اِستِثنا27
1باقی اسرائیلی قٲیدن ہمراہ ووٚن موسیٰؔ ہن لوٗکن یہ زِ تِمن تمام احکامن پٮ۪ٹھ کٔرؠ زیٚو عمل یمہ مےٚ توٚہہ از دِتمٕتؠ چُھو۔2عنقریب گٔژھیٚو توٚہؠ یردن دریاوس تار لٔبِتھ تتھ ملکس منٛز دٲخل یمیُک تُہنٛدؠ خدا یہُوواہنؔ توٚہہ دنُک وعدہ کوٚرمُت چُھ۔ تتہِ کٔرؠ زیوکھ کینٛہہ بجہِ کنہِ کھڑا تہٕ مٔتھؠ زیوکھ چونہٕ۔3تِمن کنٮ۪ن پٮ۪ٹھ لیٚکھؠ زیٚو تِم تمام قانون تہٕ تعلیمات، ییٚلہ توٚہؠ تتھ سیٹھہےٕ ذرخیز زمینہٕ پٮ۪ٹھ دٲخٕل سپدیٚو یُس یہُوواہنؔ، تٔمؠ خدا یمسنٛز سٲنؠ جدٕاجداد عبادت کران ٲسؠ توٚہہ دِنُک وعدہ کوٚرمُت اوس۔4ییٚلہ توٚہؠ یردن دریاوس اپور تٔرِتھ تہٕ عیبالؔ بالس پٮ۪ٹھ کینٛہہ بجہِ کنہِ تھٲیو، یتھٕ کِنؠ مےٚ توٚہہ ووٚن تہٕ تِمن کٔرؠ زیٚو چونہٕ گچھ۔ 5تہٕ تتہِ بنٲے زیٚو کنٮ۪ن ہنٛز اکھ قربان گاہ یُتھ زن یہُوواہسؔ قربٲنیہ پیش کٔریٚو، مگر شسترو اوزارو سٟتؠ کٔرؠ زیٚو نہٕ تِمن کنٮ۪ن پٮ۪ٹھ کانٛہہ تہِ کٲم۔6یمہٕ قربان گاہ توٚہؠ سٲنِس خدا یہُوواہسؔ باپتھ قربٲنیہ زالنہٕ خٲطرٕ بناوان چُھو تِم گژھن پُھٹراونہٕ ورٲے کنیٚو سٟتؠ بناونہٕ ینہِ۔7تہٕ تتہِ گژھیٚو توٚہؠ یہُوواہسؔ سٟتؠ لول ورتاونہٕ خٲطرٕ قربٲنیہ پیش کرنہِ تہٕ توٚہؠ کھیٚؠ زیٚو تِمو قربٲنیو منٛزٕ پنُن حصہٕ تہٕ یہُوواہسؔ برُونٛہہ کنہِ روزؠ زیٚو خوش۔ 8تہٕ ییٚلہِ توٚہؠ تِمن کنٮ۪ن پٮ۪ٹھ یِم قانون لیٚکھیٚو تہٕ یِم لیکھؠ زیوکھ صاف صاف۔"9پتہٕ ووٚن موسیٰؔ ہن تہٕ کاہنو سارنی اسرائیلی لوٗکن، "اے اسرائیلی لوٗکو، ژۅپہٕ کٔریٚو تہٕ بوزیٚو یہ کینٛژھا بہٕ ونان چُھسو۔ از بنیٚو توٚہؠ تِم لوٗکھ یِم سٲنِس خدا یہُوواہؔ سنٛدؠ چھِ۔10لہٰذا پزِ توٚہہ تی کرُن یہ سُہ توٚہہ ونان چُھ تہٕ تِمن سارنی اصولن تہٕ قٲیِدن پٮ۪ٹھ چھیٚو عمل کرٕنؠ یمہٕ بہٕ از توٚہہ ونان چُھسو۔11امی دوٚہہ ووٚن موسیٰؔ ہن اسرائیلی لوٗکن،12یردن دریاوس تار لبنہٕ پتہٕ پزِ شمعون، لاوی، یہُوداؔ، اشکار، یوسف تہٕ بنیمِینؔ قبیلہٕ کٮ۪ن گرزِیمؔ پہاڑس پٮ۪ٹھ کھڑا سپدُن تہٕ یہُوواہسؔ درخواس کرُن زِ سُہ کرِنؠ لوٗکن برکت۔