اِستِثنا6
1یِم چھِ تِم احکام، قوٲعِد تہٕ ضوٲبط یِم سٲنؠ خدا یہُوواہنؔ مےٚ توٚہؠ ہیٚچھِ ناونٕکؠ حکم کوٚر۔ سُہ چُھ یژھان زِ توٚہؠ کٔریٚو یتھ ملکس منٛز تمؠ سنٛز عبادت یتھ منٛز توٚہؠ ینہٕ وٲلؠ تہٕ قبضہٕ کرن وٲلؠ چُھو۔2سُہ چُھ یژھان زِ توٚہؠ کٔریٚو تس تعظیم تہٕ بیٚیہِ کٔریٚو توٚہؠ تہٕ تُہنٛدؠ اولاد ہمیشہٕ تِمن اصولن تہٕ ضٲبطن پٮ۪ٹھ عمل یمہٕ بہٕ توٚہہِ ونان چُھسو، تاکہِ توٚہؠ روزیٚو واریہس کالس زنٛدٕ۔3لہٰذا، اے اسرائیل کیٚو لوٗکو، بوزیٚو تہنٛز کتھ غورٕ سان تہٕ کٔریٚو تمؠ سنٛز عبادت۔ اگر توٚہؠ یہ کٔریٚو توٚہہ سٟتؠ سپدن ماملات ٹھیک، تہٕ توٚہؠ بٔنیٚو اکھ بوٚڈ قوم ییٚلہ توٚہؠ یتھ ذرخیز زمینہٕ پٮ۪ٹھ بسنہِ لگیٚو۔ یہ سپدنُک وعدہ یہُوواہنؔ یمسنٛز عبادت سٲنؠ جدٕاجداد کران ٲسؠ کوٚرمُت چُھ۔ 4اسرائیل کیٚو لوٗکو، بوزیٚو! صرف چُھ یہُوواہؔ سون خدا۔5توٚہہِ چُھ تس وژھِ وٲنجہِ محبت کرُن، یتھ کٔنؠ تہِ توٚہہِ محسوس سپدِ تہٕ پرٮ۪تھ رنٛگہٕ یتھ کنؠ تہِ توٚہؠ کٔرِتھ ہکیٚو۔6یِم احکام مٔشرٲوؠ زیٚو نہٕ زانٛہہ یمہٕ بہٕ توٚہہِ از ونان چُھسو۔7یِم ہیٚچھٕ ناوؠ زیوکھ پنٕنؠ بچہٕ بار بار۔ یِمن متعلق کٔرزیٚو پرٮ۪تھ وزِ کتھ۔ ییٚلہ تہِ، توٚہؠ پننِس گھرس منٛز ٲسیٚو، ییٚلہ توٚہؠ نیٚبرؠ چکر کران ٲسیٚو، یِمن متعلق روزیٚو کتھ کران چاہے توٚہؠ لَر ترٲوِتھ ٲسِو یا پکان ٲسیٚو۔ 8یِم لیٚکھیٚو لۅکٹٮ۪ن لۅکٹٮ۪ن طُمارن پٮ۪ٹھ تہٕ پتہٕ تھٲیو تِمہ نرٮ۪ن گنٛڈِتھ، تِمہٕ تھٲیو تِمن پٹٮ۪ن پٮ۪ٹھ لیٚکھِتھ یمہٕ توٚہؠ ڈٮ۪کس گنٛڈان چُھو تاکہِ توٚہہِ روزن یمہٕ یاد۔9یمہٕ تھٲیو پننٮ۪ن گھرٕ کٮ۪ن چۅکاٹھن تہٕ شہرٕ کٮ۪ن دروازن پٮ۪ٹھ لیٚکھِتھ۔10سٲنؠ خدا یہُوواہنؔ چُھ تُہنٛدین جدٕاجدادن ابراہامؔ، اضحاقؔ تہٕ یعقوبسؔ سٟتؠ پۅختہٕ وعدہ کوٚرمُت زِ سُہ دییہِ توٚہہِ تِژھ اکھ زمین یتھ منٛز گۅڈے بٔڈؠ تہٕ خوشحال شہر آسن یمہِ نہٕ توٚہہِ بنٲومٕتؠ آسن۔11تِمو ووٚن زِ تِمن شہرن ہنٛدؠ گھرٕ آسن تِتھیٚو جان چیزو سٟتؠ گۅڈے بٔرِتھ یمہٕ کٲنٛسہِ بدلن تتہِ تھٲے مٕتؠ آسن۔ توٚہہِ آسن نہٕ تِمہٕ تتہِ تھٲے مٕتؠ۔ کریرؠ آسن یمہٕ خبر کٔمو کھٔنمٕتؠ آسن۔ دچھِ باغ تہٕ زیتون کُلؠ آسن یمہٕ بدل کٲنٛسہِ لٲگمٕتؠ آسن۔ بس! ییٚلہ یہُوواہؔ توٚہہِ تتھ ملکس منٛز واتناوِ تہٕ توٚہہِ آسہ پرٮ۪تھ اکھ سُہ چیز میسر یُس توٚہؠ کھیٚون یژھیٚو۔12پژھ تھٲے زیٚو تہٕ یہُوواہؔ مٔشرٲی زیٚون نہٕ، یمؠ توٚہؠ مِصرٕ منٛزٕ غلامی نِشہ کٔڈؠ نو تہٕ یِم سٲری چیز دِتؠ نو۔