اعمال9
1اتھ دوران رود ساوُلؔ شرارتس منٛز تمن لوٗکن مارنٕچ دھمکی دِوان یمہٕ خداوند سنٛدؠ شٲگرد ٲسؠ۔ سُہ گو یروشلمس منٛز سردار کاہنس نِشہٕ،2تہٕ کوٚرنس درخواست زِ سُہ لیٚکھِن دمشقس منٛز یہُودؠ عبادت گاہ کٮ۪ن رہنماہن ساوُل سُنٛد تعارف دِتھ تِمن نامہٕ۔ نامن منٛز آو تِمن وننہٕ زِ ساوُلس دِین اختیار یُتھ سُہ کانٛسہِ تہِ زنہِ یا مردس رٔٹِتھ انہِ یمو سۅ وتھ اختیار کٔرمٕژ آسہ یۅسہ تِمن یسوعنؔ ہٲو، تہٕ تِمن واتناوِ قٲدؠ بنٲوِتھ یروشلم تاکہ یہُودؠ رہنما دِن تِمن انصاف بوزِتھ سزا۔3ییٚلہ ساوُل تہٕ تمسنٛدؠ سٲتھی سفرس دوران دمشق نزدیک وٲتؠ اچانک چمکیاو ساوُلس اندؠ پٔکؠ آسمانہٕ پیٚٹھُک اکھ چمکہٕ وُن گاش۔4سُہ او یکدم پتھر لاینہٕ۔ پتہٕ بوز تٔمؠ کمسنٛز تانؠ آواز یۅسہ تمِس ونان ٲس، "ساوُل، ساوُل، ژٕ کیازِ چُھکھ مےٚ تکلیف دِنٕچ کوشش کران؟5ساوُلنؔ پرُژھ تمِس، "خداوند، توٚہؠ کم چُھو؟ تٔمؠ دِتُس جواب، "بہٕ چُھس یسوع، یمِس ژٕ تکلیف دِوان چُھکھ۔6ووٚنؠ گژھِ کھڑا تہٕ وات شہرس منٛز! تتہِ ؤنی ژےٚ کانٛہہ زِ بہٕ کیاہ چُھس ژےٚ اتتھِ کرناون یژھان"7تِم نفر یمہ ساوُلس سٟتؠ سفرس منٛز ٲسؠ سپدؠ تِتھؠ حٲران زِ تِمو ہیٚوک نہٕ کینٛہہ ونِتھ۔ تِم گے تٔتی رٔہِتھ۔ تِمو بوزٕ خداوند سنٛزٕ کتھٕ، مگر وُچِھتھ ہیٚککھ نہٕ کہین۔8ساوُل وۅتھ پتھرِ تھوٚد مگر ییٚلہ تٔمؠ أچھ مُژراوِ تٔمؠ ہیٚوک نہٕ کِہین وُچِھتھ۔ تہٕ تمؠ سنٛدیو سٲتھیٚو واتنوو سُہ تھف کٔرِتھ دمشق۔9تریٚن دوٚہُن ہیٚوک نہٕ ساوُلنؔ کہین تہِ وُچِھتھ تہٕ نہ ہیٚکُن کینٛہہ کھیٚتھ چیٚتھ۔10دمشقس منٛز اوس یسوع سُنٛد اکھ ژاٹھ یمِس حننیاہؔ ناو اوس۔ خداوندن دیُت تس جلوٕ تہٕ وُننَس، "حننیاہؔ!" تٔمؠ ووٚنُس "خداوند، بہٕ چُھس بوزان"11خداوند یسوعنؔ ووٚن تس زِ یمہ سیٚزِ وتہِ گژھِ ہُتھ گرس منٛز یُس یہُوداؔ سُنٛد چُھ۔ تتہِ پرِژھ کانٛسہ زِ کیاہ ژٕ ہیٚککھا ترسسؔ کِس ساوُل ناوٕ کِس نفرس سٟتؠ کتھ کٔرِتھ، تکیازِ سُہ چُھ وُنکٮ۪ن مےٚ دُعا منٛگان۔12ساوُلنؔ وُچھ اکھ پرتوا یتھ منٛز تٔمؠ حننیاہؔ ناوک اکھ نفرا تٔمؠ تتھ گرس منٛز اژان وُچھ یتہِ سُہ ٹھہرِتھ اوس تہٕ تھٲوِن پنٕنؠ اتھٕ تس پیٚٹھ تاکہِ سُہ ہیٚکہ ہے دوبارٕ وُچِھتھ۔