3 یوحناؔ1
1بہٕ چُھس یوحناؔ، توٚہؠ زٲنِو مےٚ بزرگ ناوٕ تہِ۔ بہٕ چُھسے یہِ نامہٕ لیٚکھان ژےٚ میانہِ ٹاٹھِ گِیُسہؔ یمِس بہٕ پٔزی لول ویندان چُھس۔2ٹاٹھِ یارٕ، بہٕ منٛگہٕ خدایس زِ سُہ کٔرِنؠ چٲنؠ سٲری معاملہٕ درُست۔ تہٕ ژےٚ روزؠ نےَ جسمٲنی لحاظٕ تہِ اوٚر زُو تہٕ دوٚر کوٚٹھ یتھٕ پٲٹھؠ ژٕ اوٚر تہٕ دوٚر چھُکھ خدایہِ سنٛدِس رشتس منٛز۔3مےٚ چھےٚ خبر زِ ژٕ چھُکھ خدایہِ سٕنٛدِس رشتس منٛز اوٚر تِمو سٲتھی ایماندارو ہنٛدؠ کِنؠ یِم یور آیہِ تہٕ بووٕہم چانہِ زندگی ہُنٛد پوٚز طریقہٕ۔ تِم چھِ ونان زِ ژٕ چھُکھ مسیحؔ سٕنٛدِس پٔزِس پٲغامس پٮ۪ٹھ دٔرِتھ زُووان۔ أمؠ کوٚرُس بہٕ واریاہ خوش۔4یہِ کتھ چھےٚ مےٚ سٮ۪ٹھا مسرت بخشان زِ ییٚلہِ مےٚ کانٛہہ ونہِ زِ تِم لوٗکھ یِمن مےٚ یسوعس پتہٕ پتہٕ پکنس منٛز اتھہٕ روٚٹ کوٚر چھِ زُوان تٔمہِ آیہِ یہِ خدایہِ سنٛدِس پزرس مطٲبق چُھ۔ 5ٹاٹھِ یارٕ، ژٕ چھُکھ یسوعسؔ وفادٲری سان خدمت کران ییٚلہِ تہِ ژٕ پننٮ۪ن سٲتھی ایماندارن اتھہٕ روٚٹ کران چھُکھ، یوٚدوے ژٕ تِم زانہکھ تیٚنہٕ۔ 6یِمو منٛزٕ بوو کینٛژو یتھ مجلسہِ منٛز زِ ژٕ کِتھہٕ پٲٹھؠ چھُکھ تِمن سٟتؠ پنُن لول درشاوان۔ یہِ گوو واریاہ رُت زِ ژٕ چھُکھ یِتھٮ۪ن لوٗکن ہنٛدِ سفرٕ باپتھ تہنٛزٕ ضرورژٕ کھُلہٕ دِلہٕ پوٗرٕ کران، تاکہِ یہِ کرِ خدایس خوش۔7یِم چھِ سفر کران یسوعس تابعدٲری کرنہٕ مۅکھہٕ تہٕ تِمو یِمو یسوعس ایمان اوٚن نہٕ کوٚر نہٕ یِمن رژھِ تہِ مدد۔ 8اوے پزِ اسہِ یِمن یسوعس پٮ۪ٹھ ایمان چُھ تِتھٮ۪ن لوٗکن ہنٛزٕ ضرورژ پوٗرٕ کرنہِ۔ تیلی باسہِ زِ زنتہٕ أسؠ تہِ خدایہِ سُنٛد پوٚز پٲغام لوٗکن تام واتناونس منٛز تِمن سٟتؠ سٟتؠ کٲم کران چھِ۔9مےٚ لیٚوکھ یہِ نامہٕ تہنٛزِ ایماندارن ہنٛزِ جمٲژ زِ باقین ایمان والیٚن اتھہٕ روٚٹ کرنہٕ خٲطرٕ وننہٕ باپتھ۔ وۅنؠ گو دِیُترِفِیؔس چُھنہٕ میون کانٛہہ دوٚپ تہِ قبول کران۔ تکیازِ سُہ چُھ تہنٛزِ جمٲژ پننِس اتھس تل رٹُن یژھان۔10اوے تہِ ییٚلہِ بہٕ اور واتہٕ بہٕ ونہٕ کھُلہٕ پٲٹھؠ سارنےٕ زِ سُہ کیا چُھ کران۔ سُہ چُھ لوٗکن اپُز ونان زِ أسؠ چھِ کۅ کار کران۔ سُہ چُھ یہِ اسہِ زرٮ۪ر واتناونہٕ باپتھ کران پننہِ وننہٕ سٟتؠ۔ یہِ کرنہٕ علاوٕ چُھ سُہ انکار کران ایماندار سٲتھین خوش آوے کرنہٕ نِش یِم خدایہِ سنٛز کٲم کرنہٕ باپتھ سفر کران چھِ۔ اکھتُے چُھ سُہ باقین تہِ ٹھونٛٹھ انان یِتھٮ۪ن لوٗکن خوش آوے کرنس منٛز، تہٕ تِمن مجلسہِ منٛز نٮ۪بر کڈان۔11ٹاٹھِ یارٕ۔ کانٛہہ یِژھ غلط مثال مہٕ پانِراو۔ بلکہِ روزیٚو رٕژٕ مِثالہ پالان۔ ژٮ۪تس تھٲیِو زِ رٕژٕ کامہِ کرن وٲلؠ لوٗکھ چھِ پزی خدایس سٟتؠ۔ مگر کانٛہہ تہِ یُس کۅ کار کران چُھ روزان، تٔمؠ چُھنہٕ خدا زونمُتےٕ۔ 12تمام ایماندار یِم دِیمِیتؔرِیُسس زانن، چھِ ونان زِ سُہ چُھ رُت آسان۔ یمہِ آیہِ سُہ زُوان چُھ۔ خدایہِ سٕنٛدِ پزِ پٲغامہٕ مطٲبق چُھ توٚہہِ درشاوُن زِ سُہ کوتاہ رُت چُھ۔ أسؠ تہِ چھِ تصدیق کران تسنٛدِس رُت آسنس تہٕ توٚہہِ چُھ پتاہ زِ أسؠ چھِ ونان پوٚز۔ 13ییٚلہِ مےٚ یہ نامہٕ لیٚکھُن شروع کوٚر، مےٚ اوس ونُن لایق واریاہ یہِ بہٕ توٚہہِ لیٚکھُن یژھان اوسُس مگر بہٕ چُھس نہٕ تہِ یتھ نامس منٛز لیٚکھُن یژھان۔ 14اتھ برعکس چُھس بہٕ امید کران زِ بہٕ یِمہٕ پانہٕ تہٕ سمکھٕ توٚہہِ ؤلؠ۔ پتہٕ کرو أسؠ پانہٕ وٲنؠ سیٚدِ سیٚود کتھ۔ 15بہٕ چُھس خدایس منٛگان زِ سُہ تھٲوِن تُہنٛد روح امنہٕ سان۔ ییٚتہِ چُھو سٲری یار توٚہہِ رُت کانٛچھان۔ مہربٲنی کٔرِتھ ؤنؠ زیٚو اتہِ سارنےٕ یارن سٲنؠ سلام اکہِ اکہِ تہٕ ناوٕ ناوٕ۔
Bridge Connectivity Solutions Pvt. Ltd.