13توٚہہ پزیٚو سٲنِس خدا یہُوواہسؔ تعظیم کرُن تہٕ صرِف تمؠ سنٛزےٕ عبادت کرٕنؠ۔ ییٚلہ توٚہؠ پوٚز وننُک یا کانٛہہ کٲم کرنُک پوٚز قسم کھیٚوان ٲسیٚو سُہ گژھِ تمسنٛدے ناوُک کھیٚون۔14توٚہہِ پزِ نہٕ کٲنٛسہِ دویمِس دیوتا سنٛز پوٗزا کرٕنؠ یِمن دیوتاہن ہنٛز پوٗزا یتھ ملکس منٛز روزن وٲلؠ لوٗکھ کران چھِ۔ 15سون خدا یہُوواہؔ یُس توٚہہِ منٛز روزان چُھ کرِنہٕ تِمن لوٗکن قبوٗل یمہٕ بدل کٲنٛسہِ ہنٛز عبادت کران آسن۔ لہٰذا اگر توٚہؠ کٲنٛسہِ دویمِس معبودن سنٛز عبادت کٔریٚو تہٕ یہُوواہؔ سپدِ توٚہہِ پٮ۪ٹھ سٮ۪ٹھاہ ناراض تہٕ سُہ کرِ توٚہہِ پوٗرٕ پٲٹھؠ تباہ۔16یہ ازماونہٕ باپتھ گژھن نہٕ گناہ کرٕنؠ زِ یہُوواہؔ دیا اسہِ سزا کنہٕ نہ، یتھٕ کِنؠ زن تُہنٛدیٚو جدٕاجدادو مسہؔ ہس منٛز کوٚر۔ 17اتھ کتھہِ پٮ۪ٹھ تھٲیو یقین زِ توٚہؠ روزیٚو ہمیشہٕ تِمن تمام قٲیِدن، سنٛجیدٕ ہِدایِتن تہٕ احکامن ہنٛز تعمیل کران یمہٕ تٔمؠ توٚہہِ دِتؠ۔18تی کٔریٚو یہِ یہُوواہؔ افضل تہٕ بہتر ونان چُھ۔ اگر توٚہؠ تہِ کران چُھو تہٕ توٚہہِ سٟتؠ سپدن بہتر ماملات۔ توٚہؠ گٔژھیٚو تتھ اصل زمینس منٛز دٲخٕل تہٕ تتھ پٮ۪ٹھ کٔریٚو قبضہٕ یُس یہُوواہنؔ سانٮ۪ن جدٕاجدادن دِنُک وعدہ کوٚرمُت چُھ۔19یتھٕ کِنؠ زن تٔمؠ وعدہ کوٚرمُت چُھ زِ سُہ کڈِ تُہنٛدین دشمنن یمہِ ملکہٕ منٛزٕ دفاہ۔20آینٛدٕ پرِژھن تُہنٛدؠ بچہٕ توٚہہ، "سٲنؠ خدا یہُوواہنؔ کیازِ کوٚر اسہِ یِمن تمام اصولن تہٕ احکامن ہُنٛد تعمیل کرنُک حکم؟21پتہٕ ؤنیٚو توٚہؠ تِمن، "سٲنؠ جدٕاجداد ٲسؠ مِصرس منٛز بادشاہ، مگر یہُوواہنؔ أنؠ تِم پننہِ قدرتہٕ والہِ، طاقتہٕ سٟتؠ مِصرٕ منٛزٕ کٔڈِتھ22تِمو وُچھ سُہ مِصرٕ کٮ۪ن لوٗکن، بادشاہ تہٕ عہدٕدارن سٟتؠ رنٛگہٕ رنٛگہٕ معجزٕ تہٕ خوفناک کامہِ کران۔ 23تِمو تراوٕنٲوؠ سٲنؠ جدٕاجداد مِصر تہٕ أنِکھ یہ ملک رٹنہٕ باپتھ تِم یور، یتھ کنؠ زن تِمو سانٮ۪ن جدٕاجدادن سٟتؠ یہ کرنُک وعدہ کوٚرمُت اوس۔24تہٕ تِمو دیُت اسہِ تِمن تمام قانونن ہُنٛد تعمیل کرنُک تہٕ پانس تعظیم کرنُک حکم تاکہِ اسہِ سٟتؠ روزن ماملات ٹھیک تہٕ سُہ دییہِ سٲنِس قومس حفاظت کٔرِتھ ترقی ہُنٛد موقہٕ، یتھ کنے سُہ وۅنؠ کران چُھ۔25سون خدا یہُوواہؔ روزِ اسہِ رٲضؠ اگر أسؠ تِمن سارنی کتھن پٮ۪ٹھ عمل کرو یمیُک تٔمؠ اسہِ حکم کوٚرمُت چُھ۔
Bridge Connectivity Solutions Pvt. Ltd.