اِستِثنا30
1موسیٰؔ ہن ووٚن اسرائیل ین مزید، "وۅنؠ ووٚن مےٚ توٚہہ تِمن طریقِ کارن متعلق یمو سٟتؠ سون خدا یہُوواہؔ توٚہہ برکت کرِ اگر توٚہؠ تمؠ سنٛز فرمانبردٲری کٔریٚو تہٕ سۅ وتھ تہِ یمہِ سٟتؠ سُہ توٚہہ لعنت نٲزِل کرِ اگر توٚہؠ تس سنٛز نافرمٲنی کٔریٚو۔ اگر توٚہؠ تمسنٛدین قانونن پٮ۪ٹھ عمل نہ کرنُک فٲصلہٕ نِیو، تہٕ اکہ دوٚہہ ٲسیٚو توٚہؠ تِمن ملکن منٛز یتہِ سُہ توٚہہ منتشِر کرِ، تہٕ توٚہہ پییہِ یاد زِ مےٚ کیاہ ونیومو توٚہہِ۔2پتہٕ اگر توٚہؠ تہٕ تُہنٛدؠ بچہٕ سٲنِس خدا یہُوواہؔ سنٛز عبادت کرنہِ لگن تہٕ تِمن سارنی چیزن پٮ۪ٹھ وفادٲری سان عمل کرن یِمن ہُنٛد مےٚ توٚہہ از حکم دیُت،3سُہ کرِ تیٚلہِ توٚہہِ پٮ۪ٹھ رحم۔ سُہ انہِ توٚہہ تیٚلہ تِمو قومو منٛزٕ واپس یِمن منٛز توٚہؠ تٔمؠ پراکنٛدٕ کٔرؠ نو، تہٕ سُہ بناوِ توٚہہ بیٚیہِ خوشحال۔4اگر توٚہؠ زمیٖنس پٮ۪ٹھ دور دراز جاین منٛز چھکرِتھ ٲسیو توتہِ انیٚو سون خدا یہُوواہؔ توٚہہ سومبراوِتھ تہٕ پتہٕ انیٚو پننِس ملکس منٛز واپس۔ 5سُہ بناوِ توٚہہ بیٚیہِ تتھ ملکس پٮ۪ٹھ قبضہٕ کرنس قٲبل یتہٕ تُہنٛدؠ جدٕاجداد روزان ٲسؠ۔ تہٕ سُہ بناوِ توٚہہ مذید خوشحال تہٕ تُہنٛدِس تعدادس منٛز کرِ واریاہ ہُریر۔6سون خدا یہُوواہؔ بدلاوِ تُہنٛد اُندرون تمیُک نتیجہٕ نیرِ یہ زِ توٚہؠ کٔریٚو تمِس سٟتؠ دِل و جانہٕ محبت۔ تہٕ پتہٕ روزیٚو مُتوٲتِر تٔتھؠ ملکس منٛز۔ 7سون خدا یہُوواہؔ کرِ تِم تمام آفژٕ تُہنٛدین دشمنن تہٕ توٚہہ پٮ۪ٹھ ظلم کرن والٮ۪ن پٮ۪ٹھ نٲزِل یِمن متعلق مےٚ توٚہہِ ووٚن۔8یہ توٚہہ برُونٛہہ کوٚرو تی کٔرؠ زیٚو یہ یہُوواہؔ توٚہہ کرناون یژھان چُھ، تہٕ توٚہؠ کٔرؠ زیٚو تِمن تمام احکامن ہنٛز تعمیل یمہٕ مےٚ توٚہہ از دِتؠ۔9سون خدا یہُوواہؔ کرِ توٚہہ تمام کامیٚن منٛز برکت یمہٕ توٚہؠ کٔریٚو۔ توٚہہ آسن واریاہ اولاد تہٕ واریاہ چو چاروٲے تہٕ توٚہؠ وۅپدٲیو واریاہ فصٕل۔ تَس سپدِ بیٚیہِ اکہِ پھرِ خوشی توٚہؠ خوشحال بنٲوِتھ۔ بلکُل تِتھے پٲٹھؠ یتھٕ پٲٹھؠ تٔمؠ تُہنٛدؠ جدٕاجداد خوشحال بنٲوِتھ خوشی پرٲو۔10مگر سُہ کرِ یہ تیٚلہ ییٚلہ توٚہؠ تہِ کریٚو یہ تٔمؠ توٚہہِ کرُن ووٚن، تہٕ صرف تیٚلہ ییٚلہ توٚہؠ تِمن تمام اصولن تہٕ قواعدن پٮ۪ٹھ عمل کٔریٚو یمہٕ مےٚ اتھ کتابہِ منٛز لیٚکھؠ، تہٕ صرف اتھ صورتس منٛز ییٚلہ توٚہؠ پرٮ۪تھ رنٛگہٕ تہٕ دِلہٕ جانہٕ یہُوواہسؔ کُن رجوع کٔریٚو۔11یمہٕ احکام بہٕ توٚہہ از دِوان چُھس تِمن ہنٛز تعمیل کرٕنؠ چھنہٕ تُہنٛدِ باپتھ زیادٕ مشکل تہٕ تِم زانٕنؠ تہِ چھنہٕ مشکِل۔ 