اعمال3
1اکہ دوٚہہ ٲسؠ پطرسؔ تہٕ یوحناؔ عبادت گاہ کہ صحنہٕ منٛزؠ پکان۔ دُپہرچہِ ترےٚ آسہٕ بجیمژٕ، یمہِ وزِ لوٗکھ تتہِ عبادت کران ٲسؠ۔2اتہِ اوس اکھ نفر یُس زیٚنہٕ گرِ پیٚٹھےَ پٔکِتھ اوس نہٕ ہیٚکان۔ سُہ اوس عبادت گاہَس انٛدر اژنہٕ کِس تتھ دروازس نِش بہِتھ یتھ خوبصورت دروازٕ ونان ٲسؠ۔ تس ٲسؠ لوٗکھ پرٛتھ دوٚہہ تتھ دروازس نِش نِوان یُتھ زن سُہ عبادت گاہس منٛز اژن والیٚن کینٛہہ پونٛسہٕ منٛگِتھ ہیٚکہِ ہے۔3ییٚلہِ پطرسؔ تہٕ یوحناؔ عبادت گاہس منٛز اژنہِ لٔگؠ تہٕ تٔمؠ لٲگؠ تِمن پونٛسہٕ منٛگٕنؠ۔4یِتھُےٕ پطرس تہٕ یوحنا تمِس سیٚدِ سیٚود وُچھنہِ لٔگؠ تہٕ پطرسؔ لُگ تمِس وننہِ، "اسہِ کُن وُچھ"5سُہ لوٚگ تِمن کُن یتھ امید پیٚٹھ وُچھنہِ زِ یِم دِنم پوٗنٛسہٕ۔6پتہٕ ووٚنُس پطرسنؔ، "مےٚ چھی نہٕ سۅن یا پونٛسہٕ ووٚنؠ اگر بہٕ چانہِ خٲطرٕ کینٛہہ کٔرِتھ ہیٚکہٕ بہٕ کرٕ تہِ ضروٗر۔ ناصرتکِس یسوع مسیحؔ سنٛدِ ناوٕ میولےٕ ژےٚ شِفا۔ وۅتھ پکھ!"7پتہٕ کٔر پطرسن أمِس نفرس تھوٚد وتھنس منٛز مدد کرنہٕ باپتھ دٔچھنِس اتھس تھپھ۔ أتھؠ دوران پھیٚور أمِس کھۅرن تہٕ کۅٹھیٚن زُوو۔8سُہ ووٚتھ یکدم تھوٚد تہٕ لوٚگ پکنہِ۔ پتہٕ ژاو سُہ پطرسؔ تہٕ یوحناؔ ہس سٟتؠ عبادت گاہ کِس صحنس منٛز، پکان پکان، وۅٹہٕ تُلان تہٕ خدایس کُن شُکر کران۔9عبادت گاہس منٛز موجود تمام لوٗکو وُچھ سُہ پکان تہٕ خدایس کُن شکُر پران۔10تِمو پرزٕ نوو سُہ ز یہ چُھ سُے نفر یُس عبادت گاہ کہ صحنہٕ کِس خوبصوٗرت دروازس پیٚٹھ لوٗکن اتھٕ داران اوس۔ مگر اتہِ موجود تمام لوٗکھ سپٕدؠ سیٚٹھاہ حٲران زِ أمِس سٟتؠ کیاہ سپُد۔11یہ نفر اوس پطرسؔس تہٕ یوحنا ہس لٲرِتھ گومُت، تہٕ سٲری لوٗکھ ٲسؠ تیتؠ حٲران زِ تِم ٲسؠ نہٕ کِہین سونچِتھ ہیٚکان۔ لہٰذا گےَ تِم دوران دوران عبادت گاہ کِس صحنس منٛز موجود سلیمانؔ ناوٕ کِس برانٛدس نزدیک تس نِش۔12ییٚلہ پطرسن لوٗکھ سمان وُچھ تہٕ تٔمؠ ووٚن تِمن، "میانیٚو اسرائیلی سٲتھیو! توٚہہِ پزِ نہٕ اتھ کتھِ پیٚٹھ حٲران سپدُن زِ أمِس نفرس سٟتؠ کیاہ سپُد۔ توٚہؠ چُھو اسہِ کُن تِتھ کٔنؠ وُچھان زنتہٕ اسی چُھ أمِس نفرس پکنُک طاقت عطا کوٚرمُت؟13لہٰذا ونو بہٕ توٚہہِ زِ اصلی کیاہ سپُد۔ سانؠ جدٕ اجداد یمن منٛز ابرہامؔ، اضحاقؔ، تہٕ یعقوبؔ ٲسؠ خدایہ سنٛز عبادت کران۔ تہٕ ووٚنؠ دیُت خداین یسوعسؔ سیٚٹھاہ اۅبروے، یمؠ وفادٲری سان تمؠ سنٛز خدمت کٔر۔ تُہنٛدیٚو زٹھیٚو نیٚو یسوعؔ گورنر پیلاطسسؔ نِش تاکہِ تمسنٛدؠ سِپاہ کرٕہن تس قتٕل۔ توٚہی چُھو تِم یمو پیلاطسؔ سنٛزِ موجودگی منٛز یسوعسؔ انکار کوٚر، یمہِ وزِ پیلاطسنؔ یسوعؔ یلہٕ تراونُک فٲصلہٕ کوٚر14یودوے زن یسوع اسرائیل ین پنُن مسیح تہٕ وتہٕ ہاوُک اوس، مگر توٚہہِ کوٚروون سُہ رد تہٕ توٚہہِ ونُو تس تمہِ بجایہ اکھ قٲتِل یلہٕ تراونہٕ باپتھ!15خداین زون زِ توٚہہِ مورٕوون یسوعؔ، یُس لوٗکن ابدی زندگی دِوان چُھ۔ مگر خداین کوٚر سُہ دوبارٕ زنٛدٕ۔ اسہِ وُچھ یسوعؔ دوبارٕ زنٛدٕ گژھنہٕ پتہٕ کٲتہِ پھرِ۔16یہ چُھ اوٕ موکھٕ تکیازِ اسہِ کوٚر اتھ پیٚٹھ بھروسہٕ زِ یسوع کیاہ کرِ، تٔمؠ کوٚر سُہ نفر یُس توٚہؠ زٲنؠ وون تہٕ وُچھان چھون دوبارٕ پننٮ۪ن زنٛگن پیٚٹھ کھڑا۔ آ، یہ سپُد اوٕ موکھٕ تکیازِ اسہِ کوٚر یسوعسؔ پیٚٹھ بھروسہٕ تہٕ تٔمؠ کوٚر سُہ نفر توٚہہِ سارنی ہاونہٕ باپتھ مکمل پٲٹھؠ ٹھیک۔17میانیٚو ہم وطنو، ووٚنؠ چُھس بہٕ زانان زِ توٚہہِ تہٕ تُہنٛدیٚو سردارو ژُھن یسوع مٲرِتھ تکیازِ توٚہہ ٲسو نہٕ پےِ زٕ سُہ چُھ مسیح۔18ووٚنؠ کٔر خداین سۅ کتھ مکمل یۅسہ تٔمؠ واریاہ برُونٛہہ نبین پیٚٹھ ظٲہر کٔرمٕژ ٲس۔ زِ لوٗکھ واتناون یسوعؔس موتہٕ کِس انجامس۔ خداین ووٚن سارنی نبین زِ مسیحؔ چُھ خدایہ سنٛدِ طرفہٕ سوزنہٕ آمُت، یُس مصیبت تُلنہٕ پتہٕ مرِ۔19لہٰذا پھیریٚو گناہ گار زنٛدگِیو نِشہٕ باز تہٕ خدایس منٛگیٚو زِ سُہ کرِ توٚہہِ تِمہ کامہِ کرنس منٛز مدد یمہٕ تس پسنٛد چھےٚ تاکہ سُہ کرِ تُہنٛدؠ گناہ مکمل پٲٹھؠ توٚہہِ معاف تہٕ بیٚیہِ دِیو مذید تقوِیت۔20اگر توٚہؠ تہِ کٔریٚو، تیٚلہ ییہِ سُہ وقت ضرور ییٚلہِ توٚہؠ زٲنیٚو زِ خداوند خدا چُھ توٚہہِ مدد کران۔ تہٕ کُنہِ دوٚہہ سوزِ سُہ مسیحسؔ ضرور دوبارٕ زمینس پیٚٹھ۔ یُس تٔمؠ توٚہہ دیُتمُت چُھ۔ سُہ شخص چُھ یسوع۔ 21یسوع روزِ پٔزؠ پٲٹھؠ تۅتام آسمانس پیٚٹھ یۅتام خدا تہِ سورےٕ نوِ بناوِ یہ کینٛژھا تٔمؠ بنوومُت چُھ۔ خداین چُھ واریاہ برُونٛہہ یہ کرنُک وعدٕ کوٚرمُت، تہٕ تٔمؠ چھِ لوٗکن یہ وننہٕ خٲطرٕ پاک نبی ژٲرمٕتؠ۔22مثلن، نبی موسیٰؔ ہَن چُھ مسیحؔ ہس متعلق یہ ونمُت: " تُہنٛد خدا، خداوند سوزِ توٚہے منٛزٕ مےٚ ہیٚوٗ اکھ نبی۔ توٚہہِ پزِ تہِ سورےٕ بوزُن یہ سُہ توٚہہِ ونہِ۔23یِم نہٕ تمِس نبی سنٛز عبادت کرَن تہٕ کتھ مانن تِم روزن نہٕ خدا سنٛدین بنٛدن منٛزٕ تہٕ خدا کرِ تِمن نابود"24پطرسنؔ ووٚن بیٚیہِ، "ساروےٕ رسولو ووٚن اتھ متعلق زِ یمن دوٚہُن کیاہ سپدِ۔ تِمن نبین منٛز ٲسؠ سموئیلؔ تہٕ بیٚیہِ تہِ کینٛہہ شٲمل یمو پتہٕ ووٚن یمن واقٕہَن متعلق یمہٕ واقہٕ سپدنہٕ برونٛہےٕ۔25یہِ نبیو واریاہ کال برونہٛہ ووٚن چھُ توٚہہِ پیٚٹھ عٲید سپدان۔ ییٚلہ خداین سانٮ۪ن جدٕ اجدادن برکت دِنُک مکمل وعدٕ کوٚر تہٕ تٔمؠ کوٚر توٚہہِ تہِ پٔزؠ پٲٹھؠ برکت دِنُک وعدٕ۔ تٔمؠ ووٚن ابرہامسؔ مسیحؔ ہس متعلق زِ، "بہٕ کرٕ زمینس پیٚٹھ تمام لوٗکن چانیٚن اولادن ہنٛدِ ذرؠ یہ برکت عطا" 26ٲخرس ووٚتھ پطرسؔ، "لہٰذا ییٚلہ خدا پننِس خٲدم یسوعسؔ زمینس پیٚٹھ بحثیتِ مسیحؔ سوزِ سُہ سوزِ گۅڈٕ تمِس بنی اسرائیل ین نِش برکت دِنہٕ باپتھ، تاکہ تِم رکاون توٚہہِ بُرٕ کامیٚو نِشہٕ۔
Bridge Connectivity Solutions Pvt. Ltd.