہ پانس باپتھ نِیو سُہ بنہِ توٚہؠ رٹنہٕ باپتھ اکھ پھنٛد۔ یہُوواہؔ چُھ تِمن بُتن ہنٛدِس پرٮ۪تھ کُنہ حصس سٟتؠ نفرت کران۔26توٚہؠ أنؠ زیوکھ نہٕ تِمو مٔکریو بُتو منٛزٕ کانٛہہ تہِ پنُن گھرٕ تکیازِ اگر توٚہؠ تہِ کٔریٚو تہٕ خدا کرِ توٚہہِ پٮ۪ٹھ تِتھے پٲٹھؠ لعنت یتھٕ پٲٹھؠ سہ تِمن پٮ۪ٹھ لعنت سوزان چُھ۔ توٚہہ پزِ تِمن بُتن سٟتؠ نفرت تہٕ تِم حقیر زانٕنؠ، تکیازِ یِم چھِ تِم چیز یِمن یہُوواہنؔ لعنت کٔر تہٕ تِم تباہ کرنُک وعدہ کوٚر۔"
Bridge Connectivity Solutions Pvt. Ltd.