12تِم چھنہٕ آسمانس منٛز ژوٗرِ۔ توٚہہ چھنہٕ یہ وننٕچ ضرورت زِ سانہِ باپتھ کُس کھسہِ آسمانس پٮ۪ٹھ تہٕ تتہِ والہِ سانہِ باپتھ تِمہ تہٕ أسؠ ہیٚچھو؟13تہٕ تمہٕ چھنہٕ سمندرس اپارِ۔ تہٕ توٚہہ پییہِ نہٕ یہ وننُک ضرورت زِ کُس ترِ سمندرس اپور تہٕ تتہِ انہ سانہِ خٲطرٕ یِم، یُتھ زن أسؠ تمہ ہیٚچھو؟14نہ، تمسنٛدؠ احکام چھِ توٚہہ سٟتؠ، توٚہؠ چُھو تِم زانان، تہٕ توٚہؠ ہکیٚو تِم بار بار دُہرٲوِتھ۔ تہٕ توٚہؠ ہکیٚو آسٲنی سان تِم اپنٲوِتھ۔ 15ؤلیٚو بوزیٚو! از چُھسو بہٕ توٚہہ اجازت دِوان زِ توٚہؠ کٔریٚو پانے اصلیٚن تہٕ بُرٕ کامیٚن درمیان فرق، کۅسہٕ کٲم تھاوِ توٚہہ واریہس وقتس زنٛدٕ تہٕ کۅسہٕ واتناوِ توٚہہ جوٲنی منٛزےٕ مزاربل۔16بہٕ چُھسو بیٚیہِ ونان زِ اگر توٚہؠ سٲنِس خدا یہُوواہؔ سنٛدؠ احکام مٲنیٚو یمہٕ بہٕ از توٚہہ دِوان چُھس، اگر توٚہؠ تمِس سٟتؠ محبت تھٲیو تہٕ پنٕنؠ زندگی تِتھے پٲٹھؠ پکنٲیو یتھ کنؠ سُہ یژھان چُھ، اگر توٚہؠ تمسنٛدؠ تمام اصول تہٕ قانون مٲنیٚو۔ توٚہؠ روزیٚو خوشحال تہٕ توٚہہ گژھیٚو کٲفی ہُریر، سون خدا یہُوواہؔ کرِ توٚہہ تتھ ملکس منٛز برکت یتھ منٛز توٚہؠ اژن وٲلؠ تہٕ یتھ توٚہؠ قبضہٕ کرن وٲلؠ چُھو۔17مگر وۅنؠ اگر توٚہؠ یہُوواہؔ سنٛز عبادت کرٕنؠ ترٲیو، تہٕ یہ کینٛژھا سُہ ونان چُھ تہِ ماننہٕ نِشہ کٔریٚو انکار، تہٕ باقین اجازت دِیو زِ توٚہؠ کرِو باقین معبودن ہنٛز عبادت،18تہٕ بہٕ چُھسو از توٚہؠ خبردار کران زِ توٚہؠ مٔریٚو جلدےٕ۔ تُہنٛدؠ لوٗکھ روزن نہٕ زیادٕ کالس یتھ ملکس منٛز زنٛدٕ یتھ منٛز توٚہؠ دٲخل سپدِتھ تہٕ یردن دریاوس تار دِتھ قبضہٕ کرن وٲلؠ چُھو۔19بہٕ چُھس آسمان تہٕ زمینس پٮ۪ٹھٕ روزن والٮ۪ن پرٮ۪تھ أکِس عرضی کران زِ سُہ روزِ مےٚ گواہ، زِ از چُھسو بہٕ توٚہہ یہ فٲصلہٕ نِنُک اجازت دِوان زِ توٚہؠ چُھوا زیادٕ وقتس زندٕ روزُن یژھان کِنہٕ جلدےٕ مرٕنؠ یژھان، یا توٚہؠ چُھوا یہُوواہؔ سنٛز برکت یژھان کِنہٕ توٚہؠ چُھو تمؠ سنٛز لعنت نٲزل گژھٕنؠ یژھان۔ پانے کٔریٚو زندگی ہُنٛد فٲصلہٕ۔20سٲنِس خدا یہُوواہسؔ سٟتؠ محبت تھاوُن تہٕ تمؠ سنٛزِ فرمانبردٲری کرنُک کٔریٚو فٲصلہٕ۔ اگر توٚہؠ یہ کریٚو تہٕ توٚہؠ تہٕ تُہنٛدؠ اولاد روزن یتھ ملکس منٛز واریہس وقتس زنٛدٕ یمیُک یہُوواہنؔ تُہنٛدین جدٕاجدادن ابرہامسؔ، اضحاقسؔ تہٕ یعقوبسؔ سٟتؠ وعدہ کوٚرمُت چُھ زِ سُہ دییہِ تِمن۔
Bridge Connectivity Solutions Pvt. Ltd.