13حننیاہنؔ دِتُس جواب، "اے خداوند، واریہو لوٗکو ووٚن مےٚ أمِس شخصس متعلق۔ أمؠ چُھ یروشلمس منٛز تمن لوٗکن سٟتؠ واریاہ بُرٕ کامہِ کرمژٕ یمو توٚہہِ پیٚٹھ ایمان اوٚنمُت چُھ۔14زِٹھیٚو کاہنو چُھ أمِس یور دمشق ینُک حکم کوٚرمُت تاکہ تِمن نفرن کرِ گرفتار یمو توٚہہ پیٚٹھ ایمان اوٚنمُت چُھ۔15مگر خداوند یسوعنؔ ووٚن حننیاہسؔ، "ساوُلسؔ نِش گژھِ! یہ بہٕ ونے تہِ کر تکیازِ مےٚ چُھ سُہ پننہِ خدمتہٕ خٲطرٕ ژورمُت تاکہ سُہ کرِ غٲر یہُودینؔ، تہنٛدین بادشاہن تہٕ اسرائیل ین سٟتؠ مےٚ متعلق کتھ۔16بہٕ ونہٕ تس پانہ زِ لوٗکن مےٚ متعلق وننہٕ خٲطرٕ پیٚنے ژےٚ اکثر جاین مصیبت تُلٕنؠ"17لہٰذا دراو حننیاہؔ تہٕ ساوُل سُنٛد گرٕ لٔبتھ ژاو سُہ اندر۔ پتہٕ یتُھےٕ سُہ ساوُلس سمُکھ، تٔمؠ تھٲوؠ پنٕنؠ اتھٕ تس پیٚٹھ، تہٕ وُننَس، "ساوُل بایا، خداوند یسوعنؔ دیُت مےٚ پانے توٚہہِ نِش ینُک حکم۔ سُہ چُھ سُے یُس ونہِ کٮ۪ن توٚہہ تمہِ ساعتہٕ ظٲہر سپُد ییٚلہ توٚہؠ دمشقس منٛز وتہِ پکان ٲسِو۔ تمؠ سوزُس بہٕ توٚہہ نِش تاکہِ توٚہؠ ہکیٚو دوبارٕ وُچِھتھ تہٕ توٚہہِ روزیٚو مکمل پٲٹھؠ روح القدس سنٛدِس قوبوس منٛز۔18یکدم آو ساوُل سنٛزو أچھو منٛزٕ گاڈٕ زال ہیٚو کہتام چیز وسِتھ تہٕ سُہ گو دُبارٕ وُچھنس اہل۔ پتہٕ وۅتھ سُہ تھوٚد تہٕ آس بپتسمہ دنہِ۔19ییٚلہ ساوُلنؔ کینٛہہ کھیٚو چیٚو تہٕ تمِس آیہ دوبارٕ ہمتھ۔ ساوُل رود واریہن دوٚہُن دمشقس منٛز باقی ایمان والیٚن ژاٹن سٟتؠ۔20سُہ لوٚگ جلدےٕ یہُودؠ عبادت خانن منٛز یسوع سنٛز منٲدی کرنہِ۔ تٔمؠ ووٚن تِمن زِ یسوع چُھو خدایہ سُنٛد گۅبُر۔21یِمو تہِ لوٗکو سُہ یسوع سنٛز منٲدی کران وُچھ تِمن سپٕز حٲرت۔ تِمو منٛزٕ ٲسؠ کینٛہہ ونان، "أسؠ چھِ مشکِلنےٕ یقین کٔرِتھ ہیٚکان زِ یہ چھا سُے شخص یُس یروشلمس منٛز ایمان والیٚن مقابلہٕ لوٚگ تہٕ یُس تِمہ قٲدؠ بنٲوِتھ یروشلمس منٛز سردار کاہنن نِشہٕ اننہٕ خٲطرٕ تیار سپُد!"22مگر خداین بنوو ساوُل یتھ قٲبل زِ سُہ ہیٚکہِ واریہن لوٗکن امہِ کھۅتہٕ تہِ زیادٕ اعتمادٕ سان تبلیغ کٔرِتھ۔ سُہ چُھ صحیفو سٟتؠ ثٲبت کران زِ یسوع چُھ مسیح۔ اوٕ کِنؠ ہیٚکن نہٕ دمشقٕکؠ یہُودؠ رہنما یہ سوچتھےٕ زِ أمسنٛز کتھ کرٕہو غلط ثٲبت۔23کینٛہہ کال گٔژھتھ کٔر تتہِ کیٚو یہُودؠ سردارو یہ قتٕل کرنٕچ سٲزِش۔