13تہٕ روبن، جد، آشرؔ، زبولون، دان تہٕ نفتالیؔ کیٚن قبیلن پزِ عیبال پہاڑس پٮ۪ٹھ کھٔسِتھ تمہٕ کتھٕ بوزنہِ یمہٕ یہُوواہؔ لوٗکن پٮ۪ٹھ لعنت کرنہٕ وزِ کرِ۔14لاوی ہنٛدین اولادن پزن یمہٕ کتھٕ بڈِ بڈِ وننہِ:15"یہُوواہؔ وٲلِن پرٮ۪تھ تس شخصس لعنت یُس لکٕرِ ہنٛز یا کنیٚو مورت گران آسہ یا کُنہِ دھاتس بناوان آسہ۔ تہٕ پتہٕ آسہ ژورِ ژورِ سۅ کھڑا کران تہٕ تتھ عبادت کران۔یہُوواہؔ چُھ یمہٕ چیز قٲبلِ نفرت زانان۔تہٕ سارنی لوٗکن پزِ یورٕ آمین کرُن۔ 16یُس پننِس مٲلِس یا ماجہِ بے عزتی کران آسہ، یہُوواہؔ کرِ تس لعنت،تہٕ سارنی لوٗکن پزِ یورٕ آمین کرُن۔17یُس کٲنٛسہِ ہنٛدِس ملکِیتس زاگہِ تہٕ نشانہٕ ڈالہِ یہُوواہؔ کرِ تِتھیٚن لوٗکن لعنت۔تہٕ سارنی لوٗکن پزِ یورٕ آمین کرُن۔18یُس کٲنٛسہِ أنِس غلط وتھ ہاوِ، تہٕ یہُوواہؔ کرِ تس لعنت۔تہٕ سارنی لوٗکن پزِ یورٕ آمین کرُن۔ 19یُس پردیسؠ ین، یتیمن تہٕ مونڈن تِمو چیزو نشہٕ محروم کرِ یمہٕ چیز شریعتن تِمن واتان آسن تہٕ یہُوواہؔ کرِ تِمن لعنت۔تہٕ سارنی لوٗکن پزِ یورٕ آمین کرُن۔20یہُوواہؔ کرِ تمِس پٮ۪ٹھ تہِ لعنت یُس نہٕ پننِس مٲلِس احترام کرِ تہٕ تس سنٛزِ کانٛسہِ تہِ زنانہِ سٟتؠ کرِ ہم بستری۔ تہٕ سارنی لوٗکن پزِ یورٕ آمین کرُن۔21یُس تہِ کانٛہہ چارواین سٟتؠ جنسی تعلق ورتاوِ، یہُوواہؔ کرِ تس لعنت،تہٕ سارنی لوٗکن پزِ یورٕ ضروری ونُن "آمین" 22اگر کانٛہہ پننہِ بیٚنہِ یا وۅرٕ بیٚنہِ سٟتؠ ہم بستری کرِ تہٕ یہُوواہؔ منٛگہِ تس باپتھ لعنت،تہٕ سارنی لوٗکن پزِ یورٕ ضروری ونُن "آمین" 23یُس پننہِ ہشہِ ماجہِ سٟتؠ ہم بستری کرِ تہٕ یہُوواہؔ منٛگہِ تس خٲطرٕ لعنت،تہٕ سارنی لوٗکن پزِ یورٕ ضروری ونُن "آمین" 24یُس کٲنٛسہِ ژورِ ژورِ قتل کرٕ تمِس باپتھ تہِ منٛگہ یہُوواہؔ لعنت،تہٕ سارنی لوٗکن پزِ یورٕ ضروری ونُن "آمین"25یہُوواہؔ منٛگہِ تس باپتھ لعنت یُس کٲنٛسہِ نِش پونٛسہٕ رٹِتھ ناحقہ کانٛہہ قتل کرِ،تہٕ سارنی لوٗکن پزِ یورٕ ضروری ونُن "آمین" 26یہُوواہؔ سوزِ پرٮ۪تھ تس شخصس لعنت یُس تِمن قانونن ہنٛز نافرمٲنی کٔرِتھ واضیح کرِ زِ یِم قانون چھِنہٕ ٹھیک، تہٕ سارنی لوٗکن پزِ یورٕ ضروری ونُن "آمین"
Bridge Connectivity Solutions Pvt. Ltd.