24سُہ اوس دوٚہس راتس یہُودؠ شہرٕکیٚو تمام دروازو کِنؠ نیرتھ لوٗکن منٛز ژھٲنٛڈ دِوان تاکہ ساوُل گژھِ نظرِ تہٕ سُہ کر وون قتٕل۔ حالانکہ کٔمؠ تام ووٚن ساوُلسؔ زِ تِم کیاہ کرنُک اِرادٕ چُھ۔25مگر یم ژاٹھ تٔمؠ یسوعسؔ پیٚٹھ ایمان اننٲومٕتؠ ٲسؠ تِمو منٛزٕ نیٚو سُہ کینٛژو روتلہِ کنٮ۪ن ہنٛدِس تتھ تھدِس دیوارس نِش یُس شہرس گیرٕ کٔرِتھ اوس۔ تِمو تُل سُہ رزو سٟتؠ گنٛڈِتھ اکِس ٹوکرِ منٛز تہٕ ترووُکھ دیوارکہِ اکہ کھنہٕ منٛزؠ بوٚن۔ یتھٕ کٔنؠ ژۅل سُہ دمشق شہرٕ منٛزٕ۔26ییٚلہ ساوُل یروشلم ووت تہٕ تٔمؠ کٔر باقی ژاٹن سمکھنٕچ کوشش۔ تاہم ٲسؠ سٲری تس کھۅژان، تکیازِ تِمن اوس نہٕ بیہوان زِ سُہ چُھ اکھ ایماندار بنیٚومُت۔27مگر برنباسنؔ نیٚو سُہ رسولن نِشہٕ۔ تٔمؠ ووٚن نبین یتھٕ پٲٹھؠ زِ ییٚلہ ساوُل دمشق چیٚو وتو صفر کران اوس، تٔمؠ وُچھ تتہِ خداوند یسوع، تہٕ تتہِ کِتھٕ کنؠ کٔر خداوند یسوعنؔ أمِس سٟتؠ کتھ۔ تٔمۍ ووٚن تِمن یتہِ زِ ساوُلنؔ کِتھٕ پٲٹھؠ کٔر جُرتہٕ سان دمشقس منٛز لوکن سٟتؠ یسوعسؔ متعلق کتھ۔28چناچہ ساوُل اوس سٲرسےٕ یروشلمس منٛز نبین تہٕ باقی ایمان والیٚن سمکھان تہٕ لوٗکن بڈٕ ہمتہٕ سان خداوند یسوعسؔ متعلق ونان۔29ساوُل اوس یونٲنؠ بولن والیٚن یہُودٮ۪ن سٟتؠ تہِ یسوعسؔ متعلق کتھ کران تہٕ تِمن سٟتؠ بحث تہِ کران۔ مگر تِم ٲسؠ لگاتار سُہ مارنٕچہِ وتہِ ہنٛدِس تلاشس منٛز۔30ییٚلہ باقی ایمان والیٚو بوز زِ یہُودؠ چھِ أمِس قتٕل کرنُک اِرادٕ کران تہٕ تِمو منٛزٕ نیٚو ساوُل کینٛژو قیصریہ کِس شہرس منٛز۔ تتہِ بیہنوو سُہ تِمو اکِس جہازس پیٚٹھ یُس تمسنٛدِس آبٲئی شہر ترسسؔ کُن گژھان اوس۔31چناچہ یہُودیہ، گلیلؔ تہٕ سامریہ ہنٛدین تمام علاقن ہنٛدؠ ایمان واجنہِ جمٲژ آسہ امنہٕ سان روزان تکیازِ ووٚنؠ اوس نہٕ تِمن پیٚٹھ کانٛہہ تہِ ظلم کران۔ پاک روحُک طاقت اوس تِمن حوصلہٕ تہٕ طاقت دِوان۔ تِم ٲسؠ خداوند یسوع سنٛز عبادت جٲری تھٲوِتھ، تہٕ پاک روح اوس واریہن دویمٮ۪ن لوٗکن ایمان وٲلؠ بننس کُن رٲغب کران۔32ییٚلہ پطرس تِمن علاقن منٛز سفر کران اوس تہٕ اکہِ پھرِ گو سُہ سٲحلی مٲدانن منٛز تِمن پژھ، والیٚن سمکھنہِ یمہ لُدہ شہرس منٛز روزان ٲسؠ۔33تتہِ سمُکھ سُہ اینیاسؔ ناوٕ کِس اکِس نفرس۔ اینیاسؔ اوس نہٕ ٲٹھو وریو پیٚٹھٕ بسترٕ منٛزٕ نیٚبرےٕ درامُت تکیازِ تس ٲس فالٕج گٔمٕژ تہٕ اوس چارپایہِ پیٚٹھ۔34پطرسن ووٚن تس، "اینیاسؔ، یسوع مسیح چھی ژےٚ شِفا عطا کران۔ وۅتھ وٹھ پنُن بستر!" اینییاسؔ وۅتھ جلدےٕ تھوٚد۔35واریہو لوٗکو یمہٕ لُدہ تہٕ شارُون کٮ۪ن مٲدانن منٛز روزان ٲسؠ اوٚن خداوند یسوعسؔ پیٚٹھ ایمان ییٚلہ تِمو خداوند سنٛدِ شفا پتہٕ اینیاسؔ وُچھ۔36یافاؔ شہرس منٛز ٲس اکھ ایمان واجِنؠ روزان یمسُنٛد ناو تبیتاؔ اوس۔ یونٲنؠ زبٲنؠ منٛز اوس تمیُک مطلب ڈوراکاس اوس۔ سُہ ٲس ہمیشہ غریبن ہنٛدِ باپتھ رُت کانٛچھان تہٕ تِمن ضرورتٕکؠ چیز فراہم کران۔37یمہِ ساعتہٕ پطرس لُدہس منٛز اوس سۅ سپٕز بٮ۪مار تہٕ گُزرییہ۔ تتِچو کینٛژو مستوراتو دیُت تس یہُودؠ رسمو مطٲبق غسُل۔ تہٕ پتہٕ تھٲوکھ تمؠ سنٛز لاش کفنہٕ ؤلِتھ تمسنٛدِس گرٕکِس پیٚٹھمِس کمرس منٛز۔38لُدہ اوس یافا شہرس نکھے، اوٕ کِنؠ ییٚلہ شاگردو بوز زِ پطرس چُھ وُنہٕ لُدہ شہرسےٕ منٛز تہٕ تِمو کٔڈؠ زٕ نفر پطرسس نِش گژھنہٕ خٲطرٕ۔ ییٚلہ تمہ پطرس سنٛزِ جایہ وٲتؠ تہٕ تِمو کٔر تس عرضی، "مہربٲنی کرِتھ یہ اسہِ سٟتؠ جلدی یافا!39پطرس گو دستی تیار تہٕ دراو تِمنےٕ سٟتؠ۔ ییٚلہ تِم واپس یافا پنُن گرٕ وٲتؠ تِمو کھول سُہ سیوٚدُے ہیٚرمِس کمرس منٛز یتہِ دورکاسؔ سنٛز لاش پتھر ٲس۔ تتہِ موجود سارے مونٛڈٕ آس تس انٛدؠ انٛدؠ کھڑا ودان۔ تِمہ ٲسؠ تس تِمہ پلو تہٕ ملبوسات ہاوان یمہ ڈوراکاہہِ لوٗکن کِتؠ بنٲومٕتؠ ٲسؠ ییٚلہ سۅ زنٛدٕ ٲس۔40مگر پطرسن کٔڈؠ تمہٕ سٲری کمرٕ منٛزٕ نیٚبر۔ پتہٕ وُتھ کۅٹھٮ۪ن پیٚٹھ تہٕ کوٚرُن دُعا۔ پتہٕ پھیور تمؠ سنٛزِ لاشہِ کُن، تٔمؠ ووٚن، "تبیتاؔ، وۅتھ تھوٚد!" تمہِ مُژراوِ یکدم أچھ، تہٕ پطرس وُچِھتھ ہیٚوتُن تھوٚد وتُھن۔41تٔمؠ کٔر تمِس اتھس تھف تہٕ کوٚرنس تھوٚد وتھنس منٛز مدد۔ پتہٕ أنِن ایمان وٲلؠ تہٕ خاص کر تِمہ موٚنٛڈٕ انٛدر ناد دِتھ تہٕ ہٲونکھ زِ سۅ چھےٚ بیٚیہِ زنٛدٕ۔42یکدم گییہِ یافا کٮ۪ن سارنےٕ لوٗکن منٛز امہِ معجزٕچ ٹُبے تہٕ امہِ سببہٕ اوٚن واریہو لوٗکو خداوند یسوعسؔ پیٚٹھ ایمان۔43پطرس رود واریہن دوٚہُن یافاہس منٛز شمعون ناوٕ کِس نفرس نِش یُس گُپن دالس چمبرٕ بناوان اوس۔
Bridge Connectivity Solutions Pvt. Ltd.